Erbinol

Tarkib

Tabletka tarkibiga quyidagilar kiradi:

Faol moddasi: terbinafin (terbinafin gidroxlorid shaklida) - 250 mg.

Yordamchi moddalar: mikrokristall sellyuloza, makkajo‘xori kraxmali, suvsiz kolloid kremniy dioksidi, gipromelloza, talk, magniy stearati.

Tavsif

Oqdan sarg‘ish-oq ranggacha bo‘lgan dumaloq yassi tabletkalar, ixcham va bir xil tuzilishga ega, chetlari yaxlit.

Chiqarish shakli

Blisterda 7 ta tabletka. 2 ta blister qo‘llanmasi bilan birga karton qutida.

Farmakoterapevtik guruh

Zamburug‘larga qarshi preparatlar.

Farmakologik xususiyatlari

Farmakodinamika

Terbinafin kimyoviy jihatdan allilamin bo‘lib, zamburug‘larga qarshi keng ta’sir doirasiga ega. Ta’sir mexanizmi zamburug‘larning hujayra membranasidagi sterinlar biosintezining dastlabki bosqichini o‘ziga xos tarzda susaytirishi bilan bog‘liq. Bu ergosterin yetishmasligiga va skvalenning hujayra ichida to‘planishiga olib keladi, bu esa zamburug‘ hujayralarining nobud bo‘lishiga sabab bo‘ladi. Terbinafinning ta’siri zamburug‘larning hujayra membranasidagi skvalenepoksidazani ingibirlash orqali amalga oshiriladi. Bu ferment sitoxrom R450 tizimiga tegishli emas, shuning uchun Erbinol gormonlar yoki boshqa dori vositalarining metabolizmiga ta’sir qilmaydi.

Terbinafin dermatofitlarga, achitqisimon va mog‘or zamburug‘lariga, ba’zi dimorf zamburug‘larga ta’sir ko‘rsatadi. Past konsentratsiyalarda u dermatofitlarga (Trychophyton rubrum, Trychophyton mentagrophytes, Trychophyton verrucosum, Trychophyton violaceum, Trychophyton tonsurans, Microsporum canis, Epidermophyton floccosum), mog‘or zamburug‘lariga (shu jumladan Aspergillus, Cladosporium, Scopulariopsis brevicaulis) nisbatan fungitsid faollikka ega. Candida avlodiga mansub achitqi zamburug‘lariga (asosan Candida albicans) ta’siri zamburug‘ turiga qarab fungitsid yoki fungostatik bo‘lishi mumkin.

Farmakokinetika

Ichga qabul qilingandan so‘ng, terbinafin yaxshi so‘riladi (>70%); birinchi o‘tish effekti tufayli terbinafinning mutlaq biosinguvchanligi taxminan 50% ni tashkil etadi. Terbinafin 250 mg dozada bir marta ichilgandan so‘ng, uning plazmadagi Cmax ko‘rsatkichi 1,5 soatdan so‘ng erishiladi va 1,3 mkg/ml ni tashkil etadi. Ovqat qabul qilish terbinafinning biosinguvchanligiga ta’sir ko‘rsatmaydi.

Qon plazmasi oqsillari bilan bog‘lanishi 99% ni tashkil etadi. Preparatni ichga qabul qilish boshlanganidan keyingi dastlabki bir necha hafta davomida terbinafin teri va tirnoq plastinkalarida fungitsid ta’sirni ta’minlaydigan konsentratsiyalarda to‘planadi.

Biotransformatsiya natijasida terbinafin zamburug‘larga qarshi faollikka ega bo‘lmagan va asosan siydik bilan chiqariladigan metabolitlarga aylanadi.

Yarim chiqarilish davri (T1⁄2) 11 soatdan 17 soatgacha. Preparatning organizmda to‘planishiga hech qanday dalil yo‘q.

Qo‘llanilishi

dermatofit zamburug‘lari keltirib chiqaradigan onixomikozlar (tirnoqlarning zamburug‘li infeksiyasi);

terining zamburug‘li infeksiyalari tananing, boldirlarning, oyoqlarning dermatomikozlari, shuningdek Candida turkumiga mansub zamburug‘lar (masalan, Candida albicans) keltirib chiqaradigan terining achitqi infeksiyalari, agar infeksiyaning joylashuvi, yaqqolligi yoki tarqalishi og‘iz orqali davolashning maqsadga muvofiqligini belgilasa.

Qo‘llash usuli va dozalari

Kattalar va 12 yoshdan oshgan bolalarga sutkada 1 marta 250 mg dan ichishga buyuriladi.

Quyidagi holatlarda davolashning tavsiya etilgan davomiyligi:

oyoq kafti dermatomikozi (barmoqlararo, oyoq kafti yoki paypoq turi bo‘yicha) - 2-6 hafta;

tana va boldir dermatomikozida - 2-4 hafta;

teri kandidozida - 2-4 hafta. Infeksiya belgilari va u bilan bog‘liq shikoyatlarning to‘liq yo‘qolishi mikologik davolanishdan bir necha hafta o‘tgach sodir bo‘lishi mumkin;

qo‘l va oyoq panjalari onixomikozida - 6-12 hafta. Tirnoqlarning o‘sish tezligi pasaygan ba’zi bemorlar (bosh barmoq zararlangan bo‘lsa) uzoqroq davolanishga muhtoj bo‘lishi mumkin. Optimal klinik samara mikologik davolanish va terapiya to‘xtatilgandan bir necha oy o‘tgach kuzatiladi. Bu sog‘lom tirnoq o‘sishi uchun zarur bo‘lgan vaqt bilan belgilanadi.

Nojo‘ya ta’sirlari

Erbinol umuman yaxshi o‘zlashtiriladi. Nojo‘ya ta’sirlari odatda kuchsiz yoki o‘rtacha ifodalangan bo‘lib, o‘tkinchi xarakterga ega.

Ovqat hazm qilish tizimi tomonidan: oshqozonning to‘lib ketish hissi, ishtahaning yo‘qolishi, dispepsiya, ko‘ngil aynishi, qorinda kuchsiz ifodalangan og‘riqlar, diareya, meteorizm, ta’m sezgilarining buzilishi, shu jumladan ularning yo‘qolishi (tiklanish davolash to‘xtatilgandan keyin bir necha hafta ichida sodir bo‘ladi).

Suyak-mushak tizimi tomonidan: artralgiya, mialgiya.

Qon yaratish tizimi tomonidan: agranulotsitoz, trombotsitopeniya, neytropeniya.

Kamdan-kam hollarda: gepatobiliar buzilishlar (birlamchi xolestaz bilan bog‘liq), jigar yetishmovchiligi, jigar transaminazalari darajasining simptomsiz oshishi, gepatobiliar disfunksiya rivojlangan taqdirda preparat bilan davolashni to‘xtatish lozim.

Allergik reaksiyalar: eshakem, toshma, qichishish; juda kam hollarda - toksik epidermal nekroliz (Layell sindromi), anafilaktoid reaksiyalar, xavfli ekssudativ eritema (Stivens-Jonson sindromi).

Agar zo‘rayib boruvchi teri toshmasi paydo bo‘lsa, terbinafin bilan davolashni to‘xtatish kerak.

Qarshi ko‘rsatmalar

preparatning tarkibiy qismlariga yuqori sezuvchanlik;

homiladorlik;

emizish davri;

3 yoshgacha bo‘lgan bolalar va tana vazni 20 kg gacha bo‘lgan bolalar.

Preparatni jigar va/yoki buyrak yetishmovchiligi, alkogolizm, qon kasalliklari, o‘smalar, moddalar almashinuvi kasalliklari, qo‘l-oyoq tomirlari patologiyalari, psoriazda ehtiyotkorlik bilan qo‘llash lozim.

Dorilarning o‘zaro ta’siri

Erbinol in vitro sitoxrom P450 tizimi ishtirokida metabolizmga uchraydigan ko‘pchilik dorilarning (masalan, siklosporin, terfenadin, tolbutamid, triazolam yoki oral kontratseptivlar) klirensini susaytirish yoki oshirish qobiliyatiga juda kam ega.

Erbinol va peroral kontratseptivlar bir vaqtda qo‘llanilganda hayz siklining buzilishi kuzatilishi mumkin.

Terbinafinning umumiy klirensi sitoxrom R450 fermentlarining induksiyasini chaqiruvchi dori vositalari (masalan, rifampitsin) bilan tezlashishi va sitoxrom R450 tizimining ingibitorlari (masalan, simetidin) bilan sekinlashishi mumkin. Shuning uchun bu preparatlarni Erbinol bilan bir vaqtda qo‘llash zarur bo‘lganda, uning dozasini tuzatish talab etilishi mumkin.

Terbinafin kofeinning ta’sirini kuchaytirishi (vena ichiga qo‘llanganda) yoki plazmadagi konsentratsiyasini oshirishi mumkin.

Erbinol antipirin, digoksin, varfarin klirensiga ta’sir qilmaydi.

Maxsus ko‘rsatmalar

Erbinolni jigarning surunkali yoki o‘tkir kasalliklari bor bemorlarga buyurish tavsiya etilmaydi. Buyurishdan oldin jigarning oldingi kasalliklari baholanishi kerak. Anamnez yoki anamnezsiz jigar kasalliklari bo‘lgan bemorlarda gepatotoksiklik rivojlanish xavfi mavjud. Bemor quyidagi alomatlar paydo bo‘lganda zudlik bilan shifokorga murojaat qilishi kerakligi haqida ogohlantirilishi kerak: tushuntirib bo‘lmaydigan doimiy ko‘ngil aynishi, charchoq hissi, qusish, ishtahaning yo‘qolishi, sariqlik, o‘ng qovurg‘a ostida og‘riq, qora siydik yoki oq rangli najas. Bunday alomatlar paydo bo‘lgan taqdirda preparatni qabul qilishni darhol to‘xtatish va jigar faoliyatini tekshirish (ALT, AST faolligini aniqlash) zarur.

Bemorning anamnezida psoriaz bo‘lsa, Erbinolni ehtiyotkorlik bilan buyurish kerak, chunki kasallikning qo‘zish holatlari haqida ma’lumotlar mavjud.

Homiladorlik va laktatsiyada qo‘llash

Erbinolni homiladorlik davrida qo‘llashning klinik tajribasi cheklanganligi sababli, preparatni faqat ona uchun kutilayotgan ijobiy ta’sir homila uchun potensial xavfdan yuqori bo‘lgandagina tayinlash lozim.

Terbinafin ko‘krak suti bilan ajraladi, shuning uchun preparatni buyurish zarur bo‘lganda emizishni to‘xtatish kerak.

Pediatriyada qo‘llanishi

Ushbu preparatni 12 yoshgacha bo‘lgan bolalarda qo‘llash tavsiya etilmaydi.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Avtotransport va mexanizmlarni boshqarish qobiliyatiga ta’siri

Preparat avtotransportni boshqarish qobiliyatiga, shuningdek, diqqatning yuqori konsentratsiyasi bilan bog‘liq ishlarni bajarishga ta’sir qilmaydi.

Dozani oshirib yuborish

Belgilari: bosh og‘rig‘i, ko‘ngil aynishi, oshqozon og‘rig‘i va bosh aylanishi.

Davolash: faollashtirilgan ko‘mir tayinlash va oshqozonni yuvish, zarurat bo‘lganda simptomatik qo‘llab-quvvatlovchi terapiyadan foydalanish.

Saqlash shartlari

25 °C dan yuqori bo‘lmagan haroratda.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

Savdo belgisi va ro‘yxatdan o‘tkazish guvohnomasining egasi kompaniya hisoblanadi

"ROTAFARM LIMITED," BUYUK BRITANIYA

("ROTAPHARM LIMITED," GREAT BRITAIN).

Ishlab chiqarilgan

K.O. "Slaviya Farm S.R.L.," Teodor Palladi bulvari No 44S, 3-sektor, Buxarest, Ruminiya

(S.C. "Slavia Pharm S.R.L.," Bd. Theodor Pallady no 44C, district 3, Bucharest, Romania).