Пензитал таблетки №30 (3 блистера х 10 таблеток)

Tarkib

Har bir tabletka tarkibiga quyidagilar kiradi:

Faol moddalar: pankreatin 212,5 mg ferment faolligi: lipazalar - 6000 ED FIP, amilazalar - 4500 ED FIP, proteazalar - 300 ED FIP.

Yordamchi moddalar: mikrokristall sellyuloza, polivinilpirrolidon, natriy kraxmal glikolat, kolloid kremniy dioksidi, magniy stearati, IC-MS-2398 WHITE, ISE-10001 / WHITE, talk.

Tavsif

Oq rangli, dumaloq, ikki tomoni qavariq, plyonka bilan qoplangan tabletkalar.

Dori shakli

Ichakda eruvchi qobiq bilan qoplangan tabletkalar.

Farmakoterapevtik guruh

Hazm qiluvchi ferment vositasi. ATX kodi: A09AA02.

Farmakologik xususiyatlari

Oshqozon osti bezining tashqi sekretor funksiyasi yetishmovchiligini kompensatsiyalaydi, proteolitik, amilolitik va lipolitik ta’sir ko‘rsatadi.

Pankreatin tarkibiga kiruvchi fermentlar (lipaza, alfa-amilaza, tripsin, ximotripsin) oqsillarning aminokislotalargacha, yog‘larning glitserin va yog‘ kislotalarigacha, kraxmalning dekstrin va monosaxaridlargacha parchalanishiga yordam beradi.

Oshqozon-ichak tizimining funksional holatini yaxshilaydi, ovqat hazm qilish jarayonlarini me’yorlashtiradi.

Tripsin oshqozon osti bezining stimulyatsiyalangan sekretsiyasini ingibirlab, analgetik ta’sir ko‘rsatadi.

Pankreatik fermentlar dori shaklidan ingichka ichakning ishqoriy muhitida ajralib chiqadi, chunki ular oshqozon shirasi ta’siridan qobiq bilan himoyalangan.

Maksimal fermentativ faollik peroral qabul qilingandan 30-45 daqiqa o‘tgach qayd etiladi.

Qo‘llanilishi

Oshqozon osti bezining tashqi sekretor yetishmovchiligida o‘rinbosar terapiya: surunkali pankreatit, pankreatektomiya, nurlanishdan keyingi holat, dispepsiya, Remxeld sindromi (gastrokardial sindrom), mukovissidoz; meteorizm, noinfeksion genezli diareya.

Ovqat hazm bo‘lishining buzilishi (oshqozon va ingichka ichak rezeksiyasidan keyingi holat); ovqatlanishdagi xatoliklar (yog‘li ovqat iste’mol qilish, ko‘p miqdorda ovqat iste’mol qilish, nomuntazam ovqatlanish) va chaynash funksiyasining buzilishi, kam harakatli hayot tarzi, uzoq muddatli immobilizatsiya holatida oshqozon-ichak trakti funksiyasi normal bo‘lgan shaxslarda ovqat hazm bo‘lishini yaxshilash uchun.

Qorin bo‘shlig‘i a’zolarini rentgenologik tekshirish va UTTga tayyorlash.

Qo‘llash usuli va dozalari

Ichkariga. Preparat ovqat vaqtida yoki ovqatdan keyin chaynamay, ishqoriy bo‘lmagan suyuqlik (suv, meva sharbatlari) bilan ichiladi.

Doza ovqat hazm qilishning buzilish darajasiga qarab individual belgilanadi. Kattalar odatda kuniga 3 marta 1-2 tabletkadan qabul qilishadi.

Bolalarda preparat shifokor ko‘rsatmasi bo‘yicha qo‘llaniladi.

Davolash davomiyligi bir necha kundan (parhezdagi xatoliklar tufayli ovqat hazm qilish jarayoni buzilganda) bir necha oy yoki yilgacha (doimiy o‘rinbosar terapiya zarur bo‘lganda) bo‘lishi mumkin.

Nojo‘ya ta’sirlari

Allergik reaksiyalar. Ayrim hollarda - diareya, qabziyat, oshqozon sohasida noqulaylik hissi, ko‘ngil aynishi (bu reaksiyalar rivojlanishining pankreatin ta’siri bilan sababiy bog‘liqligi aniqlanmagan, chunki ko‘rsatilgan hodisalar oshqozon osti bezining tashqi sekretor yetishmovchiligi alomatlariga kiradi). Uzoq vaqt davomida yuqori dozalarda qo‘llanganda giperurikozuriya rivojlanishi, qon plazmasida siydik kislotasi miqdorining oshishi mumkin. Mukovissidozda pankreatinning zarur dozasi oshib ketgan taqdirda, ko‘tariluvchi chambar ichakning ileotsekal qismida strikturalar (fibroz kolonopatiya) rivojlanishi mumkin.

Bolalarda pankreatin yuqori dozalarda qo‘llanilganda perianal ta’sirlanish va og‘iz bo‘shlig‘i shilliq qavatining ta’sirlanishi yuzaga kelishi mumkin.

Qarshi ko‘rsatmalar

Preparat komponentlariga yuqori sezuvchanlik, o‘tkir pankreatit, surunkali pankreatitning kuchayishi.

Boshqa dori vositalari bilan o‘zaro ta’siri

Pankreatin temir preparatlari bilan bir vaqtda qo‘llanganda, ularning so‘rilishi pasayishi mumkin. Tarkibida kalsiy karbonat va/yoki magniy gidroksid bo‘lgan antatsid vositalarni bir vaqtning o‘zida qo‘llash pankreatin samaradorligining pasayishiga olib kelishi mumkin.

Maxsus ko‘rsatmalar

Homiladorlikda pankreatinni qo‘llashning xavfsizligi yetarli darajada o‘rganilmagan. Ona uchun kutilayotgan foyda homila uchun potensial xavfdan yuqori bo‘lgan hollarda qo‘llash mumkin.

Mukovissidozda strikturalar (fibroz kolonopatiya) rivojlanish xavfi ortishi oqibatida pankreatinni yuqori dozalarda qo‘llash tavsiya etilmaydi. Doza iste’mol qilinadigan ovqatning sifati va miqdorini hisobga olgan holda yog‘larning so‘rilishi uchun zarur bo‘lgan fermentlar miqdoriga mos kelishi kerak.

Uzoq muddat qo‘llanganda bir vaqtning o‘zida temir preparatlari buyuriladi.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin qo‘llamaslik lozim.

Dozani oshirib yuborish

Belgilari: giperurikozuriya, giperurikemiya. Bolalarda qabziyat.

Davolash: preparatni bekor qilish, simptomatik terapiya.

Chiqarish shakli

Ichakda eriydigan qobiq bilan qoplangan 10 tadan tabletka. Karton qutida 2, 3, 10 ta strip, qo‘llash bo‘yicha yo‘riqnoma bilan birga.

Saqlash shartlari

Harorat +2 °C dan +25 °C gacha bo‘lganda, quruq joyda.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

"Shreya Layf Sayensiz Pvt. Ltd.," Hindiston.

Shreya House, 301/A, Pereira Hill Road, Anderi (Tarix), Mumbay - 400 099.