Pentaza

Tarkib

Ichakda eriydigan qobiq bilan qoplangan 1 tabletka quyidagilarni o‘z ichiga oladi:

faol modda: pantoprazol (pantoprazol natriy seskvigidrat ko‘rinishida) - 40 mg;

yordamchi moddalar: laktoza, makkajo‘xori kraxmali, mikrokristall sellyuloza, natriy metilparaben, magniy stearat, talk, kremniy dioksidi, natriy kraxmal glikolatlar;

qobiq tarkibi: izopropil spirti, metilen xlorid, sariq bo‘yoq, titan dioksidi.

Tavsif

Sariq rangli, dumaloq shaklli, ikki tomoni qavariq, qobiq bilan qoplangan tabletkalar.

Dori shakli

Ichakda eruvchi qobiq bilan qoplangan tabletkalar.

Farmakoterapevtik guruh

Yaraga qarshi vosita (proton nasosi ingibitori). ATX kodi: A02BC02.

Farmakologik xususiyatlari

Pantoprazol oshqozon sekretsiyasining blokatori bo‘lib, pariyetal hujayralardan xlorid kislota sekretsiyasini pasaytiradi, H+, K+ ATF-aza proton nasosini, xlorid kislota sekretsiyasining yakuniy bosqichini katalizlovchi fermentni ingibirlaydi. Shu bilan birga, preparat kislotaning ham asosiy, ham rag‘batlantirilgan (stimul tabiatidan qat’i nazar) sekretsiyasini ingibirlashga yordam beradi. Bir marta qabul qilingandan so‘ng kislota sekretsiyasini ingibirlash 24-72 soat davom etadi. Preparatni qabul qilish to‘xtatilganda, sekretor faollik 7 kundan keyin asta-sekin dastlabki holatiga qaytadi. Pepsin sekretsiyasini susaytirmaydi, zardobdagi gastrin darajasini oshiradi, u odatda preparat bilan davolash to‘xtatilgandan keyin 1-2 hafta ichida dastlabki qiymatga qaytadi. Antibiotiklarning xelikobakterlarga qarshi ta’sirini namoyon qilishga yordam beradi.

Farmakokinetika

Pantoprazol ichga qabul qilingandan so‘ng tez so‘riladi. Qon plazmasidagi maksimal konsentratsiyaga (Smax) birinchi 20 mg yoki 40 mg dozadan keyin erishiladi. O‘rtacha Smax 1,0-1,5 mkg/ml ga 20 mg dozada 2-2,5 soatdan keyin va 2,0-3,0 mkg/ml ga 40 mg dozada 2,5 soatdan keyin erishiladi. Bu ko‘rsatkich ushbu preparatni ko‘p marta qo‘llagandan so‘ng doimiy bo‘lib qoladi.

Taqsimlanish hajmi (Vd) 0,15 l/kg, klirens 0,1 l/soat/kg ni tashkil etadi.

Preparatning yarim chiqarilish davri (T1/2) - 1 soat.

Farmakokinetikasi preparatni bir marta va ko‘p marta qo‘llagandan keyin bir xil.

Qon plazmasi oqsillari bilan bog‘lanishi 98%. Jigarda metabolizmga uchraydi. Asosiy chiqarish yo‘li buyraklar orqali (taxminan 80%) pantoprazol metabolitlari ko‘rinishida, oz miqdorda najas bilan chiqariladi. Qon plazmasi va siydikdagi asosiy metaboliti sulfat bilan konyugatsiyalanuvchi desmetilpantoprazoldir.

Mutlaq biosinguvchanligi - 77%. Ularni ovqat bilan bir vaqtda qo‘llash "konsentratsiya-vaqt" egri chizig‘i ostidagi maydon (AUC) va Smmax ga ta’sir qilmaydi.

Buyrak faoliyati cheklangan bemorlarda (jumladan, gemodializda bo‘lgan bemorlarda) preparatni qo‘llashda dozani kamaytirish talab etilmaydi. Sog‘lom bemorlarda bo‘lgani kabi, pantoprazolning T1/2 qisqa bo‘ladi. Preparatning juda oz qismi dializlanadi. Preparat organizmda to‘planmaydi.

Jigar sirrozi bilan og‘rigan bemorlarda (Child tasnifi bo‘yicha A va V sinflar) T1/2 qiymati 20 mg dozada qo‘llanilganda 3-6 soatgacha, 40 mg dozada qo‘llanilganda esa 7-9 soatgacha oshadi. AUC ko‘rsatkichi 3-5 marta (20 mg dozada) va 5-7 marta (40 mg dozada) oshadi. Smax sog‘lom bemorlarga nisbatan 1,3 marta (20 mg dozada) va 1,5 marta (40 mg dozada) oshadi.

Keksa odamlarda AUC va Cmax ko‘rsatkichlarining biroz oshishi klinik ahamiyatga ega emas.

Qo‘llanilishi

Oshqozon va o‘n ikki barmoqli ichak yarasi, shu jumladan gistamin H2-retseptorlari antagonistlariga chidamli, nosteroid yallig‘lanishga qarshi vositalar bilan davolash natijasida yuzaga kelgan eroziv-yarali shikastlanishlar, reflyuks-ezofagit, Zollinger-Ellison sindromining oldini olish va davolash. Antibiotiklar bilan birgalikda oshqozon va o‘n ikki barmoqli ichak yarasi bilan og‘rigan bemorlarda antixelikobakter eradikatsion terapiya.

Qo‘llash usuli va dozalari

Ichga, ovqatdan oldin (odatda ertalab), oz miqdordagi suyuqlik bilan ichiladi. Me’da yarasi va reflyuks-ezofagitni simptomatik davolash: tavsiya etilgan doza 2-4 hafta davomida har kuni 20-40 mg qabul qilishdir. Dastlabki kursdan keyin to‘liq tuzalmagan va boshqa davolash turlariga chidamli bemorlar uchun preparat dozasi kuniga 40 mg gacha oshiriladi va davolash yana 4 hafta davom ettiriladi. Davolash kursining davomiyligi ko‘rsatmalarga qarab belgilanadi, lekin u 8 haftadan oshmasligi kerak.

Duodenal yarada: odatdagi doza 20-40 mg har kuni, 2 hafta davomida. Dastlabki kursdan keyin to‘liq tuzalmagan bemorlar uchun davolash keyingi 4 haftaga uzaytiriladi. Yaraning yomon bitishida boshlang‘ich doza 40 mg va davolashning 4 haftalik davomiyligi tavsiya etiladi. Yara qaytalanishi va reflyuks-ezofagitning oldini olish uchun kuniga 10-40 mg doza tavsiya etiladi.

Preparat bilan uzoq vaqt uzluksiz davolash tavsiya etilmaydi.

Zollinger-Ellison sindromida: tavsiya etilgan boshlang‘ich doza 40 mg, har kuni. Individual ravishda dozani kuniga 240 mg gacha oshirish mumkin (bunda u ikki qabulga bo‘linadi), davolash davomiyligi esa kasallik belgilari dinamikasiga bog‘liq.

Helicobacter pylori ga qarshi bakteritsid ta’sirga erishish uchun preparat 40 mg dozada kuniga ikki marta tegishli antibiotiklar (amoksitsillin, klaritromitsin, tetratsiklin va boshqalar) bilan 7 yoki 14 kun davom etadigan turli sxemalarda qabul qilinadi. Yaraning to‘liq bitishi uchun, ikki yoki uch martalik davolash tugagandan so‘ng, antatsidlar bilan qo‘shimcha davolash kerak bo‘lishi mumkin.

Nosteroid yallig‘lanishga qarshi dorilarni qabul qilish natijasida yuzaga kelgan yarada pantoprazolning tavsiya etilgan dozasi kuniga 20-40 mg ni tashkil etadi.

Nojo‘ya ta’sirlari

Preparat odatda juda yaxshi o‘zlashtiriladi. Ba’zi hollarda (taxminan 1%) quyidagilar kuzatilishi mumkin:

Asab tizimi tomonidan: bosh og‘rig‘i, bosh aylanishi, uyquchanlik, uyqusizlik, lohaslik hissi, paresteziyalar, ayrim hollarda depressiya va gallyutsinatsiyalar (moyil bemorlarda).

Oshqozon-ichak va jigar tomonidan: kolit, diareya, qorin og‘rig‘i, ko‘ngil aynishi, qusish, meteorizm, ta’m bilish sezgisining o‘zgarishi, stomatit, bilirubin miqdori oshishi va oshmasligi bilan jigar fermentlari faolligining oshishi, glikozuriya, giperbilirubinemiya.

Nafas olish tizimi tomonidan: laringit, kamdan-kam hollarda bronxospazm, bronxial astma.

Tayanch-harakat tizimi tomonidan: artralgiya, mialgiya, mushaklar kuchsizligi.

Qon yaratish tizimi tomonidan: ayrim hollarda - anemiya.

Teri reaksiyalari: teri toshmasi, eshakemi va/yoki qichishish, ko‘p shaklli eritema.

Boshqa reaksiyalar: ayrim hollarda - periferik shishlar, ko‘rishning buzilishi, gematuriya, impotensiya, terlashning kuchayishi, isitma, buyrak og‘riqlari.

Qarshi ko‘rsatmalar

Preparatga yuqori sezuvchanlik, nevrotik turdagi dispepsiya, oshqozon-ichak tizimining xavfli kasalliklari, buyrak va jigar faoliyatining yaqqol buzilishlari, homiladorlik, laktatsiya, 12 yoshgacha bo‘lgan bolalar.

Dozani oshirib yuborish

Preparatni bir marta 400 mg gacha qabul qilish hech qanday xavfli alomatlarning rivojlanishiga olib kelmaydi. Doza yanada oshib ketganda, maxsus ziddizahar yo‘qligi sababli, oshqozonni yuvish va simptomatik davolash o‘tkazilishi kerak. Qonni preparatdan gemodializ bilan tozalash samara bermaydi.

Ehtiyot choralari va qo‘llash xususiyatlari

Maxsus ko‘rsatmalar

Keksa bemorlar va jigar yoki buyrak faoliyati buzilgan bemorlar uchun maxsus doza tanlash talab etilmaydi.

Davolashni boshlashdan oldin me’da va qizilo‘ngachda xavfli jarayon mavjudligini istisno qilish kerak, chunki preparatni qabul qilish simptomatikani yashirishi mumkin, bu esa to‘g‘ri tashxis qo‘yishni qiyinlashtiradi va uzoqlashtiradi.

Jigar faoliyati buzilgan bemorlarda qo‘llanganda, qondagi jigar fermentlari faolligini muntazam nazorat qilish va u oshganda pantoprazolni bekor qilish lozim.

Homiladorlik va laktatsiya davri

Homiladorlik davrida pantoprazolni qo‘llash zarurati tug‘ilganda, ona uchun taxmin qilinayotgan foyda va homila uchun potensial xavfni taqqoslash lozim. Laktatsiya davrida preparatni qabul qilish zarurati tug‘ilganda, ko‘krak suti bilan emizishni to‘xtatish masalasini hal qilish kerak, chunki eksperimental tadqiqotlarda pantoprazol ko‘krak suti bilan ajralib chiqishi aniqlangan.

Avtotransportni boshqarish va potensial xavfli mexanizmlarni boshqarish qobiliyatiga ta’siri

Preparat bilan davolanish vaqtida diqqatni jamlashni talab qiladigan transport vositalarini boshqarish va mexanizmlar bilan ishlashdan tiyilish kerak.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Boshqa dorilar bilan o‘zaro ta’siri, boshqa o‘zaro ta’sirlar

Preparat diazepam, varfarin va fenitoin hamda jigarda sitoxrom P450 ishtirokida mikrosomal oksidlanish yo‘li bilan metabolizmga uchraydigan boshqa dori vositalarining organizmdan chiqarilishini sekinlashtiradi.

Preparatni qabul qilish fonida ba’zi dorilarning so‘rilishi pasayishi mumkin, ular uchun me’da shirasining pH darajasi ularning biologik qulayligini belgilovchi muhim omil hisoblanadi (masalan, ketokonazol, ampitsillin va uning hosilalari, temir tuzlari).

Preparatni antatsidlar, metoprolol, teofillin, lidokain va xinidin bilan bir vaqtda qo‘llanganda dori vositalarining ta’siri o‘zgarmasligi aniqlandi.

Chiqarish shakli va qadoqlash

Ichakda eriydigan qobiq bilan qoplangan 40 mg li tabletkalar; alyuminiy folga va PVX plyonkadan tayyorlangan kontur-yacheykali o‘ramda 10 ta tabletka. 1 yoki 3 tadan kontur-yacheykali o‘ramlar qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

Namlik va yorug‘likdan himoyalangan, harorati 15 °C dan 25 °C gacha bo‘lgan joyda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

Avantika Medeks Pvt. Ltd.,"

90, Shri Sharanya Industrial Estate,

Moraiya yo‘li, Morai-Changodar,

Ahmadobod, Gujarat, Hindiston.