Polioksidoniy

Tarkib

Faol modda: Polioksidoniy® (Azoksimera bromid) - 12 mg yordamchi moddalar bilan aralashmada: mannitol, povidon, betakaroten - 18 mg gacha.

Yordamchi moddalar: laktoza monogidrat 185 mg, kartoshka kraxmali 45 mg, stearin kislotasi 2 mg.

Tavsif

Tabletkalar sarg‘ish tusli oq rangdan to‘q sariq tusli sariq ranggacha, yassi silindrsimon, faskali, bir tomonida chiziqcha va ikkinchi tomonida "PO" yozuvi bor. Kuchliroq rangdagi bilinar-bilinmas dog‘lar bo‘lishiga yo‘l qo‘yiladi.

Chiqarish shakli

Tarkibida 12 mg Polioksidoniy® bo‘lgan tabletkalar, 10 donadan, polivinilxlorid plyonka va alyuminiy folgadan yasalgan konturli katakli o‘ramda, qo‘llash bo‘yicha yo‘riqnomaga ega karton qutida, 1 yoki 2 o‘ramdan iborat.

Farmakoterapevtik guruh

Immunomodullovchi vosita. ATX kodi: L03AX.

Farmakologik xususiyatlari

Polioksidoniy® 12 mg tabletkalar immunomodullovchi ta’sirga ega. Preparat organizmning bakterial, zamburug‘li va virusli infeksiyalarga qarshi chidamliligini oshiradi. Polioksidoniyning® immunomodullovchi ta’siri mexanizmining asosi leykotsitlarning mikroblarni fagotsitlash qobiliyatini oshirish, dastlabki past ko‘rsatkichlarda immunitetni faollashtiruvchi sitokinlar ishlab chiqarilishini rag‘batlantirish, yuqumli agentlarga qarshi antitanachalar hosil bo‘lishini kuchaytirishdan iborat.

Polioksidoniy® periferik qon fagotsitlari va to‘qima makrofaglarini faollashtiradi, bu esa infeksiya o‘chog‘i mavjud bo‘lganda qo‘zg‘atuvchining organizmdan tezroq chiqib ketishiga yordam beradi. Bundan tashqari, Polioksidoniy® mahalliy limfa tugunlarida joylashgan limfoid hujayralarni, xususan, sekretor IgA ishlab chiqaradigan B-hujayralarni faollashtiradi.

Sublingval qo‘llanganda Polioksidoniy® burun bo‘shlig‘i, yevstaxiy naylari, og‘iz-halqum va bronxlarda joylashgan limfoid hujayralarni faollashtiradi. Bundan tashqari, Polioksidoniy® so‘lakning bakteritsid xususiyatlarini faollashtiradi.

Polioksidoniy® og‘iz orqali qo‘llanganda, ichak limfa tugunlarida joylashgan limfoid hujayralarni ham faollashtiradi.

Buning natijasida nafas olish, oshqozon-ichak va LOR a’zolarining yuqumli agentlarga chidamliligi oshadi.

Immunomodullovchi ta’sir bilan bir qatorda, Polioksidoniy® kuchli dezintoksikatsion va antioksidant faollikka ega bo‘lib, organizmdan toksinlarni, og‘ir metall tuzlarini chiqarish qobiliyatiga ega, lipidlarning peroksidlanishini ingibirlaydi. Ko‘rsatilgan xususiyatlar Polioksidoniy® ning tuzilishi va yuqori molekulyar tabiati bilan belgilanadi.

Ikkilamchi immunitet tanqisligi holatlarida Polioksidoniy®ni qo‘llash davolash samaradorligini oshirish va davomiyligini qisqartirish, antibiotiklar, bronxolitiklar, glyukokortikosteroidlar qo‘llanilishini sezilarli darajada kamaytirish, remissiya muddatini uzaytirish imkonini beradi.

Preparat yaxshi o‘zlashtiriladi, mitogen, poliklonal faollikka, antigen xossalarga ega emas, allergik, mutagen, embriotoksik, teratogen va kanserogen ta’sir ko‘rsatmaydi.

Farmakokinetika

Polioksidoniy® 12 mg tabletkalari ichga qabul qilingandan so‘ng oshqozon-ichak traktidan tez so‘riladi, biosinguvchanligi taxminan 50% ni tashkil etadi. Qon plazmasidagi maksimal konsentratsiyasi ichga qabul qilingandan 3 soat o‘tgach erishiladi. Polioksidoniya® farmakokinetikasi chiziqli hisoblanadi (qon plazmasidagi konsentratsiyasi qabul qilingan dozaga mutanosib).

Polioksidoniy® gidrofil birikma hisoblanadi. Taqsimlanishning ko‘rinma hajmi taxminan 0,5 l/kg ni tashkil etadi, bu esa preparat asosan hujayralararo suyuqlikda taqsimlanishini ko‘rsatadi. Yarim so‘rilish davri 35 minut, yarim chiqarilish davri 18 soat. Organizmda oligomerlargacha gidrolizlanadi, ular asosan buyraklar orqali chiqariladi. Kumulyativ samara yo‘q.

Qo‘llanilishi

Polioksidoniy® 12 mg tabletkalari kattalar va 12 yoshdan oshgan o‘smirlarda standart davolashga bo‘ysunmaydigan yuqumli-yallig‘lanish kasalliklarini (virusli, bakterial va zamburug‘li etiologiyali) davolash va oldini olish uchun qo‘llaniladi. Polioksidoniy® ham xuruj bosqichida, ham remissiya bosqichida qo‘llaniladi:

kompleks terapiyada:

og‘iz-halqum, burun yondosh bo‘shliqlari, yuqori nafas yo‘llari, ichki va o‘rta quloqning o‘tkir va surunkali qaytalanuvchi yuqumli-yallig‘lanish kasalliklari;

qaytalanuvchi bakterial, zamburug‘li va virusli infeksiya bilan asoratlangan allergik kasalliklar (shu jumladan pollinoz, bronxial astma);

tez-tez va uzoq vaqt (yiliga 4-5 martadan ko‘p) kasal bo‘lgan shaxslarni reabilitatsiya qilish uchun;

monoterapiya shaklida:

qaytalanuvchi gerpetik infeksiyaning oldini olish uchun;

og‘iz-halqum, burun yondosh bo‘shliqlari, yuqori nafas yo‘llari, ichki va o‘rta quloq infeksiyalarining surunkali o‘choqlari kuchayishining mavsumiy profilaktikasi uchun;

epidemiya oldi davrida gripp va boshqa o‘tkir respirator infeksiyalarning oldini olish uchun immuniteti zaif shaxslarda;

qarish yoki noqulay omillar ta’siri natijasida yuzaga keladigan ikkilamchi immunitet tanqisligini tuzatish uchun.

Qo‘llash usuli va dozalari

Polioksidoniy® 12 mg tabletkalari ovqatdan 20-30 daqiqa oldin har kuni 1, 2 yoki 3 marta og‘iz orqali va til ostiga qo‘llaniladi: kattalar uchun - 12 mg yoki 24 mg dozada, 12 yoshdan oshgan o‘smirlar uchun - 12 mg dozada.

Tavsiya etilgan davolash usullari

Sublingval:

Og‘iz-halqum yallig‘lanish jarayonlarida (bakterial, virusli va zamburug‘li) - 1 tabletkadan kuniga 2 marta 12 soatdan keyin 10-14 kun davomida. Og‘iz bo‘shlig‘i gerpetik va zamburug‘li infeksiyasining og‘ir shakllarida - 1 tabletkadan kuniga 3 marta 8 soatdan keyin 15 kun davomida.

Burun yondosh bo‘shliqlarining surunkali kasalliklarida va surunkali otitlarda - 1 tabletkadan kuniga 2 marta 12 soatdan keyin 5-10 kun davomida.

Surunkali tonzillitda - 1 tabletkadan kuniga 3 marta 8 soatdan keyin 10-15 kun davomida.

Yuqori nafas yo‘llarining surunkali kasalliklarida - kattalarga 2 tabletkadan kuniga 2 marta, o‘smirlarga 1 tabletkadan 12 mg dan kuniga 2 marta 12 soatdan keyin 10-14 kun davomida.

Gripp va o‘tkir respirator infeksiyalarning oldini olish uchun - immuniteti zaif, O‘RK bilan yiliga 4 martadan ko‘p kasallanuvchi shaxslarga, epidemiya oldi davrida kattalarga 2 tabletkadan, o‘smirlarga 1 tabletkadan kuniga 2 marta 12 soatdan keyin 10-15 kun davomida.

Og‘iz orqali

Yuqori nafas yo‘llarining surunkali kasalliklarida - kattalarga 2 tabletkadan kuniga 2 marta har 12 soatda, o‘smirlarga 1 tabletkadan kuniga 2 marta har 12 soatda, 10-14 kun davomida.

Nojo‘ya ta’sirlari

Polioksidoniy® ning nojo‘ya ta’siri haqida xabar berilmagan.

Qarshi ko‘rsatmalar

Individual yuqori sezuvchanlik. 12 yoshgacha bo‘lgan bolalar yoshi. Homiladorlik va laktatsiya davri.

Ehtiyotkorlik bilan

O‘tkir buyrak yetishmovchiligida, shuningdek, laktozani ko‘tara olmaslikda, laktaza yetishmovchiligida, glyukozagalaktoza malabsorbsiyasida ehtiyotkorlik bilan qo‘llaniladi.

Dorilarning o‘zaro ta’siri

Dorilarning o‘zaro ta’siri aniqlanmagan. Polioksidoniy®ni ko‘plab dori vositalari bilan qo‘llash mumkin, jumladan antibiotiklar, virusga qarshi, zamburug‘ga qarshi va antigistamin preparatlar, bronxolitiklar, glyukokortikosteroidlar, sitostatiklar, β-adrenomimetiklar bilan mos keladi.

Maxsus ko‘rsatmalar

Ko‘rsatilgan dozalar va davolash kursi davomiyligidan oshirmaslik kerak.

Homiladorlik va emizish davrida qo‘llash

Homiladorlik va laktatsiyada qo‘llash mumkin emas (qo‘llashning klinik tajribasi yo‘q). Polioksidoniy® ning ona suti bilan ekskretsiyasi o‘rganilmagan.

Avtomobil va murakkab mexanizmlarni boshqarish qobiliyatiga ta’siri

Avtomobil va mexanizmlarni boshqarish qobiliyatiga ta’sir ko‘rsatmaydi.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Polioksidoniy® dozasini oshirib yuborish holatlari ma’lum emas.

Saqlash shartlari

Yorug‘lik tushmaydigan quruq joyda, 4 dan 25 °C gacha bo‘lgan haroratda.

Yaroqlilik muddati

2 yil.

Dorixonalardan berish shartlari

Preparat retseptsiz beriladi.

Ishlab chiqaruvchi

"NPO Petrovaks Farm" MCHJ

Yuridik manzil/Iste’molchilarning da’volari uchun manzil

Rossiya Federatsiyasi, 142143, Moskva viloyati, Podolskiy tumani, Pokrov qishlog‘i, Sosnovaya ko‘chasi, 1-uy, tel./faks: (495) 926-21-07, e-mail: [email protected]

Ishlab chiqarilgan:

Rossiya Federatsiyasi, 115598, Moskva shahri, Zagorevskaya ko‘chasi, 10-uy, 4-korporatsiya, tel./faks: (495) 329-17-18.

Qadoqlangan:

Rossiya Federatsiyasi, 142143, Moskva viloyati, Podolskiy tumani, Pokrov qishlog‘i, Sosnovaya ko‘chasi, 1-uy, tel./faks: (495) 926-21-07.