Bolalar uchun Nurofen (Nurofen for children) og'iz orqali yuborish uchun qulupnay ta'mi suspenziyasi bilan 100 mg / 5 ml, har biri 150 ml (shisha)

5 мл Нурофен^® для детей суспензияси қуйидагиларни сақлайди:

фаол модда: 100 мг ибупрофен;

ёрдамчи моддалар: 0,5 мг полисорбат 80, 0,5 мл глицерол, 1,625 мл мальтитол сиропи, 10 мг натрий сахаринати, 20 мг лимон кислотаси, 25,45 мг натрий цитрати, 37,5 мг ксантан камеди, 5,5 мг натрий хлориди, 0,5 мг домифен бромиди, 12,5 мг апельсин ароматизатори 2М16014 ёки қулупнай ароматизатори 500244Е, тозаланган сув 5 мл гача.

Сиропсимон консистенцияли, апельсин ёки қулупнай ҳидили, оқ ёки деярли оқ рангли суспензия.

Ичга қабул қилиш учун суспензия (апельсинли, қулупнайли).

Ностероид яллиғланишга қарши препарат (НЯҚП). ATХ коди: М01АЕ01.

Фармакологик хусусиятлари

Фармакодинамикаси

Ностероид яллиғланишга қарши препаратлар (НЯҚП) гуруҳига мансуб бўлган, пропион кислотасининг ҳосиласи ибупрофеннинг таъсир механизми оғриқ, яллиғланиш ва гипертермик реакциянинг медиаторлари - простагландинлар синтезини ингибиция қилишига боғлиқдир. Циклооксигеназа 1 (ЦОГ-1) ва циклооксигеназа 2 (ЦОГ-2) танламай блоклайди, бунинг оқибатида простагландинлар синтезини тормозлайди. Оғриққа қарши тез йўналтирилган (оғриқ қолдирувчи), иситмани туширувчи ва яллиғланишга қарши таъсир кўрсатади. Бундан ташқари, ибупрофен тромбоцитлар агрегациясини қайтувчан ингибиция қилади. Препаратнинг таъсири 8 соатгача давом этади.

Фармакокинетикаси

Сўрилиши - юқори, меъда-ичак йўллари (МИЙ) дан тез ва деярли тўлиқ сўрилади (қон плазмаси оқсиллари билан боғланиши - 90%). Препаратни оч қоринга қабул қилингандан сўнг ибупрофен қон плазмасида 15 минутдан сўнг аниқланади, ибупрофеннинг қон плазмасидаги максимал концентрацияси (С_max) га 60 минутдан кейин эришилади. Препаратни овқат билан бирга қабул қилиш максимал концентрацияга эришиш вақтини (ТС_max) 1-2 соатгача ошириши мумкин. Ярим чиқарилиш даври (Т_1/2) - 2 соат. Бўғимлар бўшлиғига секин киради, плазмадагига нисбатан юқорироқ концентрацияни ҳосил қилиб, синовиал тўқимада тутиб қолинади. Сўрилганидан сўнг фармакологик фаол бўлмаган R-шаклининг тахминан 60% фаол S-шаклига аста-секин айланади. Жигарда метаболизмга учрайди. Буйрак орқали (ўзгармаган ҳолда кўпи билан 1%) ва камроқ даражада сафро билан чиқарилади.

Чекланган тадқиқотларда ибупрофен кўкрак сутида жуда паст концентрацияларда аниқланган.

Нурофен^® для детей суспензияси 3 ойликдан 12 ёшгача бўлган болаларда ўткир респиратор касалликларда (шу жумладан гриппда) иситма туширувчи восита сифатида, болалардаги инфекцияларда, тана ҳароратини ошиши билан кечувчи бошқа инфекцион-яллиғланиш касалликларида ва эмлашдан кейинги реакцияларда симптоматик даволаш учун қўлланади.

Препарат кучсиз ва ўртача оғирликдаги оғриқ синдромида симптоматик оғриқ қолдирувчи восита сифатида, шунингдек тиш оғриғи, бош оғриғи, мигрень, невралгиялар, қулоқлардаги оғриқ, томоқдаги оғриқ, пай чўзилишидаги оғриқлар, мушак оғриқлари, ревматик оғриқлар, бўғимлардаги оғриқларда қўлланади.

Препарат оғриқни камайтириш ва қўллаш вақтидаги яллиғланишни симптоматик даволаш учун мўлжалланган, касалликни ривожланишга таъсир қилмайди.

Нурофен^® для детей - суспензияси болалар учун махсус ишлаб чиқарилган. Ичга қабул қилиш учун буюрилади. Меъдани юқори сезувчанлиги бўлган пациентларга препаратни овқатланиш вақтида қабул қилиш тавсия этилади.

Фақат қисқа муддат қўллаш учун. Препаратни қабул қилишдан олдин йўриқномани диққат билан ўқиб чиқинг.

Истеъмол қилишдан олдин флаконни яхшилаб чайқатинг. Препарат дозасини аниқ ўлчаш учун қулай бўлган ўлчов шприц илова қилинади. 5 мл препарат 100 мг ибупрофен ёки 1 мл 20 мг ибупрофен сақлайди.

Ўлчов шприцини ишлатиш:

Ўлчов шприцини флакон бўйнига зич қўйинг. Флаконни туби билан юқорига айлантиринг ва суспензияни шприцга керакли белгигача тортиб, поршенни пастга аста тортинг. Флаконни олдинги ҳолатига қайтаринг ва шприцни эҳтиёткорлик билан бураб олинг. Шприцни оғиз бўшлиғига жойланг ва суспензияни аста чиқариб поршенни секин босинг.

Истеъмолдан кейин шприцни иссиқ сув билан ювинг ва бола ололмайдиган жойда уни қуритинг.

Иситма ва оғриқ:

Болалар учун дозалаш боланинг ёши ва тана вазнига боғлиқ.

Максимал суткалик доза препаратни қабул қилиш орасидаги интервал 6-8 соат бўлиб, бола тана вазнига 30 мг/кг дан ошмаслиги керак.

3-6 ойлик болалар (бола вазни 5 кг дан 7,6 кг гача): 24 соат давомида 3 марта 2,5 мл (50 мг) дан, лекин суткада 7,5 мл (150 мг) дан ортиқ эмас.

6-12 ойлик болалар (бола вазни 7,7-9 кг): 24 соат давомида 3-4 марта 2,5 мл (50 мг) дан, лекин суткада 10 мл (200 мг) дан ортиқ эмас.

1-3 ёшли болалар (бола вазни 10-16 кг): 24 соат давомида 3 марта 5,0 мл (100 мг) дан, лекин суткада 15 мл (300 мг) дан ортиқ эмас.

4-6 ёшли болалар (бола вазни 17-20 кг): 24 соат давомида 3 марта 7,5 мл (150 мг) дан, лекин суткада 22,5 мл (450 мг) дан ортиқ эмас.

7-9 ёшли болалар (бола вазни 21-30 кг): 24 соат давомида 3 марта 10 мл (200 мг) дан, лекин суткада 30 мл (600 мг) дан ортиқ эмас.

10-12 ёшли болалар (бола вазни 31-40 кг): 24 соат давомида 3 марта 15 мл (300 мг) дан, лекин суткада 45 мл (900 мг) дан ортиқ эмас.

Даволаш давомийлиги - 3 кундан ортиқ эмас. Кўрсатилган дозани оширманг.

Агар препарат қабул қилингандан кейин 24 соат давомида (3-5 ойлик болаларда) ёки 3 кун давомида (6 ойлик ва ундан катта болаларда) симптомлар сақланса ёки кучайса, даволашни тўхтатиш ва шифокорга мурожаат қилиш зарур.

Постиммунизацион иситма:

6 ойликкача бўлган болаларга: 2,5 мл (50 мг) дан препарат. Зарурати бўлганида 6 соатдан кейин яна 2,5 мл (50 мг). 24 соат давомида 5 мл (100 мг) дан ортиқ қабул қилманг.

Агар препаратни қисқа курсларда, симптомларни бартараф этиш учун зарур бўлган минимал самарали дозада қабул қилинса, ножўя самараларни юз бериш хавфини минимумга етказиш мумкин.

Ножўя самаралар асосан дозага боғлиқдир. Қуйида санаб ўтилган ножўя реакциялар ибупрофенни суткада 1200 мг дан ошмайдиган дозаларда қисқа муддат давомида қабул қилинганда аниқланган. Сурункали ҳолатларни даволаганда ва узоқ муддат қўлланганда бошқа ножўя реакциялар пайдо бўлиши мумкин.

Ножўя реакцияларни юз бериш тез-тезлигини баҳолаш қуйидаги мезонларга асосан амалга оширилган: жуда тез-тез (≥1/10), тез-тез (≥1/100 дан <1/10 гача), тез-тез эмас (≥1/1000 дан <1/100 гача), кам ҳолларда (≥1/10000 дан <1/1000 гача), жуда кам ҳолларда (<1/10000), тез-тезлиги номаълум (тез-тезлигини баҳолаш бўйича маълумотлар йўқ).

Қон ва лимфатик тизими томонидан бузилишлар.

Жуда кам ҳолларда: қон яратилишини бузилиши (анемия, лейкопения, апластик анемия, гемолитик анемия, тромбоцитопения, панцитопения, агранулоцитоз). Бундай бузилишларнинг биринчи белгилари бўлиб иситма, томоқда оғриқ, оғиз бўшлиғида юза яралар, гриппсимон симптомлар, кучли ҳолсизлик, бурундан қон кетиш ва тери ости қон қуйилишлари, номаълум этиологияли қон кетишлари ва номаълум этиологияли кўкаришлар ҳисобланади.

Иммун тизими томонидан бузилишлар:

• Тез-тез эмас: юқори сезувчанлик реакциялари - носпецифик аллергик реакциялар ва анафилактик реакциялар, нафас олиш йўллари томонидан реакциялар (бронхиал астма, шу жумладан уни зўрайиши, бронхоспазм, ҳансираш, диспноэ), тери реакциялар (қичишиш, эшакеми, пурпура, Квинке шиши, эксфолиатив ва буллез дерматозлар, шу жумладан токсик эпидермал некролиз, Лайелл синдроми, Стивенс-Джонсон синдроми, кўп шаклли эритема), аллергик ринит, эозинофилия.
• Жуда кам ҳолларда: юқори сезувчанликнинг оғир реакциялари, шу жумладан юз, тил ва ҳиқилдоқ шиши, ҳансираш, тахикардия, артериал гипотензия (анафилаксия, Квинке шиши ёки оғир анафилактик шок).

Меъда-ичак йўллари томонидан бузилишлар:

• Тез-тез эмас: қоринда оғриқ, кўнгил айниши, диспепсия.
• Кам ҳолларда: диарея, метеоризм, қабзият, қусиш.
• Жуда кам ҳолларда: пептик яралар, меъда-ичакдан қон кетиши ёки тешилиши, мелена, қон аралаш қусиш, ярали стоматит, гастрит.
• Тез-тезлиги номаълум: колитни зўрайиши ва Крон касаллиги.

Жигар ва ўт чиқариш йўллари томонидан бузилишлар:

• Жуда кам ҳолларда: жигар фаолиятини бузилиши.

Буйрак ва сийдик чиқариш йўллари томонидан бузилишлар:

• Жуда кам ҳолларда: ўткир буйрак етишмовчилиги (компенсвацияланган ва декомпенсацияланган), айниқса қон плазмасида мочевина концентрациясини ошиши ва шишларни пайдо бўлиши билан бирга узоқ муддат қўлланганда, папилляр некроз.

Нерв тизими томонидан бузилишлар:

• Тез-тез эмас: бош оғриғи.
• Жуда кам ҳолларда: асептик менингит (аутоиммун касалликлари бўлган пациентларда).

Юрак-қон томир тизими томонидан бузилишлар:

• Тез-тезлиги номаълум: юрак етишмовчилиги, периферик шиш, узоқ муддат қўлланганида тромботик асоратлар хавфини ошиши (масалан, миокард инфаркти), артериал босимни ошиши.

Нафас тизими ва кўкс оралиғи аъзолари томонидан бузилишлар:

• Тез-тезлиги номаълум: бронхиал астма, бронхоспазм, ҳансираш.

Бошқалар:

• Жуда кам ҳолларда: шишлар, шу жумладан периферик шиш.

Лаборатория кўрсаткичлари:

• гематокрит ёки гемоглобин (камайиши мумкин);
• қон кетиш вақти (ошиши мумкин);
• қон плазмасида глюкозанинг концентрацияси (пасайиши мумкин);
• креатинин клиренси (камайиши мумкин);
• креатининнинг плазма концентрацияси (ошиши мумкин);
• «жигар» трансаминазалар фаоллиги (ошиши мумкин).

Ножўя самаралар пайдо бўлганида препаратни қабул қилишни тўхтатиш ва шифокорга мурожаат қилиш лозим.

• Препаратнинг таркибига кирувчи ибупрофенга ёки ҳар қандай компонентга юқори сезувчанлик.
• Бронхиал астма, бурун ёки бурун олди бўшлиқларининг қайталанувчи полипози ва ацетилсалицил кислотаси ёки бошқа НЯҚП ни ўзлаштиролмасликни тўлиқ ёки нотўлиқ қўшилиб келиши.
• НЯҚП ни қабул қилиниши оқибатида қўзғалган анамнездаги меъда-ичак йўлларидаги ярадан қон кетиши ёки перфорация.
• Меъда-ичак йўллари аъзоларининг эрозив-ярали касалликлари (шу жумладан меъда ва ўн икки бармоқ ичак яра касаллиги, Крон касаллиги, ярали колит) ёки фаол босқичида ёки анамнезида ярадан қон кетиши (яра касалликлари ёки ярадан қон кетишининг икки ёки ундан ортиқ шикастланган эпизодлари).
• Оғир жигар етишмовчилиги ёки фаол фазадаги жигар касаллиги.
• Оғир даражадаги буйрак етишмовчилиги (креатинин клиренси <30 мл/мин), тасдиқланган гиперкалиемия.
• Декомпенсацияланган юрак етишмовчилиги, аортокоронар шунтлаш ўтказилгандан кейинги давр.
• Цереброваскуляр ёки бошқа қон кетишлари.
• Гемофилия қон ивишининг бошқа бузилишлари (шу жумладан гипокоагуляция), геморрагик диатезлар.
• Ҳомиладорлик (III уч ойлик).
• Фруктозани ўзлаштиролмаслик.
• Тана вазни 5 кг гача бўлган болаларда қўллаш мумкин эмас.

Ушбу бўлимда кўрсатилган ҳолатлар бўлганида, препаратни қўллашдан олдин шифокор билан маслаҳатлашиш керак.

Бошқа НЯҚП ни бир вақтда қабул қилиш, анамнезда меъда яра касаллиги ёки МИЙ да ярадан қон кетишининг бир марталик эпизоди бўлган бўлса; гастрит, энтерит, колит, Helicobacter pylori инфекциясини борлиги, ярали колит; бронхиал астма ёки зўрайиш босқичидаги ёки анамнездаги аллергик касалликлар - бронхоспазм ривожланиши мумкин; тизимли қизил югурик ёки бириктирувчи тўқиманинг аралаш касаллиги (Шарп синдроми) -асептик менингитни хавфи ошади; буйрак етишмовчилиги, шу жумладан сувсизланганда (креатинин клиренси минутига 30-60 мл дан кам), нефротик синдром, жигар етишмовчилиги, портал гипертензия билан кечувчи жигар циррози, гипербилирубинемия, артериал гипертензия ва/ёки юрак етишмовчилиги, цереброваскуляр касалликлар, ноаниқ этиологияли қон касалликлари (лейкопения ва анемия), оғир соматик касалликлар, дислипидемия/гиперлипидемия, қандли диабет, периферик артерияларнинг касалликлари, чекиш, алкоголни тез-тез истеъмол қилиш, яраларни ёки қон кетишларини юз бериш хавфини ошириши мумкин бўлган дори воситаларини, хусусан, перорал глюкокортикостероидлар (шу жумладан преднизолонни), антикоагулянтлар (шу жумладан варфарин), серотонинни қайта қамраб олинишининг селектив ингибиторлари (шу жумладан циталопрам, флуоксетин, пароксетин, сертралин) ёки антиагрегантларни (шу жумладан ацетилсалицил кислотаси, клопидогрелни) бир вақтда қабул қилиш, ҳомиладорлик I-II уч ойлик, эмизиш даври, кекса ёшдаги пациентлар.

• Ибупрофенни қуйидаги дори воситалари билан бир вақтда қўллашга йўл қўймаслик керак:
• Ацетилсалицил кислотаси: шифокор томонидан буюрилган ацетилсалицил кислотасининг паст дозалари (кўпи билан суткада 75 мг) дан ташқари, чунки бирга қўллаш ножўя самараларни юз бериш хавфини ошириши мумкин. Бир вақтда қўлланганда ибупрофен ацетилсалицил кислотасининг яллиғланишга қарши ва антиагрегант таъсирини пасайтиради (антиагрегант восита сифатида ацетилсалицил кислотасининг кичик дозаларини қабул қилаётган пациентларда, ибупрофенни қабул қилиш бошлангандан кейин ўткир коронар етишмовчиликни ривожланиш тезлиги ошиши мумкин).
• Бошқа НЯҚП, шу жумладан ЦОГ-2 нинг селектив ингибиторлари: НЯҚП гуруҳига мансуб икки ва ундан ортиқ препаратларни бир вақтда қўллашдан, ножўя самараларни юз бериш хавфи ошиши мумкинлиги туфайли бир вақтда қўллашдан сақланиш керак.

Қуйидаги дори воситалари билан бир вақтда эҳтиёткорлик билан қўллаш керак:

• Антикоагулянтлар ва тромболитик препаратлар: НЯҚП антикоагулянтларнинг, хусусан, варфариннинг ва тромболитик препаратларнинг самарасини кучайтириши мумкин.
• Антигипертензив воситалар (ААФ ингибиторлари ва ангиотензиа II антагонистлари) ва диуретиклар: НЯҚП бу гуруҳ препаратларнинг самарадорлигини пасайтириши мумкин. Диуретиклар ва ААФ ингибиторлари НЯҚП нинг нефротоксиклигини ошириши мумкин.
• Глюкокортикостероидлар: МИЙ да яраларни ҳосил бўлиш ва меъда-ичак йўлларидан қон кетишлари хавфи ошади.
• Антиагрегантлар ва серотонинни қайта қамраб олинишининг селектив ингибиторлари: меъда-ичак йўлларидан қон кетишларини юз бериш хавфи ошади.
• Юрак гликозидлари: НЯҚП ва юрак гликозидларини бир вақтда буюрилиши юрак етишмовчилигини оғирлашишига, буйрак калавалари фильтрацияси тезлигини пасайишига ва қон плазмасида юрак гликозидларининг концентрациясини ошишига олиб келиши мумкин.
• Литий препаратлари: НЯҚП ни қўллаш фонида қон плазмасида литийнинг концентрациясини ошиш эҳтимоли тўғрисида маълумотлар мавжуд.
• Метотрексат: НЯҚП ни қўллаш фонида қон плазмасида метотрексататнинг концентрациясини ошиш эҳтимоли тўғрисида маълумотлар мавжуд.
• Циклоспорин: НЯҚП ва циклоспоринни бир вақтда буюрилганда нефротоксиклик хавфи ошади.
• Мифепристон: НЯҚП ни қабул қилишни, мифепристон қабул қилингандан кейин камида 8-12 кундан сўнг бошлаш лозим, чунки НЯҚП мифепристоннинг самарадорлигини пасайтириши мумкин.
• Такролимус: НЯҚП ва такролимус бир вақтда буюрилганда нефротоксиклик хавфи ошиши мумкин.
• Зидовудин: НЯҚП ва зидовудинни бир вақтда қўлланиши гепатотоксикликни ошишига олиб келиши мумкин. Зидовудин ва ибупрофенни бирга қўллаб даволанган гемофилияси бўлган, ОИТВ-мусбат пациентларда гемартроз ва гематомаларни юз беришининг юқори хавфи тўғрисида маълумотлар мавжуд.
• Хинолон қатори антибиотиклари: НЯҚП ва хинолон қатори антибиотикларини бирга қабул қилаётган пациентларда тиришишларни юз бериш хавфи ошиши мумкин.

Препаратни максимал равишда иложи борича қисқа курсларда ва симптомларни бартараф этиш учун зарур бўлган минимал самарали дозада қабул қилиш тавсия этилади.

Узоқ муддатли даволаниш вақтида периферик қон манзарасини ва жигар ҳамда буйракнинг функционал ҳолатини назорат қилиш керак. Гастропатия белгилари пайдо бўлганида эзофагогастродуоденоскопия, қон умумий таҳлилини (гемоглобин миқдорини аниқлаш), аҳлатда яширин қон борлиги юзасидан таҳлилини ўз ичига олувчи синчков назорат кўрсатилган. 17-кетостероидларни аниқлаш зарурати туғилганида, текширишдан 48 соат олдин препаратни бекор қилиш керак. Даволаниш даврида этанолни қабул қилиш тавсия этилмайди. Препарат таркибида мальтитол бўлганлиги сабабли фруктозани ўзлаштираолмаслиги бўлган пациентларда қўллаш мумкин эмас.

Нурофен^® для детей препаратни қандли диабети бўлган болаларда қўллаш мумкин, чунки препарат қанд сақламайди. Бўёвчилар сақламайди.

Буйрак етишмовчилиги бўлган пациентлар препаратни қўллашдан олдин шифокор билан маслаҳатлашишлари лозим, чунки буйракнинг функционал ҳолатини ёмонлашиш хавфи мавжуд бўлади.

Гипертонияси, шу жумладан анамнезида гипертонияси ва/ёки сурункали юрак етишмовчилиги бўлган пациентлар препаратни қўллашдан олдин шифокор билан маслаҳатлашишлари лозим, чунки препарат организмда суюқликни тутилишини, артериал босимни ошишини ва шишларни чақириши мумкин.

Ҳомиладорликда ва эмизиш даврида қўлланилиши

Препаратни ҳомиладорликнинг III уч ойлигида қўллаш мумкин эмас. Препаратни ҳомиладорликнинг I-II уч ойликларида ёки эмизиш даврида қўллашдан олдин шифокор билан маслаҳатлашиш лозим. Ибупрофен оз миқдорда кўкрак сутига ўтиши тўғрисида маълумотлар бор, бу эмизикли боланинг соғлиғига салбий таъсир кўрсатмайди.

Транспортни ва бошқа потенциал хавфли механизмларни бошқариш қобилиятига таъсири

Ибупрофенни қабул қилганда бош айланиши, уйқучанлик, тормозланиш ёки кўришни бузилишини ҳис этувчи пациентлар автотранспортни ҳайдаш ёки механизмларни бошқаришдан сақланишлари лозим.

Препарат болалар ололмайдиган жойда сақлансин ва яроқлилик муддати ўтгач қўлланилмасин.

Болаларда дозани ошириб юбориш симптомлари тана вазнига 400 мг/кг дан ортиқ дозани қабул қилгандан кейин юз бериши мумкин. Катталарда дозани ошириб юбориш симптомларини дозага боғлиқлиги камроқ намоён бўлади. Доза ошириб юбоилганда препаратни ярим чиқарилиш даври 1,5-3 соатни ташкил этади.

Симптомлари: кўнгил айниши, қусиш, эпигастрал соҳада оғриқ, камроқ ҳолларда - диарея, қулоқни шанғиллаши, бош оғриғи, меъда-ичакдан қон кетиши. Оғирроқ ҳолларда марказий нерв тизими томонидан кўринишлар: уйқучанлик, кам ҳолларда - қўзғалиш, тиришишлар, дезориентация, кома кузатилади. Оғир заҳарланиш ҳолларида метаболик ацидоз ва протромбин вақтини ошиши, буйрак етишмовчилиги, жигар тўқимасини шикастланиши, артериал босимни пасайиши, нафасни сусайиши ва цианоз ривожланиши мумкин. Бронхиал астмаси бўлган пациентларда бу касаллик зўрайиши мумкин.

Даволаш: нафас йўлларининг ўтказувчанлигини таъминлаш шарти, ЭКГ ва ҳаёт фаолиятининг асосий кўрсаткичларини пациентнинг ҳолати нормаллашгунига қадар мониторингини ўтказиш билан симптоматик бўлиши керак. Фаоллаштирилган кўмирни перорал қўллаш ёки ибупрофеннинг потенциал токсик дозаси қабул қилингандан кейин 1 соатдан сўнг меъдани ювиш тавсия этилади. Агар ибупрофен сўрилиб бўлган бўлса, ибупрофеннинг кислотали ҳосиласини буйрак орқали чиқариш мақсадида ишқорий суюқликларни ичиш, жадаллаштирилган диурез буюрилиши мумкин. Тез-тез кузатиладиган ёки давомли тиришишларни диазепам ёки лоразепамни вена ичига юбориб бартараф этиш керак. Бронхиал астмани кечиши ёмонлашганда бронходилататорларни қўллаш тавсия этилади.

Ичга қабул қилиш учун суспензия (апельсинли, қулупнайли) 100 мг/5 мл.

Паст зичликдаги полиэтилен ёки полипропилен прокладка қопқоқчали 100 мл, 150 мл ёки 200 мл суспензия сақловчи полиэтилентерефталат флакон.

Ҳар бир флакон шприц-дозатор билан мажмуада қўллаш бўйича йўриқномаси билан бирга картон қутига жойланади.

Қуруқ, 25 °C дан юқори бўлмаган ҳароратда.

3 йил.

Флакон очилгандан кейигн 6 ой давомида ишлатилсин.

Рецептсиз.

Рекитт Бенкизер Хелскэр Интернешнл Лтд, Тейн Роуд, Ноттингем, NG90 2DB, Буюк Британия.

БСМ Лтд, Тейн Роуд, Ноттингем, NG2 3AA, Буюк Британия.

Рекитт Бенкизер Хелскэр (Буюк Британия) Лимитед, Дэнсом Лейн, Халл, Ист Йоркшир, ХЮ8 7ДС, Буюк Британия.

Россиядаги ваколатхонаси/Истеъмолчиларнинг эътирозларини қабул қилувчи ташкилот

«Рекитт Бенкизер Хэлскэр» МЧЖ

Россия, 115114, Москва, Кожевническая кўч., 14 уй

Тел.: 8-800-505-1-500 (Россия бўйича қўнғироқлар бепул),

contact_ru@reckittbenckiser.com