Medinak (Medinac) tabletkalari 50 mg + 500 mg № 100 (10 blister х 10 tabletka)

Tarkib

1 tabletka quyidagilarni o‘z ichiga oladi:

Faol moddalar: paratsetamol 500 mg, diklofenak natriy 50 mg.

Yordamchi moddalar: makkajo‘xori kraxmali, povidon, natriy metilparaben, natriy propilparaben, magniy stearat, tozalangan talk, natriy kraxmalglikolat, natriy krosskarmelloza.

Tavsif

Oq, oval shaklidagi, qoplamasiz, bir tomoni siniq chiziqli, ikkinchi tomoni silliq tabletkalar.

Dori shakli

Tabletkalar.

Farmakoterapevtik guruh

Antipiretik va analgetik. ATX kodi: M01AB55.

Farmakologik xususiyatlari

Medinak® - og‘riq qoldiruvchi va yallig‘lanishga qarshi kombinatsiyalangan preparat. Ta’sir mexanizmi uni tashkil etuvchi komponentlarning farmakologik xususiyatlariga bog‘liq.

Paratsetamol og‘riq qoldiruvchi va isitma tushiruvchi ta’sir ko‘rsatadi. Og‘riq qoldiruvchi ta’sir mexanizmi asosan gipotalamusdagi termoregulyatsiya markazida prostaglandinlar sintezining ingibirlanishi bilan bog‘liq.

Diklofenak natriy nosteroid yallig‘lanishga qarshi vosita hisoblanadi. Siklooksigenazani (SOG1 va SOG2) tanlamasdan so‘ndirib, araxidon kislotasi metabolizmini buzadi va yallig‘lanish o‘chog‘ida prostoglandinlar miqdorini kamaytiradi. Yallig‘lanish xarakteridagi og‘riqlarda eng samarali hisoblanadi. Yallig‘lanishga qarshi, og‘riq qoldiruvchi va isitma tushiruvchi ta’sir ko‘rsatadi, trombotsitlar agregatsiyasiga to‘sqinlik qiladi. Uzoq muddat qo‘llanilganda desensibilizatsiyalovchi ta’sir ko‘rsatadi.

Farmakokinetika

Paratsetamol ichilganda yaxshi va tez so‘riladi. Plazmadagi konsentratsiyaning cho‘qqisiga 30-90 daqiqadan so‘ng erishiladi. Organizmning deyarli barcha to‘qimalariga kiradi, yo‘ldoshga oson o‘tadi va ko‘krak suti bilan ajraladi. Buyraklar orqali asosan metabolitlar holida ajraladi. Yarim chiqarilish davri 1,5 dan 3 soatgacha. Jigar faoliyati buzilganda preparatning organizmdan chiqarilishi sekinlashadi, bu esa metabolitlarning organizmda to‘planishiga yordam beradi. Jigarda metabolizmga uchraydi va siydik bilan chiqariladi, metabolitlar farmakologik jihatdan faol emas, ammo to‘planganda jigar nekroziga olib kelishi mumkin.

Diklofenak natriy - ichga bir marta qabul qilingandan so‘ng ichakdan tez va to‘liq so‘riladi, faol moddaning taxminan 50% jigar orqali birinchi o‘tishda metabolizmga uchraydi. Preparatning qon plazmasidagi maksimal konsentratsiyasi 50 mg dozada 1-2 soatdan keyin kuzatiladi va 1,5 mkg/ml (5 mkmol/l) ni tashkil etadi. Ovqat so‘rilish tezligini sekinlashtiradi, lekin so‘riluvchi faol modda miqdori o‘zgarmaydi. Preparatning qon plazmasi oqsillari bilan bog‘lanishi 99,7% ni tashkil etadi; bunda preparatning katta qismi (99,4%) albuminlar bilan bog‘lanadi. Sinovial suyuqlikka, bo‘g‘im bo‘shlig‘iga yaxshi o‘tadi. Sinovial suyuqlikdan yarim chiqarilish davri 3-6 soatni tashkil etadi. Medinak®a ning 60% buyraklar orqali metabolitlar ko‘rinishida, qolgan qismi o‘t orqali chiqariladi. Buyrak faoliyatining yaqqol buzilishlari bo‘lgan bemorlarda (kreatinin klirensi 10 ml/min dan kam) metabolitlarning o‘t bilan chiqarilishining solishtirma og‘irligi ortadi, shuning uchun ularning qondagi konsentratsiyasining oshishi kuzatilmaydi.

Qo‘llanilishi

Quyidagi kasalliklarda kuchsiz va o‘rtacha darajadagi og‘riq sindromi:

LOR a’zolari (faringit, tonzillit, otit);

o‘t yo‘llari (o‘t sanchig‘i);

siydik yo‘llari (buyrak sanchig‘i);

bosh miya tomirlari (migren);

ayollar jinsiy a’zolari (algodismenoreya, adneksit);

tayanch-harakat apparati (revmatoid artrit, psoriatik, yuvenil artrit, ankilozlovchi spondilit, podagra artriti, osteoartroz, osteoxondroz);

bo‘g‘imdan tashqari to‘qimalar (tendovaginit, bursit);

nevralgiya, mialgiya;

jarohatdan keyingi va operatsiyadan keyingi og‘riqlar;

tish og‘rig‘i;

isitma sindromi

Qo‘llash usuli va dozalari

Ichkariga. Tabletkalarni butunligicha, chaynamasdan, yetarli miqdorda suyuqlik bilan ichish kerak. Davolashning boshida tana vazni 60 kg dan ortiq bo‘lgan kattalar va 12 yoshdan oshgan o‘smirlarga kuniga 2-3 tabletka Medinak®a buyurish tavsiya etiladi. Preparatni ovqatdan oldin qabul qilgan ma’qul. Me’da sezuvchanligi oshganda preparat ovqatdan keyin qabul qilinadi.

Kasallikning o‘rtacha ifodalangan alomatlarida, shuningdek, uzoq muddatli terapiyada, qoida tariqasida, kuniga 2 tabletkadan dori qabul qilish yetarli - ertalab va kechqurun bir tabletkadan. Maksimal bir martalik doza - 2 tabletka. Preparatni qo‘llash muddati 5-7 kun.

12 yoshdan oshgan, tana vazni 30 kg dan ortiq bo‘lgan bolalarga 1/2 tabletkadan buyuriladi. Kuniga 2-3 marta. Har bir navbatdagi qabul o‘rtasidagi interval kamida 4 soatni tashkil etadi.

Kattalarda davolashning maksimal davomiyligi - 7 kun, bolalarda - 3 kun.

Nojo‘ya ta’sirlari

Oshqozon-ichak tizimi tomonidan: ko‘ngil aynishi, qusish, anoreksiya, noqulaylik hissi (epigastral sohada og‘riq va spazm), meteorizm, ishtahaning pasayishi. Kamdan-kam hollarda: me’da-ichak yo‘lining qon ketishi, perforatsiya, aftoz stomatit, ezofagit bilan asoratlanadigan eroziv-yarali shikastlanishlari.

Markaziy asab tizimi tomonidan: bosh og‘rig‘i, bosh aylanishi, tez charchash. Kamdan-kam hollarda: idrokning buzilishi (xira ko‘rish, diplopiya), quloq shang‘illashi, jizzakilik, tutqanoq, uyqu buzilishi, depressiya, xavotir hissi, ruhiy buzilishlar.

Dermatologik reaksiyalar: teri toshmasi, eshakemi. Bullyoz toshmalar, ekzema, eritrodermiya, soch to‘kilishi, fotosensibilizatsiya kuzatilishi mumkin.

Jigar faoliyati tomonidan: jigar faoliyatining buzilishi, shu jumladan gepatit (sariqlik bilan yoki sariqliksiz).

Qon yaratish tizimi tomonidan: ayrim hollarda: trombotsitopeniya, leykopeniya, agranulotsitoz, gemolitik anemiya, aplastik anemiya.

Yurak-qon tomir tizimi tomonidan: ayrim hollarda - taxikardiya, ko‘krak qafasi sohasida og‘riq, arterial gipertenziya, dimlangan yurak yetishmovchiligi.

Allergik va immunopatologik reaksiyalar: kam hollarda: bronxial astma xurujlari, tizimli anafilaktik (anafilaktoid) reaksiyalar.

Agar sizda qandaydir noodatiy reaksiyalar paydo bo‘lsa, preparatni keyingi qo‘llash bo‘yicha albatta shifokor bilan maslahatlashing!

Qarshi ko‘rsatmalar

preparat komponentlariga yuqori sezuvchanlik;

anamnezida diklofenak, paratsetamol, atsetilsalitsil kislotasi yoki boshqa nosteroid yallig‘lanishga qarshi dori vositalarini iste’mol qilish natijasida bronxospazm, eshakem, o‘tkir rinit yoki boshqa allergiya belgilari mavjudligi;

oshqozon-ichak traktining kuchayish bosqichidagi eroziv-yarali shikastlanishlari (shu jumladan peptik yara, Kron kasalligi, nospetsifik yarali kolit);

homiladorlik, laktatsiya;

12 yoshgacha bo‘lgan bolalar;

qon ishlab chiqarish funksiyasining buzilishi, nafas yo‘llarining surunkali obstruktiv kasalliklari, burun poliplari, pichan isitmasi;

buyrak va jigar faoliyatining yaqqol buzilishlari;

rang ko‘rish qobiliyatining buzilishi;

glyukoza-6-fosfatdegidrogenazaning tug‘ma yetishmovchiligi.

Dorilarning o‘zaro ta’siri

Agar siz boshqa dori vositalarini qabul qilayotgan bo‘lsangiz, albatta shifokorga xabar bering!

Preparat kaliy saqlovchi diuretiklar bilan bir vaqtda buyurilganda qonda kaliy miqdori oshishi mumkin. Dori vositalarining bunday kombinatsiyasi holatida kaliy darajasini nazorat qilish zarur.

Bilvosita antikoagulyantlar bilan bir vaqtda buyurilganda qon ketishi rivojlanishi mumkin.

Medinak® qon plazmasida litiy, digoksin va siklosporin konsentratsiyasini oshirishi mumkin, shuning uchun ularni birgalikda qo‘llashda ikkinchisining dozasini to‘g‘rilash zarur. Preparatni metotreksatni qabul qilishdan 24 soat oldin yoki keyin buyurishda ehtiyot bo‘lish kerak, chunki bunday hollarda metotreksatning qondagi konsentratsiyasi oshishi va uning toksik ta’siri kuchayishi mumkin.

Fenotiazinlar bilan birga qo‘llanganda haddan tashqari gipotermiya, azidotimidin bilan qo‘llanganda esa neytropeniya boshlanishi mumkin. Preparat xloramfenikolning zaharliligini kuchaytiradi, bilvosita antikoagulyantlar, difenin, peroral gipoglikemik preparatlarning ta’sirini kuchaytirishi mumkin, tiazidli diuretiklarning diuretik va natriyuretik ta’sirini susaytiradi.

Boshqa nosteroid yallig‘lanishga qarshi preparatlar, shuningdek, glyukokortikoidlar bilan birga qo‘llanilganda nojo‘ya ta’sirlarning ko‘payishi va kuchayishi kuzatiladi.

Maxsus ko‘rsatmalar

Preparatni anamnezida oshqozon-ichak traktining eroziv-yarali shikastlanishlariga ko‘rsatma bo‘lgan bemorlarga, shuningdek jigar, buyraklar, qon yaratish a’zolari faoliyatining yaqqol buzilishlari bo‘lgan bemorlarga buyurishda ehtiyot bo‘lish kerak. Yuqori dozalarda preparat trombotsitlar agregatsiyasini susaytirishi mumkin, shuning uchun gemostaz buzilgan bemorlarni diqqat bilan kuzatish zarur.

Medinak® keksalarda, surunkali yurak yetishmovchiligi, arterial gipertoniya, porfiriya bilan og‘rigan bemorlarda, shuningdek, jiddiy jarrohlik amaliyotlaridan so‘ng darhol ehtiyotkorlik bilan qo‘llanilishi lozim.

Preparat bilan davolash vaqtida jigar, buyrak faoliyati va periferik qon manzarasini nazorat qilish zarur.

Diklofenak va paratsetamol ona sutiga o‘tadi, shuning uchun laktatsiya davrida preparatni buyurish zarur bo‘lgan taqdirda emizishni to‘xtatish kerak.

Preparatni qo‘llash paytida bosh aylanishi yoki ko‘rish qobiliyatining buzilishini his qiladigan bemorlar transport vositasini boshqarmasliklari yoki potentsial xavfli mexanizmlar bilan ishlamasliklari kerak.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Belgilari: Maxsus belgilari yo‘q. Buyraklar funksiyasining buzilishi yoki yuz, hiqildoqning tez kuchayib boruvchi shishlari, nafas qisishi ko‘rinishidagi allergik reaksiyalar rivojlanishi mumkin.

Davolash: oshqozonni yuvish ko‘rsatilgan, SH-guruh donorlarini yuborish tavsiya etiladi. Vena ichiga kalsiy glyukonat yoki kalsiy xlorid yuborish, zarurat bo‘lganda vena ichiga glyukokortikoidlar yuborish, faollashtirilgan ko‘mir tayinlash, shuningdek, simptomatik terapiya o‘tkazish. Shuni hisobga olish kerakki, preparat tarkibiga paratsetamol kiradi. Ichga 6 g dan ortiq paratsetamol qabul qilish jigarning og‘ir shikastlanishiga, hatto jigar komasiga olib kelishi mumkin.

Intoksikatsiya belgilari (ko‘ngil aynishi, qusish, uyquchanlik, jigar kattalashishi, sariqlik) kuzatilsa, zudlik bilan shifokor chaqirish va oshqozonni yuvish kerak.

Agar sizda qandaydir noodatiy reaksiyalar paydo bo‘lsa, dori vositasini keyinchalik qo‘llash bo‘yicha albatta shifokor bilan maslahatlashing!

Chiqarish shakli

10 ta tabletka blisterda, 10 tadan blister karton qadoqda, tibbiy qo‘llash bo‘yicha yo‘riqnoma bilan birga.

Saqlash shartlari

Quruq, yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

"Mediwin Pharmaceuticals.," Hindiston

Joylashgan joyi. 128/A, Phase I & II, G.I.D.C., Naroda Ahmedabad - 382 330. (India).