Sukrofer tomir ichiga yuborish uchun eritma 20 mg/ml, 5 ml №5 (flakon)

Tarkib

1 ml preparat tarkibida quyidagilar mavjud:

faol modda: saxaroza kompleksining temir (III) gidroksidi 333,0 mg (elementar temirga ekvivalent) 20,0 mg;

yordamchi moddalar: natriy gidroksid, inyeksiya uchun suv.

Tavsif

To‘q jigarrang, biroz yopishqoq, ko‘zga ko‘rinadigan qattiq zarrachalardan xoli suyuqlik.

Dori shakli

Vena ichiga yuborish uchun eritma 20 mg/ml, 5 ml.

Farmakologik ta’siri

Ta’sir mexanizmi

Sukrofer preparatining faol komponenti temir-saxaroza kompleksi ko‘p sonli kovalent bog‘lanmagan saxaroza molekulalari bilan o‘ralgan temir (III) gidroksidining ko‘p yadroli yadrosidan iborat. Bu kompleksning o‘rtacha molekulyar massasi (MM) taxminan 43 kDa ga teng. Ko‘p yadroli temir saqlovchi yadroning tuzilishi temirning fiziologik deposi ferritin oqsili yadrosining tuzilishiga o‘xshaydi. Ushbu majmua organizmda temirni tashish va saqlash uchun mas’ul bo‘lgan oqsillar (mos ravishda transferrin va ferritin) uchun utilizatsiya qilinadigan temirning boshqariladigan manbasini yaratish uchun mo‘ljallangan.

Vena ichiga yuborilgandan so‘ng, ushbu kompleks tarkibiga kiruvchi ko‘p yadroli temir saqlovchi yadro asosan jigar, taloq va suyak ko‘migining retikuloendotelial tizimi tomonidan qamrab olinadi. Keyingi bosqichda temir gemoglobin, mioglobin va boshqa temir saqlovchi fermentlarni sintez qilish uchun ishlatiladi yoki asosan jigarda ferritin shaklida to‘planadi.

Farmakokinetika

Taqsimlash

Saxaroza kompleksi temir (III) gidroksidining vena ichiga yuborilishida temirning yarim chiqarilish davri 6 soatni, umumiy klirensi 1,2 l/soatni tashkil etadi.

Radioaktiv nishonning makrofaglarga boy taloq tomonidan qamrab olinishi retikuloendotelial tizim tomonidan temirning qamrab olinishiga xos deb hisoblanadi.

Biotransformatsiya

Inyeksiyadan so‘ng saxarozaning katta qismi dissotsiatsiyalanadi va ko‘p yadroli temir saqlovchi yadro asosan jigar, taloq va suyak ko‘migining retikuloendotelial tizimi tomonidan qamrab olinadi. Kiritilgandan 4 hafta o‘tgach, eritrotsitlar tomonidan utilizatsiya 59 dan 97% gacha bo‘lgan.

Chiqarish

Temir-saxaroza kompleksining o‘rtacha molekulyar massasi (MM) taxminan 43 kDa ga teng bo‘lib, bu buyraklar orqali chiqarilishining oldini olish uchun yetarli darajada ko‘pdir. Tarkibida 100 mg temir bo‘lgan saxaroza kompleksining temir (III) gidroksid dozasi inyeksiyasidan keyingi dastlabki 4 soat ichida buyraklar orqali temirning chiqarilishi kiritilgan dozaning 5% dan kamrog‘iga to‘g‘ri keldi. 24 soatdan so‘ng qon zardobidagi temirning umumiy konsentratsiyasi preparat yuborilishidan oldin qayd etilgan darajagacha pasaydi. Saxarozaning buyraklar orqali chiqarilishi kiritilgan dozaning taxminan 75% ni tashkil etdi.

Ko‘rsatmalar

Temir tanqisligi holatlari:

temir zaxiralarini tezda to‘ldirish zarur bo‘lganda;

og‘iz orqali qabul qilinadigan temir preparatlarini ko‘tara olmaslikda;

ichakning faol yallig‘lanish kasalliklari mavjud bo‘lganda, og‘iz orqali qabul qilinadigan temir preparatlari samarasiz bo‘lganda;

Sukrofer preparatini faqat qo‘llash uchun ko‘rsatma tegishli laboratoriya tadqiqotlari natijalari bilan tasdiqlangan hollardagina qo‘llash lozim.

Qo‘llash usuli va dozalari

Sukrofer vena ichiga sekin inyeksiya qilish, vena ichiga tomchilab yuborish uchun mo‘ljallangan. Preparat mushak orasiga yuborish uchun yaroqli emas. Birinchi terapevtik dozani yuborishdan oldin test dozasini tayinlash kerak. Agar kuzatuv davrida o‘zlashtira olmaslik holatlari yuzaga kelsa, preparatni yuborishni darhol to‘xtatish lozim.

Ampulani ochishdan oldin cho‘kma va shikastlanishlar bor-yo‘qligini ko‘zdan kechirish kerak. Faqat cho‘kmasiz jigarrang eritmadan foydalanish mumkin. Preparat faqat statsionarda, reanimatsiya va shokka qarshi terapiya vositalari mavjudligi sharti bilan, yuborish paytida va undan keyin (1 soat davomida) shifokor nazorati ostida yuboriladi. O‘ta sezuvchanlik yoki o‘zlashtira olmaslik reaksiyasining har qanday ko‘rinishlarida yuborish darhol to‘xtatiladi.

Doza organizmdagi umumiy temir tanqisligiga muvofiq individual ravishda hisoblanadi.

Sukrofer preparatini yuborishning afzal ko‘rilgan usuli gipotenziv epizodlar xavfini va preparatning venalar atrofidagi to‘qimalarga tushishini kamaytirish uchun tomchilab yuborishdir. Bevosita infuziyadan oldin Sukrofer preparatini 1:20 nisbatdagi 0,9% (massa/hajm) steril natriy xlorid eritmasi bilan suyultirish lozim.

Sukrofer preparatini suyultirilmagan eritma holida vena ichiga sekin, minutiga 1 ml sukrofer preparati (20 mg temir) tezligida yuborish ham mumkin (5 ml sukrofer preparati (100 mg temir) kamida 5 minutda yuboriladi). Preparatning maksimal hajmi bir inyeksiyada Sukrofer preparatining 10 ml (200 mg temir) miqdoridan oshmasligi kerak.

Sukrofer preparatining terapevtik dozasini birinchi oqimli yuborishdan oldin, test dozasini tayinlash kerak: Sukrofer preparatining 1 ml (20 mg temir) kattalarga 1-2 daqiqa davomida sekin yuboriladi. Keyingi 15 daqiqalik kuzatuv davomida noxush holatlar kuzatilmasa, eritmaning qolgan qismini tavsiya etilgan tezlikda yuborish lozim. Inyeksiyadan so‘ng, bemorga qo‘lini bir muddat cho‘zilgan holatda fiksatsiya qilish tavsiya etiladi.

Bolalarda qo‘llanilishi

Bolalarda preparatni qo‘llash bo‘yicha yetarli tajriba yo‘qligi sababli tavsiya etilmaydi.

Nojo‘ya ta’sirlari

Tez-tez:

ta’m bilishning buzilishi;

arterial gipotenziya, arterial gipertenziya;

ko‘ngil aynishi;

inyeksiya qilingan joydagi og‘riq.

Tez-tez emas:

politsitemiya;

yuqori sezuvchanlik;

bosh og‘rig‘i, bosh aylanishi, achishish hissi, paresteziya, gipesteziya;

tromboflebit, flebit;

hansirash;

xromaturiya;

qusish, qorin og‘rig‘i, ich ketishi, qabziyat;

qichishish, toshma;

mushak tortishishi, mialgiya, artralgiya, oyoq-qo‘llardagi og‘riq, beldagi og‘riq;

qaltirash, inyeksiya joyidagi reaksiyalar, inyeksiya joyidagi ta’sirlanish, inyeksiya joyidagi ekstravazatsiya, inyeksiya joyidagi teri rangining o‘zgarishi, inyeksiya joyidagi achishish hissi, inyeksiya joyidagi shish, asteniya, charchoq, og‘riq;

gamma-glutamiltransferaza darajasining oshishi, alaninaminotransferaza darajasining oshishi, aspartataminotransferaza darajasining oshishi,

jigar sinamalari natijalari bo‘yicha.

Kamdan-kam:

pnevmoniya;

temir bilan ortiqcha yuklash;

hushdan ketish, bosh og‘rig‘i, uyquchanlik;

yurak urishini his qilish;

giperemiya;

og‘iz qurishi;

qo‘l-oyoqlarda noqulaylik hissi, mushak spazmlari;

inyeksiya joyida issiqlik hissi, ko‘krak qafasidagi og‘riq, pireksiya, shish, qichishish, inyeksiya joyida qontalash;

periferik shish;

qon zardobida ferritin miqdorining ko‘payishi, qonda kreatinin miqdorining ko‘payishi, qonda laktatdegidrogenaza miqdorining ko‘payishi.

Chastotasi noma’lum:

anafilaktoid reaksiyalar, angionevrotik shish;

ong darajasining pasayishi, ongning chalkashishi, hushdan ketish, xavotirlanish, titrash;

bradikardiya, taxikardiya;

tomir kollapsi, yuzaki venalar trombozi;

bronxospazm;

eshakem, eritema;

mushaklar gipotoniyasi;

gipergidroz, sovuq ter, umumiy holsizlik, rangparlik.

Qarshi ko‘rsatmalar

preparatning faol yoki yordamchi komponentlariga yuqori sezuvchanlik;

temir tanqisligi bilan bog‘liq bo‘lmagan anemiya;

gemosideroz, gemoxromatoz yoki temirdan foydalanish jarayonining buzilishi;

surunkali poliartrit;

anamnezida bronxial astma, ekzema yoki boshqa atopik allergik reaksiyalar bo‘lgan bemorlar;

18 yoshgacha bo‘lgan bolalar va o‘smirlar;

Homiladorlikning I trimestri.

Dozani oshirib yuborish

Belgilari: gemosideroz.

Davolash: simptomatik vositalar va zarur bo‘lsa, temirni bog‘lovchi moddalar (xelatlar), masalan, v/i deferoksamin qo‘llash tavsiya etiladi.

Maxsus shartlar

Sukrofer faqat kamqonlik tashxisi tegishli laboratoriya ma’lumotlari bilan tasdiqlangan bemorlarga tayinlanishi kerak. Temirning parenteral preparatlari o‘limga olib kelishi mumkin bo‘lgan allergik yoki anafilaktoid reaksiyalarni keltirib chiqarishi mumkin. Shuning uchun allergiyaga qarshi terapiya vositalari, reanimatsiya vositalari va jihozlari tayyor turishi kerak.

Jigar yetishmovchiligi bo‘lgan bemorlarga temir preparatlarini yuborishda ehtiyotkorlik talab etiladi. Jigar disfunksiyasi bo‘lgan bemorlarga temirning parenteral preparatlarini qo‘llashdan saqlanish kerak, chunki organizmning temir bilan ortiqcha yuklanishi, ayniqsa, kechki teri porfiriyasi rivojlanishini tezlashtiruvchi omil hisoblanadi. Organizmda temirning ortiqcha yuklanishiga yo‘l qo‘ymaslik uchun temir miqdorini sinchiklab nazorat qilish tavsiya etiladi. Parenteral temir o‘tkir va surunkali infeksiyalarda ehtiyotkorlik bilan qo‘llanilishi kerak. Bakteriyemiyasi davom etayotgan bemorlarda temir saxaratini yuborishni bekor qilish tavsiya etiladi. Surunkali infeksiyalari bo‘lgan bemorlarda eritropoezni bostirish imkoniyatini hisobga olgan holda preparatni qo‘llashning foyda/xavf nisbatini baholash zarur.

Agar preparat juda tez yuborilsa, gipotenziya epizodlari rivojlanishi mumkin. Allergik reaksiyalar, ba’zan artralgiya bilan, ko‘pincha tavsiya etilgan dozadan oshganda kuzatiladi. Preparatning venalar atrofidagi to‘qimalarga tushishidan saqlanish kerak, chunki ekstravazatsiya og‘riq, yallig‘lanish, to‘qima nekrozi va terining jigarrang tusga kirishiga olib kelishi mumkin.

Sukrofer preparati avtomobil haydash va mexanizmlar bilan ishlash qobiliyatiga salbiy ta’sir ko‘rsatishi ehtimoldan yiroq. Biroq, agar temir-saxaroza kompleksi yuborilgandan so‘ng bosh aylanishi, ongning chalkashishi yoki hushdan ketish oldi holati kabi alomatlar paydo bo‘lsa, bemorlar ushbu alomatlar yo‘qolmaguncha transport vositalari yoki mexanizmlarni boshqarmasliklari kerak.

Homiladorlik va emizish davrida

Homilador ayollarda yetarli darajada nazorat qilinadigan tadqiqotlar hanuzgacha o‘tkazilmagan. Preparat homiladorlikning I trimestrida qo‘llash mumkin emas. Sukrofer II va III trimestrdagi homilador ayollarda faqat temir preparatlarini og‘iz orqali qabul qilish samarasiz yoki chidab bo‘lmaydigan bo‘lsa, shuningdek, anemiya darajasi ona va homila salomatligiga xavf tug‘diradigan darajada yuqori bo‘lgandagina qo‘llanilishi mumkin.

Metabolizmga uchramagan temir-saxaroza kompleksi ona sutiga o‘ta olmaydi. Biroq, emizish paytida preparatni faqat xavf va foydani sinchiklab taqqoslagandan so‘ng tayinlash mumkin.

Dorilarning o‘zaro ta’siri

Ichish uchun temirning dori shakllari bilan bir vaqtda buyurish mumkin emas (temirning MIYdan so‘rilishi kamayadi). Temirning peroral preparatlari bilan davolashni oxirgi inyeksiyadan 5 kundan keyin boshlash mumkin.

Saqlash shartlari

Asl qadoqda, 25 °C dan yuqori bo‘lmagan haroratda. Muzlatmang. Bolalar qo‘li yetmaydigan joyda saqlang.

Yaroqlilik muddati

Ishlab chiqarilgan sanadan boshlab 3 yil. Yaroqlilik muddati tugaganidan keyin ishlatilmasin.

Chiqarish shakli

Shisha ampulalarda 5 ml dan preparat. 5, 10 yoki 25 ta ampula davlat va rus tillarida tibbiy qo‘llash bo‘yicha yo‘riqnoma bilan birga karton qutiga solinadi.

Ishlab chiqaruvchi

Baxter Pharmaceuticals India Private Limited, Hindiston.