Serrabest

Tarkib

Har bir tabletka tarkibiga quyidagilar kiradi:

faol modda: serratiopeptidaza 10 mg;

yordamchi modda: makkajo‘xori kraxmali, ikki asosli kalsiy fosfati, natriy krosskarmelloza, tozalangan talk, magniy stearati, metakril kislota kukuni, titan dioksidi, gidroksipropilmetil sellyuloza, sellyuloza atsetatftalat, dibutil ftalat, qizil temir oksidi, izopropil spirti, dixlormetan.

Tavsif

Ichakda eriydigan qoplamali jigarrang, dumaloq shaklli, ikki tomonlama qavariq, ikki tomoni silliq tabletkalar.

Toifa - suyak-mushak tizimi uchun.

Farmakoterapevtik guruh

Proteolitik ferment. ATX kodi: M09AB.

Farmakologik xususiyatlari

Preparat qon ivish qobiliyatiga ta’sir qilganligi sababli, qon ketish xavfi bo‘lgan va qon ivish vaqti buzilgan bemorlarda, shuningdek, antikoagulyantlar qabul qilayotgan bemorlarda ehtiyotkorlik bilan qo‘llanilishi lozim.

Jigar va buyrakning og‘ir kasalliklarida ehtiyotkorlik bilan qo‘llaniladi.

Farmakodinamika

Nopatogen ichak bakteriyasi Serratia E15 dan ajratib olingan ta’sir etuvchi modda - serratiopeptidaza fibrinolitik, yallig‘lanishga va shishga qarshi faollikka ega proteolitik ferment hisoblanadi.

Preparat yallig‘lanish jarayonini kamaytirishdan tashqari, yallig‘lanish o‘chog‘idan og‘riq mediatorlarining chiqishini to‘xtatishi tufayli og‘riqni kamaytiradi.

Preparat 1:1 nisbatda qondagi alfa-2-makroglobulin bilan bog‘lanadi, bu uning antigenligini yashiradi, lekin fermentativ faolligini saqlab qoladi. Yallig‘lanish joyidagi ekssudatga asta-sekin o‘tadi va asta-sekin uning qondagi miqdori kamayadi.

Serratiopeptidaza bradikinin, gistamin va serotonin gidrolizlanishi orqali bevosita kapillyarlar dilatatsiyasi va o‘tkazuvchanligini kamaytiradi. Preparat plazmin ingibitorlarini bloklaydi va shu tariqa fibrinolitik faollikni oshirishga yordam beradi.

Preparat shishni kamaytirishi va mikrotsirkulyatsiyani yaxshilashi tufayli balg‘amning suyulishi va ajralishiga yordam beradi.

Farmakokinetika

Preparat oshqozondan o‘zgarmagan holda o‘tadi va ichakda so‘riladi. Plazmada maksimal konsentratsiyaga 1 soatdan keyin erishiladi. Serratiopeptidaza oz miqdorda siydikda aniqlanadi.

Serratiopeptidazaning terapevtik dozasi tayinlanganda, qondagi fermentning beqarorligi sababli farmakokinetikani o‘rganish imkoni bo‘lmaydi. Serratiopeptidazaning absorbsiyasini ko‘ngillilarga yuqori dozalar buyurilganda o‘rganish mumkin.

Plazmada serratiopeptidaza 100 mg/kg dozada ichga qabul qilingandan so‘ng aniqlanadi, uning konsentratsiyasining cho‘qqisi qabul qilingandan keyin 30 daqiqa va 2 soat ichida aniqlanadi, ingichka ichakda so‘riladi va qonda fermentga o‘xshash faol shakllar ko‘rinishida aylanadi.

Qo‘llanilishi

Kompleks terapiyada:

yuqori nafas yo‘llari kasalliklari (balg‘am yopishqoqligini kamaytirish va antibiotiklarning so‘rilishini oshirish uchun);

LOR a’zolari kasalliklari;

og‘riq sindromi bilan kechadigan dermatit;

mastit (gematomalarni so‘rish, shishni kamaytirish uchun);

jarohatlar: sport jarohatlari, paylarning cho‘zilishi va uzilishi, sinishlar va chiqishlar (shishni kamaytirish va jarohatlangan joyda mikrotsirkulyatsiyani tiklash uchun);

operatsiyadan keyingi davr (infeksion asoratlarning oldini olish va davolash hamda bitishma jarayonlari rivojlanish xavfini kamaytirish maqsadida, shishlarni kamaytirish uchun);

to‘qima va a’zolar transplantatsiyasi (transplantat ko‘chib tushishining oldini olish va ko‘chib tushgan joyda mikrotsirkulyatsiyani tiklash uchun).

Qo‘llash usuli va dozalari

Preparat kompleks terapiya tarkibida 10 mg (1 tabletka) dozada kuniga 2-3 marta, ovqatlanishdan qat’i nazar buyuriladi. Tabletkalar chaynamay, 1 stakan suv bilan yutiladi. Maksimal bir martalik doza - 10 mg.

Maksimal sutkalik doza - 30 mg.

Davolash kursining davomiyligi 1-4 hafta bo‘lib, patologik jarayonning xarakteri va dinamikasiga bog‘liq.

Qarshi ko‘rsatmalar

Me’da yara kasalligi.

Preparatga yuqori sezuvchanlik.

Homiladorlik va laktatsiya.

18 yoshgacha bo‘lgan bolalar va o‘smirlar.

Eslatma: Qon ivishining buzilishi, jigar va buyrak kasalliklari bo‘lgan hamda serratiopeptidaza buyurilgan vaqtda antikoagulyant davolashda bo‘lgan bemorlar shifokor nazoratida bo‘lishlari kerak.

Dozani oshirib yuborish

Belgilari: ko‘ngil aynishi, qusish, anoreksiya, epigastral sohada noqulaylik, balg‘amda qon aralashmasi va qon ketishi.

Davolash: simptomatik terapiya.

Ehtiyot choralari va qo‘llash xususiyatlari

Avtotransportni boshqarish va potensial xavfli mexanizmlarni boshqarish qobiliyatiga ta’siri

Ta’sir qilmaydi.

Boshqa dorilar bilan o‘zaro ta’siri, boshqa o‘zaro ta’sirlar

Preparat bir vaqtda qo‘llanganda antikoagulyantlar ta’sirini kuchaytiradi.

Chiqarilish shakli va qadoqlash

Alyuminiy folga blisterida plyonkali qobiq bilan qoplangan 10 tadan tabletka.

No100 (10x10) qadoqdagi 10 ta blister karton qutida qo‘llash bo‘yicha yo‘riqnoma bilan birga.

Saqlash shartlari

Yorug‘likdan himoyalangan quruq joyda, 30 °C dan yuqori bo‘lmagan haroratda saqlanadi.

Bolalar qo‘li yetmaydigan joyda saqlang.

Yaroqlilik muddati

3 yil.

Ishlab chiqaruvchi

"West- Coast Pharmaceutical Works LTD" MCHJ