Sertozin in'ektsiyasi 1000 mg / 4 ml №5 (ampulalar)

Tarkib

Preparatning 1 ampulasi quyidagilarni o‘z ichiga oladi:

faol modda: sitikolin (sitikolin natriy shaklida) - 500 mg yoki 1000 mg;

yordamchi moddalar: natriy gidroksid, xlorid kislota, inyeksiya uchun suv.

Tavsif

Tiniq, rangsiz yoki qo‘ng‘ir-sariq rangli eritma.

Dori shakli

Inyeksiya uchun eritma.

Farmakoterapevtik guruh

Nootrop vosita. ATX kodi: N06BX06.

Farmakologik xususiyatlari

Sitikolin hujayra membranasining asosiy ultrastrukturali tarkibiy qismlarining (asosan fosfolipidlarning) o‘tmishdoshi bo‘lib, keng ta’sir doirasiga ega - shikastlangan hujayra membranalarini tiklashga yordam beradi, fosfolipazalar ta’sirini ingibirlaydi, ortiqcha erkin radikallar hosil bo‘lishiga to‘sqinlik qiladi, shuningdek, apoptoz mexanizmlariga ta’sir qilib, hujayralar o‘limining oldini oladi. Insultning o‘tkir davrida shikastlangan to‘qima hajmini kamaytiradi, xolinergik o‘tkazuvchanlikni yaxshilaydi. Bosh miya jarohatida posttravmatik komaning davomiyligini va nevrologik simptomlarning yaqqolligini kamaytiradi.

Bosh miyaning surunkali gipoksiyasi holatida sitikolin xotiraning pasayishi, tashabbussizlik, kundalik harakatlarni bajarishda va o‘z-o‘ziga xizmat ko‘rsatishda yuzaga keladigan qiyinchiliklar kabi kognitiv buzilishlarni davolashda samarali hisoblanadi.

Preparat bilan uzoq vaqt davolanish mumkin, chunki sitikolin nafas olishga, pulsga va qon bosimiga ta’sir qilmaydi.

Farmakokinetika

So‘rish

Sitikolin vena ichiga va mushak ichiga yuborilganda yaxshi so‘riladi.

Metabolizm

Sitikolin vena va mushak ichiga yuborilganda jigarda xolin va sitidin hosil qilib metabolizmga uchraydi. Yuborilgandan so‘ng qon plazmasida xolin konsentratsiyasi sezilarli darajada oshadi.

Taqsimlash

Sitikolin bosh miya tuzilmalarida sezilarli darajada taqsimlanadi, bunda xolin fraksiyalari strukturaviy fosfolipidlarga va sitidin fraksiyalari sitidin nukleotidlari va nuklein kislotalariga tez kirishadi. Sitikolin bosh miyaga kirib, hujayra, sitoplazmatik va mitoxondrial membranalarga faol joylashib, strukturaviy fosfolipidlar fraksiyasining bir qismini hosil qiladi.

Chiqarish

Yuborilgan sitikolin dozasining atigi 15 foizi odam organizmidan chiqariladi: 3 foizdan kamrog‘i buyraklar orqali va taxminan 12 foizi nafas bilan CO2 chiqariladi. Sitikolinning siydik bilan ekskretsiyasida 2 ta fazani ajratish mumkin: birinchi faza taxminan 36 soat davom etadi, bunda ekskretsiya tezligi tez pasayadi va ikkinchi faza, bunda ekskretsiya tezligi ancha sekin pasayadi. Xuddi shu narsa nafas bilan chiqariladigan CO2 da ham kuzatiladi - chiqarish tezligi taxminan 15 soatdan keyin tez pasayadi, keyin esa ancha sekin pasayadi.

Qo‘llanilishi

ishemik insultning o‘tkir davri;

ishemik va gemorragik insultlarning tiklanish davri;

bosh miya jarohati, o‘tkir va tiklanish davri;

bosh miyaning degenerativ va qon tomir kasalliklarida kognitiv buzilishlar.

Qo‘llash usuli va dozalari

Mushak orasiga va vena ichiga yuborish uchun eritma.

Vena ichiga asta-sekin vena ichiga inyeksiya (5 daqiqa davomida) yoki tomchilab vena ichiga yuborish (daqiqasiga 40-60 tomchi) ko‘rinishida buyuriladi. Vena ichiga yuborish yo‘li mushak ichiga yuborishdan ko‘ra afzalroqdir. Mushak orasiga yuborilganda, preparatni bir joyga qayta yuborishdan saqlanish kerak.

Ishemik insult va bosh miya jarohatining o‘tkir davri: tavsiya etilgan doza tashxis qo‘yilganidan keyingi birinchi kundan boshlab har 12 soatda 1000 mg ni tashkil etadi; davolash davomiyligi - kamida 6 hafta. Davolash boshlanganidan 3-7 kun o‘tgach, mushak orasiga yuborish (kuniga 1-2 inyeksiya) yoki ichishga o‘tish mumkin (agar yutish funksiyasi buzilmagan bo‘lsa).

Ishemik va gemorragik insultlarning tiklanish davri, bosh miya jarohatida tiklanish davri, bosh miyaning degenerativ va qon tomir kasalliklarida kognitiv buzilishlar: tavsiya etilgan doza sutkasiga 500-2000 mg ni tashkil etadi. Davolash dozasi va davomiyligi kasallik belgilarining og‘irligiga bog‘liq.

Es-hushning uzoq muddatli buzilishlarida kasallikning birinchi bosqichlaridan boshlab preparatni uzluksiz qo‘llash mumkin.

Keksa yoshdagi bemorlarga v/i yoki m/i yuborilganda Sertozin dori vositasining dozasini tuzatish talab etilmaydi.

Ampuladagi v/i va m/i yuborish uchun eritma bir marta qo‘llash uchun mo‘ljallangan. Ampula ochilgandan so‘ng eritmani darhol ishlatish kerak. Preparat natriy xlorid va dekstrozaning barcha turdagi v/i izotonik eritmalari bilan mos keladi.

Nojo‘ya ta’sirlari

Sertozin, odatda, yaxshi o‘zlashtiriladi. Salbiy nojo‘ya ta’sirlar chastotasi juda kam uchraydi (< 1/10000) (alohida holatlarni hisobga olgan holda).

Markaziy va periferik asab tizimi tomonidan: uyqusizlik, bosh og‘rig‘i, bosh aylanishi, qo‘zg‘alish, tremor, falajlangan oyoq-qo‘llarda uvishish.

Ovqat hazm qilish tizimi tomonidan: ko‘ngil aynishi, ishtaha pasayishi, jigar fermentlari faolligining o‘zgarishi.

Allergik reaksiyalar: toshma, teri qichishi, anafilaktik shok.

Boshqalar: isitma. Ba’zi hollarda sitikolin parasimpatik tizimni rag‘batlantirishi, shuningdek, qon bosimini qisqa muddatga o‘zgartirishi mumkin.

Agar yo‘riqnomada ko‘rsatilgan har qanday nojo‘ya ta’sirlar kuchaysa yoki yo‘riqnomada ko‘rsatilmagan boshqa har qanday nojo‘ya ta’sirlar kuzatilsa, bu haqda shifokorga xabar berish lozim.

Qarshi ko‘rsatmalar

preparat komponentlariga yuqori sezuvchanlik;

kuchli vagotoniya (vegetativ asab tizimining parasimpatik qismi tonusining ustunligi).

Dorilarning o‘zaro ta’siri

Sitikolin levodopaning ta’sirini kuchaytiradi.

Preparatni tarkibida meklofenoksat bo‘lgan dori vositalari bilan bir vaqtda buyurish mumkin emas.

Sertozinni bir vaqtning o‘zida qon to‘xtatuvchi vositalar, kalla ichi antigipertenziv vositalari va oddiy perfuzion suyuqliklar bilan qo‘llash mumkin.

Maxsus ko‘rsatmalar

Bosh miya jarohatlarida kalla ichi bosimini pasaytirish uchun mannitol va kortikosteroid dori vositalari buyurilishi shart.

Kalla ichiga qon quyilganda sitikolin dozasini bir marta 500 mg dan oshirish mumkin emas, bunda dozani bo‘laklash mumkin (100-200 mg sutkada 2-3 marta).

Homiladorlik va laktatsiyada qo‘llash

Preparatni homiladorlikda qo‘llash faqat ona uchun foyda homila uchun potensial xavfdan yuqori bo‘lgan taqdirdagina mumkin.

Laktatsiya davrida preparatni qo‘llash zarur bo‘lganda, ko‘krak suti bilan emizishni to‘xtatish masalasini hal qilish lozim.

Pediatriyada qo‘llanishi

Preparatni 18 yoshgacha bo‘lgan bolalar va o‘smirlarda qo‘llash samaradorligi va xavfsizligi aniqlanmagan.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Avtotransport va mexanizmlarni boshqarish qobiliyatiga ta’siri

Davolanish davrida bemorlar avtomobilni boshqarishda va psixomotor reaksiyalarning yuqori tezligini talab qiladigan ishlarni bajarishda ehtiyot bo‘lishlari kerak.

Dozani oshirib yuborish

Preparatning past toksikligi tufayli, hatto terapevtik dozalar oshirilganda ham, dozani oshirib yuborish holatlari qayd etilmagan.

Chiqarish shakli

Inyeksiya uchun eritma 4 ml dan rangsiz shisha ampulalarda. 5 ta ampula kontur katakli o‘ramda. Karton qutida qo‘llash bo‘yicha yo‘riqnoma bilan birga 1 ta konturli yacheykali qadoq.

Saqlash shartlari

25 °C dan yuqori bo‘lmagan haroratda saqlanadi.

Yaroqlilik muddati

5 yil.

Dorixonalardan berish shartlari

Retsept bilan beriladi.

Ishlab chiqaruvchi

Ro‘yxatdan o‘tish sertifikatining egasi kompaniya hisoblanadi

"Dr Sertus Ilach Sanayi ve Tijaret Limited Shirketi," Turkiya

("Dr Sertus İlach Sanayi ve Ticaret Limited Shirketi," Turkey).

Ishlab chiqarilgan

"FarmaVijn Sanayi ve Tijaret A.Sh.," Turkiya

(Davutposho Jaddesi No145, To‘pqopi/Istanbul).

"PharmaVision Sanayi ve Ticaret A.Sh.," Turkiya

(Davutpasha Caddesi No.145, Topkapı/İstanbul).