Trimedat Forte

Tarkib

Bir tabletka quyidagilarni o‘z ichiga oladi:

ta’sir etuvchi modda: trimebutin maleat - 300 mg;

yordamchi moddalar: mikrokristall sellyuloza, povidon (K 25), gipromelloza, magniy stearat;

qobiq tarkibi: Opadray II85F18422: qisman gidrolizlangan polivinil spirti, makrogol-3350, titan dioksidi E 171, talk.

Tavsif

Bir tomonida ikkita tomchisimon element ko‘rinishidagi siqib chiqarilgan belgisi bo‘lgan oq rangli plyonkali qobiq bilan qoplangan dumaloq, ikki tomonlama qavariq tabletkalar. Ko‘ndalang kesimda yadrosi oq yoki deyarli oq rangda bo‘ladi.

Chiqarish shakli

Plyonkali qobiq bilan qoplangan, ajralishi uzaytirilgan tabletkalar, 300 mg.

Farmakoterapevtik guruh

Spazmolitik vosita. Trimebutin. ATX kodi: A03AA05.

Farmakologik xususiyatlari

Farmakodinamika

Trimebutin ichakning ensefalinergik tizimiga ta’sir qilib, uning peristaltikasini tartibga solib turadi. Periferik δ-, μ- va κ-retseptorlarga, shu jumladan, oshqozon-ichak trakti (OIT) bo‘ylab bevosita silliq mushaklarda joylashgan retseptorlarga ta’sir ko‘rsatib, markaziy asab tizimiga ta’sir qilmasdan motorikani boshqaradi. Shunday qilib, trimbutin motorikaning buzilishi bilan bog‘liq bo‘lgan oshqozon-ichak traktining turli kasalliklarida ichak mushaklarining normal fiziologik faolligini tiklaydi.

Trimebutin visseral sezuvchanlikni me’yorlashtirib, abdominal og‘riq sindromida analgetik ta’sir ko‘rsatadi.

Farmakokinetika

Ichga qabul qilingandan so‘ng trimebutin MIY tez so‘riladi. Plazma oqsillari bilan bog‘lanish darajasi 5% atrofida. Trimebutin yo‘ldosh to‘sig‘idan kam darajada o‘tadi. Trimebutin jigarda biotransformatsiyalanadi va asosan metabolitlar ko‘rinishida siydik bilan chiqariladi.

Tadqiqotda sog‘lom ko‘ngillilarda Trimedat® forte preparatini bir marta qabul qilishda trimebutinning faol metaboliti - 2-metilamino-2-fenilbutil-3,4,5-trimetoksibenzoat (desmetiltrimebutin) farmakokinetik parametrlarining qiymatlari: maksimal konsentratsiya (Smax) - 441,45±252,99 ng/ml; unga erishish vaqti (Tmax) - 2,20±1,01 soat; organizmda o‘rtacha ushlab turish vaqti (MRT) - 17,12±3,14 soat; yarim chiqarilish davri (T1/2) - 12,52±4,54 soat; taqsimlanish hajmi (Vd) - 1279,72±1108,53 l, umumiy klirens (TS) - 66,51±34,34 l/soat.

Ko‘rsatmalar

Oshqozon-ichak trakti va o‘t yo‘llari a’zolarining funksional kasalliklari (gastroezofageal reflyuks kasalligining eroziv bo‘lmagan shakli; o‘t-tosh kasalligi; o‘t yo‘llari disfunksiyasi; ta’sirlangan ichak sindromi; Oddi sfinkteri disfunksiyasi, xoletsistektomiyadan keyingi sindrom) bilan bog‘liq qorin sohasidagi og‘riq, spazm va noqulaylik, shishish (meteorizm) hissi, ich ketish chastotasining o‘zgarishi bilan ichakning motor buzilishlari (diareya yoki qabziyat), dispepsiya, jig‘ildon qaynashi, kekirish, ko‘ngil aynishi, qusishni simptomatik davolash.

Operatsiyadan keyingi paralitik ichak tutilishi.

Qarshi ko‘rsatmalar

Preparat tarkibiga kiruvchi komponentlarga yuqori sezuvchanlik.

Homiladorlik.

12 yoshgacha bo‘lgan bolalar yoshi (ushbu dori shakli uchun).

Ehtiyotkorlik bilan

Trimedat® forte preparatini emizish davrida ehtiyotkorlik bilan qo‘llash lozim, chunki uning ona sutiga singish qobiliyati haqida ma’lumotlar yo‘q.

Qo‘llash usuli va dozalari

Ichkariga. Kattalar va 12 yoshdan oshgan bolalarga 1 tabletkadan kuniga 2 mahal (12 soat tanaffus bilan). Ovqat hazm qilish trakti va o‘t yo‘llarining funksional kasalliklari bilan bog‘liq qorin og‘rig‘ini davolash kursi - 28 kun.

Nojo‘ya ta’sirlari

Ovqat hazm qilish tizimi tomonidan: og‘iz qurishi, yoqimsiz ta’m sezish, diareya, dispepsiya, ko‘ngil aynishi, qabziyat.

Asab tizimi tomonidan: uyquchanlik, charchoq, bosh aylanishi, bosh og‘rig‘i, bezovtalik.

Allergik reaksiyalar: teri toshmasi.

Boshqalar: hayz siklining buzilishi, ko‘krak bezlarining og‘riqli kattalashishi, siydik tutilishi.

Dozani oshirib yuborish

Trimedad® forte preparatining dozasini oshirib yuborish holatlari hozirgacha qayd etilmagan.

Davolash: preparatni bekor qilish, oshqozonni yuvish, faollashtirilgan ko‘mir buyurish, simptomatik terapiya. Maxsus antidotlar yo‘q.

O‘zaro aloqa

Trimedad® forte preparatining dorilar bilan o‘zaro ta’siri tavsiflanmagan.

Maxsus ko‘rsatmalar

Remissiya davrida o‘tkazilgan davolash kursidan so‘ng ichak ta’sirlanish sindromi qaytalanishining oldini olish uchun 12 hafta davomida kuniga 300 mg dozada qabul qilishni davom ettirish tavsiya etiladi.

Homiladorlik va laktatsiya

Eksperimental tadqiqotlarda preparatning teratogenligi va embriotoksikligi haqida ma’lumotlar aniqlanmadi. Shunga qaramay, zarur klinik ma’lumotlar yo‘qligi sababli, Trimedad® forte preparatini homiladorlik davrida qo‘llash mumkin emas.

Trimedat® forte preparatini laktatsiya davrida qo‘llash xavfsizligini tasdiqlovchi ishonchli klinik ma’lumotlar yo‘qligi sababli, uni tayinlash tavsiya etilmaydi. Laktatsiya davrida preparatni qo‘llash zarur bo‘lsa, emizishni to‘xtatish lozim.

Transport vositalari va mexanizmlarini boshqarish qobiliyatiga ta’siri

Preparat sedativ ta’sir ko‘rsatmaydi, psixomotor reaksiya tezligiga ta’sir qilmaydi va turli kasb egalarida, shu jumladan, yuqori diqqat va harakat koordinatsiyasini talab qiladigan shaxslarda qo‘llanilishi mumkin. Biroq, ko‘rsatilgan qobiliyatlarga ta’sir qilishi mumkin bo‘lgan nojo‘ya ta’sirlarni (bosh aylanishi va boshqalar) hisobga olgan holda, avtotransportni boshqarishda va boshqa potensial xavfli faoliyat turlari bilan shug‘ullanishda ehtiyot bo‘lish lozim.

Qadoq

10 tadan tabletka konturli yacheykali o‘ramga yoki polivinilxlorid plyonka va alyuminiy folga bilan perforatsiyalangan konturli yacheykali o‘ramga joylashtiriladi.

1, 2 yoki 6 ta kontur o‘ramlari qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

Asl qadoqda, 25 °C dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

2 yil.

Qadoqda ko‘rsatilgan yaroqlilik muddati tugagandan so‘ng qo‘llanilmaydi.

Dorixonalardan berish shartlari

Retseptsiz.

Ro‘yxatdan o‘tish guvohnomasi egasi

VALENTA FARM AJ Rossiya.

Ishlab chiqaruvchi

VALENTA FARM AJ Rossiya.