Futsis tabletkalari 150 mg №4 (1 blister)

Tarkib

1 ta tabletka tarkibida quyidagilar mavjud:

faol modda: flukonazol 50 mg yoki 100 mg, 150 mg yoki 200 mg;

yordamchi moddalar: laktoza, mikrokristall sellyuloza, povidon K30, talk, magniy stearat, natriy krosskarmeloza, aerosil, natriy saxarin.

Dori shakli

Tabletkalar.

Farmakoterapevtik guruh

Tizimli qo‘llash uchun zamburug‘larga qarshi vosita. ATX kodi: J02AC01.

Farmakologik xususiyatlari

Flukonazol triazol zamburug‘larga qarshi vositalarning yangi sinfi vakili bo‘lib, zamburug‘lar hujayrasida sterollar sintezining kuchli selektiv ingibitori hisoblanadi. Ta’sir mexanizmi zamburug‘ hujayrasining 14a-demetilaza fermentini sezilarli darajada ingibirlashi va buning natijasida zamburug‘ va mog‘or hujayra devorining asosiy komponenti bo‘lgan ergosterol sintezini bostirishi bilan bog‘liq.

Blastomyces dermatitidis, Candida spp., Coccidioides immitis, Cryptococcus neoformans, Epidermophyton spp., Histoplasma capsulatum, Microsporum spp. va Trichophyton spp. keltirib chiqaradigan mikoz qo‘zg‘atuvchilariga nisbatan faol. Flukonazolni uzoq vaqt qo‘llash tufayli Candida spp ning ba’zi shtammlariga ta’sir qilmaydi. Boshqa azol zamburug‘larga qarshi dori vositalari bilan o‘zaro rezistentlik qayd etilgan. Mikrobiologik o‘zaro ta’siri: in vitro tajribalarida terbinafin va flukonazolning Candida albicans ga nisbatan sinergik zamburug‘larga qarshi ta’siri aniqlangan.

Farmakokinetika

Ichga qabul qilingandan so‘ng flukonazol yaxshi so‘riladi. Biologik o‘zlashtirilishi 90% dan kam emas. Maksimal konsentratsiyaga (Smax) flukonazol qabul qilingandan 1-2 soat o‘tgach erishiladi. Plazmadagi konsentratsiya 50-400 mg dozada dozaga mutanosibdir. Preparat takroran qabul qilinganda plazmadagi konsentratsiya cho‘qqisi ortadi.

Muvozanatli konsentratsiyaga 5-10 kun ichida erishiladi, ammo zarba dozasi buyurilganda 2 kundan keyin ham yetishi mumkin.

Oqsillar bilan bog‘lanishi past (taxminan 12%). Flukonazol organizmning barcha suyuqliklariga yaxshi o‘tadi. Flukonazolning ko‘krak suti, so‘lak, balg‘am, sinovial, vaginal va peritoneal suyuqliklardagi darajasi uning plazmadagi konsentratsiyasiga o‘xshash. Zamburug‘li meningit bilan og‘rigan bemorlarda orqa miya suyuqligidagi flukonazol miqdori uning plazmadagi darajasining taxminan 50-90% ni tashkil qiladi.

Flukonazol asosan buyraklar orqali chiqariladi; qabul qilingan dozaning taxminan 80% siydikda o‘zgarmagan holda aniqlanadi. Yarim chiqarilish davri (T1/2) taxminan 30 soatni tashkil etadi. Flukonazol klirensi kreatinin klirensiga mutanosibdir. Flukonazol dializda chiqariladi.

Ko‘rsatmalar

kandidalar keltirib chiqargan infeksiyalar, shu jumladan tarqalgan kandidoz, shu jumladan kandidemiya, tarqoq kandidoz va invaziv kandidozli infeksiyaning boshqa shakllari (infeksiyalar: tarqalgan, endokard, ko‘z, nafas va siydik yo‘llari infeksiyalari);

shilliq qavatlar, shu jumladan og‘iz bo‘shlig‘i va tomoq, qizilo‘ngach kandidozi;

noinvaziv bronx-o‘pka infeksiyalari;

kanduriya;

og‘iz bo‘shlig‘i shilliq qavatining teri-shilliq va surunkali atrofik kandidozi (tish protezlarini taqish bilan bog‘liq);

genital kandidoz: vaginal kandidoz (o‘tkir yoki qaytalanuvchi), vaginal kandidoz qaytalanishining oldini olish (bir yilda 3 va undan ortiq marta uchrasa), shuningdek, kandidozli balanit.

Flukonazol kriptokokkli meningit va boshqa lokalizatsiyali kriptokokkli infeksiyada; dermatomikozlarda, shu jumladan oyoqlar, tana, chov sohasi mikozlarida; temiratki; onixomikozda; chuqur endemik mikozlarda, shu jumladan koksidioidomikoz, parakoksidioidomikoz, sporotrixoz va gistoplazmozda; shuningdek, sitostatik yoki nur terapiyasini olayotgan bemorlarda, OITS bilan og‘rigan bemorlarda zamburug‘li infeksiyalarning oldini olish uchun qo‘llaniladi.

Qo‘llash usuli va dozalari

Ichish uchun tabletkalar. Zamburug‘li infeksiyaning xarakteri va kechishiga qarab, sutkalik doza 50 mg dan 400 mg gacha bo‘lishi mumkin.

Davolashning davomiyligi klinik va mikologik ta’sirlarga bog‘liq. Flukonazol har kuni sutkada 1 marta qo‘llaniladi.

Kandidemiya, tarqoq kandidoz va boshqa invaziv kandidozli infeksiyalarda doza, odatda, 1 kun davomida 400 mg, keyin esa kuniga 200 mg ni tashkil etadi. Klinik ta’sirning ifodalanishiga qarab, terapiyani davom ettirish va dozani kuniga 400 mg gacha oshirish mumkin.

Orofaringeal kandidozda kattalarga, odatda, 50-100 mg flukonazol sutkada 1 marta 7-14 kun davomida buyuriladi. Immuniteti sezilarli darajada pasaygan bemorlarda davolash zarurat tug‘ilganda uzoqroq muddatga uzaytiriladi.

Tish protezlarini taqish bilan bog‘liq bo‘lgan og‘iz bo‘shlig‘i shilliq qavatining atrofik kandidozida, odatda, protezga ishlov berish uchun mahalliy antiseptik vositalar bilan birga 14 kun davomida sutkada 1 marta 50 mg dozada buyuriladi. Shilliq qavatlarning boshqa kandidozli infeksiyalarida (genital kandidozdan tashqari, masalan, ezofagit, noinvaziv bronx-o‘pka infeksiyalari, kanduriya, teri va shilliq qavatlar kandidozi va boshqalar) samarali doza odatda kuniga 50-100 mg ni tashkil etadi, davolash davomiyligi 14-30 kun.

OITS bilan og‘rigan bemorlarda orofaringeal kandidoz qaytalanishining oldini olish uchun birlamchi davolash kursi tugagandan so‘ng flukonazol haftasiga 1 marta 150 mg dozada buyuriladi. Shilliq pardalar kandidozida flukonazolning bolalar uchun tavsiya etilgan dozasi sutkasiga 3 mg/kg ni tashkil etadi. 1-kuni tezda barqaror bir xil konsentratsiyaga erishish uchun 6 mg/kg zarbdor dozani tayinlash mumkin.

Vaginal kandidozda flukonazol bir marta 150 mg ichiladi. Kasallikning qaytalanish chastotasini kamaytirish uchun preparat 150 mg dozada oyiga 1 marta qabul qilinadi. Davolashning davomiyligi individual ravishda belgilanadi; u 4 oydan 12 oygacha o‘zgarib turadi. Ba’zi hollarda qabul qilish chastotasi oshiriladi. Candida qo‘zg‘atgan balanitda flukonazol bir marta 150 mg dozada ichishga buyuriladi.

Kandidozning oldini olish uchun tavsiya etilgan doza zamburug‘li infeksiyaning rivojlanish xavfi darajasiga qarab kuniga 1 marta 50-400 mg ni tashkil etadi. Tarqalgan infeksiyaning yuqori xavfi mavjud bo‘lganda, masalan, ko‘zda tutilgan yaqqol yoki uzoq davom etuvchi neytropeniya bilan og‘rigan bemorlarda tavsiya etilgan doza - kuniga 1 marta 400 mg. Flukonazol mo‘ljallangan neytropeniya paydo bo‘lishidan bir necha kun oldin buyuriladi; neytrofil granulotsitlar soni 1 mm3 da 1000 dan ko‘paygandan keyin davolash yana 7 kun davom ettiriladi.

Kriptokokkli meningit va boshqa joylardagi kriptokokkli infeksiyalarda 1-kuni odatda 400 mg buyuriladi, keyin esa kuniga 1 marta 200-400 mg dozada davolash davom ettiriladi. Kriptokokkli infeksiyalarni davolashning davomiyligi klinik va mikologik samaraga erishishga bog‘liq; kriptokokkli meningitda odatda kamida 6-8 hafta davom ettiriladi. OITS bilan og‘rigan bemorlarda kriptokokkli meningitning qaytalanishini oldini olish uchun (birlamchi davolash kursi tugagandan so‘ng) flukonazol bilan davoni >200 mg/sutka dozada uzoq vaqt davom ettirish mumkin.

Teri infeksiyalarida, jumladan oyoq, silliq teri, chov sohasi mikozlarida va kandidoz infeksiyalarida tavsiya etilgan doza haftasiga 1 marta 150 mg yoki kuniga 1 marta 50 mg ni tashkil etadi. Davolashning davomiyligi odatda 2-4 hafta, biroq oyoq mikozida uzoqroq (6 haftagacha) davolanish talab etilishi mumkin.

Temiratki kasalligida tavsiya etilgan doza 2 hafta davomida haftasiga 1 marta 300 mg ni tashkil etadi; ba’zi bemorlar flukonazolning uchinchi dozasini - 300 mg qabul qilishga muhtoj bo‘lsalar, ayrim hollarda preparatni bir marta 300-400 mg qabul qilish kifoya qiladi. Davolashning muqobil sxemasi preparatni kuniga 1 marta 50 mg dan 2-4 hafta davomida qo‘llashdir. Onixomikozda (tinea unguium) tavsiya etilgan doza - 150 mg haftasiga 1 marta. Davolashni shikastlangan tirnoq sog‘lom tirnoq bilan to‘liq almashtirilgunga qadar davom ettirish lozim. Qo‘l va oyoq barmoqlarida tirnoqlarning to‘liq o‘sishi uchun odatda mos ravishda 3-6 va 6-12 oy kerak bo‘ladi, ammo tirnoqlarning o‘sish tezligi turli odamlarda, shuningdek, yoshga qarab keng chegaralarda o‘zgarishi mumkin. Muvaffaqiyatli davolanishdan so‘ng surunkali infeksiyalar og‘ir davolanadi, ba’zan tirnoqlar shaklining o‘zgarishi kuzatiladi.

Chuqur endemik mikozda preparatni kuniga 200-400 mg dozada uzoq vaqt (2 yilgacha) qo‘llash kerak bo‘lishi mumkin. Davolashning davomiyligi individual ravishda belgilanadi; odatda u koksidioidomikozda 11-24 oy, parakoksidioidomikozda 2-17 oy, sporotrixozda 1-16 oy va gistoplazmozda 3-17 oyni tashkil qiladi.

Keksalarni davolash uchun buyrak yetishmovchiligi belgilari bo‘lmaganda preparat odatdagi dozada ishlatiladi. Buyrak yetishmovchiligi bo‘lgan bemorlar uchun (kreatinin klirensi 11-50 ml/min) boshlang‘ich zarba dozasi 50-400 mg, keyingi qabullar uchun flukonazolning sutkalik dozasi 2 baravar kamaytiriladi. Doimiy dializda bo‘lgan bemorlar har bir dializ seansidan keyin flukonazol qabul qiladilar.

7 yoshdan oshgan bolalarga flukonazol shifokor tavsiyasi bilan buyuriladi.

Bolalar uchun sutkalik doza kattalarnikidan oshmasligi kerak.

Tarqalgan kandidoz va kriptokokk infeksiyasini davolash uchun bolalar uchun flukonazol dozasi kasallikning holatiga qarab kuniga 6-12 mg/kg ni tashkil etadi.

Kriptokokk infeksiyasini davolash uchun bolalar uchun flukonazolning tavsiya etilgan dozasi kasallikning kechishiga qarab kuniga 6-12 mg/kg ni tashkil etadi.

Qarshi ko‘rsatmalar

Flukonazolga yoki kimyoviy tuzilishi bo‘yicha unga yaqin bo‘lgan azol birikmalariga yuqori sezuvchanlik; flukonazol bilan kuniga 400 mg yoki undan ortiq dozada davolanayotgan bemorlarda terfenadinni bir vaqtda qo‘llash; jigar yetishmovchiligi; homiladorlik; laktatsiya; 7 yoshgacha bo‘lgan bolalar.

Nojo‘ya ta’sirlari

Futsis® odatda yaxshi qabul qilinadi.

Biroq, nojo‘ya ta’sirlardan ko‘pincha bosh og‘rig‘i, qorin og‘rig‘i, diareya, meteorizm, ko‘ngil aynishi, qusish, jigarning toksik shikastlanishi (laboratoriya ko‘rsatkichlarining o‘zgarishi - ishqoriy fosfataza, bilirubin, aminotransferaza darajasining oshishi) va gepatit rivojlanishi mumkin. Shuningdek, bosh aylanishi, talvasalar; alopetsiya, eksfoliativ teri reaksiyalari; leykotsitlar (neytropeniya, agranulotsitoz) va qon trombotsitlari sonining o‘zgarishi; allergik reaksiyalar (teri toshmalari, qichishish, yuz shishi, anafilaksiya), qonda xolesterin, triglitseridlar, kaliy miqdorining oshishi; ta’m bilishning o‘zgarishi kuzatilishi mumkin.

Agar sizda qandaydir noodatiy reaksiyalar paydo bo‘lsa, dori vositasini keyingi qo‘llash bo‘yicha albatta shifokor bilan maslahatlashing!

Dorilarning o‘zaro ta’siri

Varfarin va flukonazolni bir vaqtda qabul qilish protrombin vaqtini oshiradi; flukonazol va sulfonilmochevina hosilalari guruhidagi peroral gipoglikemik preparatlar (xlorpropamid, glibenklamid, glipizid va tolbutamid) - ularning yarim chiqarilish davrini uzaytiradi (gipoglikemiya rivojlanishi mumkinligini hisobga olish kerak).

Futsis va fenitoin bir vaqtda qabul qilinganda, fenitoin konsentratsiyasi klinik jihatdan sezilarli darajada oshadi (konsentratsiyani nazorat qilish va dozani tanlash zarur). Gidroxlortiazidni ko‘p marta qo‘llash flukonazolning qon plazmasidagi konsentratsiyasini oshiradi, biroq flukonazolning dozalash tartibini o‘zgartirish, odatda, kerak emas.

Flukonazol 50-200 mg dozada ichishga mo‘ljallangan kombinatsiyalangan kontratseptiv vositalarning samaradorligiga sezilarli ta’sir ko‘rsatmaydi.

Flukonazol va rifampitsinni bir vaqtda qo‘llash AUC (konsentratsiya/vaqt bog‘liqligini belgilovchi farmakologik egri chiziq ostidagi maydon) 25% ga va flukonazolning yarim chiqarilish davri davomiyligi 20% ga kamayishiga olib keldi. Preparatlarning ko‘rsatilgan kombinatsiyasidan foydalanayotgan bemorlar flukonazol dozasini oshirish maqsadga muvofiqligini hisobga olishlari kerak.

Flukonazolni qo‘llash vaqtida qondagi siklosporin miqdorini nazorat qilish tavsiya etiladi.

Flukonazol va zidovudin kombinatsiyasi tayinlangan bemorlarning holatini zidovudinning nojo‘ya ta’sirlarini erta aniqlash maqsadida kuzatib borish lozim, bunda AUC ("konsentratsiya/vaqt" bog‘liqligini belgilovchi farmakologik egri chiziq ostidagi maydon) sezilarli darajada oshadi.

Sizaprid, astemizol, rifabutin, takrolimus yoki sitoxrom R450 tizimi tomonidan metabolizmga uchraydigan boshqa dori vositalarini bir vaqtning o‘zida qabul qilayotgan bemorlarda flukonazol qo‘llanilishi ushbu dori vositalarining qondagi konsentratsiyasi oshishi bilan kechishi mumkin.

Simeditin yoki antatsidlarni bir vaqtda qabul qilish flukonazolning so‘rilishiga klinik jihatdan sezilarli ta’sir ko‘rsatmaydi.

Maxsus ko‘rsatmalar

Ushbu preparatni tayinlagan shifokor davolash jarayonini kuzatib borishi muhimdir. U tayinlagan vaqtda uning oldiga kelishni unutmang.

Davolashni boshlashdan oldin shifokor bilan maslahatlashing!

Flukonazol bilan davolash vaqtida jigar funksiyasi ko‘rsatkichlari buzilgan bemorlar shifokor nazoratida bo‘lishlari kerak. Jigar shikastlanishining klinik belgilari paydo bo‘lishi bilan flukonazolni bekor qilish kerak.

OITS bilan og‘rigan bemorlar ko‘pchilik preparatlarni qabul qilganda terida og‘ir reaksiyalar rivojlanishiga ko‘proq moyil bo‘ladilar. Yuzaki zamburug‘li infeksiya tufayli davolanayotgan bemorda flukonazolni qo‘llash bilan bog‘liq bo‘lishi mumkin bo‘lgan toshmalar paydo bo‘lishi bilan preparatni bekor qilish kerak. Invaziv/tizimli zamburug‘li infeksiyalar bilan og‘rigan bemorlarda toshmalar paydo bo‘lishi bilan, albatta, holatni kuzatish va polimorf eritema paydo bo‘lganda flukonazolni bekor qilish kerak.

Homilador ayollarni davolash uchun flukonazolni tayinlashdan saqlanish kerak, og‘ir va hayot uchun xavfli bo‘lgan zamburug‘li infeksiyalar bundan mustasno, bunda ayol uchun kutilayotgan foyda homila uchun potensial xavfdan yuqori bo‘ladi. Flukonazol ona sutida qondagi konsentratsiya bilan bir xil miqdorda aniqlanadi, shuning uchun uni laktatsiya davrida qo‘llash tavsiya etilmaydi.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin iste’mol qilmaslik kerak.

Dozani oshirib yuborish

Belgilari: ko‘ngil aynishi, qusish, diareya, og‘irroq hollarda - talvasalar bo‘lishi mumkin.

Davolash: oshqozonni yuvish va simptomatik davolash tavsiya etiladi. Chunki flukonazol siydik bilan chiqariladi. Tezlashtirilgan diurez uning chiqarilishini oshiradi. 3 soat davomida gemodializ o‘tkazish plazmadagi flukonazol konsentratsiyasini yarmiga kamaytiradi.

Chiqarilish shakli: 50 mg li tabletkalar blisterda, karton qadoqda.

100 mg li No 4 tabletkalar blisterda, karton qutida.

150 mg li No 1, No 4 tabletkalar blisterda, karton qutida.

Blisterda 200 mg li No 4 tabletkalar, karton qutida.

Saqlash shartlari

Quruq, qorong‘i joyda, 15-25 °C haroratda.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

KUSUM HEALTHCARE PVT.LTD.

SP-289 (A),RIICO INDL.AREA,CHOPANKI,

BHIWADI (RAJ.) INDIA.