Klodifen tashqi foydalanish uchun gel 5% 45 g (naycha)

Tarkib

100 g gel tarkibida

faol modda - diklofenak natriy 5,0 g,

yordamchi moddalar: etanol 96%, propilenglikol, gidroksietilsellyuloza, metilparagidroksibenzoat, tozalangan suv.

Tashqi ko‘rinish, hid, ta’m tavsifi

Shaffof, rangsiz yoki biroz sarg‘ish, bir jinsli, pufakchalarsiz, kuchsiz spirt hidiga ega bo‘lgan gel.

Dori shakli, dozasi

5% li gel

Farmakoterapevtik guruh

Suyak-mushak tizimi. Bo‘g‘im va mushak og‘riqlarida mahalliy qo‘llash uchun preparatlar. Yallig‘lanishga qarshi preparatlar, nosteroid, mahalliy qo‘llash uchun. Diklofenak. ATX kodi: M02AA15.

Qo‘llanilishi

Kladifen geli og‘riqni yengillashtirish hamda yallig‘lanish va shishni kamaytirish uchun qo‘llaniladi:

- bo‘g‘imlarning degenerativ kasalliklarida (tizza va boshqa bo‘g‘imlar artrozi)

- yumshoq to‘qimalarning revmatik kasalliklarida (tendinit va tendovaginit, yelka bo‘g‘imi kapsulasi, mushaklar va fassial pardalarning yallig‘lanishi)

- jarohatlar va shikastlanishlarda, shu jumladan sportda (pay cho‘zilishi, lat yeyish, chiqish)

- yuzaki venalar yallig‘langanda (qo‘shimcha davolash sifatida).

Agar bemor dori bilan davolanishni boshlaganidan keyin 3 kun ichida ahvoli yaxshilanmasa, shifokor bilan maslahatlashishi kerak.

Kladifen gelini bolalar va o‘smirlarda qo‘llash tavsiya etilmaydi.

Qo‘llash boshlangunga qadar zarur bo‘lgan ma’lumotlar ro‘yxati

Qarshi ko‘rsatmalar

- faol moddaga yoki preparatning har qanday yordamchi moddalariga yuqori sezuvchanlik

- anamnezda bronxial astma, eshakemi yoki o‘tkir rinit kabi atsetilsalitsil kislotasi va boshqa nosteroid yallig‘lanishga qarshi vositalarga yuqori sezuvchanlik reaksiyalari

- homiladorlikning uchinchi trimestri

- terining ochiq jarohatlari, terining yallig‘lanish yoki yuqumli kasalliklari, ekzema.

Kladifen geli shilliq qavatlarga surtish uchun mo‘ljallanmagan.

Qo‘llashda zarur ehtiyot choralari

Kladifen gelini faqat sog‘lom teri sohalariga surtish kerak. Preparatni jarohatlarga yoki ochiq jarohatlangan teri sohalariga surtish mumkin emas.

Boshqa dori vositalari bilan o‘zaro ta’siri

Mahalliy qo‘llanganda diklofenak tizimli qon oqimiga ozgina darajada o‘tadi, shuning uchun preparatni qo‘llashda dorilarning o‘zaro ta’siri kutilmaydi.

Maxsus ogohlantirishlar

Bolalar va o‘smirlarda preparatning qo‘llanilishi haqida ma’lumotlar yo‘q; Kladifen gelini ushbu toifadagi bemorlarda qo‘llash tavsiya etilmaydi.

Agar preparat uzoq vaqt davomida teri yuzasining katta maydoniga surtilsa, tizimli nojo‘ya ta’sirlar rivojlanish xavfini istisno qilib bo‘lmaydi (diklofenakni tibbiy qo‘llash bo‘yicha tegishli yo‘riqnomaga qarang, unda uning tizimli ta’siri haqida ma’lumot berilgan).

Dori vositasini qo‘llashda gelning ko‘zga yoki shilliq qavatlarga tushishining oldini olish maqsadida ehtiyotkorlik bilan yondashish lozim. Kladifen gelini ichmaslik kerak.

Agar preparatni surtgandan so‘ng terida toshma paydo bo‘lsa, uni qo‘llashni to‘xtatish lozim.

Kladifen gelni neoklyuzion bog‘lamlar ostida qo‘llash mumkin va havo o‘tkazmaydigan oklyuzion bog‘lamlar ostida qo‘llash mumkin emas.

Yordamchi moddalar

Kladifen geli tarkibida metil paragidroksibenzoat mavjud bo‘lib, u allergik reaksiyalarni (shu jumladan kechiktirilgan reaksiyalarni) keltirib chiqarishi mumkin.

Kladifen geli tarkibida terini ta’sirlashi mumkin bo‘lgan propilenglikol mavjud.

Homiladorlik yoki emizish davrida

Homiladorlik

Mahalliy qo‘llanganda diklofenakning qon plazmasidagi konsentratsiyasi tizimli qo‘llashga qaraganda ancha past bo‘ladi.

Prostaglandinlar sintezini ingibirlash homiladorlik va/yoki embrion/homila rivojlanishiga salbiy ta’sir ko‘rsatishi mumkin. Epidemiologik tadqiqotlar ma’lumotlari shuni ko‘rsatadiki, homiladorlikning erta muddatlarida prostaglandinlar sintezi ingibitorlarini qo‘llash o‘z-o‘zidan abort qilish xavfining oshishi, yurak nuqsonlari va gastroshizis rivojlanishi bilan bog‘liq. Yurak-qon tomir tizimining tug‘ma nuqsonlari rivojlanishining mutlaq xavfi 1% dan kamdan taxminan 1,5% gacha oshdi; davolash dozasi va davomiyligi oshishi bilan xavf ortishi taxmin qilinmoqda.

Hayvonlarga gestatsiya davrida (homila organogenezi davrida) prostaglandinlar sintezi ingibitorlari kiritilganda, turli rivojlanish nuqsonlari, shu jumladan yurak-qon tomir tizimi nuqsonlari paydo bo‘lish chastotasining oshishi qayd etildi.

Homiladorlikni rejalashtirayotgan, shuningdek, homiladorlikning birinchi va ikkinchi trimestrida bo‘lgan ayollarda Kladifen gelini faqat o‘ta zarur hollarda, eng qisqa vaqt davomida minimal dozalarda qo‘llash lozim.

Homiladorlikning uchinchi trimestrida qo‘llaniladigan barcha prostaglandin sintezi ingibitorlari quyidagilarga salbiy ta’sir ko‘rsatishi mumkin:

- homila - yurak-o‘pka toksikligi (arterial yo‘lning muddatidan oldin yopilishi va o‘pka gipertenziyasining rivojlanishi); buyrak faoliyatining buzilishi, ba’zan buyrak yetishmovchiligi va oligogidramnion rivojlanishi bilan;

- ona va homila (homiladorlikning oxirida) - qon ketish vaqtining uzayishi mumkin (antiagregant ta’siri juda past dozalarda qo‘llanilganda ham namoyon bo‘lishi mumkin); bachadon qisqaruvchanligining pasayishi, bu esa tug‘ruqning kechikishi va davomiyligining uzayishiga olib kelishi mumkin.

Homiladorlikning uchinchi trimestrida preparatni qo‘llash mumkin emas.

Laktatsiya

Boshqa nosteroid yallig‘lanishga qarshi vositalar kabi diklofenak ham oz miqdorda ona sutiga o‘tadi. Dori vositasi terapevtik dozalarda mahalliy qo‘llanganda emizikli bolaga ta’sir ko‘rsatishi kutilmaydi.

Emizikli davrda ayollarda preparatni qo‘llash bo‘yicha klinik tadqiqotlar o‘tkazilmagan, shuning uchun bunday vaziyatlarda Kladifen gelini faqat shifokor bilan maslahatlashgan holda qo‘llash lozim. Shu bilan birga, preparatni ko‘krak sohasiga yoki teri yuzasining katta maydoniga surtish yoki uzoq vaqt davomida ishlatish mumkin emas.

Dori vositasining transport vositasi yoki potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Mahalliy qo‘llanganda avtotransportni boshqarish va mexanizmlarni boshqarish qobiliyatiga ta’sir ko‘rsatmaydi.

Qo‘llash bo‘yicha tavsiyalar

Dozalash tartibi

Kladifen gelini yallig‘lanish o‘chog‘i ustidagi teriga kuniga 2-3 marta yupqa qatlam qilib surtish kerak.

Kladifen gelini ionoforez muolajasini o‘tkazishda ishlatish mumkin, bunda uni manfiy qutbga (katodga) surtish lozim.

Yuborish usuli va yo‘li

Preparat sirtga qo‘llash uchun mo‘ljallangan.

Preparat surtilgandan so‘ng, avval qo‘llarni quruq qog‘oz sochiq bilan artish, so‘ngra qo‘llarni yuvish tavsiya etiladi (qo‘l barmoqlarini davolash bundan mustasno). Dush yoki vanna qabul qilishdan oldin bemor teriga surtilgan preparatning qurishini kutishi lozim.

Doza oshirib yuborilganda ko‘riladigan choralar

Preparatning dozasini oshirib yuborish ehtimoli kam, chunki diklofenak mahalliy qo‘llanganda tizimli qon oqimiga sezilarsiz darajada o‘tadi.

Preparat tasodifan ichga qabul qilinganda (bitta tubada 2,25 g diklofenak natriy mavjud) nojo‘ya reaksiyalar rivojlanishi mumkin, bular diklofenakning peroral shakllari dozasi oshirib yuborilganda qayd etiladi.

Agar preparatni tasodifan ichga qabul qilgandan so‘ng kuchli tizimli nojo‘ya reaksiyalar rivojlansa, ularning terapiyasi zaharlanishlarni davolashning umumiy tamoyillariga asoslanishi kerak.

Oshqozonni yuvish va faollashtirilgan ko‘mirdan foydalanish masalasini ko‘rib chiqish kerak, ayniqsa dori vositasini qabul qilgandan beri ko‘p vaqt o‘tmagan bo‘lsa.

Dori vositasini qo‘llash usulini tushuntirish uchun tibbiyot xodimiga maslahat so‘rab murojaat qilish bo‘yicha tavsiyalar

Dori vositasini qo‘llash bo‘yicha savollar tug‘ilganda, maslahat olish uchun shifokor yoki farmatsevtga murojaat qilish lozim.

Dori vositalarini standart qo‘llashda yuzaga keladigan nojo‘ya ta’sirlarning tavsifi va bunday hollarda ko‘rilishi kerak bo‘lgan choralar

Tez-tez

- dermatit (shu jumladan kontakt dermatit), toshma, eritema, ekzema, qichishish

Kamdan-kam

- bullyoz dermatit;

Juda kam

- yuqori sezuvchanlik (shu jumladan eshakemi), angionevrotik shish

- fotosensibilizatsiya reaksiyalari

- yiringchali toshma

- bronxial astma

Chastota noma’lum

- surtilgan joyda achishish hissi, terining quruqligi.

Chiqarilish shakli va qadoqlash

45 g dan preparat yuqori zichlikdagi polietilendan tayyorlangan buraluvchan qopqoqli epoksid qoplamali alyuminiy tubalarga joylashtiriladi.

1 ta tuba davlat va rus tillaridagi tibbiy qo‘llash bo‘yicha yo‘riqnoma bilan birga karton qutiga joylashtiriladi.

Saqlash muddati

3 yil

Yaroqlilik muddati o‘tgandan keyin qo‘llanilmaydi.

Saqlash shartlari

25oC dan yuqori bo‘lmagan haroratda saqlanadi.

Bolalar qo‘li yetmaydigan joyda saqlang!

Dorixonalardan berish shartlari

Retsept bo‘yicha.

Ishlab chiqaruvchi tafsilotlari

"Uorld Meditsin Iloch San. ve Tij. A.Sh.," Turkiya

15 Temmuz Max., Jomi Yolu Jad. No50, Güneşli, Bag‘cılar, İstanbul.

Tel.: +90 (212) 474 70 50

Faks: +90 (212) 474 09 01

Elektron pochta: [email protected]

Ro‘yxatdan o‘tkazish guvohnomasi egasi

"VORLD MEDITSIN LIMITED," Buyuk Britaniya

Graund Flo, Gadd Xaus, Arkadiya Avenyu, Finchli, London shahri, N3 2JU, Buyuk Britaniya.

Tel.: +44 (0) 845 0 66 33 00

Faks: +44 (0) 845 0 66 33 01

Elektron pochta: [email protected]