Zalain vaginal suppozitorlari 300 mg №1 (1 blister)

Tarkib

1 shamcha uchun

ta’sir etuvchi modda: sertakonazol nitrat 300 mg;

yordamchi moddalar: vitepsol 1,305 g, suppotsir 1,305 g, suvsiz kolloid kremniy dioksidi 0,09 g.

Tavsif

Shamchalar oval shaklda, mumsimon, oq rangda bo‘ladi.

Chiqarish shakli

Vaginal shamcha 300 mg.

Farmakoterapevtik guruh

Zamburug‘larga qarshi vosita. Imidazol hosilalari. ATX kodi: G01AF.

Farmakologik xususiyatlari

Farmakodinamika

Sertakonazol - zamburug‘larga qarshi vosita, imidazol va benzotiofenning hosilasi. Terapevtik dozalarda fungistatik va fungitsid ta’sirga ega. Candida turkumiga mansub zamburug‘larga nisbatan faol. Sertakonazolning ta’sir mexanizmi ergosterol sintezini susaytirish va zamburug‘lar hujayra membranasining o‘tkazuvchanligini oshirishdan iborat bo‘lib, bu zamburug‘ hujayrasining lizisga uchrashiga olib keladi.

Stafilokokk va streptokokklarga nisbatan ham antibakterial faollikka ega.

Farmakokinetika

Intravaginal qo‘llanganda sertakonazolning so‘rilishi sezilarsiz, qon va siydikda aniqlanmaydi.

Ko‘rsatmalar

Candida turkumiga mansub zamburug‘lar keltirib chiqaradigan qin shilliq qavati infeksiyalarini (kandidozli vulvovaginit) mahalliy davolash.

Zarurat tug‘ilganda, iltimos, dori vositasini qabul qilishdan oldin shifokor bilan maslahatlashing.

Qarshi ko‘rsatmalar

Sertakonazolga, imidazol hosilalariga, benzotiofenga, preparatning yordamchi moddalariga yuqori sezuvchanlik.

Qo‘llash usuli va dozalari

Qin ichiga, bir marta.

Preparatni qo‘llashdan oldin tashqi jinsiy a’zolarni neytral yoki ishqoriy sovun bilan yuvish lozim.

Bitta vaginal shamcha uyqu oldidan, chalqancha yotgan holda qinga chuqur kiritiladi. Agar klinik belgilar saqlanib qolsa, shamchani 7 kundan keyin qayta yuborish mumkin.

Agar davolanishdan so‘ng ahvol yaxshilanmasa yoki alomatlar og‘irlashsa yoki yangi alomatlar paydo bo‘lsa, shifokor bilan maslahatlashish zarur. Preparatni faqat qo‘llanilish yo‘riqnomasida ko‘rsatilgan ko‘rsatmalar, qo‘llash usuli va dozalarda qo‘llang.

Nojo‘ya ta’sirlari

Quyida keltirilgan nojo‘ya reaksiyalar a’zolar va a’zolar tizimining shikastlanishi hamda uchrash chastotasiga ko‘ra sanab o‘tilgan. Uchrash chastotasi quyidagicha aniqlanadi: juda tez-tez (≥ 1/10), tez-tez (≥ 1/100 va <1/10), tez-tez emas (≥ 1/1 000 va <1/100), kamdan-kam (≥ 1/10 000 va <1/1 000), juda kam (<1/10 000). noma’lum (mavjud ma’lumotlar asosida baholash imkonsiz).

Immun tizimi tomonidan buzilish:

Chastotasi noma’lum: allergik reaksiyalar.

Reproduktiv tizim va sut bezlari tomonidan buzilishlar:

Kamdan-kam hollarda: achishish hissi, qinda qichishish kuzatiladi, ular davolanish davomida o‘z-o‘zidan o‘tib ketadi va preparatni bekor qilishni talab qilmaydi.

Agar sizda yo‘riqnomada ko‘rsatilgan nojo‘ya ta’sirlar kuzatilsa yoki ular og‘irlashsa yoki yo‘riqnomada ko‘rsatilmagan boshqa nojo‘ya ta’sirlarni sezsangiz, bu haqda shifokorga xabar bering.

Dozani oshirib yuborish

Preparatni qo‘llash bo‘yicha yo‘riqnomaga muvofiq qo‘llanilganda, dozani oshirib yuborish ehtimoli kam. Preparat tasodifan ichilganda simptomatik davolash ko‘rsatilgan.

O‘zaro aloqa

Preparatni mahalliy kontratseptiv preparatlar bilan bir vaqtda qo‘llash ularning spermitsid ta’siri susayishiga olib kelishi mumkin.

Maxsus ko‘rsatmalar

Jinsiy lablar va yondosh sohalarning bir vaqtdagi infeksiyasida (kandidozli vulvit) qo‘shimcha ravishda ZALAIN kremi bilan mahalliy davolash o‘tkazish lozim. Preparatni qo‘llashda jinsiy aloqadan tiyilish tavsiya etiladi.

Urogenital infeksiyaning oldini olish uchun jinsiy sherikni bir vaqtning o‘zida davolash masalasini ko‘rib chiqish tavsiya etiladi.

Prezervativ yoki diafragmaning yirtilish xavfi ularni preparat bilan bir vaqtda qo‘llashda ortadi.

Davolashni hayz vaqtida o‘tkazish mumkin.

Homiladorlik va laktatsiya

Sertakonazolning homiladorlik va laktatsiya davrida qo‘llanilishi haqida yetarli ma’lumotlar yo‘q. Biroq, preparatni qo‘llash usulini (bir martalik yuborish), shuningdek, preparatni intravaginal kiritgandan so‘ng tizimli so‘rilishning yo‘qligini hisobga olgan holda, sertakonazolni homiladorlik va laktatsiya davrida qo‘llash, agar ona uchun potensial foyda homila yoki bola uchun mumkin bo‘lgan xavfdan yuqori bo‘lsa, mumkin.

Zalain® preparatini qo‘llashdan oldin, agar siz homilador bo‘lsangiz yoki homilador bo‘lishingiz mumkinligini taxmin qilsangiz yoki homiladorlikni rejalashtirayotgan bo‘lsangiz, shifokor bilan maslahatlashish lozim.

Transport vositalari va mexanizmlarini boshqarish qobiliyatiga ta’siri

Preparat transportni boshqarish qobiliyatiga yoki diqqatning yuqori konsentratsiyasini va psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishga ta’sir qilmaydi.

Qadoq

PVX/PE blisterli 1 ta vaginal shamcha. 1 ta blister karton qutida qo‘llash bo‘yicha yo‘riqnoma bilan birga.

Saqlash shartlari

30 °C dan yuqori bo‘lmagan haroratda. Bolalar qo‘li yetmaydigan joyda saqlang.

Yaroqlilik muddati

5 yil. Yaroqlilik muddati tugagandan keyin qo‘llanilmaydi.

Ro‘yxatdan o‘tish guvohnomasi egasi

EGIS FARMATSEVTIK ZAVOD YOAJ Vengriya

Ishlab chiqaruvchi

TROMMSDORFF GMBX I KO KG ARSNAYMITEL Germaniya

EGIS FARMATSEVTIK ZAVOD YOAJ Vengriya