Klodifen

Tarkib

3 ml eritma tarkibiga quyidagilar kiradi:

Faol modda: diklofenak natriy (100% moddaga qayta hisoblaganda) - 75,0 mg.

Yordamchi moddalar: propilenglikol, mannitol, benzil spirti, natriy metabisulfit, natriy gidroksidning 1M eritmasi, inyeksiya uchun suv.

Tavsif

Shaffof, rangsiz yoki biroz rangli, o‘ziga xos kuchsiz hidli suyuqlik.

Dori shakli

Inyeksiya uchun eritma.

Farmakoterapevtik guruh

Nosteroid yallig‘lanishga qarshi preparatlar. Sirka kislota hosilalari. ATX kodi: M01AB05.

Farmakologik xususiyatlari

Fenilsirka kislotasi hosilasi bo‘lgan nosteroid yallig‘lanishga qarshi vosita (NYAQV). Kuchli yallig‘lanishga qarshi, og‘riq qoldiruvchi va o‘rtacha haroratni pasaytiruvchi ta’sir ko‘rsatadi. Ta’sir mexanizmi yallig‘lanish, og‘riq va isitma patogenezida asosiy rol o‘ynaydigan prostaglandinlarning o‘tmishdoshi bo‘lgan araxidon kislotasi metabolizmining asosiy fermenti - siklooksigenez (SOG) faolligini bostirish bilan bog‘liq. Analgetik ta’sir ikki mexanizmga bog‘liq: periferik (bilvosita, prostaglandinlar sintezini bostirish orqali) va markaziy (markaziy va periferik asab tizimida prostaglandinlar sintezini ingibirlash hisobiga).

Tog‘aylarda proteoglikan sintezini ingibirlaydi.

Revmatik kasalliklarda bo‘g‘imlardagi tinch holatdagi va harakatdagi og‘riqlarni, shuningdek, ertalabki bo‘g‘imlarning qotib qolishi va shishishini kamaytiradi, harakat hajmini oshirishga yordam beradi. Jarohatdan keyingi va operatsiyadan keyingi og‘riqlarni hamda yallig‘lanish shishini kamaytiradi.

Trombotsitlar agregatsiyasini susaytiradi. Uzoq muddat qo‘llanilganda desensibilizatsiyalovchi ta’sir ko‘rsatadi.

Farmakokinetika

Qon plazmasi oqsillari, asosan albuminlar bilan diklofenakning 99% ga yaqini bog‘lanadi. Preparatning maksimal konsentratsiyasiga plazmadagiga qaraganda 2-4 soat kechroq erishiladi. Sinovial suyuqlikka o‘tadi.

Yarim chiqarilishning biologik davri 1-2 soatni tashkil etadi. Buyrak va jigar faoliyatining o‘rtacha ifodalangan buzilishlarida u o‘zgarmaydi. Diklofenakning taxminan 70% siydik bilan preparatni jigarda gidroksillanishi va konyugatsiyalanishi natijasida hosil bo‘ladigan nofaol metabolitlar ko‘rinishida, 30% o‘t va najas bilan ajraladi. Faqat 1% o‘zgarmagan holda ajralib chiqadi. Keksa yoshdagi bemorlarda preparatning farmakokinetik ko‘rsatkichlari sezilarli darajada o‘zgarmaydi.

Qo‘llanilishi

tayanch-harakat tizimining degenerativ va yallig‘lanish kasalliklarida bo‘g‘im sindromi (osteoxondroz, osteoartroz, periartropatiyalar, revmatoid artrit, revmatizm, ankilozlovchi spondilit, podagra);

yumshoq to‘qimalar va tayanch-harakat tizimining yallig‘lanishi (cho‘zilish, chiqish, lat yeyish) bilan kechadigan jarohatdan keyingi og‘riq sindromi;

bo‘g‘imdan tashqari to‘qimalar kasalliklari (tendovaginit, bursit);

nevralgiya, mialgiya.

Qo‘llash usuli va dozalari

Mushak orasiga inyeksiya qilishda inyeksiya joyidagi nervlar yoki boshqa to‘qimalarning shikastlanishiga yo‘l qo‘ymaslik uchun quyidagi qoidalarga rioya qilish tavsiya etiladi - inyeksion eritmani mushak orasiga chuqur yuborish kerak.

O‘tkir holatlarni davolash yoki surunkali jarayonning zo‘rayishini bartaraf etish uchun 75 mg (1 ampula) dozada kuniga 1 marta qo‘llaniladi. Zarurat tug‘ilganda takroriy yuborish mumkin, lekin 12 soatdan oldin emas. Odatda diklofenakning inyeksion shakli ko‘pi bilan 3-5 kun davomida tavsiya etiladi, so‘ngra tabletka shakliga o‘tiladi.

Nojo‘ya ta’sirlari

ko‘ngil aynishi, qusish, ich ketishi, dispepsiya, meteorizm, anoreksiya, qabziyat;

eroziv-yarali shikastlanishlar, qon ketishi va oshqozon-ichak yo‘lining teshilishi;

teri toshmasi;

qondagi transaminazalar faolligining vaqtinchalik oshishi;

inyeksiya qilingan joyda achishish hissi.

Kamdan-kam:

bosh og‘rig‘i, bosh aylanishi, uyquning buzilishi (uyqusizlik yoki uyquchanlik), qo‘zg‘alish, asabiylashish, charchoq hissi;

yog‘ to‘qimasida infiltrat, abssess va nekroz paydo bo‘lishi;

eshakem;

bronxial astma xurujlari, tizimli anafilaktik reaksiyalar, shu jumladan shok;

periferik shishlar;

gepatit, shu jumladan fulminant gepatit;

toksik ambliopiya, ko‘rish o‘tkirligining pasayishi, diplopiya, skotoma;

eshitish qobiliyatining pasayishi, quloqlarda jaranglash, shovqin va boshqa eshitish buzilishlari;

sezuvchanlikning buzilishi, mo‘ljalni yo‘qotib qo‘yish, xotira, ta’m bilishning buzilishi, talvasalar, titroq, ruhiy buzilishlar, tushkunlik, xavotirlik, aseptik meningit;

vaskulit, pnevmonit;

hansirash, arterial gipertenziya yoki gipotenziya, aritmiyalar, kardialgiyalar, to‘sh orqasidagi og‘riq, burundan qon ketishi;

gematuriya, proteinuriya, pollakiuriya, oliguriya, anuriya;

sistit, o‘tkir buyrak yetishmovchiligi, interstitsial nefrit, nefrotik sindrom;

trombotsitopeniya, leykopeniya, neytropeniya, agranulotsitoz, gemolitik anemiya, aplastik anemiya, ichki qon ketishlar bilan bog‘liq postgemorragik anemiya;

ekzema, polimorf eritema, eritrodermiya, shu jumladan Stiven-Jonson sindromi, toksik epidermal nekroliz (Layell sindromi), fotodermatit, ekximozlar;

dismenoreya

Juda kam uchraydi:

taxikardiya, surunkali yurak yetishmovchiligi.

Qarshi ko‘rsatmalar

oshqozon-ichak traktining kuchayish bosqichidagi eroziv-yarali shikastlanishlari, "aspirin uchligi";

noaniq etiologiyali qon hosil bo‘lishining buzilishi;

oshqozon-ichak traktidan qon ketishi;

bronxial astma, shu jumladan atsetilsalitsil kislotasini qabul qilish natijasida kelib chiqqan astma;

homiladorlik, emizish davri;

18 yoshgacha bo‘lgan bolalar va o‘smirlar;

preparatga va boshqa nosteroid yallig‘lanishga qarshi preparatlarga yuqori sezuvchanlik.

Dorilarning o‘zaro ta’siri

Diklofenak bilan antigipertenziv dori vositalari bir vaqtda qo‘llanganda, ularning ta’siri susayishi mumkin.

Diuretiklar bir vaqtda qo‘llanganda diuretik ta’sir kamayishi mumkin. Kaliy saqlovchi diuretiklar bilan qonda kaliy konsentratsiyasining oshishi mumkin.

Nosteroid yallig‘lanishga qarshi vositalar va glyukokortikoid vositalarning nojo‘ya ta’sirlari (oshqozon-ichak yo‘llarida qon ketishi) paydo bo‘lish ehtimolini oshiradi.

Diklofenakni gipoglikemik preparatlar bilan bir vaqtda qo‘llagan qandli diabet bilan og‘rigan bemorlarda gipoglikemiya yoki giperglikemiya rivojlanishi haqida xabarlar mavjud.

Atsetilsalitsil kislotasi qonda diklofenak konsentratsiyasini pasaytiradi.

Bir vaqtning o‘zida qo‘llanganda qon plazmasida digoksin, litiy va fenitoin konsentratsiyasining oshishi mumkin.

Bir vaqtning o‘zida qo‘llanganda metotreksatning qon plazmasidagi konsentratsiyasi oshishi va uning zaharliligi kuchayishi mumkin.

Diklofenak bir vaqtning o‘zida qo‘llanilganda morfinning biosinguvchanligiga ta’sir ko‘rsatmasligi mumkin, biroq morfinning faol metaboliti konsentratsiyasi diklofenak ishtirokida yuqori bo‘lib qolishi mumkin, bu esa morfin metabolitining nojo‘ya ta’sirlari, shu jumladan nafas olishning pasayishi xavfini oshiradi.

Pentazotsin bilan bir vaqtda qo‘llanganda katta tutqanoq xurujining rivojlanish holati tasvirlangan; rifampitsin bilan - qon plazmasida diklofenak konsentratsiyasining pasayishi mumkin; seftriakson bilan - safro bilan seftriaksonning ekskretsiyasi oshadi; siklosporin bilan - siklosporinning nefrotoksikligi oshishi mumkin.

Maxsus ko‘rsatmalar

Nojo‘ya ta’sirlar paydo bo‘lganda, preparatni qabul qilishni to‘xtatish va davolovchi shifokor bilan maslahatlashish lozim.

Tizimli qo‘llash uchun dori shakllari bilan davolash davrida alkogol iste’mol qilish tavsiya etilmaydi.

Anamnezida jigar, buyrak, oshqozon-ichak trakti kasalliklari, dispeptik hodisalar, bronxial astma, arterial gipertoniya, yurak yetishmovchiligi bo‘lganda, jiddiy jarrohlik aralashuvlaridan so‘ng darhol, shuningdek, keksa yoshdagi bemorlarda alohida ehtiyotkorlik bilan qo‘llaniladi.

Anamnezda nosteroid yallig‘lanishga qarshi vositalar va sulfitlarga allergik reaksiyalar ko‘rsatmalari bo‘lsa, diklofenak faqat shoshilinch holatlarda qo‘llaniladi. Davolash jarayonida jigar va buyrak faoliyatini, periferik qon manzarasini muntazam nazorat qilish zarur.

Dori vositasining transport vositasini yoki potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Davolash davrida psixomotor reaksiyalar tezligi pasayishi mumkin, shuning uchun transport vositasini yoki potentsial xavfli mexanizmlarni boshqarishda ehtiyot bo‘lish kerak.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Belgilari: qusish, bosh aylanishi, bosh og‘rig‘i, hansirash, hushning xiralashishi, ko‘ngil aynishi, qusish, qorin og‘rig‘i, qon ketishi, jigar va buyrak faoliyatining buzilishi.

Davolash - simptomatik. Maxsus antidot yo‘q.

Chiqarish shakli

3 ml dan ampulalarda, kontur katakli o‘ramda 5 ampuladan. 2 tadan konturli No 5 o‘ramlar pachka yoki karton qutiga joylanadi. Har bir qutiga davlat va rus tillarida qo‘llash bo‘yicha yo‘riqnomalar joylashtiriladi.

Saqlash shartlari

Yorug‘likdan himoyalangan quruq joyda, 30 °C dan yuqori bo‘lmagan haroratda saqlanadi.

Saqlash muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

Savdo belgisi va ro‘yxatdan o‘tish sertifikati egasi

"World Medicine Ilaç Sanayi ve Ticaret A.Ş.," Turkiya.

Ishlab chiqarilgan:

"Mefar Ilaç Sanayi A.Ş.," Turkiya.