Sertogamma

Tarkib

Preparatning 1 ampulasi quyidagilarni o‘z ichiga oladi:

Faol moddalar: tiamin gidroxlorid (vitamin B1) - 100 mg, piridoksin gidroxlorid (vitamin B6) - 100 mg, sianokobalamin (vitamin B12) - 1 mg, lidokain gidroxlorid - 20 mg.

Yordamchi moddalar: benzil spirti, kaliy geksatsianoferrat (III), natriy geksametafosfat, natriy gidroksid, inyeksiya uchun suv.

Tavsif

To‘q qizil rangli tiniq eritma.

Dori shakli

Inyeksiya uchun eritma.

Farmakoterapevtik guruh

Vitaminlar. ATX kodi: A11DB.

Farmakologik xususiyatlari

Sertogamma - B guruhi vitaminlarining kombinatsiyalangan preparati.

B guruhidagi neyrotrop vitaminlar asab va harakat apparatining yallig‘lanish hamda degenerativ kasalliklarida yaxshi ta’sir ko‘rsatadi, yuqori dozalarda og‘riq qoldiruvchi ta’sirga ega bo‘lib, qon oqimini kuchaytiradi hamda asab tizimi faoliyatini va qon yaratish jarayonini me’yorlashtiradi.

Tiamin gidroxlorid (vitamin B1) muhim faol moddadir. Organizmda fosforlanish jarayonlari natijasida ko‘plab ferment reaksiyalarining kofermenti bo‘lgan kokarboksilazaga aylanadi. Uglevod, oqsil va yog‘ almashinuvida, sinapslarda nerv qo‘zg‘alishini o‘tkazish jarayonlarida muhim rol o‘ynaydi. Hujayra membranalarini peroksidlanish mahsulotlarining zaharli ta’siridan himoya qiladi.

Piridoksin gidroxlorid (vitamin B6) fosforillangan shaklda aminokislotalarning dekarboksillanishi va qayta aminlanishi, lipidlar almashinuvi jarayonlarida ishtirok etuvchi fermentlar tarkibiga kiradi. Periferik asab tizimi va markaziy asab tizimining (MAT) normal ishlashi uchun zarur.

Ikkala vitaminning fiziologik funksiyasi bir-birining ta’sirini kuchaytirish bo‘lib, bu nerv-mushak va yurak-qon tomir tizimiga ijobiy ta’sir ko‘rsatishda namoyon bo‘ladi. B6 vitamini tanqisligida keng tarqalgan tanqislik holatlari ushbu vitaminlar yuborilgandan so‘ng tezda bartaraf etiladi.

Sianokobalamin (vitamin B12) hujayra metabolizmi jarayonlari uchun zarurdir. Qon yaratish funksiyasiga ta’sir qiladi (anemiyaga qarshi tashqi omil), xolin, metionin, kreatinin, nuklein kislotalar hosil bo‘lishida ishtirok etadi, og‘riq qoldiruvchi ta’sir ko‘rsatadi.

Lidokain mahalliy og‘riqsizlantiruvchi vosita sifatida ta’sir ko‘rsatadi.

Farmakokinetika

Tiamin gidroxlorid parenteral yuborilganidan so‘ng, inyeksiya joyidan tezda so‘riladi va organizmga tarqaladi. Qonda uning konsentratsiyasi nisbatan past, shu bilan birga plazmada asosan erkin tiamin, eritrotsitlar va leykotsitlarda uning fosforli efirlari aylanadi. Fosforlanish jigarda sodir bo‘ladi. Eng faol fosfor efiri koferment faollikka ega bo‘lgan tiamindifosfatdir. Taxminan 1 mg B1 vitamini har kuni metabolizmga uchraydi. Metabolitlar siydik bilan chiqariladi. Yarim yemirilishning biologik davri - 0,35 soat. Tiamin gidroxloridning organizmda to‘planishi yog‘larda kuchsiz erishi tufayli sodir bo‘lmaydi. Gematoensefalik to‘siq (GEB) va yo‘ldosh to‘sig‘i orqali o‘tib, ona sutida aniqlanadi.

B6 vitamini fosforlanadi va piridoksal-5-fosfatgacha oksidlanadi. Qon plazmasida piridoksal-5-fosfat va piridoksal albumin bilan bog‘lanadi. Hujayra membranasidan o‘tish uchun albumin bilan bog‘langan piridoksal-5-fosfat ishqoriy fosfataza orqali piridoksalga gidrolizlanadi. Vitaminlarning 80% ga yaqini qon plazmasi oqsillari bilan bog‘lanadi. Piridoksin gidroxlorid butun organizmga tarqaladi, yo‘ldosh orqali ona sutiga o‘tadi. Organizmda 40-150 mg B6 vitamini mavjud bo‘lib, uning kunlik eliminatsiya tezligi 1,7-3,6 mg atrofida, tiklanish tezligi esa 2,2-2,4% ni tashkil etadi. Jigarda to‘planadi va 4-piridoksin kislotasigacha oksidlanadi, u so‘rilgandan keyin ko‘pi bilan 2-5 soat o‘tgach siydik bilan chiqariladi.

Vitamin B12 parenteral yuborilganidan keyin transport oqsil komplekslarini hosil qiladi, ular jigar, suyak ko‘migi va boshqa a’zolar tomonidan tez so‘riladi. B12 vitamini o‘tga tushadi va ichak-jigar sirkulyatsiyasida ishtirok etadi, yo‘ldosh to‘sig‘i orqali o‘tadi.

Qo‘llanilishi

Turli kelib chiqishga ega bo‘lgan asab tizimi kasalliklari va sindromlarini kompleks davolash tarkibida patogenetik va simptomatik vosita sifatida:

polinevropatiya (shu jumladan diabetik, alkogol va boshqalar);

nevrit va polinevrit, shu jumladan retrobulbar nevrit;

periferik parezlar, shu jumladan yuz nervi parezlari;

nevralgiya, shu jumladan uch shoxli nerv va qovurg‘alararo nervlar nevralgiyasi;

og‘riq sindromi (ildizchali, mialgiya, belbog‘simon gerpes);

B1 va B6 hamda B12 vitaminlarining isbotlangan tanqisligi bilan bog‘liq tizimli nevrologik kasalliklar.

Qo‘llash usuli va dozalari

Preparat mushak orasiga chuqur yuborish uchun mo‘ljallangan.

Og‘ir holatlarda va o‘tkir og‘riqlarda - kuniga 1 marta 2 ml dan; xuruj bartaraf etilgandan so‘ng, shuningdek, kasallikning yengil shakllarida - haftasiga 2-3 marta 2 ml dan.

Davolashning davomiyligi kasallikning og‘irligiga qarab belgilanadi.

Nojo‘ya ta’sirlari

Ayrim hollarda - terlash, husnbuzar toshmasi, teri reaksiyalari (eshakemi). Kamdan kam hollarda yuqori sezuvchanlik reaksiyalari rivojlanadi (teri toshmasi, nafas olishning buzilishi, anafilaktik shok, Kvinke shishi).

Qarshi ko‘rsatmalar

preparatning tarkibiy qismlariga yuqori individual sezuvchanlik;

dekompensatsiyalangan yurak yetishmovchiligi.

Dorilarning o‘zaro ta’siri

Tiamin gidroxlorid tarkibida sulfitlar bo‘lgan eritmalarda to‘liq parchalanadi. Boshqa vitaminlar B1 vitaminining parchalanish mahsulotlari ishtirokida inaktivatsiyalanadi. B6 vitamini levodopaning terapevtik samaradorligini pasaytiradi. Preparatning sikloserin, D-penitsillamin, adrenalin, noradrenalin, sulfonamidlar bilan o‘zaro ta’siri bo‘lishi mumkin.

Maxsus ko‘rsatmalar

Homiladorlik va emizish davrida qo‘llash

Preparatni homiladorlikda qabul qilish tavsiya etilmaydi.

Laktatsiya davrida preparatni buyurish zarur bo‘lsa, emizishni to‘xtatish lozim.

Pediatriyada qo‘llanishi

Bolalar va o‘smirlarda qo‘llash xavfsizligi bo‘yicha yetarli ma’lumotlar yo‘q.

Preparat tarkibida benzil spirti bo‘lganligi sababli yangi tug‘ilgan chaqaloqlarga va ayniqsa chala tug‘ilgan bolalarga buyurish mumkin emas.

Preparatni bolalar qo‘li yetmaydigan joyda saqlash va yaroqlilik muddati tugagandan so‘ng ishlatmaslik lozim.

Avtotransport va mexanizmlarni boshqarish qobiliyatiga ta’siri

Transport vositalari haydovchilari va potensial xavfli mexanizmlar bilan ishlaydigan shaxslarda preparatni qo‘llash bo‘yicha hech qanday ogohlantirishlar yo‘q.

Dozani oshirib yuborish

Preparatning nojo‘ya ta’siri belgilarining kuchayishi bilan namoyon bo‘ladi.

Davolash: simptomatik terapiya o‘tkaziladi.

Chiqarilish shakli: inyeksiya uchun eritma. Konturli katakli o‘ramda 2 ml dan 5 ta to‘q rangli shisha ampula. Karton qutida qo‘llash bo‘yicha yo‘riqnoma bilan birga 1 ta konturli yacheykali qadoq.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bilan beriladi.

Ishlab chiqaruvchi

Savdo belgisi va ro‘yxatdan o‘tkazish guvohnomasining egasi kompaniya hisoblanadi

"DR SERTUS ILACH SANAYI VE TIDJARET LIMITED SHIRKETI," TURKIYA

("DR SERTUS İLACH SANAYİ VE TİCARET LİMİTED SHİRKETİ," TURKEY).

Ishlab chiqarilgan

"Mefar Iloch Sanayi A.Sh.," Ramazonolu Max. Ensar Jad. No 20, 34906

Kurtko‘y-Pendik/Istanbul, Turkiya

("Mefar İlach Sanayi A.Sh.," Ramazono‘g‘li Mah. Ensar Cad. ## 20, 34906

Kurtko‘y-Pendik/Istanbul, Turkey).