URS

Tarkib

Har bir tabletka tarkibiga quyidagilar kiradi:

faol modda: ursodezoksixol kislotasi 300 mg;

yordamchi moddalar: mikrokristall sellyuloza, kalsiy fosfat, laktoza monogidrati, makkajo‘xori kraxmali, kolloid suvsiz kremniy dioksidi, povidon, talk, magniy stearati, natriy glikolat kraxmali, titan dioksidi.

Tavsif

Tabletkalar oq rangda, yumaloq, yassi, bir tomoni muhrlangan, qoplamasiz.

Dori shakli

Tabletkalar.

Farmakoterapevtik guruh

O‘t pufagi kasalliklarini davolash uchun preparatlar.

Farmakologik ta’siri

Ursodeoksixol kislotasini og‘iz orqali qabul qilish xolesterinning o‘t kislotalari tuzlariga va o‘tdagi fosfolipidlarga nisbatini kamaytiradi, to‘yingan o‘t xolesterini desaturatsiyasini keltirib chiqaradi. Ta’sirining aniq mexanizmi to‘liq aniqlanmagan.

Farmakokinetika

Ursodeoksixol kislotasi oshqozon-ichak traktidan so‘riladi va tizim oldi metabolizmi hamda jigar ichi retsirkulyatsiyasidan o‘tadi. U o‘tga ekskretsiyalanishidan oldin jigarda qisman konyugatsiyalanadi va 7-b-degidroksillanishdan litoxol kislotasiga o‘tadi, uning bir qismi bevosita najas bilan organizmdan chiqariladi. Qolgan qismi so‘riladi va asosan, najas bilan ekskretsiyalanishidan oldin jigarda konyugatsiya va sulfatlanadi.

Ko‘rsatmalar

Tabletkadagi ursodeoksixol kislotasi birlamchi biliar sirrozni (BBS) davolashda va o‘t pufagi ishlayotgan bemorlarda mayda va o‘rta rentgen o‘tkazuvchan, xolesteringa boy o‘t toshlarini eritish uchun qo‘llaniladi.

Qo‘llash usuli va dozalari

Ursodeoksixol kislotasi tabletka holida ichish uchun kerakli miqdordagi suv bilan ichiladi.

Birlamchi biliar sirroz:

Kattalar va qariyalarga: kuniga har kg uchun 10-15 mg ursodeoksixol kislotasi 2-4 ta bo‘lingan doza ko‘rinishida.

Bolalarga: dozasi tana vazniga mos bo‘lishi kerak.

O‘t toshlarini eritish:

Kattalar va qariyalar uchun: odatdagi doza kuniga 6-12 mg/kg ni tashkil etadi, yoki tungi vaqtda bir martalik doza ko‘rinishida, yoki bo‘lingan dozalarda. Zarurat tug‘ilganda, semiz bemorlar uchun u kuniga 15 mg/kg gacha oshirilishi mumkin.

Bolalarga: dozasi tana vazniga mos bo‘lishi kerak.

Nojo‘ya ta’siri

Oshqozon-ichak buzilishlari: ich ketishi, qorin og‘rig‘i, ko‘ngil aynishi va qusish. Teri va teri osti buzilishlari juda kam uchraydi va eshakem hamda qichishishni o‘z ichiga oladi. Ushbu nojo‘ya ta’sirlarning chastotasi noma’lum.

Qarshi ko‘rsatmalar

Ursodeoksixol kislotasi quyidagi bemorlarga tavsiya etilmaydi:

rentgenokontrast kalsifikatsiyalangan o‘t toshlari;

o‘t pufagi yoki o‘t yo‘llarining o‘tkir yallig‘lanishi;

jigar sanchiqlarining tez-tez uchrashi;

o‘t kislotalariga yoki dori tarkibining har qanday yordamchi moddalariga yuqori sezuvchanlik;

homilador yoki emizikli yoki homilador bo‘lishni rejalashtirayotgan ayollarga;

surunkali jigar kasalliklari, oshqozon va o‘n ikki barmoqli ichak yarasi yoki ingichka va yo‘g‘on ichakning yallig‘lanish kasalliklari bilan og‘rigan bemorlarga.

Dozani oshirib yuborish

Doza oshirib yuborilganda ich ketishi mumkin. Odatda, dozani oshirib yuborishning boshqa alomatlari ehtimoli kam, chunki ursodeoksixol kislotasining so‘rilishi doza ortishi bilan pasayadi va shuning uchun najas bilan ko‘proq ajraladi.

Hech qanday maxsus qarshi choralar talab qilinmaydi va diareya asoratlarini simptomatik ravishda suyuqlik va elektrolitlar muvozanatini tiklash bilan davolash kerak.

Maxsus ko‘rsatmalar

Agar o‘t pufagi rentgen tasvirida ko‘rinmasa yoki o‘t pufagida kalsifikatsiyalangan toshlar bo‘lsa, o‘t pufagining qisqaruvchanligi buzilsa yoki o‘t pufagi tez-tez sanchib tursa, ursodeoksixol kislotasini qabul qilmaslik kerak.

Ursodeoksixol kislotasini shifokor nazorati ostida qabul qilish lozim. Davolashning dastlabki 3 oyi davomida jigar funksiyasi ko‘rsatkichlari AST (SGOT), ALT (SGPT) va r-GT har 4 haftada, so‘ngra har 3 oyda shifokor tomonidan nazorat qilinishi kerak.

Homiladorlik va emizish davrida

Ursodeoksixol kislotasini homiladorlik davrida qabul qilish mumkin emas. Homiladorlik yuz berganda, darhol davolanishni to‘xtatish va tibbiy maslahatga murojaat qilish lozim.

Ursodeoksixol kislotasini laktatsiya davrida qabul qilish mumkin emas. Agar ursodeoksixol kislotasi bilan davolash zarur bo‘lsa, emizishni to‘xtatish kerak.

Dorilarning o‘zaro ta’siri

Ursodeoksixol kislotasini faollashtirilgan ko‘mir, kolistiramin, kolistipol yoki tarkibida alyuminiy gidroksidi bo‘lgan antatsidlar va/yoki smektit (alyuminiy oksidi) bilan bir vaqtda buyurish mumkin emas, chunki bu preparatlar ursodeoksixol kislotasini ichakda bog‘laydi va shu bilan uning so‘rilishi hamda samaradorligini sekinlashtiradi. Ursodeoksixol kislotasi siklosporinning ichakdan so‘rilishini oshirishi mumkin. Shuningdek, dapsonning terapevtik ta’sirini kamaytirish bilan o‘zaro ta’siri haqida xabar berilgan. Og‘iz orqali qabul qilinadigan kontratseptivlar, estrogen gormonlar va kpofibrat kabi qondagi xolesterin darajasini pasaytiruvchi dorilar o‘t pufagidagi toshlarni eritish uchun ishlatiladigan ursodeoksixol kislotasiga teskari ta’sir ko‘rsatadigan o‘t toshlari hosil bo‘lishini kuchaytirishi mumkin.

Chiqarish shakli

Alyuminiy folgadagi 10 ta tabletka. Karton qutida tibbiy qo‘llash bo‘yicha yo‘riqnoma bilan birga 3 tadan blister.

Saqlash shartlari

30 °C dan yuqori bo‘lmagan haroratda, quruq joyda saqlanadi. Preparatni bolalar qo‘li yetmaydigan joyda saqlash lozim.

Yaroqlilik muddati

Ishlab chiqarilgan sanasidan boshlab 36 oy. Yaroqlilik muddati tugagandan so‘ng preparatni ishlatmang.

Ishlab chiqaruvchi

Synokem Pharmaceuticals Limited (Hindiston).