Gidrokortizon-Akos (Hydrocortisonum-Akos) ko'z malhami 0,5%, 5 g (naycha)

Tarkib

100 g uchun tarkib:

Ta’sir etuvchi modda: gidrokortizon atsetat - 0,5 g.

Yordamchi moddalar: metilparagidroksibenzoat (metilparaben, nipagin), oq yumshoq parafin (vazelin).

Tavsif

Oq, sarg‘ish tusli oq yoki sariq rangli surtma.

Chiqarish shakli

Ko‘z surtmasi 0,5%.

Farmakoterapevtik guruh

Mahalliy qo‘llash uchun glyukokortikosteroid. Gidrokortizon. ATX kodi: S01BA02.

Farmakologik xususiyatlari

Farmakodinamika

Gidrokortizon - tabiiy glyukokortikosteroid. Yallig‘lanishga, allergiyaga qarshi ta’sir ko‘rsatadi. Yallig‘lanishli hujayra infiltratlarini kamaytiradi, leykotsitlar va limfotsitlarning yallig‘lanish sohasiga migratsiyasini kamaytiradi. Hujayra va subhujayra, jumladan, lizosomal va semiz hujayra membranalarini barqarorlashtiradi. Immunoglobulinlarning hujayra yuzasidagi retseptorlar bilan bog‘lanishini kamaytiradi va limfotsitlar hamda makrofaglardan sitokinlar (interleykinlar va interferon) sintezi yoki ajralib chiqishini tormozlaydi. Fosfolipidlardan araxidon kislotasining ajralib chiqishini va uning metabolitlari (prostaglandinlar, leykotriyenlar, tromboksan) sintezini kamaytiradi. Ekssudativ reaksiyani kamaytiradi, kapillyarlar o‘tkazuvchanligini kamaytiradi. Erta immunologik javobning ifodalanishini pasaytiradi. Katabolik ta’sirga ega bo‘lib, biriktiruvchi to‘qimaning rivojlanishini va chandiqlanishni tormozlaydi.

Farmakokinetika

Absorbsiya

Ko‘z surtmasi qo‘llangandan so‘ng gidrokortizon suvli namlikda, shox pardada, rangdor pardada, qon tomir pardasida, siliar tanada va to‘r pardada so‘riladi. Tizimli so‘rilishi mumkin, ammo faqat yuqori dozalarda va/yoki uzoq muddatli davolashda klinik ahamiyatga ega bo‘ladi.

Taqsimlash

Gidrokortizonning shilliq parda va shox parda orqali so‘rilishi shox parda epiteliysining intaktlik darajasi va ko‘zdagi yallig‘lanish holatlarining yaqqolligiga bevosita bog‘liq.

Biotransformatsiya

Qonda 80% i transkortin bilan, 10% i albuminlar bilan bog‘lanadi.

Epiminatsiya

Gidrokortizonning plazmadagi yarim chiqarilish davri taxminan 90 daqiqani tashkil etadi. Ekskretsiyaning 90% dan ortig‘i buyraklar orqali glyukuronid ko‘rinishida, faqat 0,5% ga yaqini o‘zgarmagan gidrokortizon ko‘rinishida siydik bilan chiqariladi.

Ko‘rsatmalar

- Ko‘z allergik kasalliklari (qovoq dermatitlari, blefaritlar, konyunktivitlar va keratokonyunktivitlar);

- shox parda epiteliysining butunligi buzilmagan holda ko‘zning oldingi qismidagi yallig‘lanish kasalliklari (blefaritlar, konyunktivitlar va keratokonyunktivitlar);

- termik va kimyoviy kuyish (shox parda nuqsonlarining to‘liq epitelizatsiyasidan so‘ng).

Qarshi ko‘rsatmalar

Ta’sir etuvchi moddaga yoki yordamchi moddalarning istalganiga yuqori sezuvchanlik; ko‘z sili; gerpetik epitelial keratit; ko‘zning boshqa virusli infeksiyalarining o‘tkir davri, ko‘zning zamburug‘li kasalliklari, ko‘zning bakterial infeksiyalari, shox pardaning jarohatlari va boshqa buzilishlari, glaukoma.

Qo‘llash usuli va dozalari

Mahalliy.

Konyunktiva xaltasiga 1 sm ko‘z surtmasi sutkada 2-3 marta yuboriladi.

Davolash kursi 1-2 hafta. Shifokor tavsiyasiga ko‘ra davolash kursi uzaytirilishi mumkin.

Nojo‘ya ta’sirlari

Quyida klinik tadqiqotlar davomida va preparatni qo‘llashning marketingdan keyingi tajribasi asosida qayd etilgan nojo‘ya ta’sirlar keltirilgan. Nojo‘ya ta’sirlar chastotasi quyidagi gradatsiya bo‘yicha baholandi: juda tez-tez (≥1/10), tez-tez (≥1/100 dan <1/10 gacha), tez-tez emas (≥1/1000 dan <l/100 gacha), kamdan-kam (≥1/10000 dan <1/1000 gacha), juda kamdan-kam (<l/10000), chastotasi noma’lum (mavjud ma’lumotlarni baholash imkonsiz).

Immun tizimi tomonidan buzilishlar

Kamdan-kam hollarda: kontakt dermatit, dermatokonyunktivit, qovoqlar ekzemasi kabi allergik reaksiyalar.

Ko‘ruv a’zosining buzilishi

Kamdan-kam hollarda: konyunktiva inyeksiyasi, ko‘zdan yosh oqishi, oftalmogipertenziya ("Maxsus ko‘rsatmalar" bo‘limiga qarang).

Kamdan-kam hollarda: achishish, sanchish, infeksiyalar (masalan, virusli, zamburug‘li yoki bakterial), shox pardaning trofik shikastlanishi, ekzoftalm, katarakta.

Chastotasi noma’lum: midriaz, yaralarning sekin bitishi, ptoz, ko‘rishning xiralashishi.

Dozani oshirib yuborish

Dozaning oshirib yuborilishi juda kam kuzatiladi. Dozani oshirib yuborish belgilari: mahalliy dozaga bog‘liq nojo‘ya ta’sirlar yuzaga kelishi mumkin. Preparat bekor qilinganda dozani oshirib yuborish hodisalari o‘z-o‘zidan o‘tib ketadi.

O‘zaro aloqa

Midriatiklar (masalan, atropin yoki boshqa antixolinergik dorilar) va gidrokortizonni birgalikda qo‘llash ko‘z ichi bosimining ko‘tarilishi xavfini oshiradi. Gidrokortizon va oftalmologiyada gipotenziv terapiya uchun mo‘ljallangan preparatlar birgalikda qo‘llanganda, ikkinchisining samaradorligi pasayishi mumkin.

Maxsus ko‘rsatmalar

Allergik konyunktivitda mahalliy kortikosteroidlarni qo‘llash faqat og‘ir holatlarda, standart davolash (masalan, antigistamin preparatlar) yetarli natija bermaganda tavsiya etiladi. Klinik manzaraning og‘irligiga qarab, muntazam vaqt oralig‘ida o‘tkazilayotgan terapiyaning samaradorligini tekshirish va uni davom ettirish yoki o‘zgartirish to‘g‘risida qaror qabul qilish lozim. Davolash kursining davomiyligi iloji boricha qisqa bo‘lishi kerak.

Kortikosteroidlar ko‘zning bakterial, virusli yoki zamburug‘li infeksiyasini niqoblashi, faollashtirishi yoki og‘irlashtirishi mumkin, bu esa davolash davomida bemorning holatini sinchkovlik bilan nazorat qilishni talab etadi. Terapiya tugagandan keyin ham, ayniqsa uzoq muddatli davolanish va shox pardaning oldingi shikastlanishi holatida, infeksion zararlanish rivojlanish xavfi saqlanib qoladi.

Anamnezida oftalmogerpes bo‘lgan bemorlarni davolash jarayonida preparat bilan davolash davomida yondosh virusga qarshi terapiyani tayinlash zarurligini baholash lozim.

Kortikosteroidlar bilan davolash davomida ko‘z ichki bosimining ko‘tarilishi kuzatilishi mumkin, bu esa ko‘ruv nervining shikastlanishi va keyinchalik ko‘rish maydoni va/yoki ko‘rish o‘tkirligining yo‘qolishi bilan kechuvchi glaukomaga olib kelishi mumkin. Bu, xususan, oldingi davolanish paytida ko‘z ichi bosimining ko‘tarilishi qayd etilgan bemorlarga, shuningdek, keksa yoshdagi bemorlarga tegishli. Shu sababli, gidrokortizon bilan davolash paytida ko‘z ichi bosimini qisqa vaqt oralig‘ida nazorat qilish kerak.

Ko‘z kasalliklarini davolashda kortikosteroidlarni qo‘llash ham katarakta rivojlanishiga olib kelishi mumkin, keksa bemorlar va qandli diabet bilan og‘rigan bemorlar yuqori xavf ostida. Ayniqsa, uzoq vaqt davolanganda ko‘z holatini sinchiklab nazorat qilish lozim.

Shox parda perforatsiyasi oftalmologiyada kortikosteroidlarni mahalliy qo‘llashda shox parda va skleraning yupqalashishiga olib keladigan holatlar mavjud bo‘lganda yuzaga kelishi mumkin. Shuning uchun shox pardaning holatini muntazam nazorat qilib turish kerak.

Oftalmologiyada mahalliy qo‘llash uchun kortikosteroidlar bilan uzoq vaqt davolash ko‘ruv nerviga shikastlovchi ta’sir ko‘rsatishi mumkin.

Homiladorlik va laktatsiya

Homiladorlik

Homilador ayollarda gidrokortizonni qo‘llash bo‘yicha nazoratli tadqiqotlar o‘tkazilmagan. Homiladorlik davrida glyukokortikoidlar bilan uzoq vaqt davolanish bolaning ona qornida rivojlanishining kechikishiga olib kelishi mumkin. Klinikagacha bo‘lgan tadqiqotlarda glyukokortikoidlar tanglayning yorilishiga olib kelganligi haqida ma’lumotlar olingan. Homiladorlikning birinchi uch oyligida glyukokortikoidlar bilan davolashda og‘iz bo‘shlig‘ida yoriqlar paydo bo‘lish xavfi ortishi haqida ma’lumotlar mavjud. Epidemiologik tadqiqotlar va klinikagacha bo‘lgan ma’lumotlarga asoslanib, homiladorlik davrida glyukokortikoidlar bilan davolanish katta yoshda metabolik va yurak-qon tomir kasalliklarining rivojlanishiga olib kelishi mumkinligi ko‘rsatilgan.

Kortikosteroidlar yo‘ldosh orqali o‘tadi. Mahalliy oftalmologik qo‘llashdan keyin ham tizimli ta’sirni to‘liq istisno qilish mumkin bo‘lmaganligi sababli, preparat homiladorlikda qo‘llanilmasligi kerak, muqobil davolash usullari mavjud bo‘lmagan holatlar bundan mustasno. Davolash o‘tkazish zarur bo‘lsa, kurs iloji boricha qisqaroq bo‘lishi va minimal dozalar tayinlanishi kerak.

Agar glyukokortikoidlar homiladorlikning uchinchi trimestrida buyurilsa, homilada buyrak usti bezi po‘stlog‘ining atrofiyaga uchrash xavfi mavjud. Shuning uchun homiladorlik davrida gidrokortizon qabul qilgan onalarning bolalari buyrak usti bezi yetishmovchiligi belgilarini sinchiklab kuzatib borishlari kerak. Zarurat tug‘ilganda chaqaloqni o‘rinbosar terapiya bilan davolash mumkin.

Emizish davri

Glyukokortikoidlar ko‘krak sutiga o‘tadi. Homilador va emizikli ayollarda gidrokortizonni qo‘llashga faqat davolovchi shifokor ko‘rsatmasi bilan, ona uchun kutilayotgan davolash samarasi homila yoki bola uchun potensial xavfdan yuqori bo‘lganda ruxsat etiladi.

Transport vositalari va mexanizmlarini boshqarish qobiliyatiga ta’siri

Agar bemorda preparatni qo‘llashdan so‘ng ko‘rish qobiliyati vaqtincha pasaysa, ko‘rish qobiliyati tiklanmaguncha avtomobil boshqarish va ko‘rish qobiliyatining aniqligini talab qiladigan faoliyat turlari bilan shug‘ullanish tavsiya etilmaydi.

Qadoq

Alyuminiy tubalarga 3 g, 5 g dan solinadi. Ishlatish yo‘riqnomasi yozilgan har bir tuba karton qutiga solinadi.

Saqlash shartlari

15 oS dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

2 yil.

Qadoqni ochgandan so‘ng 1 oy davomida ishlating.

Yaroqlilik muddati o‘tgandan keyin qo‘llanilmasin.

Dorixonalardan berish shartlari

Retseptsiz

Ro‘yxatdan o‘tish guvohnomasi egasi

SINTEZ OAJ QO‘RG‘ON TIBBIYOT PREPARATLARI VA BUYUMLARI AKSIYADORLIK JAMIYATI Rossiya

Ishlab chiqaruvchi

SINTEZ OAJ QO‘RG‘ON TIBBIYOT PREPARATLARI VA BUYUMLARI AKSIYADORLIK JAMIYATI Rossiya