Aksen Fort tabletkalari 550 mg №10 (1 blister)

Tarkib

1 tabletka quyidagilarni o‘z ichiga oladi:

faol modda: natriy naproksen 550 mg;

yordamchi moddalar: mikrokristall sellyuloza (Avisel PH 101), makkajo‘xori kraxmali, povidon PVP K 30, magniy stearati, natriy krosskarmelloza.

Tavsif

Tabletkalar oq rangda, oval shaklda, bir tomonida chizig‘i bor.

Farmakoterapevtik guruh

Nosteroid yallig‘lanishga qarshi preparatlar. ATX kodi: M01AE02.

Farmakologik xususiyatlari

Farmakodinamika

Naproksen natriy - nosteroid yallig‘lanishga qarshi preparat bo‘lib, yallig‘lanishga qarshi va og‘riq qoldiruvchi ta’sir ko‘rsatadi. Boshqa nosteroid yallig‘lanishga qarshi dorilar singari, naproksen ham siklooksigenazalar (SOG-1 va SOG-2) faolligini ingibirlaydi, bu esa prostaglandinlar sintezining susayishiga olib keladi.

Farmakokinetika

So‘rish

Suvda eriydigan natriy naproksen ichilganidan keyin me’da-ichak yo‘llaridan tez va to‘liq so‘riladi. Faol moddaning natriyli tuzi tez va to‘liq so‘rilishi tufayli og‘riq qoldiruvchi ta’sir preparatni qabul qilgandan so‘ng 20 daqiqadayoq boshlanadi. Maksimal plazma konsentratsiyasiga 1-2 soatdan keyin erishiladi. Muvozanat konsentratsiyasiga preparatning 4-5 dozasi qabul qilingandan so‘ng erishiladi.

Taqsimlash

Natriy naproksenning yarim chiqarilish davri taxminan 13 soatni tashkil etadi. Terapevtik dozalarda faol moddaning 99% dan ortig‘i plazma oqsillari bilan bog‘lanadi.

Metabolizm

Jigarda asosan 6-O-dezmetilnaproksengacha metabolizmga uchraydi.

Chiqarish

Qabul qilingan dozaning taxminan 95% qismi o‘zgarmagan naproksen, 6-O-dezmetilproksen va uning kon’yugatlari ko‘rinishida siydik bilan chiqariladi.

Qo‘llanilishi

Og‘riq sindromi bilan kechadigan holatlar: nevralgiya, ishialgiya, orqa miya churrasi, tishlarni olish, og‘iz bo‘shlig‘idagi operatsiyalar, epiziotomiya, tug‘ruqdan keyingi og‘riqlar, operatsiyadan keyingi og‘riqlar, dismenoreya, bachadon ichiga spiral kiritish bilan bog‘liq og‘riqlar, migren xurujlarining oldini olish va davolash.

Revmatik kasalliklar: revmatoid artrit, yuvenil artrit, osteoartrit, ankilozlovchi spondilit, bo‘g‘imdan tashqari revmatizm.

Travmatologiya: mushaklarning chiqishi, yorilishi va jarohatlari, travmatologik va ortopedik operatsiyalar.

Podagraning o‘tkir xurujlari.

Urologiya va LOR: yallig‘lanish xarakteridagi og‘riqlar.

Yuqumli kasalliklar: spetsifik terapiyaga qo‘shimcha ravishda analgetik, yallig‘lanishga qarshi va isitmani tushiruvchi vosita sifatida.

Qo‘llash usuli va dozalari

Aksen Fort tabletkalarini ichga, ovqatlanish vaqtida yoki undan keyin, yetarli miqdorda suv bilan ichish tavsiya etiladi.

Og‘riqlar, birlamchi dismenoreya, o‘tkir tendinit va bursitda: Boshlang‘ich doza - 1 tabletka (550 mg), 12 soatdan so‘ng - 1 tabletka (550 mg) yoki 1⁄2 tabletka (275 mg) 6-8 soatdan so‘ng. Boshlang‘ich sutkalik doza 21⁄2 tabletkadan (1375 mg) oshmasligi kerak.

Revmatoid artrit, osteoartrit, ankilozlovchi spondilitda: Kattalar uchun tavsiya etilgan boshlang‘ich doza - 1 tabletkadan kuniga 2 marta (ertalab va kechqurun). Uzoq muddat qo‘llash zarur bo‘lganda, klinik javobga qarab preparat dozasini kamaytirish mumkin. Ertalabki va kechki dozalar bir xil bo‘lmasligi mumkin. Preparatni kuniga 2 martadan ortiq qabul qilishning hojati yo‘q.

Yuvenil artritda: 5 yoshdan oshgan bolalarda 2 mahal ichish uchun beriladigan sutkalik doza 10 mg/kg ni tashkil etadi.

Podagraning o‘tkir xurujida: Boshlang‘ich doza 11⁄2 tabletka (825 mg), keyinchalik - 1⁄2 tabletka (275 mg) har 8 soatda.

Migrenda: O‘tkir krizlarda boshlang‘ich doza 11⁄2 tabletka (825 mg) ni tashkil etadi. Zarurat tug‘ilganda yana 1⁄2 tabletkadan (275 mg) 2 marta 30 daqiqalik interval bilan qabul qilish mumkin. Migren xurujlarining oldini olish uchun - 1 tabletkadan (550 mg) kuniga 2 marta (ertalab va kechqurun). Agar 4-6 hafta ichida ahvol yaxshilanmasa, davolash to‘xtatilishi kerak.

Uzoq muddat qo‘llanganda, klinik javobga qarab dozani tuzatish mumkin. Zarurat tug‘ilganda, preparatning past dozalari yaxshi o‘zlashtirilgan taqdirda, kunlik doza 6 oy davomida 1500 mg gacha oshirilishi mumkin. Preparat yuqori dozalarda buyurilganda, shifokor terapevtik ta’sirning ortishi xavfining ehtimoliy ortishidan ustunligini baholashi lozim.

Maxsus bemorlar guruhlari bilan bog‘liq qo‘shimcha ma’lumotlar

Buyrak yetishmovchiligi

Buyrak yetishmovchiligi bo‘lgan bemorlarda preparatni qo‘llash tavsiya etilmaydi.

Jigar yetishmovchiligi

Jigar yetishmovchiligi bo‘lgan bemorlarda ehtiyotkorlik bilan qo‘llash lozim.

Pediatrik bemorlar

Preparatning xavfsizligi va samaradorligi to‘g‘risida ma’lumotlar yetarli bo‘lmaganligi sababli, 16 yoshgacha bo‘lgan bolalar va o‘smirlarda qo‘llanilmaydi. Preparat 5 yoshdan oshgan bolalarda faqat yuvenil revmatoid artritda 10 mg/kg sutkalik dozada 2 mahal (5 mg/kg 2 mahal/sut) buyuriladi.

Geriatrik bemorlar

Keksa yoshdagi bemorlarda klirensning pasayishi kuzatilganligi sababli, preparatni minimal vaqt davomida eng past samarali dozalarda ehtiyotkorlik bilan buyurish lozim. YAQNDV buyurilganda oshqozon-ichakdan qon ketish xavfi borligi sababli, keksa bemorlar nazorat ostida bo‘lishlari kerak.

Nojo‘ya ta’sirlari

Nojo‘ya ta’sirlarning paydo bo‘lish chastotasi: juda tez-tez (≥1/10); tez-tez (≥1/100 dan <1/10 gacha); tez-tez emas (≥1/1000 dan <1/100 gacha); kamdan-kam (≥1/10000 dan <1/1000 gacha); juda kamdan-kam (<1/10000); noaniq chastota bilan (mavjud ma’lumotlar asosida baholash mumkin emas).

Infeksiyalar va invaziyalar

Kam hollarda: aseptik meningit.

Qon yaratish va limfa tizimi tomonidan

Ko‘pincha: gemolitik kamqonlik.

Kam hollarda: aplastik anemiya, leykopeniya, trombotsitopeniya, agranulotsitoz, eozinofiliya.

Immun tizimi tomonidan

Kamdan-kam: anafilaktoid reaksiyalar.

Moddalar almashinuvi va ovqatlanish nuqtai nazaridan

Kam hollarda: giperglikemiya.

Ruhiy jihatdan

Kamdan-kam hollarda: depressiya, uyquning buzilishi, uyqusizlik, ongning chalkashligi, gallyutsinatsiyalar.

Asab tizimi tomonidan

Ko‘pincha: bosh aylanishi, uyquchanlik, bosh og‘rig‘i, fotosezgirlik, retrobulbar optik nevrit, diqqatni jamlash qobiliyatining buzilishi.

Kamdan-kam hollarda: talvasalar, kognitiv disfunksiya.

Ko‘ruv a’zosi tomonidan

Ko‘pincha: ko‘rishning noaniqligi, shox qavatining xiralashishi.

Kamdan kam hollarda: papillit va papilloedema.

Eshitish organi va labirint tizimi tomonidan

Kamdan-kam: eshitish qobiliyatining buzilishi, parakuziya, quloqlarda shovqin, bosh aylanishi.

Yurak-qon tomir tizimi tomonidan.

Ko‘pincha: yurak urishini his qilish, shishlar, dimlangan yurak yetishmovchiligi, natriyning ushlanib qolishi.

Kamdan-kam: gipertenziya, vaskulit.

Juda kam: miokard infarkti, insult.

Nafas olish tizimi, ko‘krak qafasi a’zolari va ko‘ks oralig‘i tomonidan

Ko‘pincha: hansirash.

Kamdan-kam: o‘pka shishi, astma, eozinofilli pnevmonit.

Hazm qilish tizimi tomonidan

Ko‘pincha: oshqozon yarasi, teshilish, qon ketishi - bu keksa bemorlarda o‘limga olib kelishi mumkin, kekirish, ko‘ngil aynishi, qusish, ezofagit, diareya, meteorizm, qabziyat, dispepsiya, epigastral sohada noqulaylik.

Kamdan-kam hollarda: oshqozon-ichak traktining nopeptik yaralari, melena, burundan qon ketishi, stomatit, yarali stomatit, yarali kolit va Kron kasalligining kuchayishi, pankreatit, gastrit.

Gepatobiliar tizim tomonidan

Kamdan-kam hollarda: o‘limga olib keluvchi gepatit, sariqlik, jigar fermentlarining anomal ko‘rsatkichlari.

Teri va teri osti kletchatkasi tomonidan

Ko‘pincha: qichishish, toshma, teridagi dog‘lar, purpura, ekximoz.

Kam hollarda: ko‘p terlash, toksik epidermal nekroliz, multiform eritema, Stivens-Jonson sindromi, tugunli eritema, qizil yassi temiratki, pustulyoz reaksiyalar, eshakemi, fotosezgirlik reaksiyalari, angionevrotik shish.

Suyak-mushak tizimi va biriktiruvchi to‘qima tomonidan

Kamdan-kam: mialgiya, mushaklar kuchsizligi.

Buyrak va siydik yo‘llari tomonidan

Ko‘pincha: buyrak faoliyatining buzilishi.

Kam hollarda: gematuriya, interstitsial nefrit, nefrotik sindrom, buyrak yetishmovchiligi, so‘rg‘ichli nekroz.

Reproduktiv tizim va ko‘krak bezi tomonidan

Kamdan-kam: ayollarda bepushtlik.

Umumiy buzilishlar va mahalliy reaksiyalar

Ko‘pincha: shish, chanqash.

Kamdan-kam: isitma, charchash, holsizlik.

Laboratoriya tekshiruvlari

Kamdan-kam hollarda: jigar fermentlarining anomal ko‘rsatkichlari.

Nojo‘ya ta’sirlar paydo bo‘lganda shifokorga murojaat qiling.

Qarshi ko‘rsatmalar

Naproksen, natriy naproksen yoki preparatning boshqa biror komponentiga yuqori sezuvchanlik.

Anamnezda aspirin yoki boshqa nosteroid yallig‘lanishga qarshi dorilar (NYQD) bilan bog‘liq yuqori sezuvchanlik reaksiyalari (masalan, astma, rinit, burun polipi yoki eshakemi).

Aorta-koronar shuntlashda perioperativ og‘riqlarni davolash.

Peptik yara (faol yoki anamnezda) yoki oshqozon-ichak tizimidan qon ketishi (ikkita yoki undan ortiq turli xil isbotlangan yara yoki qon ketish epizodlari).

Anamnezda nosteroid yallig‘lanishga qarshi dorilarni qabul qilish bilan bog‘liq oshqozon-ichak qon ketishi yoki perforatsiyalar.

Og‘ir buyrak, jigar va yurak yetishmovchiligi.

Homiladorlikning uchinchi trimestri.

Dorilarning o‘zaro ta’siri

Antatsidlar yoki kolistiramin bilan bir vaqtda qo‘llanganda natriy naproksen absorbsiyasining sekinlashishi mumkin, bunda absorbsiya darajasi o‘zgarmaydi.

Natriy naproksen plazma oqsillari bilan yuqori darajada bog‘lanishi sababli, plazma oqsillari bilan bog‘lanadigan antikoagulyantlar (kumarin kabi), sulfanilamidlar, gidantoin va boshqa nosteroid yallig‘lanishga qarshi vositalar (jumladan, atsetilsalitsil kislotasi) bilan bir vaqtda qo‘llanilganda, ularning natriy naproksen bilan o‘zaro ta’siri kuzatilishi mumkin. Aksen Fort preparati bilan bir vaqtda gidantoin, sulfanilamidlar yoki sulfonilmochevina hosilalarini qabul qilayotgan bemorlar shifokor nazoratida bo‘lishlari va zarurat tug‘ilganda preparat dozasini o‘zgartirishlari lozim.

YAQNDVlar varfarin kabi antikoagulyantlarning ta’sirini kuchaytirishi mumkin. Naproksen natriy trombotsitlar agregatsiyasini kamaytiradi va qon ketish vaqtini uzaytiradi, buni qon ketish vaqtini aniqlashda hisobga olish kerak.

Probenesid

Probenetsid plazmadagi naproksen konsentratsiyasini oshirishi sababli, bu preparatlarni bir vaqtda ehtiyotkorlik bilan qo‘llash lozim.

Siklosporin

Boshqa nosteroid yallig‘lanishga qarshi dorilar kabi, siklosporinni naproksen bilan bir vaqtda qo‘llash nefrotoksiklik xavfini oshiradi. Shu sababli siklosporinni Aksen Fort preparati bilan bir vaqtda ehtiyotkorlik bilan qo‘llash lozim.

Mifepriston

YAQNDVlar mifepriston ta’sirini susaytirishi mumkinligi sababli, YAQNDVlarni mifepriston qo‘llangandan keyin 8-12 kun davomida qabul qilmaslik kerak.

Beta-blokatorlar

Aksen Fort preparati beta-blokatorlarning gipotenziv ta’sirini susaytirishi mumkin.

Yurak glikozidlari

YAQNDV yurak yetishmovchiligi belgilarini kuchaytirishi, koptokcha filtratsiyasini pasaytirishi va plazmadagi yurak glikozidlari konsentratsiyasini oshirishi mumkin.

Takrolimus

Takrolimusni nosteroid yallig‘lanishga qarshi dorilar bilan bir vaqtda qo‘llash nefrotoksiklik xavfini oshirishi mumkin.

Zidovudin

YAQNDV bilan bir vaqtda qo‘llanganda gematologik toksik ta’sir xavfi ortadi.

Antitrombotik vositalar va serotoninni qayta qamrab olish ingibitorlari

NYAQV bilan bir vaqtda qo‘llanilganda, oshqozon-ichak qon ketishining ko‘payishi kuzatiladi.

Kortikosteroidlar

YAQNDV bilan bir vaqtda qo‘llanganda oshqozon-ichak yaralari yoki qon ketish xavfi ortishi sababli, bu preparatlarni bir vaqtda ehtiyotkorlik bilan qo‘llash lozim.

Xinolonlar

YAQNDV va xinolonlar bir vaqtda qo‘llanganda tutqanoq rivojlanish xavfi oshishi mumkin.

APF ingibitorlari

Naproksen diuretiklar va boshqa antigipertenziv dorilarning ta’sirini susaytirishga hamda buyrak faoliyatining buzilish xavfini oshirishga qodir.

Atsetilsalitsil kislota

Boshqa nosteroid yallig‘lanishga qarshi dorilar kabi, preparatning nojo‘ya ta’sirlari xavfi ortishi sababli naproksenni atsetilsalitsil kislotasi bilan bir vaqtda qo‘llash tavsiya etilmaydi.

Diuretiklar

Ayrim bemorlarda Aksen Fort furosemid va tiazidlarning natriyuretik ta’sirini susaytirishi mumkin. Bir vaqtning o‘zida diuretiklar va YAQNDV qabul qilayotgan bemorlar sinchkovlik bilan nazorat qilinishi kerak.

Litiy

YAQNDV plazmadagi litiy konsentratsiyasini oshiradi va litiy buyrak klirensini pasaytiradi. Litiyning toksik ta’siri rivojlanish xavfi tufayli bemorlar sinchkovlik bilan nazorat qilinishi kerak.

Metotreksat

Metotreksatning toksik ta’siri ortishi xavfi borligi sababli, uni YAQNDV bilan bir vaqtda ehtiyotkorlik bilan qo‘llash lozim.

Varfarin

Varfarin va YAQNDV bir vaqtda qo‘llanganda me’da-ichakdan qon ketish xavfi ortadi.

Maxsus ko‘rsatmalar

Yurak-qon tomir kasalliklari

Nosteroid yallig‘lanishga qarshi dorilarni qo‘llash miokard infarkti va insult kabi o‘limga olib kelishi mumkin bo‘lgan yurak-qon tomir tizimining jiddiy buzilishlari xavfining ortishi bilan bog‘liq bo‘lishi mumkin. Preparatni uzoq vaqt qabul qilgan, yurak-qon tomir kasalliklari bilan og‘rigan va ularning rivojlanish xavf omillariga ega bo‘lgan bemorlarda jiddiy yurak-qon tomir kasalliklarining paydo bo‘lish ehtimoli ortadi. Potensial xavfni kamaytirish uchun preparatni eng qisqa vaqt ichida minimal samarali dozalarda qo‘llash lozim. Bemorlarga yurak-qon tomir tizimi tomonidan jiddiy buzilishlarning belgilari va alomatlari haqida ma’lumot berish lozim. Atsetilsalitsil kislotasi va boshqa nosteroid yallig‘lanishga qarshi dorilar bilan bir vaqtda qo‘llash oshqozon-ichak traktida jiddiy nojo‘ya ta’sirlar xavfini oshiradi.

Gipertenziya

Gipertenziyali bemorlarga Aksen Fort preparatini ehtiyotkorlik bilan buyurish lozim. YAQNDV qabul qilganda qon bosimini nazorat qilib turish kerak.

Dimlangan yurak yetishmovchiligi va shish

YAQNDV qabul qilayotgan ba’zi bemorlarda suyuqlik ushlanib qolishi va shishlar kuzatilgan. Yurak yetishmovchiligi va suyuqlik tutilishi bo‘lgan bemorlarga preparatni ehtiyotkorlik bilan buyurish lozim.

Oshqozon-ichak qon ketishi, yaralanishi va teshilishi

YAQNDVlar oshqozon-ichak traktida yallig‘lanish, qon ketishi, yara hosil bo‘lishi yoki teshilishi kabi o‘limga olib kelishi mumkin bo‘lgan jiddiy shikastlanishlarga sabab bo‘lishi mumkin. Bunday reaksiyalar davolashning har qanday davrida kuzatilishi, simptomlar bilan kechishi yoki kuzatilmasligi mumkin. Oshqozon-ichak trakti tomonidan nojo‘ya ta’sirlar paydo bo‘lish xavfini kamaytirish uchun preparatni eng qisqa vaqt ichida minimal samarali dozalarda qo‘llash lozim.

Buyrak tomonidan buzilish

YAQNDVni uzoq vaqt qo‘llash papillyar nekroz va buyraklarning boshqa buzilishlarini keltirib chiqarishi mumkin.

Anafilaktoid reaksiyalar

Boshqa nosteroid yallig‘lanishga qarshi dorilarni qo‘llashda bo‘lgani kabi, Aksen Fortni qabul qilayotgan bemorlarda anafilaktoid reaksiyalar kuzatilishi mumkin. Anamnezida aspirin uchligi bo‘lgan bemorlarga preparat tayinlanmaydi.

Oftalmologik reaksiyalar

Ko‘rish qobiliyati buzilgan bemorlar oftalmologik tekshiruvdan o‘tkazilishi lozim.

Teri reaksiyalari

YAQNDV eksfoliativ dermatit, Stivens-Jonson sindromi, toksik epidermal nekroliz kabi o‘limga olib kelishi mumkin bo‘lgan jiddiy teri reaksiyalariga sabab bo‘lishi mumkin. Bemorlarga teri reaksiyalarining birinchi belgilari paydo bo‘lganda preparatni qo‘llashni to‘xtatish kerakligi haqida ma’lumot berilishi kerak.

Jigarning buzilishi

Jigar kasalliklarining klinik belgilari yoki tizimli ko‘rinishlari (masalan, eozinofiliya, toshma va boshqalar) paydo bo‘lganda preparatni qo‘llashni to‘xtatish lozim.

Gematologik reaksiyalar

Ba’zi bemorlarda YAQNDV trombotsitlar agregatsiyasini ingibirlash va qon ketish vaqtini uzaytirish xususiyatiga ega. Antikoagulyantlar qabul qilayotgan koagulopatiya bilan og‘rigan bemorlar nazorat ostida bo‘lishlari kerak.

Astma

Aspiringa sezuvchanligi bo‘lgan bemorlarga aspirin va boshqa nosteroid yallig‘lanishga qarshi dorilar o‘rtasidagi o‘zaro ta’sirchanlik tufayli Aksen Fort preparatini buyurmaslik kerak. Anamnezida astma bo‘lgan bemorlarda Aksen Fortni ehtiyotkorlik bilan qo‘llash lozim.

Homiladorlik va laktatsiya davrida qo‘llash

YAQNDVni qo‘llash homilada arterial yo‘lning barvaqt bitishiga, tug‘ruqning kechikishiga va yangi tug‘ilgan chaqaloqda sariqlik rivojlanishiga olib kelishi mumkinligini hisobga olib, homiladorlikning kechki davrida preparatni qo‘llashdan saqlanish kerak.

Homiladorlik davrida preparat juda zarur bo‘lganda qo‘llanilishi kerak.

Laktatsiya davrida preparatni qo‘llash tavsiya etilmaydi.

Transport vositalari va boshqa potensial xavfli mexanizmlarni boshqarish qobiliyatiga ta’siri

Aksen Fort tabletkalarini qabul qilganda ba’zi bemorlarda uyquchanlik, bosh aylanishi, uyqusizlik yoki depressiya kuzatilishi mumkin. Buni avtomobil haydashda va diqqatni talab qiladigan vazifalarni bajarishda hisobga olish kerak.

Dozani oshirib yuborish

Belgilari: Bosh og‘rig‘i, jig‘ildon qaynashi, ko‘ngil aynishi, qusish, epigastral sohada og‘riq, oshqozon-ichakdan qon ketishi, kamdan-kam hollarda - diareya, dezoriyentatsiya, qo‘zg‘alish, uyquchanlik, bosh aylanishi, quloqlarda shovqin, hushdan ketish. Kuchli intoksikatsiyada o‘tkir buyrak yetishmovchiligi va jigar zararlanishi mumkin.

YAQNDV qabul qilgandan so‘ng, kamdan-kam hollarda nafas qisilishi va koma kuzatilishi mumkin. Naproksen dozasi oshirib yuborilganda protrombin vaqtining vaqtincha uzayishi mumkin. Naproksen natriyning hayot uchun xavfli dozasi noma’lum.

Davolash: Zarurat tug‘ilganda simptomatik terapiya o‘tkaziladi. Toksik dozani qabul qilgandan keyin 1 soat ichida faollashtirilgan ko‘mir qabul qilish kerak, kattalarda muqobil sifatida 1 soat ichida oshqozonni yuvish kerak. Siydikning yaxshi ajralishini ta’minlash kerak. Shifokor jigar va buyrak faoliyatini nazorat qilishi lozim. Toksik dozani qabul qilishda bemorlar kamida 4 soat shifokor nazoratida bo‘lishlari kerak. Uzoq davom etadigan va tez-tez takrorlanadigan talvasalarda diazepam (v/i) buyuriladi. Boshqa davolash choralarini tayinlash bemorning klinik holatiga bog‘liq.

Naproksen natriyning plazma oqsillari bilan yuqori darajada bog‘lanishi tufayli gemodializ uning plazmadagi konsentratsiyasini kamaytirmaydi, biroq buyrak yetishmovchiligi bo‘lgan bemorda naproksen dozasi oshirib yuborilganda, gemodializ baribir samarali bo‘lishi mumkin.

Chiqarish shakli

Aksen FortTM 550 mg tabletkalar, blisterlarda. 1 ta blister (10 ta tabletka) qo‘llash bo‘yicha yo‘riqnoma bilan birgalikda karton qutiga qadoqlangan.

Saqlash shartlari

30 °C dan yuqori bo‘lmagan haroratda, asl qadoqda va bolalar qo‘li yetmaydigan joyda saqlang.

Yaroqlilik muddati

3 yil.

Yaroqlilik muddati tugaganidan keyin ishlatilmasin.

Dorixonalardan berish shartlari

Retsept bo‘yicha.

Ishlab chiqaruvchi

Ali Raif Iloch San. A. SH.

Ikitelli OSB Mahallasi

10. Jadd No3/1A

Bashakshehir/Istanbul/Turkiya

O‘zbekiston Respublikasi hududida dori vositasining sifati bo‘yicha e’tirozlarni (takliflarni) qabul qiluvchi tashkilotning nomi va manzili

"ASFARMA SAVDO" MCHJ

100097 Toshkent shahri, O‘zbekiston

Chilonzor tumani, S mavzesi, 4A-uy

Tel.: (+998-71) 2737095.