Deksametazon-Agio (Dexamethasone-Agio) in'ektsiya uchun eritma 4 mg/ml, 1 ml №25 (ampulalar)

Dori preparatining tarkibi

Bitta ampula tarkibida

faol modda - deksametazon natriy fosfat, deksametazon fosfatga ekvivalent 4.000 mg

yordamchi moddalar: metilgidroksibenzoat, propilgidroksibenzoat, dinatriy edetat, natriy metabisulfit, natriy sitrat, natriy gidroksid (pelletlar), inyeksiya uchun suv

Tashqi ko‘rinish, hid, ta’m tavsifi

Rangsizdan och sariq ranggacha bo‘lgan shaffof eritma.

Dori shakli, dozasi

Inyeksiya uchun eritma, 4 mg/ml, 1 ml

Farmakoterapevtik guruh

Jinsiy gormonlar va insulinlardan tashqari, tizimli ta’sirga ega gormonal preparatlar. Tizimli qo‘llash uchun kortikosteroidlar. Tizimli qo‘llash uchun kortikosteroidlar, oddiy. Glyukokortikoidlar Deksametazon.

Qo‘llanilishi

- turli genezli shok

- bosh miya shishi (bosh miya o‘smalari, bosh miya jarohati, neyroxirurgik operatsiyalar, miyaga qon quyilishi, meningitlar, ensefalitlar, nurlanish shikastlanishlarida)

- bronxial astma, astmatik holat, og‘ir allergik reaksiyalar (Kvinke shishi, bronxospazm, dermatoz, dori vositalariga o‘tkir anafilaktik reaksiya, zardob va antibiotiklarni yuborish), pirogen reaksiyalar

- o‘tkir gemolitik kamqonliklar, trombotsitopeniya, o‘tkir limfoblast leykoz, agranulotsitoz, og‘ir yuqumli kasalliklar (antibiotiklar bilan birgalikda)

- buyrak usti bezi po‘stlog‘ining o‘tkir yetishmovchiligi

- bolalarda o‘tkir stenozlovchi laringotraxeit

- kurak-yelka periartriti, epikondilit, bursit, tendovaginit, osteoxondroz, turli etiologiyali artritlar, osteoartroz

- revmatik kasalliklar, kollagenozlar

Deksametazon fosfat, inyeksiya uchun eritma, 4 mg/ml, parenteral yuborish hayotiy zarur bo‘lgan o‘tkir va shoshilinch holatlarda qo‘llaniladi. Preparat hayotiy ko‘rsatmalar bo‘yicha qisqa muddatli qo‘llash uchun mo‘ljallangan.

Qo‘llash boshlangunga qadar zarur bo‘lgan ma’lumotlar ro‘yxati

Qarshi ko‘rsatmalar

- ta’sir etuvchi moddaga yoki yordamchi moddalarning istalganiga yuqori sezuvchanlik

- o‘tkir virusli, bakterial yoki tizimli zamburug‘li infeksiyalar (agar tegishli terapiya qo‘llanilmasa)

- Kushing sindromi

- tirik vaksina bilan emlash

- qon ivishining og‘ir buzilishlari bo‘lgan bemorlarga mushak ichiga yuborish tavsiya etilmaydi

- bakteriyemiya, tizimli zamburug‘li infeksiyalar, bo‘g‘imlari beqaror bo‘lgan bemorlarda, qo‘llash joyidagi infeksiyalar, shu jumladan so‘zak yoki sil tufayli kelib chiqqan septik artritda mahalliy yuborish mumkin emas.

Qo‘llashda zarur ehtiyot choralari

Kortikoidlar bilan parenteral davolash paytida kamdan-kam hollarda yuqori sezuvchanlik reaksiyalari kuzatilishi mumkin, shuning uchun deksametazon bilan davolashni boshlashdan oldin allergik reaksiyalar ehtimolini hisobga olgan holda tegishli choralarni ko‘rish zarur (ayniqsa, anamnezida boshqa dori vositalariga allergik reaksiyalar bo‘lgan bemorlarda).

Gipertrofik kardiomiopatiya

Muddatiga yetmay tug‘ilgan chaqaloqlarda kortikosteroidlarni, shu jumladan deksametazonni tizimli qo‘llashdan keyin gipertrofik kardiomiopatiya haqida xabar berilgan. Ma’lum qilingan holatlarning aksariyatida davolanish to‘xtatilgandan so‘ng bu holatlar qaytar holat edi. Tizimli qo‘llash uchun deksametazon qabul qilgan chala tug‘ilgan bolalarda yurak funksiyasi va tuzilishini diagnostik baholash hamda monitoring qilish lozim.

Uzoq vaqt davomida deksametazon bilan davolangan bemorlarda davolanish to‘xtatilganda (tana haroratining ko‘tarilishi, tumov, konyunktivaning qizarishi, bosh og‘rig‘i, bosh aylanishi, uyquchanlik yoki asabiylashish, mushak va bo‘g‘imlarda og‘riq, qusish, tana vaznining kamayishi, holsizlik, ko‘pincha konvulsiyalar) to‘xtatish sindromi (shuningdek, buyrak usti bezi yetishmovchiligining ko‘zga ko‘rinadigan belgilarisiz) kuzatilishi mumkin. Shuning uchun deksametazon dozasini asta-sekin kamaytirib borish kerak. Davolashni to‘satdan to‘xtatish o‘limga olib kelishi mumkin.

Agar bemor terapiya davomida og‘ir stress holatida bo‘lsa (jarohat, operatsiya yoki og‘ir kasallik tufayli), deksametazon dozasini oshirish kerak, agar bu davolanishni to‘xtatish paytida sodir bo‘lsa, gidrokortizon yoki kortizon qo‘llash kerak.

Uzoq vaqt davomida deksametazon yuborilgan va terapiya to‘xtatilgandan so‘ng og‘ir stressni boshdan kechirayotgan bemorlar deksametazon qo‘llashni tiklashlari kerak, chunki u keltirib chiqargan buyrak usti bezi yetishmovchiligi davolash to‘xtatilgandan keyin bir necha oy davom etishi mumkin.

Deksametazon yoki tabiiy glyukokortikoidlar bilan davolash mavjud yoki yangi infeksiya belgilarini, shuningdek, ichak teshilishi belgilarini yashirishi mumkin. Deksametazon tizimli zamburug‘li infeksiya, yashirin amyobiaz va o‘pka silini kuchaytirishi mumkin.

Faol shakldagi o‘pka sili bilan og‘rigan bemorlar faqat tez kechuvchi yoki tarqalgan o‘pka silida deksametazon (silga qarshi dorilar bilan birga) olishlari kerak. Deksametazon bilan davolanayotgan o‘pka silining nofaol shakli bilan og‘rigan bemorlar yoki tuberkulinga javob beradigan bemorlar kimyoviy profilaktika vositalarini olishlari kerak.

Osteoporoz, arterial gipertenziya, yurak yetishmovchiligi, sil, glaukoma, jigar yoki buyrak yetishmovchiligi, qandli diabet, faol peptik yara, yaqinda ichak anastomozi, yarali kolit va epilepsiya bilan og‘rigan bemorlarda ehtiyotkorlik va tibbiy kuzatuv tavsiya etiladi. Miokard infarktidan keyingi birinchi haftalar davomida bemorlar, tromboemboliya, og‘ir miasteniya, gipotireoz, psixoz yoki psixonevroz bilan og‘rigan bemorlar, shuningdek, keksa yoshdagi bemorlar alohida parvarishni talab qiladi.

Davolash vaqtida qandli diabetning zo‘rayishi yoki latent fazadan qandli diabetning klinik ko‘rinishlariga o‘tishi mumkin.

Uzoq davolanishda qon zardobidagi kaliy miqdorini nazorat qilish kerak.

Deksametazon bilan davolash vaqtida tirik vaksina bilan emlash mumkin emas. Faolsizlantirilgan virusli yoki bakterial vaksina bilan emlash antitelolarning kutilgan sinteziga olib kelmaydi va kutilgan himoya ta’siriga ega emas. Deksametazon fosfat odatda emlashdan 8 hafta oldin tayinlanmaydi va emlashdan keyin 2 haftadan oldin qo‘llanilmaydi.

Uzoq vaqt davomida deksametazonning yuqori dozalari bilan davolangan va hech qachon qizamiq bilan kasallanmagan bemorlar infeksiyalangan shaxslar bilan aloqada bo‘lishdan saqlanishlari kerak; tasodifiy aloqada bo‘lganda immunoglobulin bilan profilaktik davolash tavsiya etilgan.

Jarrohlik amaliyoti yoki suyak sinishidan keyin sog‘ayayotgan bemorlarga ehtiyot bo‘lish tavsiya etiladi, chunki deksametazon yaralarning bitishini va suyak to‘qimasining hosil bo‘lishini sekinlashtirishi mumkin.

Glyukokortikoidlarning ta’siri jigar sirrozi yoki gipotireoz bilan og‘rigan bemorlarda kuchayadi.

Og‘ir ruhiy reaksiyalar kortikosteroidlarni tizimli qo‘llash bilan birga kechishi mumkin. Odatda simptomlar davolanish boshlanganidan bir necha kun yoki hafta o‘tgach paydo bo‘ladi. Ushbu alomatlarning rivojlanish xavfi yuqori dozalarda qo‘llanilganda ortadi. Ko‘pchilik reaksiyalar doza kamaytirilganda yoki preparat to‘xtatilganda o‘tib ketadi. Ruhiy holatdagi o‘zgarishlarni, ayniqsa, tushkun kayfiyat, suitsidal fikrlar va niyatlarni kuzatib, o‘z vaqtida aniqlash lozim. Kortikosteroidlarni affektiv buzilishlar mavjud yoki anamnezida bo‘lgan bemorlarda, shuningdek, yaqin qarindoshlarida alohida ehtiyotkorlik bilan qo‘llash kerak. Nojo‘ya ta’sirlarning paydo bo‘lishini eng qisqa vaqt davomida minimal samarali dozalarni qo‘llash yoki preparatning kerakli kunlik dozasini 1 marta, ertalab qo‘llash orqali oldini olish mumkin.

Deksametazonni bo‘g‘im ichiga qo‘llash tizimli ta’sirlarga olib kelishi mumkin.

Tez-tez qo‘llash tog‘ay shikastlanishiga yoki suyak nekroziga olib kelishi mumkin.

Bo‘g‘im ichiga yuborishdan oldin bo‘g‘imdan sinovial suyuqlikni olib tashlash va uni tekshirish (infeksiya bor-yo‘qligini tekshirish) kerak. Infeksiyalangan bo‘g‘imlarga kortikoidlar yuborishdan saqlanish kerak. Agar inyeksiyadan keyin bo‘g‘im infeksiyasi rivojlansa, tegishli antibiotiklar bilan davolashni boshlash kerak.

Bemorlarga yallig‘lanish tuzalgunga qadar zararlangan bo‘g‘imlarga jismoniy zo‘riqishlardan saqlanish kerakligi haqida xabar berish lozim.

Preparatni nostabil bo‘g‘imlarga yuborishdan saqlanish kerak.

Kortikoidlar teri allergik testlari natijalarini buzishi mumkin.

Yordamchi moddalar

Preparat tarkibida metilgidroksibenzoat va propilgidroksibenzoat mavjud bo‘lib, ular sekinlashgan turdagi allergik reaksiyalar va bronxospazmni keltirib chiqarishi mumkin.

Preparat tarkibida natriy (natriy tarkibida metabisulfit 2.0 mg, natriy sitrat 10.0 mg, natriy gidroksid (pH ni korreksiyalash uchun) mavjud bo‘lib, tuzsiz parhez tutuvchi shaxslarga buyurilganda ehtiyotkorlik bilan qo‘llash lozim.

Boshqa dori vositalari bilan o‘zaro ta’siri

Deksametazon va nosteroid yallig‘lanishga qarshi vositalarni parallel qo‘llash oshqozon-ichakdan qon ketish va yaralar paydo bo‘lish xavfini oshiradi.

Rifampitsin, rifambutin, karbamazepin, fenobarbiton, fenitoin (difenilgidantoin), primidon, efedrin yoki aminoglutetimid bir vaqtda qabul qilinsa, deksametazonning samaradorligi kamayadi, shuning uchun bunday kombinatsiyalarda deksametazon dozasini oshirish kerak.

Deksametazon va yuqorida ko‘rsatilgan barcha dori vositalarining o‘zaro ta’siri deksametazonni bostirish testini buzishi mumkin. Buni test natijalarini baholashda hisobga olish zarur.

Deksametazon miasteniyada qo‘llaniladigan antixolinesteraz vositalarning terapevtik samarasini kamaytiradi.

Deksametazon va CYP 3A4 ferment faolligini ingibirlovchi preparatlar, masalan, ketokonazol, antibiotik-makrolidlarni birgalikda qo‘llash qon zardobi va plazmasida deksametazon konsentratsiyasining oshishiga olib kelishi mumkin. Deksametazon CYP 3A4 ning o‘rtacha induktoridir. Indinavir, eritromitsin kabi CYP 3A4 bilan metabolizmga uchraydigan dorilar bilan birgalikda qo‘llash ularning klirensini oshirishi mumkin, bu esa qon zardobidagi konsentratsiyaning pasayishiga olib keladi.

Ketokonazol buyrak usti bezlari tomonidan glyukokortikoidlar sintezini susaytirishi mumkin, shu tariqa deksametazon konsentratsiyasining pasayishi oqibatida buyrak usti bezi yetishmovchiligi rivojlanishi mumkin.

Deksametazon qandli diabet, arterial gipertenziya, kumarinli antikoagulyantlar, prazikvantel va natriyuretiklarni davolash uchun ishlatiladigan dorilarning terapevtik samarasini kamaytiradi (shuning uchun bu dorilarning dozasini oshirish kerak); geparin, albendazol va kaliyuretiklarning faolligini oshiradi (zarurat tug‘ilganda bu dorilarning dozasini kamaytirish kerak).

Deksametazon kumarin antikoagulyantlarining ta’sirini o‘zgartirishi mumkin, shuning uchun preparatlarning bunday kombinatsiyasini qo‘llashda protrombin vaqtini tez-tez tekshirib turish kerak.

Deksametazon va boshqa glyukokortikoidlar yoki β2-adrenoretseptor agonistlarining yuqori dozalarini parallel qo‘llash gipokaliyemiya xavfini oshiradi. Gipokaliyemiya bilan og‘rigan bemorlarda yurak glikozidlari ko‘proq ritm buzilishiga yordam beradi va katta toksiklikka ega.

Antatsidlar deksametazonning oshqozonda so‘rilishini kamaytiradi. Deksametazonning ovqat va alkogol bilan bir vaqtda qabul qilishdagi ta’siri o‘rganilmagan, ammo dorilarni tarkibida natriy miqdori yuqori bo‘lgan ovqat bilan bir vaqtda qo‘llash tavsiya etilmaydi. Chekish deksametazon farmakokinetikasiga ta’sir qilmaydi.

Glyukokortikoidlar salitsilatning buyrak klirensini kuchaytiradi, shuning uchun ba’zan qon zardobida salitsilatlarning terapevtik konsentratsiyasini olish qiyin. Kortikosteroid dozasi asta-sekin kamaytirilayotgan bemorlarda ehtiyot bo‘lish kerak, chunki bunda qon zardobida salitsilat konsentratsiyasining oshishi va intoksikatsiya kuzatilishi mumkin.

Agar peroral kontratseptivlar parallel qo‘llanilsa, glyukokortikoidlarning yarim chiqarilish davri uzayishi mumkin, bu esa ularning biologik ta’sirini kuchaytiradi va nojo‘ya ta’sirlar xavfini oshirishi mumkin.

Tug‘ruq paytida ritodrin va deksametazonni bir vaqtda qo‘llash mumkin emas, chunki bu o‘pka shishiga olib kelishi mumkin. Bunday holatning rivojlanishi tufayli tug‘ayotgan ayolning o‘limi haqida xabar berilgan.

Deksametazon va talidomidni bir vaqtda qo‘llash toksik epidermal nekrolizni keltirib chiqarishi mumkin.

Terapevtik afzalliklarga ega bo‘lgan o‘zaro ta’sir turlari: deksametazon va metoklopramid, difengidramid, proxlorperazin yoki 5-HT3 retseptorlari antagonistlarini (serotonin yoki 5-gidroksitriptamin retseptorlari, 3-tur, masalan, ondansetron yoki granitsetron) parallel qo‘llash sisplatin, siklofosfamid, metotreksat, ftoruratsil bilan kimyoterapiya natijasida kelib chiqqan ko‘ngil aynishi va qusishning oldini olish uchun samarali hisoblanadi.

Maxsus ogohlantirishlar

Pediatriyada qo‘llanishi

Bolalarga tug‘ilganidan boshlab faqat o‘ta zarur hollarda qo‘llaniladi. Deksametazon bilan davolash vaqtida bolalarning o‘sishi va rivojlanishini sinchiklab kuzatish zarur.

Homiladorlik yoki emizish davrida

Homila va yangi tug‘ilgan chaqaloqqa zararli ta’sirini istisno qilib bo‘lmaydi. Dori vositasi bolaning ona qornidagi rivojlanishini susaytiradi. Deksametazon homilador ayollarga faqat bir nechta shoshilinch holatlarda, ona uchun kutilayotgan foyda homila uchun potensial xavfdan yuqori bo‘lganda tayinlanishi mumkin. Ayniqsa, preeklampsiyada ehtiyot bo‘lish tavsiya etiladi. Umumiy tavsiyalarga muvofiq, homiladorlik davrida glyukokortikosteroidlar bilan davolashda asosiy kasallikni nazorat qilish uchun maksimal ta’sir etuvchi doza qo‘llanilishi kerak.

Tadqiqotlar shuni ko‘rsatdiki, erta tug‘ruq xavfi bo‘lgan ayollarda kortikosteroidlarni, shu jumladan deksametazonni qisqa muddatli prenatal qo‘llashdan so‘ng neonatal gipoglikemiya xavfi ortadi.

Homiladorlik davrida glyukokortikoidlar buyurilgan onalardan tug‘ilgan bolalarni buyrak usti bezlari yetishmovchiligiga sinchiklab tekshirish kerak.

Glyukokortikoidlar yo‘ldosh orqali o‘tib, homilada yuqori konsentratsiyaga erishadi. Deksametazon yo‘ldoshda prednizonga qaraganda kamroq faol metabolizmga uchraydi, shuning uchun homila qon zardobida deksametazonning yuqori konsentratsiyasi kuzatilishi mumkin. Ba’zi ma’lumotlarga ko‘ra, hatto glyukokortikoidlarning farmakologik dozalari ham yo‘ldosh yetishmovchiligi, oligogidramnion, homila rivojlanishining sekinlashishi yoki uning bachadon ichida nobud bo‘lishi, homilada leykotsitlar (neytrofillar) sonining ko‘payishi va buyrak usti bezi yetishmovchiligi xavfini oshirishi mumkin. Glyukokortikosteroidlarning teratogen ta’sirini tasdiqlovchi hech qanday dalillar yo‘q.

Qo‘shimcha

Qo‘llash bo‘yicha tavsiyalar

Dozalash tartibi

Kattalarda va bolalarda tug‘ilganidan boshlab qo‘llaniladi.

Dozani individual ravishda, muayyan bemorning kasalligiga, ko‘zda tutilgan davolash davriga, kortikoidlarni ko‘tara olish qobiliyatiga va organizm reaksiyasiga qarab belgilash kerak.

Vena ichiga va mushak ichiga yuborish

Tavsiya etilgan boshlang‘ich doza tashxisga qarab sutkasiga 0,5 dan 9 mg gacha o‘zgaradi. Uncha og‘ir bo‘lmagan holatlarda 0,5 mg dan past doza yetarli bo‘lishi mumkin, og‘ir kasalliklarda esa kuniga 9 mg dan yuqori doza zarur bo‘lishi mumkin.

Deksametazon fosfatning boshlang‘ich dozalarini klinik reaksiya paydo bo‘lgunga qadar qo‘llash kerak, keyin esa dozani asta-sekin eng past klinik samarali darajagacha kamaytirish kerak. Agar yuqori dozalar bir necha kundan ortiq muddat davomida tayinlansa, keyin dozani keyingi bir necha kun davomida yoki hatto uzoqroq muddat davomida asta-sekin kamaytirish kerak.

Agar tegishli vaqt oralig‘ida qoniqarli klinik reaksiya kuzatilmasa, deksametazon inyeksiyalarini to‘xtatish va bemorga boshqa davolashni tayinlash lozim.

Dozani o‘zgartirishni talab qilishi mumkin bo‘lgan belgilarni diqqat bilan kuzatib borish lozim: kasallikning remissiyasi yoki kuchayishi natijasida klinik holatning o‘zgarishi, doriga individual reaksiya, stress ta’siri (masalan, jarrohlik amaliyoti, infeksiya, jarohat). Stress paytida dozani vaqtincha oshirish zarurati tug‘ilishi mumkin.

Agar preparatni yuborishni davolashning bir necha kunidan keyin to‘xtatish kerak bo‘lsa, to‘xtatishni asta-sekin amalga oshirish kerak.

Shok

Deksametazon fosfat inyeksiyasi dozalari:

- 20 mg vena ichiga dastlabki inyeksiyadan so‘ng 24 soat ichida tana vazniga 3 mg/kg miqdorida doimiy vena ichiga yuborish yo‘li bilan;

- tana vazniga 2-6 mg/kg miqdorida bir martalik vena ichiga inyeksiya shaklida;

- boshlang‘ich doza - 40 mg, so‘ngra shok belgilari kuzatilguncha har 4-6 soatda takroriy vena ichiga inyeksiyalar;

- boshlang‘ich doza - 40 mg, so‘ngra shok alomatlari kuzatilguncha har 2-6 soatda takroriy vena ichiga inyeksiyalar;

– tana vazniga 1 mg/kg miqdorida bir martalik vena ichiga inyeksiya ko‘rinishida.

Yuqori dozali kortikosteroid terapiyasini qo‘llash faqat bemorning ahvoli barqarorlashgunga qadar, odatda 48-72 soatdan ko‘p bo‘lmagan muddatda davom etadi.

Miya shishi

Deksametazon fosfat odatda vena ichiga 10 mg boshlang‘ich dozada, so‘ngra simptomlar yo‘qolguncha har 6 soatda 4 mg dan mushak ichiga buyurilishi kerak.

Davolashga bo‘lgan reaksiyani 12-24 soat davomida kuzatish kerak, dozani davolashning 2-4 kunidan keyin kamaytirish mumkin, preparatni 5-7 kun davomida asta-sekin bekor qilish kerak. Takroriy yoki operatsiya qilib bo‘lmaydigan miya o‘smalari bo‘lgan bemorlarda palliativ qo‘llash uchun kuniga 2-3 marta 2 mg dozada qo‘llab-quvvatlovchi terapiya samarali bo‘lishi mumkin.

Og‘ir allergik kasalliklar

O‘z-o‘zidan o‘tib ketadigan o‘tkir allergik kasalliklarda yoki surunkali allergik kasalliklarning og‘ir xurujlarida birinchi kuni mushak orasiga 1 yoki 2 ml (4 yoki 8 mg) dan Deksametazon fosfat buyurish; ikkinchi kundan boshlab preparatni peroral shakllari bilan davolashni davom ettirish.

Mahalliy kiritish

Bo‘g‘im ichiga yuborish, jarohatlangan joyga yoki yumshoq to‘qimalarga yuborish odatda shikastlanish bir yoki ikkita bo‘g‘im (hudud) bilan cheklangan hollarda qo‘llaniladi. Dozalash va inyeksiya chastotasi inyeksiya sharoiti va joyiga bog‘liq. Odatdagi doza – 0,2-6 mg. Qo‘llash chastotasi odatda 3-5 kunda bir marta yuborishdan 2-3 haftada bir marta yuborishgacha o‘zgarib turadi. Bo‘g‘im ichiga tez-tez yuborish bo‘g‘im tog‘ayini shikastlashi mumkin.

Kortikosteroidlarni bo‘g‘im ichiga yuborish mahalliy ta’sirlarga qo‘shimcha ravishda tizimli ta’sirlarga ham olib kelishi mumkin.

Infeksiyalangan bo‘g‘imlarga kortikosteroidlarni kiritishdan saqlanish kerak.

Kortikosteroidlarni beqaror bo‘g‘imlarga yuborish mumkin emas.

Odatdagi bir martalik dozalardan ba’zilari quyida keltirilgan:

Inyeksiya joyi

Deksametazon fosfat dozasi (mg)

Katta bo‘g‘imlar (masalan, tizza)

2-4

Mayda bo‘g‘imlar (masalan, falangalararo, chakka-pastki jag‘)

0,8-1

Mushaklararo xaltachalar

2-3

Pay pardalari

0,4-1

Yumshoq matolar

2-6

Gangliyalar

1-2

Deksametazon fosfat, ayniqsa, kam eriydigan, uzoq muddatli ta’sirga ega steroidlardan biri bilan birgalikda bo‘g‘im ichiga va yumshoq to‘qimalarga yuborish uchun tavsiya etiladi.

Bolalar

O‘rin bosuvchi terapiyada tavsiya etilgan doza tana vazniga 0,02 mg/kg yoki tana yuzasining 0,67 mg/m2 maydoniga kuniga uchta inyeksiyani tashkil etadi.

Boshqa barcha ko‘rsatmalarda boshlang‘ich dozalar diapazoni 3-4 ta inyeksiya uchun 0,02-0,3 mg/kg/sutkani tashkil etadi (tana yuzasining 0,6-9 mg/m2 maydoni/sutka).

Taqqoslash maqsadida quyida turli kortikosteroidlar uchun mg hisobidagi ekvivalent dozalar keltirilgan:

0,75 mg deksametazon dozasi 2 mg parametazon yoki 4 mg metilprednizolon va triamsinolon, yoki 5 mg prednizon va prednizolon, yoki 20 mg gidrokortizon, yoki 25 mg kortizon, yoki 0,75 mg betametazon dozasiga teng.

Dozalarning bunday nisbatlari ushbu preparatlarni faqat og‘iz orqali yoki vena ichiga qo‘llashga tegishli. Ushbu preparatlar yoki ularning hosilalari mushak orasiga yoki bo‘g‘im orasiga yuborilganda, ularning nisbiy xususiyatlari sezilarli darajada o‘zgarishi mumkin.

Yuborish usuli va yo‘li

Vena ichiga (inyeksiya yoki infuziya ko‘rinishida), mushak orasiga yoki mahalliy - bo‘g‘im ichiga inyeksiya qilish yoki teridagi jarohatlangan joyga yoki yumshoq to‘qimalar infiltratiga inyeksiya qilish orqali yuborish mumkin.

Vena ichiga infuziya uchun erituvchi sifatida 0,9% li natriy xlorid eritmasi yoki 5% li glyukoza eritmasi qo‘llaniladi.

Preparatni vena ichiga yuborish yoki keyinchalik eritish uchun mo‘ljallangan eritmalar, agar ular emizikli bolalarga, ayniqsa chala tug‘ilgan chaqaloqlarga qo‘llaniladigan bo‘lsa, konservantlarni o‘z ichiga olmasligi kerak.

Preparatni infuziya uchun erituvchi bilan aralashtirishda steril xavfsizlik choralariga rioya qilish kerak. Infuziya uchun eritmalar odatda konservantlarni o‘z ichiga olmasligi sababli, aralashmalardan 24 soat davomida foydalanish kerak.

Parenteral yuborish uchun mo‘ljallangan preparatlarni har safar yuborishdan oldin eritma va konteynerning yaroqliligini aniqlash uchun begona zarrachalar va rang o‘zgarishlariga vizual tekshirish lozim.

Doza oshirib yuborilganda ko‘rilishi kerak bo‘lgan choralar

Belgilari: O‘tkir dozani oshirib yuborish yoki o‘tkir dozani oshirib yuborish tufayli o‘lim holatlari juda kam uchragan.

Dozani oshirib yuborish, odatda, faqat bir necha haftalik haddan tashqari dozalardan so‘ng, ko‘plab nojo‘ya ta’sirlarni, birinchi navbatda Kushing sindromini keltirib chiqarishi mumkin.

Davolash: Maxsus antidot yo‘q. Davolash qo‘llab-quvvatlovchi va simptomatik bo‘lishi kerak. Gemodializ deksametazon fosfatni organizmdan tezroq chiqarib yuborishning samarali usuli emas.

Dori vositasini qo‘llash usulini tushuntirish uchun tibbiyot xodimiga murojaat qilish bo‘yicha tavsiyalar

Agar sizda ushbu dori vositasini qo‘llash bo‘yicha qo‘shimcha savollar paydo bo‘lsa, shifokoringizga murojaat qiling.

Dori vositalarini standart qo‘llashda yuzaga keladigan nojo‘ya ta’sirlar tavsifi va bunday hollarda ko‘rilishi kerak bo‘lgan choralar

Nojo‘ya ta’sirlar chastotasini aniqlash quyidagi mezonlarga muvofiq amalga oshiriladi: juda tez-tez (≥ 1/10), tez-tez (≥ 1/100 dan < 1/10 gacha), tez-tez emas (≥ 1/1000 dan < 1/100 gacha), kamdan-kam (≥ 1/10000 dan < 1/1000 gacha), juda kamdan-kam (< 1/10000), noma’lum (mavjud ma’lumotlar asosida baholash imkonsiz.

Chastota noma’lum

- tromboemboliya holatlari, monotsitlar va/yoki limfotsitlar sonining kamayishi, leykotsitoz, eozinofiliya (boshqa glyukokortikoidlarni qo‘llashdagi kabi), trombotsitopeniya va trombotsitopenik bo‘lmagan purpura

- yuqori sezuvchanlik reaksiyalari, toshmalar, allergik dermatit, eshakemi, angionevrotik shish, bronxospazm va anafilaktik reaksiyalar, immunitet javobining pasayishi va infeksiyalarga moyillikning ortishi

- yaqinda miokard infarktini o‘tkazgan bemorlarda politop qorincha ekstrasistoliyasi, paroksizmal bradikardiya, yurak yetishmovchiligi, yurak to‘xtashi, yurak yorilishi, chala tug‘ilgan chaqaloqlarda gipertrofik kardiomiopatiya

- arterial gipertenziya, gipertonik ensefalopatiya

- davolanishdan so‘ng ko‘ruv nervi diskining shishishi va kalla ichi bosimining ko‘tarilishi (soxta o‘sma) kuzatilishi mumkin. Shuningdek, bosh aylanishi (vertigo), tutqanoq va bosh og‘rig‘i, uyquning buzilishi, ongning chalkashishi, asabiylik, bezovtalik kabi nevrologik nojo‘ya ta’sirlar kuzatilishi mumkin.

- shaxs va xulq-atvorning o‘zgarishi, bu ko‘pincha eyforiya sifatida namoyon bo‘ladi; shuningdek, quyidagi nojo‘ya ta’sirlar haqida xabar berilgan: uyqusizlik, asabiylashish, giperkineziya, depressiya va psixozlar, shuningdek, maniakal-depressiv psixoz, deliriy, dezoriyentatsiya, gallyutsinatsiyalar, paranoyya, kayfiyatning o‘zgaruvchanligi, o‘z joniga qasd qilish fikrlari, shizofreniya kechishining yomonlashuvi, amneziya, epilepsiya kechishining yomonlashuvi.

- buyrak usti bezlari faoliyatining pasayishi va atrofiyasi (stressga javob reaksiyasining pasayishi), Kushing sindromi, bolalar va o‘smirlarda o‘sishning sekinlashishi, hayz siklining buzilishi, amenoreya, girsutizm, yashirin diabetning klinik faol shaklga o‘tishi, uglevodlarga chidamlilikning pasayishi, ishtahaning ortishi va tana vaznining ortishi, gipertriglitseridemiya, semizlik, diabet bilan og‘rigan bemorlarda insulinga yoki diabetga qarshi og‘iz orqali qabul qilinadigan vositalarga bo‘lgan ehtiyojning ortishi, oqsillar katabolizmi tufayli azot muvozanatining buzilishi, gipokaliemik alkaloz, organizmda natriy va suvning ushlanib qolishi, kaliy yo‘qotilishining ortishi, gipokalsiyemiya.

- ezofagit, dispepsiya, ko‘ngil aynishi, qusish, hiqichoq, oshqozon va o‘n ikki barmoqli ichakning peptik yaralari, shuningdek, oshqozon-ichak yo‘lida yara perforatsiyalari va qon ketishi (qon aralash qusish, melena), pankreatit hamda o‘t pufagi va ichak perforatsiyasi (ayniqsa, surunkali ichak yallig‘lanishi bo‘lgan bemorlarda) kuzatilishi mumkin.

- mushak kuchsizligi, steroid miopatiya (mushak kuchsizligi mushak katabolizmiga sabab bo‘ladi), mushak atrofiyasi, osteoporoz (kalsiy ajralishining oshishi) va umurtqa pog‘onasining kompression sinishlari, naysimon suyaklarning sinishi, aseptik osteonekroz (ko‘pincha son va yelka suyaklari boshchalarining aseptik nekrozi), paylarning yorilishi (ayniqsa ba’zi xinolonlarni parallel qo‘llashda), bo‘g‘im tog‘ayining shikastlanishi va suyaklar nekrozi (bo‘g‘im ichi infeksiyasi tufayli), epifizar o‘sish sohalarining muddatidan oldin yopilishi.

- yaralarning sekin bitishi, qichishish, terining yupqalashishi va sezuvchanligining oshishi, chiziqlar, petexiyalar va ko‘karishlar, husnbuzar, teleangioektaziya, eritema, ko‘p terlash, teri sinovlariga sust reaksiya

- ko‘z ichki bosimining oshishi, glaukoma, katarakta yoki ekzoftalm, shox pardaning yupqalashishi, ko‘zning bakterial, zamburug‘li yoki virusli infeksiyalarining kuchayishi

- opportunistik infeksiyalarning rivojlanishi, nofaol sil kasalligining qaytalanishi

- impotensiya

- vena ichiga yuborilganda yoki yuqori dozalarda yuborilganda terining shishishi, giper- yoki gipopigmentatsiyasi, teri yoki teri osti qavatining atrofiyasi, terining steril abssessi va qizarishi, oraliqdagi o‘tkinchi achishish va chimchilash hissi

- mushak orasiga yuborilganda - yuborilgan joydagi o‘zgarishlar, jumladan shish, achishish, uvishish, og‘riq, paresteziyalar va yuborilgan joydagi infeksiyalar, kamdan-kam hollarda atrofdagi to‘qimalarning nekrozi, inyeksiya joyida chandiqlar hosil bo‘lishi, mushak orasiga yuborilganda teri va teri osti kletchatkasining atrofiyasi (ayniqsa, deltasimon mushakka yuborish xavfli)

Vena ichiga yuborilganda – aritmiyalar, yuzga qon quyilishi, talvasalar. Intrakranial yuborilganda – burundan qon ketishi. Bo‘g‘im ichiga yuborilganda – bo‘g‘imdagi og‘riqning kuchayishi.

- uzoq vaqt davomida deksametazon bilan davolangan bemorlarda dozani tez kamaytirish paytida bekor qilish sindromi va buyrak usti bezi yetishmovchiligi, arterial gipotenziya yoki o‘lim holatlari kuzatilishi mumkin.

Ba’zi hollarda to‘xtatish sindromi belgilari bemor davolangan kasallikning yomonlashishi yoki qaytalanishi belgilariga o‘xshash bo‘lishi mumkin. Agar og‘ir nojo‘ya reaksiyalar yuz bersa, davolashni to‘xtatish kerak.

Chiqarilish shakli va qadoqlash

1 ml preparat qahrabo rangli shisha ampulalarga solinadi.

5 ta ampula qovurg‘ali taglikka joylashtiriladi.

1 ta taglikka karton pachka joylashtiriladi.

5 ta pachka yoki 5 ta taglik qozoq va rus tillaridagi tibbiy qo‘llash bo‘yicha yo‘riqnoma bilan birga karton qutiga joylashtiriladi.

Saqlash muddati

2 yil.

Yaroqlilik muddati tugaganidan keyin qo‘llanilmasin!

Saqlash shartlari

Yorug‘likdan himoyalangan joyda, 25°C dan yuqori bo‘lmagan haroratda saqlang.

Muzlatmang!

Bolalar qo‘li yetmaydigan joyda saqlang!

Dorixonalardan berish shartlari

Retsept bo‘yicha.

Ishlab chiqaruvchi tafsilotlari

"Ajio Farmatsevtikalz Ltd," Hindiston

A-38, Nandijiot Industrial Estate, Safedpul, Kurla-Andheri Road, Mumbay - 400,072.

Elektron manzil: [email protected]

Ro‘yxatdan o‘tkazish guvohnomasi egasi

"Ajio Farmatsevtikalz Ltd," Hindiston

A-38, Nandijiot Industrial Estate, Safedpul, Kurla-Andheri Road, Mumbay - 400,072.

Elektron manzil: [email protected]