Tashqi foydalanish uchun Diklofenak-Akos (Diclofenacum-Akos) malhami 1%, har biri 30 g (naycha)

Tarkib

100 g surtma tarkibida quyidagilar mavjud:

Ta’sir etuvchi modda: diklofenak natriy - 1,0 g;

Yordamchi moddalar: dimetilsulfoksid (dimeksid), makrogol 400 (polietilenglikol 400), makrogol 4000 (polietilenglikol 4000), propilenglikol, metilparagidroksibenzoat (metilparaben, nipagin), propilparagidroksibenzoat (propilparaben, nipazol).

Tavsif

Oq yoki deyarli oq rangli, kuchsiz o‘ziga xos hidli surtma.

Chiqarish shakli

Sirtga qo‘llash uchun surtma, 1%.

Farmakoterapevtik guruh

YAQNDV. Diklofenak.

Farmakologik xususiyatlari

Farmakodinamika

Diklofenak dori vositasining faol komponenti - yallig‘lanishga qarshi nosteroid dori vositasi (YAQNDV) bo‘lib, kuchli og‘riq qoldiruvchi va yallig‘lanishga qarshi xususiyatlarga ega. 1 va 2-turdagi siklooksigenazani tanlamasdan so‘ndirib, araxidon kislotasi metabolizmini va yallig‘lanish rivojlanishining asosiy bo‘g‘ini bo‘lgan prostaglandinlar sintezini buzadi. Diklofenak travmatik yoki revmatik kelib chiqishga ega bo‘lgan bo‘g‘imlar, mushaklar va boylamlardagi og‘riq sindromi va yallig‘lanishni bartaraf etish uchun qo‘llaniladi, yallig‘lanish jarayoni bilan bog‘liq og‘riq va shishni kamaytirishga yordam beradi, bo‘g‘imlarning harakatchanligini oshiradi.

Farmakokinetika

Sirtga qo‘llanganda diklofenak teri orqali yaxshi o‘tadi, asosan yallig‘lanish o‘chog‘ida va sinovial suyuqlikda to‘planadi. Teri orqali so‘riladigan diklofenak miqdori surtmaning teri bilan kontakt vaqti va surtish maydoniga mutanosib ravishda preparatning umumiy dozasiga va terining gidratatsiya darajasiga bog‘liq. Tavsiya etilgan qo‘llash usulida diklofenakning ko‘pi bilan 6% i absorbsiyalanadi. 10 soat davomida okklyuzion bog‘lamni qo‘llash diklofenak rezorbsiyasining 3 baravar oshishiga olib keladi.

Ko‘rsatmalar

- Umurtqa pog‘onasining yallig‘lanish va degenerativ kasalliklarida bel og‘rig‘i (osteoartroz, radikulit, lyumbago, ishias);

- osteoartrozda bo‘g‘imlardagi og‘riqlar (qo‘l barmoqlari, tizza bo‘g‘imlari va boshqalar);

- mushaklarda og‘riq;

- jarohatlar va revmatik kasalliklar natijasida yumshoq to‘qimalar va bo‘g‘imlarning yallig‘lanishi hamda shishishi;

- mushak va bo‘g‘im kasalliklari (lyumbago, ishias, nevralgiya, mialgiya, tendinit) bilan bog‘liq og‘riq sindromi va shish;

- tayanch-harakat tizimining degenerativ kasalliklari (deformatsiyalovchi osteoartroz, osteoxondroz).

Simptomatik davolash, foydalanish paytida og‘riq va yallig‘lanishni kamaytirish uchun mo‘ljallangan bo‘lib, kasallikning rivojlanishiga ta’sir qilmaydi.

Qarshi ko‘rsatmalar

Diklofenakka yuqori sezuvchanlik.

Bronxial astma, burun va burun yondosh bo‘shliqlarining takroriy polipozi va atsetilsalitsil kislotasi yoki boshqa nosteroid yallig‘lanishga qarshi dorilarni ko‘tara olmaslikning to‘liq yoki to‘liq bo‘lmagan kombinatsiyasi (shu jumladan anamnezda).

20 haftadan ortiq muddatdagi homiladorlik, emizish davri, bolalik yoshi (12 yoshgacha).

Taxmin qilingan surtish joyida teri qoplamlari butunligining buzilishi.

Ehtiyotkorlik bilan

Jigar porfiriyasi (zo‘rayishi), oshqozon-ichak traktining eroziv-yarali shikastlanishlari, jigar va buyrak faoliyatining og‘ir buzilishlari, surunkali yurak yetishmovchiligi, qon ivishining buzilishi (shu jumladan, gemofiliya, qon ketish vaqtining uzayishi, qon ketishga moyillik), keksa yosh, 20 haftagacha bo‘lgan homiladorlik.

Qo‘llash usuli va dozalari

Tashqarida.

Kattalar va 12 yoshdan oshgan bolalarga malham teriga sutkada 2 marta (har 12 soatda, yaxshisi ertalab va kechqurun) 2-4 g dozada surtiladi. Yallig‘lanish o‘chog‘i ustidagi teriga yupqa qatlam qilib surtiladi va yengil ishqalanadi.

Surtmaning maksimal sutkalik dozasi 8 g dan oshmasligi kerak.

Davolash kursi - 14 kundan ko‘p emas. Preparatni qo‘llashdan samara bo‘lmasa, 7 kundan keyin shifokorga murojaat qilish kerak.

Agar qo‘llar og‘riq joyi bo‘lmasa, u holda malham surtilgandan so‘ng qo‘llar yuvilishi kerak.

Minimal samarali dozalarda minimal qisqa kurs bilan qo‘llash kerak.

Nojo‘ya ta’sirlari

Nojo‘ya ta’sirlarning rivojlanish chastotasi Jahon sog‘liqni saqlash tashkiloti tavsiyalariga muvofiq tasniflangan: juda tez-tez - ≥1/10; tez-tez - ≥1/100 dan <1/10 gacha; tez-tez emas - ≥1/1000 dan <1/100 gacha; kamdan-kam - ≥1/10000 dan <1/1000 gacha; juda kamdan-kam (alohida xabarlarni o‘z ichiga olgan holda) - <1/10000, chastotasi noma’lum - mavjud ma’lumotlar bo‘yicha hisoblab bo‘lmaydi.

Mahalliy reaksiyalar: kam hollarda - ko‘p shaklli ekssudativ eritema (shu jumladan Stivens-Jonson sindromi), ekzema, juda kam hollarda kontakt dermatit (qichishish, giperemiya, ishlov berilayotgan teri sohasining shishishi, papulyoz-vezikulyoz toshmalar, po‘st tashlash).

Surtma terining katta yuzalariga uzoq vaqt davomida surtilganda, diklofenakning tizimli nojo‘ya ta’sirlari rivojlanishi mumkin.

Tizimli reaksiyalar: kamdan-kam hollarda - tarqalgan teri toshmasi, allergik reaksiyalar (eshakem, angionevrotik shish, bronxospastik reaksiyalar), kamdan-kam hollarda - fotosensibilizatsiya, juda kam hollarda - anafilaktik reaksiyalar (shu jumladan shok).

Dozani oshirib yuborish

Surtma applikatsiyasida tizimli so‘rilish past bo‘lganligi sababli, dozani oshirib yuborish ehtimoli kam.

Tasodifan ichilganda tizimli nojo‘ya reaksiyalar rivojlanishi mumkin.

Belgilari: ko‘ngil aynishi va qusish.

Davolash: oshqozonni yuvish, qusish induksiyasi, faollashtirilgan ko‘mir, kuchaytirilgan diurez, simptomatik terapiya.

Diklofenakning qon plazmasi oqsillari bilan yuqori darajada bog‘lanishi (taxminan 99%) tufayli gemodializ samarali emas.

O‘zaro aloqa

Preparatni boshqa nosteroid yallig‘lanishga qarshi vositalar bilan qo‘llash tavsiya etilmaydi.

Diklofenak fotosensibilizatsiyani chaqiruvchi dorilarning ta’sirini kuchaytirishi mumkin.

Boshqa dori vositalari bilan klinik ahamiyatga ega o‘zaro ta’siri tavsiflanmagan.

Maxsus ko‘rsatmalar

Faqat sirtga qo‘llash. Surtmani faqat terining shikastlanmagan sohalariga surtish mumkin. Surtma surtilgandan keyin okklyuzion bog‘lam qo‘yilmaydi. Oshqozon va o‘n ikki barmoqli ichak yara kasalligi, jigar, buyrak yoki qon yaratish tizimi faoliyati buzilgan bemorlar, shuningdek, boshqa YAQNDVlarni bir vaqtda qo‘llashdan oldin shifokor bilan maslahatlashishlari kerak. Preparat diklofenakning boshqa dori shakllari bilan birgalikda qo‘llanganda, maksimal sutkalik dozani hisobga olish lozim.

Uzoq muddat qo‘llanilganda va/yoki keng yuzalarga surtilganda, rezorbtiv ta’sir tufayli tizimli nojo‘ya ta’sirlar rivojlanishi mumkin. Preparatning ko‘zga, shilliq pardalarga yoki ochiq jarohatlarga tushishidan saqlanish kerak.

Homiladorlik va laktatsiya

Preparatni 20 haftadan ortiq homiladorlikda qo‘llash mumkin emas. Homiladorlikning 20-haftasidan boshlab ayollarda YAQNDV qo‘llanilganda, yangi tug‘ilgan chaqaloqlarda kamsuvlik va/yoki buyrak patologiyasi (neonatal buyrak disfunksiyasi) rivojlanishi mumkin. Homiladorlikning 20-haftasigacha preparatni qo‘llashdan oldin shifokor bilan maslahatlashish lozim.

Preparatning ona sutiga o‘tishi haqida ma’lumotlar yo‘qligi sababli, uni emizish davrida qo‘llash tavsiya etilmaydi. Agar baribir preparatni qo‘llash zarur bo‘lsa, uni sut bezlariga yoki terining katta yuzasiga surtmaslik va uzoq vaqt qo‘llamaslik kerak.

Transport vositalari va mexanizmlarini boshqarish qobiliyatiga ta’siri

Preparat transport vositalari va boshqa mexanizmlarni boshqarish qobiliyatiga ta’sir ko‘rsatmaydi.

Qadoq

Alyuminiy tubalarga 30 g dan solinadi. Ishlatish yo‘riqnomasi yozilgan har bir tuba karton qutiga solinadi.

Saqlash shartlari

25 °C dan yuqori bo‘lmagan haroratda. Muzlatish mumkin emas.

Bolalar qo‘li yetmaydigan joyda saqlang.

Yaroqlilik muddati

2 yil.

Yaroqlilik muddati tugagandan keyin ishlatilmasin.

Dorixonalardan berish shartlari

Retseptsiz

Ro‘yxatdan o‘tish guvohnomasi egasi

SINTEZ OAJ Rossiya

Ishlab chiqaruvchi

SINTEZ OAJ Rossiya