Vasklor

Tarkib

1 g gel tarkibida quyidagilar mavjud:

faol modda: progesteron - 80 mg;

yordamchi moddalar: glitserol, yengil suyuq parafin, 974 R karbomer, palma moyi (gidrogenlangan glitserid), sorbin kislotasi, polikarbofil, natriy gidroksid, tozalangan suv.

Tavsif

Oq bir jinsli gel.

Farmakoterapevtik guruh

Progestagen. ATX kodi: G03DA04.

Dori shakli

Vaginal gel.

Farmakologik xususiyatlari

Progesteron sariq tana gormonidir. Bachadon shilliq qavatining follikulani stimullovchi gormon (FSG) chaqiradigan proliferatsiya fazasidan sekretor fazaga o‘tishiga sabab bo‘ladi. Bachadon va bachadon naylari mushaklarining qo‘zg‘aluvchanligi va qisqaruvchanligini kamaytiradi.

Progesteron gipotalamik FSG ajralib chiqish omillari va lyuteinlovchi gormon sekretsiyasini ingibirlaydi, gipofizda gonadotrop gormonlar hosil bo‘lishini susaytiradi va ovulyatsiyani tormozlaydi.

Farmakokinetika

Vaginal gel tarkibida 45 yoki 90 mg progesteron bo‘lgan dozalarda qo‘llanilganda, preparatning qondagi maksimal konsentratsiyasiga erishish vaqti (7 ng/ml - 45 mg va 11 ng/ml - 90 mg oralig‘ida) taxminan 6 soatni tashkil etadi.

Preparatning qondagi doimiy konsentratsiyasi miqdori 45 mg dozada 7 ng/ml ni tashkil etadi. Yarim chiqarilish davri - 34-48 soat.

Metabolizm.

Progesteron asosan jigarda metabolizmga uchraydi. Qin orqali qo‘llash jigar orqali "birinchi o‘tish" ta’sirini sezilarli darajada kamaytiradi. Asosiy metaboliti 3-a, 5b-pregnandiol siydik bilan chiqariladi.

Qo‘llanilishi

reproduksiyaning yordamchi usullarini qo‘llash jarayonida lyutein fazasini saqlab turish;

ikkilamchi amenoreya, disfunksional bachadon;

progesteron yetishmovchiligi tufayli kelib chiqadigan qon ketishlar;

o‘rinbosar gormonoterapiya.

Qo‘llash usuli va dozalari

Reproduksiyaning yordamchi usullarini qo‘llash jarayonida lyutein fazasini saqlab turish.

Embrion ko‘chirilgan kundan boshlab gel 1,125 g (90 mg progesteron - 1 applikator) miqdorida homiladorlikning klinik tasdiqlangan vaqtidan boshlab 30 kun davomida har kuni intravaginal yuboriladi.

Ikkilamchi amenoreya, progesteron yetishmovchiligi tufayli yuzaga keladigan disfunksional bachadon qon ketishi.

1,125 g (90 mg progesteron) gel siklning 15-kunidan 25-kunigacha kunora intravaginal yuboriladi. Zarurat bo‘lganda doza kamaytirilishi yoki ko‘paytirilishi mumkin.

O‘rnini bosuvchi gormonoterapiya.

90-180 mg progesteron (1-2 applikator) sutkada 1-2 marta.

Nojo‘ya ta’sirlari

Bosh og‘rig‘i, uyquchanlik, qorin og‘rig‘i, sut bezlarining og‘riqliligi.

Kamdan kam hollarda - hayzlararo qon ketishlar, applikatsiya joyida qin shilliq qavatining ta’sirlanishi.

Qarshi ko‘rsatmalar

progesteronga yoki preparatning boshqa tarkibiy qismlariga yuqori sezuvchanlik;

noaniq etiologiyali qindan qon ketishi;

porfiriya;

jinsiy a’zolar yoki sut bezlarining xavfli o‘smalari;

o‘tkir trombozlar yoki tromboflebitlar, tromboembolik kasalliklar, miya qon aylanishining o‘tkir buzilishi (shu jumladan anamnezda);

homila tushishi;

laktatsiya.

Dorilarning o‘zaro ta’siri

Vasklor preparatini boshqa intravaginal vositalar bilan birga qo‘llash tavsiya etilmaydi.

Maxsus ko‘rsatmalar

Vasklor preparati tarkibiga mahalliy teri reaksiyasini (kontakt dermatit) keltirib chiqarishi mumkin bo‘lgan sorbin kislotasi kiradi.

Uzoq muddatli davolash jarayonida endometriy giperplaziyasi rivojlanish ehtimolini istisno qilish uchun muntazam ginekologik ko‘riklar zarur.

Vasklor qo‘llanilganda "xavfli" homila tushishi ehtimolining oldini olish uchun xorionik gonadotropin darajasini aniqlash yoki ultratovush tekshiruvi o‘tkazish lozim.

Jigar faoliyati buzilganda ehtiyotkorlik bilan qo‘llaniladi.

To‘satdan qon ketish holatida, shuningdek, muntazam bo‘lmagan vaginal qon ketish holatlarida, nofunksional sababni istisno qilish kerak. Etiologiyasi noaniq bo‘lgan qindan qon ketish holatida tegishli tekshiruv o‘tkazilishi lozim.

Progestagenlar organizmda suyuqlikni ushlab qolish xususiyatiga ega bo‘lganligi sababli, epilepsiya, migren, astma, yurak-qon tomir yetishmovchiligi, buyrak faoliyati buzilishi kabi kasalliklari bo‘lgan bemorlar sinchkovlik bilan nazorat qilinishi kerak.

Anamnezida depressiya bo‘lgan bemorlarni diqqat bilan kuzatib borish va depressiya kuchaysa, davolashni to‘xtatish kerak.

Estrogenprogestagen terapiyasini olayotgan bemorlarning oz qismida glyukozaga tolerantlikning pasayishi kuzatilishi mumkin. Buzilish mexanizmi noma’lum. Shu sababli, qandli diabet bilan og‘rigan bemorlar progesteron bilan davolash jarayonida sinchkovlik bilan nazorat qilinishi kerak.

Homiladorlik va emizish davrida qo‘llash

Vasklorni homiladorlik davrida qo‘llash mumkin emas, homiladorlikning erta davrida yordamchi reproduktiv usullarni o‘tkazish jarayonida qo‘llash bundan mustasno.

Vasklorni emizish davrida qo‘llash mumkin emas.

Preparatning avtomobil va boshqa mexanizmlarni boshqarish qobiliyatiga ta’siri

Vasklor qo‘llanganda charchoq hissi paydo bo‘lishi mumkinligi sababli, avtomashina va boshqa mexanizmlarni boshqarishda ehtiyotkorlik talab etiladi. Alkogol iste’mol qilish bu ta’sirni kuchaytirishi mumkin.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Dozani oshirib yuborish

Hozirgi vaqtda Vasklor preparatining dozasini oshirib yuborish holatlari haqida xabar berilmagan.

Chiqarish shakli

Alyuminiy naychada 22,5 g vaginal gel.

Karton qutida 1 ta tuba, qo‘llash bo‘yicha yo‘riqnoma va 15 ta applikator bilan.

Saqlash shartlari

25 °C dan yuqori bo‘lmagan haroratda.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

HELP S. A.

PEDINI IOANNINON, IOANNINA, 45501, Gretsiya

Tel: ++30210-28-15-353, ++30210-28-43-479, Faks: ++30210-28-11-850

E -mail: [email protected]

Ishlab chiqarish litsenziyasi egasi

VERISFIELD (UK) LTD,

41 Chalton Street, London, NW1 1JD, BUYUK BRITANIYA

www.verisfield.gr/en/