Kyupen planshetlari 50 mg / 500 mg №100 (10 blister х 10 tabletka)

Tarkib

Har bir tabletka tarkibiga quyidagilar kiradi:

Faol moddalar: paratsetamol 500 mg, diklofenak natriy 50 mg.

Yordamchi moddalar: kraxmal, jelatin, tozalangan talk, magniy stearat, natriy kraxmal glikolat, Sunset Yellow FCF bo‘yog‘i, suvsiz kolloid kremniy dioksidi, tozalangan suv (yetarli miqdorda).

Tavsif

Tabletka oq-zarg‘aldoq rangli, ikki qavatli, dumaloq, ikki tomoni qavariq, har ikki tomoni silliq (kesiksiz), qobiq bilan qoplanmagan tabletka.

Farmakoterapevtik guruh

Analgetik-antipiretik. ATX kodi: M01AB55.

Farmakologik xususiyatlari

Kyupen tabletkalari tarkibida NYAQV guruhidan 2 ta modda bor; paratsetamol va diklofenak natriy.

Ikkala vosita ham araxidon kislotasidan siklik endoperoksidlar hosil bo‘lishiga yordam beruvchi siklooksigenaza faolligini susaytiradi.

Siklik endoperoksidlar yallig‘lanish va uning klinik ko‘rinishlari og‘riq, shish, harorat ko‘tarilishi rivojlanishida ishtirok etuvchi prostaglandinlar hosil bo‘lish jarayonida boshlang‘ich material bo‘lib xizmat qiladi.

Diklofenak siklooksigenazaning ikkala turi faolligini susaytirish hisobiga prostaglandinlar hosil bo‘lishini susaytiradi. Bu bilan u kuchli og‘riq qoldiruvchi va yallig‘lanishga qarshi ta’sir ko‘rsatadi.

Isitma tushiruvchi ta’siri o‘rtacha ifodalangan.

Diklofenakning og‘riq qoldiruvchi ta’sirining markaziy mexanizmi nerv sistemasida prostaglandinlar hosil bo‘lishini ingibirlashi bilan bog‘liq.

Paratsetamol asosan markaziy ta’sir ko‘rsatib, nerv sistemasida prostaglandinlar hosil bo‘lishini susaytiradi.

Kuchli analgetik va antiseptik hisoblanadi.

Yallig‘lanishga qarshi ta’siri sust ifodalangan.

Farmakokinetika

Diklofenak ovqat hazm qilish yo‘llaridan yaxshi so‘riladi.

Bir vaqtning o‘zida ovqat iste’mol qilinganda so‘rilish tezligi biroz sekinlashadi. Sinovial suyuqlikka kira oladi.

Metabolizm asosan jigarda amalga oshadi. Metabolitlarning bir qismi farmakologik jihatdan faol. Metabolitlar asosan buyraklar orqali, qisman o‘t orqali chiqariladi. Diklofenakning 1% ga yaqini buyraklar orqali o‘zgarmagan holda chiqariladi.

Paratsetamolning hazm yo‘lida so‘rilishi tez, asosan ingichka ichakda sodir bo‘ladi.

Paratsetamolning metabolizmi jigarda sodir bo‘ladi. Almashinuv mahsulotlari buyraklar orqali chiqariladi. Buyraklar o‘zgarmagan holda 5% preparatni ekskretsiya qiladi.

Ko‘rsatmalar

Shamollash kasalliklari, bosh og‘rig‘i, nevralgiya, tish og‘rig‘i, bel og‘rig‘i, osteoartroz, ishias, revmatoid artrit, radikulit, isitma holatlari, bursitlar, tendinitlar, miozitlar, dismenoreya, operatsiyadan keyingi og‘riqlarni simptomatik davolash uchun tavsiya etiladi.

Qo‘llash usuli va dozalari

Ichish uchun.

12 yoshdan kichik bolalarda qo‘llanilmaydi.

Kattalar va 12 yoshdan oshgan bolalar: 1 tabletkadan kuniga 2-3 mahal ovqatdan keyin.

Yoki shifokor buyurganidek.

Nojo‘ya ta’sirlari

anoreksiya, qabziyat, ko‘ngil aynishi, qorin og‘rig‘i, ich ketishi;

qon ketishi bilan asoratlanishi mumkin bo‘lgan ovqat hazm qilish traktining yaralari (odatda, faqat uzoq vaqt foydalanilganda uchraydi);

tushkunlik, uyquchanlik, bosh og‘rig‘i;

gematuriya, nefrotik sindrom, o‘tkir buyrak yetishmovchiligi, proteinuriya;

trombotsitopeniya, anemiya;

allergik reaksiyalar.

Nojo‘ya ta’sir belgilari (agar mavjud bo‘lsa) dori to‘xtatilgandan so‘ng pasayishi kerak. Agar alomatlar yo‘qolmasa, shifokorga murojaat qiling.

Qarshi ko‘rsatmalar

Quyidagi holatlarda qo‘llash mumkin emas:

yara kasalligining zo‘rayishi;

homiladorlik;

buyrak kasalliklarida;

laktatsiya davrida;

"aspirin uchligi" (burun va qo‘shimcha bo‘shliqlar polipozi, nosteroid yallig‘lanishga qarshi dorilarni ko‘tara olmaslik va bronxial astmaning birga kelishi);

12 yoshgacha bo‘lgan bolalar yoshi.

Dozani oshirib yuborish

Belgilari: buyrak yetishmovchiligi, arterial gipotenziya, talvasalar, dispeptik holatlar, nafas olishning buzilishi.

Davolash: simptomatik.

Maxsus shartlar

Buyrak va jigar faoliyati buzilgan bemorlarda preparatni qo‘llashda ehtiyot bo‘lish kerak.

Qadoqdagi yaroqlilik muddatini tekshiring va yaroqlilik muddati tugagandan so‘ng preparatni ishlatmang.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin qo‘llamaslik kerak.

Homiladorlik va emizish davrida

Homiladorlik yoki laktatsiya davrida qo‘llash mumkin emas.

Homiladorlikda faqat bemor uchun potentsial foyda homila uchun potentsial xavfdan ustun bo‘lgandagina qo‘llaniladi.

Dorilarning o‘zaro ta’siri

Kyupen furosemid va gipotenziv dorilarning klinik ta’sirini pasaytiradi, kaliy saqlovchi diuretiklarning ta’sirini kuchaytiradi.

Plazmada digoksin miqdorini oshiradi.

Kortikosteroidlarni bir vaqtda buyurish ovqat hazm qilish trakti yaralarining rivojlanish xavfini oshiradi.

Metotreksatning toksik ta’sirini oshiradi.

Siklosporinning nefrotoksik ta’sirini kuchaytiradi.

Antikoagulyantlar ta’sirini kuchaytirish mumkin.

Chiqarish shakli

Tabletkalar 500 mg+50 mg N100 (10x10) (blisterlar).

Saqlash shartlari

Qorong‘i joyda, 25 oC dan past haroratda saqlanadi.

Yaroqlilik muddati

Ishlab chiqarilgan sanadan boshlab 4 yil.

Ishlab chiqaruvchi

Avison Pharmaceutical Pvt. Ltd., India Coral Laboratories Limited.