Pantenol

Tarkib

Ta’sir etuvchi moddasi: dekspantenol - 5,0 g.

Yordamchi moddalar: vazelin - 25,0 g, suvsiz lanolin - 15,0 g, suyuq parafin (vazelin moyi) - 10,0 g, emulsion mum - 3,0 g, setostearil spirti - 1,65 g, metilparagidroksibenzoat (nipagin) - 0,2 g, tozalangan suv - 40,15 g.

Tavsif

Surtma och sariq rangda, sarg‘ish-jigarrangdan yashil-jigarranggacha bo‘lishi mumkin, lanolinning o‘ziga xos hidi bor.

Chiqarish shakli

Sirtga qo‘llash uchun 5% li surtma.

Farmakoterapevtik guruh

To‘qimalar reparatsiyasi stimulyatori. Dekspantenol. ATX kodi: D03AX03.

Farmakologik xususiyatlari

Farmakodinamika

Dekspantenol - pantoten kislotasining hosilasi bo‘lib, u uglevod, oqsil va yog‘ almashinuvi uchun A kofermentining tarkibiy qismi sifatida zarur bo‘lgan suvda eriydigan B guruhi vitamini (B 5 vitamini) hisoblanadi. Teri regeneratsiyasini rag‘batlantiradi, hujayra metabolizmini me’yorlashtiradi, kollagen tolalarining mustahkamligini oshiradi. Regenerativ, kuchsiz yallig‘lanishga qarshi ta’sir ko‘rsatadi, terini oziqlantiradi va yumshatadi. Yordamchi moddalar malhamning terapevtik xususiyatini yaxshilaydi.

Farmakokinetika

Dekspantenol sirtga qo‘llanganda tez adsorbsiyalanadi va pantoten kislotaga aylanadi, qon plazmasi oqsillari (asosan beta-globulin va albumin) bilan bog‘lanadi. Pantoten kislotasining qondagi konsentratsiyasi 0,5-1 mg/l, qon plazmasida 100 mkg/l ni tashkil etadi. Pantotenat kislota organizmda metabolizmga uchramaydi va buyraklar orqali o‘zgarmagan holda chiqariladi.

Ko‘rsatmalar

Mexanik, kimyoviy, harorat omillari yoki jarrohlik aralashuvlaridan keyin yuzaga keladigan teri butunligining buzilishi:

kelib chiqishi turlicha bo‘lgan kuyishlar (shu jumladan quyoshdan);

tirnalishlar, shilinishlar, yaralar, yotoq yaralari;

operatsiyadan keyingi yaxshi bitmaydigan aseptik jarohatlar;

dermatitlar, chipqonlar, oyoqlarning trofik yaralari;

laktatsiya davrida sut bezi so‘rg‘ichlarining yorilishi va yallig‘lanishini davolash va oldini olish;

bolalarni parvarish qilish: emizikli bolalarda kuyishning oldini olish va davolash, mayda shikastlanishlarda terining bitish jarayonini faollashtirish, yo‘rgak dermatiti;

quruq terini ishlov berish va himoya qilish uchun;

tashqi muhit omillarining (sovuq, shamol, namlik) teriga salbiy ta’siri oqibatlarini davolash va oldini olish.

Qarshi ko‘rsatmalar

Preparat komponentlariga yuqori sezuvchanlik.

Qo‘llash usuli va dozalari

Tashqarida. Surtma zararlangan joyga yupqa qatlam qilib, yengil ishqalab, sutkada 2-4 marta (zarur bo‘lsa, tez-tez) surtiladi. Infeksiyalangan teri yuzasiga surtilgan taqdirda, uni oldindan har qanday antiseptik bilan ishlov berish kerak. Emizikli onalar har bir emizishdan so‘ng ko‘krak uchi yuzasiga malham surtishlari lozim.

Emizikli bolalarga malham har gal kir almashtirgandan yoki suv muolajasidan keyin surtiladi. Preparatni qo‘llash davomiyligi bemorda kasallik kechishining individual xususiyatlariga bog‘liq bo‘lib, erishilgan terapevtik samara va preparatning o‘zlashtirilishi bilan belgilanadi.

Agar davolanishdan so‘ng ahvol yaxshilanmasa yoki yangi alomatlar paydo bo‘lsa, shifokor bilan maslahatlashish zarur.

Preparatni faqat yo‘riqnomada ko‘rsatilgan qo‘llash usuli va dozalari bo‘yicha qo‘llang. Zarur hollarda, iltimos, dori vositasini qo‘llashdan oldin shifokor bilan maslahatlashing.

Nojo‘ya ta’sirlari

Allergik reaksiyalar (shu jumladan, tarkibida metilparagidroksibenzoat mavjudligi sababli sekinlashgan) - eshakemi, qichishish.

Dozani oshirib yuborish

Preparat dozasini oshirib yuborish holatlari kuzatilmadi.

O‘zaro aloqa

Boshqa preparatlar bilan o‘zaro ta’siri aniqlanmagan.

Maxsus ko‘rsatmalar

Ho‘l yaralarga surtilmaydi.

Preparatning ko‘zga tushishidan saqlanish kerak. Trofik yaralar va yaxshi bitmaydigan transplantatlarni davolash davolovchi shifokor nazorati ostida olib borilishi kerak.

Preparatni qo‘llashni boshlashdan oldin yo‘riqnomani diqqat bilan o‘qib chiqing. Yo‘riqnomani saqlab qo‘ying, u yana kerak bo‘lishi mumkin.

Savollaringiz bo‘lsa, shifokorga murojaat qiling.

Siz davolanayotgan dori vositasi shaxsan sizga mo‘ljallangan bo‘lib, boshqa shaxslarga bermaslik kerak, chunki u sizdagi kabi alomatlar mavjud bo‘lganda ham ularga zarar yetkazishi mumkin.

Homiladorlik va laktatsiya

Pantenolni homiladorlik va emizish davrida qo‘llash mumkin.

Transport vositalari va mexanizmlarni boshqarish qobiliyatiga ta’siri

Preparat transport vositalarini boshqarish va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanish qobiliyatiga ta’sir ko‘rsatmaydi.

Qadoq

Sirtga qo‘llash uchun surtma 5% li alyuminiy tubalarda 25,0 g dan bushonlar bilan; 30,0 g yoki 50,0 g. Har bir tuba tibbiy qo‘llash bo‘yicha yo‘riqnoma bilan birga karton qutiga solinadi.

Saqlash shartlari

25 °C dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

3 yil. Yaroqlilik muddati tugaganidan keyin ishlatilmasin.

Dorixonalardan berish shartlari

Retseptsiz.

Ro‘yxatdan o‘tish guvohnomasi egasi

ZELENAYA DUBRAVA YoAJ Rossiya.

Ishlab chiqaruvchi

ZELENAYA DUBRAVA YoAJ Rossiya.