Febrofid tashqi foydalanish uchun gel 2,5% 30 g (naycha)

Tarkib

100 g gel tarkibida quyidagilar mavjud:

Faol modda: ketoprofen lizin tuzi 2,5 g.

Yordamchi moddalar: polietilenglikol 200, metilgidroksibenzoat, propildroksibenzoat, karbomer, trietanolamin, tozalangan suv.

Tavsif

Rangsizdan och sarg‘ish ranggacha bo‘lgan, shaffof yoki biroz opalescent gel.

Dori shakli

Sirtga qo‘llash uchun 2,5% li gel.

Farmakoterapevtik guruh

Nosteroid yallig‘lanishga qarshi vosita. ATX kodi: M02AA10.

Farmakologik xususiyatlari

Ketoprofen nosteroid yallig‘lanishga qarshi dorilar guruhiga kiradi, gel ko‘rinishida teri qatlamlaridan yaxshi o‘tadi va mahalliy yallig‘lanishga qarshi, antiekssudativ hamda og‘riq qoldiruvchi ta’sir ko‘rsatadi. Febrofid geli bo‘g‘imlar, paylar, boylamlar, mushaklar, teri, venalar, limfa tomirlari va limfa tugunlari shikastlanishlarini mahalliy davolashni ta’minlaydi. Bo‘g‘im sindromida tinch holatda va harakatda bo‘g‘imlardagi og‘riqlarning susayishiga, ertalabki qotib qolish va bo‘g‘imlar shishishining kamayishiga olib keladi.

Farmakokinetika

Ketoprofen teri orqali yaxshi o‘tadi va mahalliy yallig‘lanishga qarshi hamda og‘riq qoldiruvchi ta’sir ko‘rsatadi. Gelning biosinguvchanligi - taxminan 5%. Ketoprofenning so‘rilgan qismi qon plazmasi oqsillari bilan taxminan 99% bog‘lanadi. Preparat jigarda metabolizmga uchraydi Qabul qilingan dozaning taxminan 80% siydik bilan metabolitlar ko‘rinishida, 10% dan kamrog‘i o‘zgarmagan holda ajraladi. Organizmda to‘planmaydi.

Qo‘llanilishi

Simptomatik davolashda og‘riq qoldiruvchi va yallig‘lanishga qarshi vosita sifatida mahalliy qo‘llaniladi:

umurtqa pog‘onasidagi og‘riqlar, nevralgiya, mialgiya;

tayanch-harakat apparatining yallig‘lanish-degenerativ kasalliklari (shu jumladan artrit, bursit, sinovit, tendinit, lyumbago);

asoratlanmagan jarohatlar, xususan sport jarohatlari, chiqishlar, boylamlar va paylarning cho‘zilishi yoki uzilishi, lat yeyishlar, jarohatdan keyingi og‘riqlar;

venalar (flebit, periflebit), limfa tomirlari, limfa tugunlari (limfangiit, yuzaki limfadenit) yallig‘lanish kasalliklarida kombinatsiyalangan terapiya tarkibida.

Qo‘llash usuli va dozalari

Sirtga, teriga qo‘llash uchun.

Kattalar

Kuniga 2-3 marta oz miqdorda (3-5 sm) gel og‘rigan joy terisiga surtiladi va yengil ishqalanadi.

Quruq bog‘lam qo‘yishning hojati yo‘q, chunki gel teri orqali yaxshi so‘riladi, hidi yo‘q, bo‘yoq moddalari yo‘q, yog‘li dog‘lar qoldirmaydi, kiyimlarni ifloslantirmaydi.

Bolalar

Bolalarda xavfsizlik va samaradorlik bo‘yicha ma’lumotlar mavjud emas. 15 yoshdan kichik bolalarda qo‘llash tavsiya etilmaydi.

Nojo‘ya ta’sirlari

Nojo‘ya ta’sirlar paydo bo‘lish chastotasi bo‘yicha, eng ko‘p qayd etilganlaridan boshlab, quyidagi tasnifga muvofiq guruhlangan: juda tez-tez (≥1/10); tez-tez (≥ 1/100 dan < 1/10 gacha); tez-tez emas (≥ 1/1000 dan < 1/100 gacha); kamdan-kam (≥ 1/10000 dan < 1/1000 gacha); juda kamdan-kam (< 1/10000); noma’lum (mavjud ma’lumotlar asosida chastotani aniqlashning imkoni yo‘q).

Immunologik tizim tomonidan buzilishlar:

Noma’lum: anafilaktik shok, Kvinke shishi, o‘ta sezuvchanlik reaksiyalari.

Teri va teri osti to‘qimalaridagi buzilishlar:

kamdan-kam hollarda: eritema, ekzema, qichishish va achishish kabi mahalliy teri reaksiyalari;

kamdan-kam hollarda: (dermatologik buzilishlar) fotosensibilizatsiya va eshakem. Tarqalish tendensiyasiga ega yoki umumiy xarakterga ega bo‘lgan vezikulyoz yoki fliktenulyoz dermatit kabi og‘ir reaksiyalar kamroq uchraydi.

Buyraklar va siydik chiqarish yo‘llaridagi buzilishlar:

juda kam hollarda: preparatni qo‘llashdan oldin aniqlangan buyrak yetishmovchiligining kuchayishi.

Barcha nojo‘ya (g‘ayrioddiy) ta’sirlar, shu jumladan yo‘riqnomada ko‘rsatilmaganlari paydo bo‘lishi haqida o‘z shifokoringizga xabar berish kerak.

Qarshi ko‘rsatmalar

Ketoprofen, fenofibrat, tiaprofen kislotasi, atsetilsalitsil kislotasi yoki boshqa nosteroid yallig‘lanishga qarshi dorilarni qo‘llashdan keyin yuzaga keladigan astma, allergik rinit belgilari kabi ma’lum bo‘lgan yuqori sezuvchanlik reaksiyalari.

Yordamchi moddalarning birortasiga nisbatan anamnezda yuqori sezuvchanlik reaksiyalari.

Anamnezda fotosensibilizatsiya reaksiyalari.

Anamnezda ketoprofen, tiaprofen kislotasi, fenofibrat, ultrabinafsha filtrlar yoki atirlardan keyin teri allergiyasi.

Davolash davrida va mahsulotni qo‘llash to‘xtatilgandan keyin 2 hafta davomida quyosh nuri, hatto osmon bulutli bo‘lganda ham, shuningdek, solyariyda ultrabinafsha nurlar ta’siri.

Teri o‘zgarishlari, masalan, ekzema yoki husnbuzar, shuningdek, dermatit va ochiq yaralar.

Homiladorlikning uchinchi trimestri.

15 yoshgacha bo‘lgan bolalar yoshi.

Dorilarning o‘zaro ta’siri

Mahalliy qo‘llaniladigan ketoprofen kam so‘riladi, shuning uchun dorilarning o‘zaro ta’siri ehtimoli kam.

Maxsus ko‘rsatmalar

Gel qon aylanishi yetishmovchiligi, buyrak yoki jigar faoliyati buzilgan bemorlarda ehtiyotkorlik bilan qo‘llanilishi kerak, chunki buyrak faoliyati buzilishiga ta’sir qiluvchi umumiy tizimli nojo‘ya ta’sirlarning individual holatlari haqida ma’lumotlar mavjud.

Gelni okklyuzion bog‘lamlar ostiga qo‘llash mumkin emas.

Ko‘z va shilliq qavatlarni dori mahsuloti bilan aloqa qilishdan himoya qilish lozim.

Har qanday teri reaksiyalari, shu jumladan oktokrilenni o‘z ichiga olgan mahsulotlarni parallel qo‘llashdan keyin teri reaksiyalari rivojlangan taqdirda, davolashni darhol to‘xtatish lozim.

Terapiya davomida va u tugagandan so‘ng 2 hafta davomida quyosh nuriga o‘ta sezuvchanlik xavfini oldini olish uchun davolanadigan teri sohalarini kiyim bilan himoya qilish tavsiya etiladi.

Har safar gelni ishlatgandan so‘ng, og‘riqli joy aynan qo‘llar bo‘lmagan hollar bundan mustasno, qo‘llar yuviladi. Teriga uzoq muddat applikatsiya qilish zarur bo‘lganda, himoya qo‘lqoplaridan foydalanish tavsiya etiladi.

Davolash kursining tavsiya etilgan muddatini uzaytirish mumkin emas, chunki qo‘llash muddati uzayishi bilan birga kontakt dermatit va yuqori sezuvchanlik reaksiyalari rivojlanish xavfi ortib boradi.

Astmasi va yondosh surunkali rinit, sinusit va/yoki burun polipozi bo‘lgan bemorlarda ehtiyotkorlik bilan qo‘llash lozim. Bunday bemorlarda atsetilsalitsil kislotasi va/yoki nosteroid yallig‘lanishga qarshi dori vositalariga nisbatan allergik reaksiya xavfi qolgan aholiga nisbatan yuqori bo‘ladi.

Bolalarda mahsulotni qo‘llashning xavfsizligi va samaradorligi aniqlanmagan.

Homiladorlik va laktatsiya davri

Homiladorlik

Mahalliy qo‘llaniladigan ketoprofen bo‘yicha klinik ma’lumotlar mavjud emas. Quyida keltirilgan ma’lumotlar umumiy ta’sirga ega ketoprofenga tegishli.

Homiladorlikning birinchi va ikkinchi trimestrlari:

Homiladorlik davrida ketoprofenni qo‘llashning xavfsizligi o‘rganilmagan. Homiladorlikning birinchi va ikkinchi trimestrlarida ketoprofenni qo‘llashdan saqlanish kerak.

Homiladorlikning uchinchi trimestri:

Homiladorlikning uchinchi trimestrida prostaglandin sintetazasining barcha ingibitorlari, shu jumladan ketoprofen, homilada yurak, o‘pka va buyraklarning toksik shikastlanishiga olib kelishi mumkin. Homiladorlikning oxirida onada va bolada qon ketish davomiyligi uzayishi mumkin. Demak, homiladorlikning oxirgi davrida ketoprofenni qo‘llash mumkin emas.

Emizish davri

Ketoprofenning ona sutiga kirishiga oid ma’lumotlar yo‘q. Emizikli ayollarda Febrofid gel dori vositasini qo‘llash tavsiya etilmaydi.

Avtotransportni boshqarish va harakatdagi mexanizmlarni boshqarish qobiliyatiga ta’siri

Febrofid gel dori vositasining avtotransportni boshqarish va harakatdagi mexanizmlarni boshqarish qobiliyatiga ta’sir qiluvchi nojo‘ya ta’sirlariga oid ma’lumotlar mavjud emas.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Mahalliy qo‘llash uchun gel shaklidagi ketoprofen dozasini oshirib yuborish ehtimoli kam.

Gel noto‘g‘ri yutilganda, ichiga tushgan modda miqdoriga qarab tizimli nojo‘ya ta’sirlar: uyquchanlik, ko‘ngil aynishi va qusish kuzatilishi mumkin. Darhol shifokorga murojaat qilish zarur.

Odatda, nosteroid yallig‘lanishga qarshi dori vositalari bilan zaharlanishni davolashda qo‘llaniladigan choralar va simptomatik davolashni qo‘llash kerak.

Chiqarish shakli

Alyuminiy tubalarda 30 g yoki 50 g dan.

1 ta tuba karton qutida qo‘llash bo‘yicha yo‘riqnoma bilan birga.

Saqlash shartlari

15 °C dan 25 °C gacha bo‘lgan haroratda saqlang. Yorug‘likdan himoya qiling.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

Medana Farma A.O.

98-200 Seradz, V. Loketka ko‘chasi 10, Polsha.