Rotabiotik Beybi

Tarkib

1 ta paketda quyidagilar mavjud:

faol moddalar: liofillangan bakteriyalar - 3,0×108 KHQB, Lactobacillus acidophilus - 0,5×108 KHQB, Bifidobacterium spp. - 2,5×108 KOYE, oddiy arpabodiyon mevasi ekstrakti - 200 mg, dorivor moychechak gullari ekstrakti - 150 mg, inulin - 150 mg;

yordamchi modda: saxaroza.

Tavsif

Qum-sariq rangli, jigarrang zarrachali kukun.

Dori shakli

Ichish uchun eritma tayyorlash uchun kukun.

Farmakoterapevtik guruh

Ichak mikroflorasi muvozanatini tartibga soluvchi, biologik kelib chiqishga ega bo‘lgan diareyaga qarshi preparatlar. Tarkibida sut kislotasi hosil qiluvchi mikroorganizmlar bo‘lgan preparatlar. ATX kodi: A07FA01.

Farmakologik xususiyatlari

Rotabiotik Bebi - lakto- va bifidobakteriyalar shtammlari Lactobacillus acidophilus, Bifidobacterium spp., shuningdek, oddiy arpabodiyon mevalari va dorivor moychechak gullari ekstraktlarini o‘z ichiga olgan kombinatsiyalangan probiotik. Rotabiotik Bebi organizm funksiyalarini optimallashtiradi, ichak mikroflorasi va ovqat hazm qilish jarayonining fiziologik muvozanatini saqlaydi hamda tartibga soladi.

Rotabiotik Bebi tarkibiga kiruvchi laktobakteriyalar uglevodlarni parchalab, sut kislotasi hosil qiladi, shuningdek, ovqat hazm qilish tizimining tabiiy himoyasini oshiradi, ichakning normal mikrobiotsenozi shakllanishi uchun qulay sharoit yaratadi. Ular hosil qilgan kislotali muhit organizm ichak mikroflorasining 85-95% ini tashkil etuvchi bifidobakteriyalarning rivojlanishiga yordam beradi.

Oddiy arpabodiyon mevasi ekstrakti yel haydovchi va spazmolitik ta’sirga ega (ayniqsa, ichakning silliq mushaklariga nisbatan). Moychechak ekstrakti mikroblarga qarshi, yallig‘lanishga qarshi, yel haydovchi, og‘riq qoldiruvchi, spazmolitik va allergiyaga qarshi ta’sirga ega.

Inulin o‘simlik polisaxaridi, D-fruktoza polimeri bo‘lib, ichak florasiga ijobiy ta’sir ko‘rsatadi va bifidobakteriyalarning o‘sishini rag‘batlantiradi, kalsiy va magniyning so‘rilishini oshiradi, lipid va uglevod almashinuvini me’yorlashtirishga yordam beradi.

Bifidobakteriyalar va laktobakteriyalar keng doiradagi patogen va shartli patogen mikroorganizmlarga qarshi yuqori antagonistik faollikka ega bo‘lib, stafilokokklar, shigellalar, rotaviruslar, proteylar, enteropatogen ichak tayoqchalari, ayrim achitqisimon zamburug‘larning hayot faoliyatini susaytiradi, ularning ichak shilliq qavatiga yopishishiga to‘sqinlik qiladi. Lakto- va bifidobakteriyalar ichakning foydali mikroflorasi rivojlanishi uchun qulay sharoit yaratadi, ichak mikroflorasining fiziologik muvozanatini saqlaydi va tartibga soladi, oshqozon-ichak trakti mikrobiotsenozini me’yorlashtirishga yordam beradi, shuningdek, organizmning nospetsifik chidamliligini oshiradi, immunomodullovchi ta’sirga ega.

Rotabiotik Bebi tarkibiga kiruvchi normal mikroflora bakteriyalari devor oldi ovqat hazmini faollashtiradi, oqsillar, yog‘lar, uglevodlarning fermentativ parchalanishida, o‘t kislotalari va xolesterin almashinuvi jarayonlarida ishtirok etadi. Lakto- va bifidobakteriyalar aminokislotalar, pantoten kislotasi, K va B guruhi vitaminlarini sintezlaydi, temir, kalsiy, D vitaminining so‘rilishiga yordam beradi.

Qo‘llanilishi

ichak mikroflorasini tiklash va me’yorlashtirish, ovqat hazm qilishni yaxshilash;

meteorizm va sanchiqlarda;

bir yoshgacha bo‘lgan bolalarda o‘z ichak mikroflorasini rivojlantirish uchun;

gastroenterit va dispepsiyani davolash;

antibiotiklar qabul qilish bilan bog‘liq diareyaning oldini olish va davolash;

ko‘krak suti bilan oziqlantirishdan ovqatlanishning boshqa turlariga o‘tish;

adaptatsiya (ko‘chish, bolalar bog‘chasiga, maktabga borishni boshlash) paytida ichak kasalliklari bo‘lgan bolalarda;

allergik holatlar (shu jumladan bolalarda diatez, atopik dermatit);

immunitetni va organizmning kasalliklarga umumiy qarshiligini oshirish.

Qo‘llash usuli va dozalari

Rotabiotik Bebi ovqatdan keyin yoki ovqatlanish oralig‘ida ichiladi.

Eritma tayyorlash uchun 1 ta paketchadagi ichidagini butilka yoki piyolaga to‘kib, ustiga 100 ml iliq (issiq bo‘lmagan) qaynatilgan suv, sut yoki sharbat qo‘shiladi.

Yangi tug‘ilgan chaqaloqlar va 6 oygacha bo‘lgan bolalarga: kuniga 1 paketchadan (paketchadagi ichimlikni bir necha qabulga bo‘lib). Ochilgan paketcha sovutgichda ko‘pi bilan bir kun saqlanadi.

6 oylikdan 1 yoshgacha: 1 paketchadan kuniga 2 mahal.

1 yoshdan 3 yoshgacha: 1 paketchadan kuniga 3 mahal.

3 yoshdan boshlab: 1 paketchadan kuniga 3-4 marta.

Davolash davomiyligi ko‘rsatmalarga bog‘liq bo‘lib, shifokor tomonidan belgilanadi.

Nojo‘ya ta’sirlari

Komponentlardan biriga yuqori sezuvchanlik tufayli allergik reaksiya paydo bo‘lishi mumkin (juda kamdan-kam hollarda).

Qarshi ko‘rsatmalar

Komponentlarning birortasiga ma’lum yuqori sezuvchanlik.

Dorilarning o‘zaro ta’siri

Dori vositalari bilan o‘zaro ta’sirlashganda nojo‘ya ta’sirlar yoki nomaqbul reaksiyalar haqida ma’lumotlar yo‘q.

Maxsus ko‘rsatmalar

D-laktik atsidoz bilan og‘rigan qisqa ichak sindromi bo‘lgan bolalarda probiotik terapiya faqat shifokor nazorati ostida o‘tkaziladi.

Laktozani ko‘tara olmaydigan bemorlarda preparat ehtiyotkorlik bilan qo‘llaniladi.

Pediatriyada qo‘llanishi

Preparat pediatriya amaliyotida qo‘llash uchun mo‘ljallangan.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin qo‘llamaslik lozim.

Dozani oshirib yuborish

Hozirgi vaqtda Rotabiotik Bebi preparatining dozasini oshirib yuborish holatlari haqida xabar berilmagan.

Chiqarish shakli

Ichish uchun eritma tayyorlash uchun kukun 3,0 g dan paketchalarda.

Karton qutida qo‘llash bo‘yicha yo‘riqnoma bilan birga 10 yoki 20 ta paketcha.

Saqlash shartlari

Namlikdan himoyalangan joyda, 18 °C dan yuqori bo‘lmagan haroratda saqlanadi.

Yaroqlilik muddati

2 yil.

Dorixonalardan berish shartlari

Retseptsiz.

Ishlab chiqaruvchi

Savdo belgisi va ro‘yxatdan o‘tkazish guvohnomasining egasi kompaniya hisoblanadi

"Rotafarm Limited," Buyuk Britaniya

("Rotapharm Limited," Buyuk Britaniya).

Ishlab chiqarilgan

"Kendi Ltd," 8 Gurmazovskiy shossesi, 2227 Bojurishte, Bolgariya

("Kendy Ltd," 8 Gurmazovsko shose, 2227 Bozhurishte, Bulgaria).