9 Месяцев

Tarkib

1 tabletka quyidagilarni o‘z ichiga oladi: ta’sir etuvchi modda: folat kislotasi - 0,0004 g (400 mkg);

yordamchi moddalar: laktoza monogidrati, kolloid kremniy dioksidi, kopovidon, magniy stearati; qobiq: Opadray II 85F22233: qisman gidrolizlangan polivinil spirti, makrogol, talk, titan dioksidi E 171, temir oksidi sariq bo‘yog‘i E 172, xinolin sariq bo‘yog‘i asosidagi alyuminiy lok E 104.

Tavsif

Yumaloq, ikki tomoni qavariq, sariq rangli parda bilan qoplangan tabletkalar. Ko‘ndalang kesimda yadrosi och sariq rangda, xol-xol bo‘lib ko‘rinadi.

Dori shakli

Plyonkali qobiq bilan qoplangan tabletkalar.

Farmakoterapevtik guruh

Vitamin. ATX kodi: V03VV01.

Farmakologik xususiyatlari

Farmakodinamika

B guruhi vitamini (Vs vitamini, V9 vitamini) ichak mikroflorasi tomonidan sintezlanishi mumkin. Organizmda folat kislotasi turli metabolik jarayonlarda ishtirok etuvchi koenzim bo‘lgan tetragidrofolat kislotasigacha qaytariladi. Megaloblastlarning normal yetilishi va normoblastlarning hosil bo‘lishi uchun zarur. Eritropoezni rag‘batlantiradi, aminokislotalar (shu jumladan glitsin, metionin), nuklein kislotalar, purinlar, pirimidinlar sintezida, xolin, gistidin almashinuvida ishtirok etadi.

Farmakokinetika

Folat kislotasi me’da-ichak yo‘lida, asosan o‘n ikki barmoqli ichakning yuqori bo‘limlarida yaxshi va to‘liq so‘riladi. Deyarli to‘liq plazma oqsillari bilan bog‘lanadi. Jigarda digidrofolatreduktaza fermenti ta’sirida faollashib, tetragidrofolat kislotaga aylanadi. Qon plazmasidagi maksimal konsentratsiyasiga (Cmax) 30-60 daqiqadan so‘ng erishiladi. Gematoensefalik va platsentar to‘siqlar orqali o‘tib, ko‘krak sutiga o‘tadi. Buyraklar orqali asosan metabolitlar ko‘rinishida chiqariladi; agar qabul qilingan doza folat kislotasiga bo‘lgan sutkalik ehtiyojdan ancha ko‘p bo‘lsa, u holda o‘zgarmagan holda chiqariladi. Gemodializ yordamida chiqariladi.

Qo‘llanilishi

Folat kislotasi yetishmovchiligi. Homiladorlikning I trimestrida homilada nerv nayi nuqsonlari rivojlanishining oldini olish.

Qo‘llash usuli va dozalari

Ovqatdan keyin ichiladi. Folat kislotasi yetishmovchiligida - kuniga 400 mkg (1 tabletka). Homiladorlikning 1-trimestrida homilada nerv nayi nuqsonlari rivojlanishining oldini olish uchun - 400 mkg - 800 mkg (1-2 tabletka).

Nojo‘ya ta’sirlari

Allergik reaksiyalar (teri toshmasi, qichishish, bronxospazm, eritema, gipertermiya); oshqozon-ichak yo‘li tomonidan: ko‘ngil aynishi, qorin dam bo‘lishi, og‘izda achchiq ta’m, anoreksiya. Uzoq muddat qo‘llanganda B12 gipovitaminozi rivojlanishi mumkin.

Qarshi ko‘rsatmalar

Preparat tarkibiga kiruvchi komponentlarga yuqori sezuvchanlik; pernitsioz anemiya, xavfli o‘smalar, kobalamin yetishmovchiligi, bolalik davri.

Dozani oshirib yuborish

Folat kislotasini kuniga 1000 mkg dan ortiq dozalarda uzoq vaqt (1-2 oydan ortiq) qabul qilganda va vitamin-mineral komplekslari bilan birgalikda qo‘llash natijasida yuzaga kelishi mumkin.

Ehtiyot choralari va qo‘llash xususiyatlari

Gipovitaminozning oldini olish uchun muvozanatli ovqatlanish eng ma’qul hisoblanadi. Folat kislotasiga boy mahsulotlar - yashil sabzavotlar (salat, ismaloq, pomidor, sabzi), yangi jigar, dukkaklilar, lavlagi, tuxum, pishloq, yong‘oq, boshoqli o‘simliklar.

Folat kislotasi B12-defitsitli (pernitsioz), normotsitar va aplastik kamqonliklarni, shuningdek, terapiyaga refrakter kamqonlikni davolash uchun qo‘llanilmaydi. Pernitsioz (B12-tanqisligi) anemiyasida folat kislotasi gematologik ko‘rsatkichlarni yaxshilab, nevrologik asoratlarni niqoblaydi. Pernitsioz anemiya istisno qilinmagan bo‘lsa, folat kislotasini kuniga 0,1 mg dan ortiq dozalarda buyurish tavsiya etilmaydi (homiladorlik va laktatsiya davri bundan mustasno).

Shuni nazarda tutish kerakki, gemodializda bo‘lgan bemorlar folat kislotasining yuqori miqdoriga muhtoj bo‘ladilar.

Davolash vaqtida antatsidlarni folat kislotasini qabul qilgandan 2 soat o‘tgach, kolistiraminni folat kislotasini qabul qilishdan 4-6 soat oldin yoki 1 soat o‘tgach qo‘llash kerak. Shuni nazarda tutish kerakki, antibiotiklar plazma va eritrotsitlar folat kislotasi konsentratsiyasini mikrobiologik baholash natijalarini buzishi (aniq past ko‘rsatkichlarni berishi) mumkin.

Folat kislotasining katta dozalari qo‘llanganda, shuningdek, uzoq vaqt davomida terapiya o‘tkazilganda B12 vitamini konsentratsiyasining pasayishi mumkin.

Homiladorlik va laktatsiya davri

Folat kislotasi homiladorlikka tayyorgarlik davrida (rejalashtirilgan homiladorlik vaqtidan 1-3 oy oldin) va homiladorlikdan keyingi dastlabki bir necha haftalarda (I trimestr) zarur.

Boshqa dorilar bilan o‘zaro ta’siri, boshqa o‘zaro ta’sirlar

Fenitoin ta’sirini pasaytiradi (uning dozasini oshirish talab etiladi). Analgetiklar (uzoq muddatli terapiya), tutqanoqqa qarshi dorilar (shu jumladan fenitoin va karbamazepin), estrogenlar, peroral kontratseptivlar folat kislotasiga bo‘lgan ehtiyojni oshiradi. Antatsidlar, kolistiramin, sulfonaminlar (shu jumladan sulfasalazin) folat kislotasining so‘rilishini kamaytiradi. Metotreksat, pirimetamin, triamteren, trimetoprim digidrofolatreduktazani ingibirlaydi va folat kislotasining ta’sirini kamaytiradi (uning o‘rniga bu preparatlarni qo‘llovchi bemorlarga kalsiy folinat buyurilishi kerak). Xloramfenikol, neomitsin, polimiksinlar, tetratsiklinlar bilan bir vaqtda qo‘llanganda folat kislotasining so‘rilishi pasayadi.

Chiqarilish shakli va qadoqlash

Plyonkali qobiq bilan qoplangan tabletkalar, 400 mkg. 10 tadan tabletka konturli yacheykali o‘ramga yoki polivinilxlorid plyonkasi va laklangan alyuminiy bosma folgasidan tayyorlangan perforatsiyali konturli yacheykali o‘ramga solinadi. 3, 6, 9 tadan konturli o‘ramlar qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlang. Bolalar qo‘li yetmaydigan joyda saqlang.

Yaroqlilik muddati

3 yil.

Yaroqlilik muddati tugaganidan keyin ishlatilmasin.

Dorixonalardan berish shartlari

Retseptsiz beriladi.

Ishlab chiqaruvchi

"Valenta Farm" AJ 141101, Rossiya, Moskva viloyati, Shchelkovo shahri, Fabrika ko‘chasi, 2-uy. Tel. +7 (495) 933 48 62, faks +7 (495) 933 48 63.