Diklofenak (Diclofenac) Ozon ichak bilan qoplangan tabletkalar 50 mg №20 (2 blister х 10 tabletka)

Tarkib

1 ta tabletka tarkibida:

Faol moddasi: diklofenak natriy - 50 mg.

Yordamchi moddalar (yadro): mikrokristall sellyuloza - 5,9 mg, laktoza monogidrati - 28,5 mg, kartoshka kraxmali - 11,1 mg, povidon (polivinilpirrolidon) - 3,5 mg, magniy stearati - 1,0 mg.

Yordamchi moddalar (qobiq): sellasefat - 2,31 mg, titan dioksidi - 0,962 mg, kanakunjut moyi - 0,269 mg, polisorbat 80 - 0,886 mg, tropeolin bo‘yog‘i - 0 - 0,573 mg.

Tavsif

Tabletkalar yumaloq, ikki tomonlama qavariq, zarg‘aldoq-sariqdan jigarranggacha bo‘lgan qobiq bilan qoplangan. Ko‘ndalang kesimda ikkita qatlam ko‘rinadi: qobiq - zarg‘aldoq-sariqdan jigarranggacha va yadro - oqdan biroz sarg‘ish tusli oq ranggacha.

Chiqarish shakli

Ichakda eriydigan qobiq bilan qoplangan tabletkalar 50 mg.

Farmakoterapevtik guruh

Nosteroid yallig‘lanishga qarshi preparat. Diklofenak. ATX kodi: M01AB05.

Farmakologik xususiyatlari

Farmakodinamika

Nosteroid yallig‘lanishga qarshi preparat (NYAQP), fenilsirka kislotasi hosilasi; yallig‘lanishga qarshi, og‘riq qoldiruvchi va isitma tushiruvchi ta’sir ko‘rsatadi. Siklooksigenaza 1 va siklooksigenaza 2 ni tanlab bo‘lmagan holda susaytirib, araxidon kislota metabolizmini buzadi, yallig‘lanish o‘chog‘ida prostaglandinlar miqdorini kamaytiradi. Yallig‘lanish xarakteridagi og‘riqlarda eng samarali hisoblanadi. Barcha nosteroid yallig‘lanishga qarshi preparatlar kabi preparat antiagregant ta’sir ko‘rsatadi. Revmatik kasalliklarda diklofenakning yallig‘lanishga qarshi va og‘riq qoldiruvchi ta’siri og‘riqning yaqqolligini, ertalabki karaxtlikni, bo‘g‘imlarning shishini sezilarli darajada kamaytirishga yordam beradi, bu esa bo‘g‘imning funksional holatini yaxshilaydi. Jarohatlarda, operatsiyadan keyingi davrda diklofenak og‘riq sezgilarini va yallig‘lanish shishini kamaytiradi.

Farmakokinetika

Absorbsiya - tez va to‘liq, ovqat absorbsiya tezligini 1-4 soatga sekinlashtiradi va maksimal konsentratsiyani (Smax) 40% ga pasaytiradi. Og‘iz orqali qabul qilingandan so‘ng 50 mg Smax -1,5 mkg/ml, maksimal konsentratsiyaga erishish vaqti (MSmax) - 2-3 soat.

Plazmadagi konsentratsiya yuborilayotgan doza miqdoriga chiziqli bog‘liqlikda bo‘ladi. Ko‘p marta yuborish fonida diklofenak farmakokinetikasida o‘zgarishlar kuzatilmaydi. Ovqatlanishlar o‘rtasida tavsiya etilgan vaqt oralig‘iga rioya qilinganda to‘planmaydi.

Biomavjudligi - 50%. Plazma oqsillari bilan bog‘lanish - 99% dan ortiq (katta qismi albuminlar bilan bog‘lanadi). Ko‘krak sutiga, sinovial suyuqlikka o‘tadi; Smax sinovial suyuqlikda plazmaga qaraganda 2-4 soat kechroq kuzatiladi. Sinovial suyuqlikdan yarim chiqarilish davri (T1/2) - 3-6 soat (sinovial suyuqlikda preparatning konsentratsiyasi uni kiritgandan keyin 4-6 soat o‘tgach, plazmadagiga qaraganda yuqori bo‘ladi va yana 12 soat davomida yuqori bo‘lib qoladi).

Preparatning 50% qismi jigar orqali "birinchi o‘tish" vaqtida metabolizmga uchraydi. Metabolizmi ko‘p marta yoki bir marta gidroksillanish va glyukuron kislotasi bilan konyugatsiyalanish natijasida sodir bo‘ladi. Preparat metabolizmida CYP2C9 izofermenti ishtirok etadi. Metabolitlarning farmakologik faolligi diklofenakka qaraganda kamroq.

Tizimli klirens 260 ml/min ni tashkil etadi. Yuborilgan dozaning 60% buyraklar orqali metabolitlar ko‘rinishida chiqariladi; 1% dan kamrog‘i o‘zgarmagan holda chiqariladi, dozaning qolgan qismi o‘t bilan metabolitlar ko‘rinishida chiqariladi.

Yaqqol ifodalangan buyrak yetishmovchiligi (kreatinin klirensi 10 ml/min dan kam) bo‘lgan bemorlarda metabolitlarning o‘t bilan chiqarilishi ortadi, bunda ularning qondagi konsentratsiyasi oshishi kuzatilmaydi.

Surunkali gepatit yoki kompensatsiyalangan jigar sirrozi bo‘lgan bemorlarda farmakokinetik ko‘rsatkichlar o‘zgarmaydi. Diklofenak ona sutiga o‘tadi.

Ko‘rsatmalar

Tayanch-harakat tizimining yallig‘lanish va degenerativ kasalliklarini simptomatik davolash (revmatoid artrit, psoriatik, ankilozlovchi spondilit; podagra artriti, yumshoq to‘qimalarning revmatik shikastlanishi, periferik bo‘g‘imlar va umurtqa pog‘onasining osteoartrozi, shu jumladan ildiz sindromi bilan, tendovaginit, bursit, deformatsiyalovchi osteoartroz, osteoxondroz).

Kuchsiz yoki o‘rtacha darajadagi og‘riq sindromi: nevralgiya, mialgiya, lyumboishialgiya, yallig‘lanish bilan kechadigan posttravmatik og‘riq sindromi, operatsiyadan keyingi og‘riq, bosh og‘rig‘i, migren, algodismenoreya; kichik chanoqdagi yallig‘lanish jarayonlari, shu jumladan adneksit, proktit, tish og‘rig‘i. Kuchli og‘riq sindromi (faringit, tonzillit, otit) bilan kechuvchi quloq, tomoq, burunning yuqumli-yallig‘lanish kasalliklarini kompleks davolash tarkibida. "Shamollash" va gripp kasalliklarida isitma sindromi.

Preparat simptomatik davolash uchun mo‘ljallangan bo‘lib, qo‘llash paytida og‘riq va yallig‘lanishni kamaytiradi, kasallikning rivojlanishiga ta’sir ko‘rsatmaydi.

Qarshi ko‘rsatmalar

- Faol modda yoki yordamchi komponentlarga yuqori sezuvchanlik.

- Atsetilsalitsil kislotasi yoki boshqa nosteroid yallig‘lanishga qarshi dorilarni qabul qilgandan keyin bronxoobstruksiya, rinit, eshakemi xuruji to‘g‘risidagi anamnestik ma’lumotlar (bronxial astma, burun va burun yondosh bo‘shliqlarining qaytalanuvchi polipozi va atsetilsalitsil kislotasi hamda boshqa nosteroid yallig‘lanishga qarshi dorilarni ko‘tara olmaslikning to‘liq yoki to‘liq bo‘lmagan kombinatsiyasi (shu jumladan anamnezda).

- Oshqozon yoki 12 barmoqli ichak shilliq qavatining eroziv-yarali o‘zgarishlari, faol oshqozon-ichak qon ketishi.

- Ichakning yallig‘lanish kasalliklari (yarali kolit, Kron kasalligi).

- Aortakoronar shuntlash o‘tkazilgandan keyingi davr.

- Homiladorlikning III trimestri, emizish davri.

- Dekompensatsiyalangan yurak yetishmovchiligi.

- Serebrovaskulyar qon ketishi yoki boshqa qon ketishlar va gemostazning buzilishi.

- Yaqqol ifodalangan jigar yetishmovchiligi yoki faol jigar kasalligi.

- Yaqqol ifodalangan buyrak yetishmovchiligi (kreatinin klirensi 30 ml/daqiqadan kam); zo‘rayib boruvchi buyrak kasalliklari, tasdiqlangan giperkaliyemiya.

- 14 yoshgacha bo‘lgan bolalar yoshi.

- Irsiy laktozani ko‘tara olmaslik, laktoza yetishmovchiligi yoki glyukoza va galaktoza so‘rilishining buzilishi.

Ehtiyotkorlik bilan

Anemiya, bronxial astma, serebrovaskulyar kasalliklar, yurak ishemik kasalligi, dimlangan yurak yetishmovchiligi, arterial gipertenziya, periferik arteriyalar kasalliklari, shish sindromi, jigar yoki buyrak yetishmovchiligi, anamnezda jigar kasalliklari, dislipidemiya, giperlipidemiya, qandli diabet, chekish, ichak yallig‘lanish kasalliklari, aylanib yuruvchi qon hajmining sezilarli darajada kamayishi (shu jumladan keng ko‘lamli jarrohlik aralashuvlaridan keyin), induksiyalangan porfiriya, divertikulit, biriktiruvchi to‘qimaning tizimli kasalliklari, homiladorlikning I-II trimestri, kreatinin klirensi 30-60 ml/min.

Oshqozon-ichak traktining (OIT) yara kasalligi rivojlanishi to‘g‘risidagi anamnestik ma’lumotlar, Helicobacter pylori infeksiyasining mavjudligi, nosteroid yallig‘lanishga qarshi dorilarni uzoq vaqt qo‘llash, alkogolni tez-tez iste’mol qilish, og‘ir somatik kasalliklar.

Keksa bemorlar (shu jumladan diuretiklar qabul qiluvchi, zaiflashgan va kam vaznli bemorlar). Antikoagulyantlar (masalan, varfarin), antiagregantlar (masalan, atsetilsalitsil kislotasi, klopidogrel), peroral glyukokortikosteroidlar (masalan, prednizolon), serotoninni qayta qamrab olishning selektiv ingibitorlari (masalan, sitalopram, fluoksetin, paroksetin, sertralin) bilan bir vaqtning o‘zida davolash.

Qo‘llash usuli va dozalari

Ichga, chaynamay, ovqat vaqtida yoki ovqatdan keyin, ozgina suv bilan ichiladi. Kattalar va o‘smirlarga 14 yoshdan boshlab - 50 mg dan kuniga 2-3 marta. Optimal terapevtik samaraga erishilganda, doza asta-sekin kamaytiriladi va 50 mg/sut dozada qo‘llab-quvvatlovchi davolashga o‘tiladi. Maksimal sutkalik doza - 150 mg.

Nojo‘ya ta’sirlari

Ovqat hazm qilish tizimi tomonidan: epigastral og‘riq, ko‘ngil aynishi, qusish, diareya, dispepsiya, meteorizm, anoreksiya, aminotransferazalar faolligining oshishi, gastrit, proktit, oshqozon-ichak traktidan qon ketishi (qonli qusish, melena, qon aralash diareya), oshqozon-ichak trakti yaralari (qon ketishi yoki teshilishi bilan yoki qonsiz), gepatit, sariqlik, jigar faoliyatining buzilishi, stomatit, glossit, qizilo‘ngachning shikastlanishi, ichakning diafragmasimon torayishi, nospetsifik gemorragik kolit, yarali kolit yoki Kron kasalligining kuchayishi, qabziyat, pankreatit, yashin tezligidagi gepatit.

Asab tizimi tomonidan: bosh og‘rig‘i, bosh aylanishi, uyquchanlik, sezuvchanlikning buzilishi, shu jumladan paresteziyalar, xotiraning buzilishi, tremor, tutqanoqlar, xavotir, serebrovaskulyar buzilishlar, aseptik meningit, dezoriyentatsiya, depressiya, uyqusizlik, tungi "qo‘rqinchli tushlar," asabiylashish, ruhiy buzilishlar.

Sezgi a’zolari tomonidan: ko‘rishning buzilishi (ko‘rishning noaniqligi, diplopiya), eshitishning buzilishi, quloqlarda shovqin, ta’m bilishning buzilishi, vertigo.

Siydik ajratish tizimi tomonidan: o‘tkir buyrak yetishmovchiligi, gematuriya, proteinuriya, interstitsial nefrit, nefrotik sindrom, papillyar nekroz. Qon yaratish a’zolari tomonidan - trombotsitopeniya, leykopeniya, gemolitik va aplastik anemiya, agranulotsitoz.

Yurak-qon tomir tizimi tomonidan: yurak urishi hissi, ko‘krak qafasidagi og‘riq, qon bosimining ko‘tarilishi, vaskulit, yurak yetishmovchiligi, miokard infarkti.

Nafas tizimi tomonidan: bronxial astma (shu jumladan nafas qisishi), pnevmonit. Teri qoplamlari tomonidan: teri toshmasi, eshakem, bullyoz toshmalar, eritema, shu jumladan ko‘p shaklli va Stivens-Jonson sindromi, Layell sindromi, eksfoliativ dermatit, qichishish, soch to‘kilishi, fotosensibilizatsiya, purpura, shu jumladan allergik. Allergik reaksiyalar: anafilaktik/anafilaktoid reaksiyalar, jumladan qon bosimining yaqqol pasayishi va shok, angionevrotik shish (shu jumladan yuz).

Boshqalar: shishlar.

Dozani oshirib yuborish

Simptomlari: qusish, oshqozon-ichak traktidan qon ketishi, epigastral og‘riq, diareya, bosh aylanishi, quloqlarda shovqin, letargiya, talvasalar, kamdan-kam hollarda qon bosimi oshishi, o‘tkir buyrak yetishmovchiligi, gepatotoksik ta’sir, nafas olishning pasayishi, koma. Davolash: oshqozonni yuvish, faollashtirilgan ko‘mir, arterial bosimning ko‘tarilishi, buyrak faoliyatining buzilishi, talvasalar, oshqozon-ichak yo‘llarining ta’sirlanishi, nafas olishning pasayishini bartaraf etishga qaratilgan simptomatik terapiya. Tezlashtirilgan diurez, gemodializ kam samara beradi.

O‘zaro aloqa

Digoksin, metotreksat, litiy va siklosporin preparatlarining plazma konsentratsiyasini oshiradi.

Diuretiklar ta’sirini pasaytiradi, kaliy saqlovchi diuretiklar fonida giperkaliyemiya xavfi kuchayadi; antikoagulyantlar, antiagregantlar va trombolitik dori vositalari (alteplaza, streptokinaza, urokinaza) fonida qon ketish xavfini oshiradi (ko‘pincha oshqozon-ichak traktidan). Gipotenziv va uxlatuvchi dori vositalarining ta’sirini kamaytiradi. Boshqa nosteroid yallig‘lanishga qarshi dorilar va glyukokortikosteroid vositalarning nojo‘ya ta’sirlari (oshqozon-ichak traktidan qon ketishi), metotreksatning toksikligi va siklosporinning nefrotoksikligi ehtimolini oshiradi.

Atsetilsalitsil kislotasi qonda diklofenak konsentratsiyasini kamaytiradi. Paratsetamol bilan bir vaqtda qo‘llash diklofenakning nefrotoksik ta’siri rivojlanish xavfini oshiradi.

Gipoglikemik vositalarning ta’sirini kamaytiradi.

Sefamadol, sefoperazon, sefotetan, valproat kislotasi va plikamitsin gipoprotrombinemiya rivojlanish chastotasini oshiradi.

Siklosporin va oltin preparatlari diklofenakning buyraklarda prostaglandinlar sinteziga ta’sirini oshiradi, bu esa nefrotoksiklikni oshiradi.

Etanol, kolxitsin, kortikotropin, serotoninni qayta qamrab olishning selektiv ingibitorlari va teshik dalachoy preparatlari bilan bir vaqtda qo‘llash oshqozon-ichak traktida qon ketish xavfini oshiradi. Diklofenak fotosensibilizatsiyani chaqiruvchi dorilarning ta’sirini kuchaytiradi. Kanalchalar sekretsiyasini bloklovchi preparatlar diklofenakning plazmadagi konsentratsiyasini oshiradi va shu bilan uning zaharliligini oshiradi.

Xinolon guruhidagi antibakterial dori vositalari tutqanoq rivojlanish xavfini oshiradi.

Maxsus ko‘rsatmalar

Kerakli terapevtik samaraga tez erishish maqsadida ovqatdan 30 daqiqa oldin qabul qilinadi. Qolgan hollarda ovqatdan oldin, ovqat vaqtida yoki ovqatdan keyin chaynamay, yetarli miqdorda suv bilan ichiladi.

Oshqozon-ichak trakti tomonidan nojo‘ya ta’sirlar rivojlanish xavfini kamaytirish uchun minimal samarali dozani iloji boricha qisqa kurs bilan qo‘llash kerak.

Agar preparatni qabul qilish vaqtida "jigar" transaminazalari faolligining oshishi saqlanib qolsa yoki ko‘paysa, gepatotoksiklikning klinik belgilari (jumladan, ko‘ngil aynishi, charchoq, uyquchanlik, diareya, teri qichishishi, sariqlik) kuzatilsa, davolashni to‘xtatish kerak.

Prostaglandinlarning buyrak qon aylanishini saqlashdagi muhim roli tufayli, yurak yoki buyrak yetishmovchiligi bo‘lgan bemorlarga, shuningdek, diuretiklar qabul qiluvchi keksa bemorlarni va biror sababga ko‘ra aylanib yuruvchi qon hajmining kamayishi kuzatiladigan bemorlarni davolashda (masalan, keng ko‘lamli jarrohlik amaliyotidan so‘ng) alohida ehtiyotkorlik bilan qo‘llash kerak. Agar bunday hollarda diklofenak buyurilsa, ehtiyot chorasi sifatida buyrak faoliyatini nazorat qilish tavsiya etiladi.

Jigar yetishmovchiligi (surunkali gepatit, kompensatsiyalangan jigar sirrozi) bilan og‘rigan bemorlarda kinetika va metabolizm jigar faoliyati me’yorda bo‘lgan bemorlardagi shunga o‘xshash jarayonlardan farq qilmaydi. Uzoq muddatli terapiya o‘tkazilganda jigar faoliyatini, periferik qon manzarasini, najasning yashirin qonga tahlilini nazorat qilish zarur.

Fertillikka salbiy ta’sir ko‘rsatishi sababli, homilador bo‘lishni istagan ayollarga preparatni qo‘llash tavsiya etilmaydi. Bepushtligi bo‘lgan bemorlarda (shu jumladan tekshiruvdan o‘tayotganlarda) preparatni bekor qilish tavsiya etiladi.

Transport vositalari va mexanizmlarini boshqarish qobiliyatiga ta’siri

Davolash davrida ruhiy va harakat reaksiyalari tezligining pasayishi mumkin, shuning uchun avtotransportni boshqarishdan va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishdan tiyilish kerak.

Qadoq

10, 20, 30 ta tabletka polivinilxlorid plyonkasi va laklangan alyuminiy bosma folgasidan yasalgan konturli yacheykali o‘ramga joylashtiriladi. 10, 20, 30, 40, 50 yoki 100 ta tabletka dori vositalari uchun polimer idishga joylashtiriladi. Bitta konteyner yoki 1, 2, 3, 4, 5, 6, 8 yoki 10 ta konturli yacheykali o‘ramlar qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

Harorati 25 °C dan yuqori bo‘lmagan quruq, yorug‘likdan himoyalangan joyda saqlang. Bolalar qo‘li yetmaydigan joyda saqlang.

Yaroqlilik muddati

3 yil. Yaroqlilik muddati tugagandan keyin preparatni ishlatmang.

Dorixonalardan berish shartlari

Retsept bo‘yicha

Ro‘yxatdan o‘tish guvohnomasi egasi

OZON MCHJ Rossiya

Ishlab chiqaruvchi

OZON MCHJ Rossiya