Гепариновая Мазь

Tarkib

100 g surtma tarkibida quyidagilar mavjud:

ta’sir etuvchi moddalar: benzilnikotinat - 0,08 g, benzokain (anestezin) - 4,0 g, natriy geparin - 0,0833 g (10000 XB);

yordamchi moddalar: glitserol (distillangan glitserin) - 15,0 g, vazelin - 6,0 g, stearin (stearin kislotasi) - 5,0 g, makkajo‘xori moyi - 5,0 g, 1-sonli emulgator metilparagidroksibenzoat - 0,148 g, propilparagidroksibenzoat - 0,048 g, tozalangan suv - 100,0 g gacha.

Tavsif

Oq rangli, sarg‘ish tusli bir xil maz.

Chiqarish shakli

Sirtga qo‘llash uchun surtma.

Farmakoterapevtik guruh

Mahalliy qo‘llash uchun to‘g‘ridan-to‘g‘ri ta’sir etuvchi antikoagulyant vosita + boshqa preparatlar. Geparin boshqa preparatlar bilan kombinatsiyada. ATX kodi: C05BA53.

Farmakologik xususiyatlari

Farmakodinamika

Ta’siri tarkibiga kiruvchi komponentlarning xususiyatlariga bog‘liq bo‘lgan, tashqi qo‘llash uchun mo‘ljallangan kombinatsiyalangan preparat. Bevosita ta’sir etuvchi antikoagulyant. Surtmadan asta-sekin ajralib chiqadigan geparin natriy yallig‘lanish jarayonini kamaytiradi va antitrombotik ta’sir ko‘rsatadi. Mavjud tromblarning so‘rilishiga yordam beradi va yangi tromblar hosil bo‘lishiga to‘sqinlik qiladi. Trombin sintezini bloklaydi, trombotsitlar agregatsiyasini kamaytiradi. Gialuronidaza faolligini susaytiradi, qonning fibrinolitik xususiyatlarini faollashtiradi.

Benzilnikotinat tomirlarni kengaytiruvchi, spazmolitik ta’sir ko‘rsatadi. Tomirlar va ichki a’zolar silliq mushaklarining qisqarish faolligini bevosita kamaytiradi. Benzilnikotinat yuza tomirlarni kengaytirib, geparinning so‘rilishiga yordam beradi.

Mahalliy anestetik benzokain (anestezin) hujayra membranasining natriy ionlari uchun o‘tkazuvchanligini kamaytirib, nerv impulslari o‘tishini bloklaydi. Sezuvchi nerv oxirlarida og‘riq impulslarining paydo bo‘lishiga va ularning nerv tolalari bo‘ylab o‘tishiga to‘sqinlik qiladi, og‘riq sezgisining ifodalanganligini kamaytiradi. Teriga surtilganda mahalliy og‘riq qoldiruvchi ta’sir ko‘rsatadi.

Farmakokinetika

Mahalliy qo‘llanganda tizimli qon aylanishiga geparin natriyning faqat ozgina miqdori so‘riladi, u asosan buyraklar orqali chiqariladi.

Ta’sir etuvchi moddalar - benzilnikotinat va benzokain (anestezin) ning mahalliy qo‘llashdagi farmakokinetikasi o‘rganilmagan.

Ko‘rsatmalar

Yuzaki venalar tromboflebitlari; yumshoq to‘qimalarning chegaralangan infiltratlari va shishlari; pay va bo‘g‘imlarning jarohatlari, yumshoq to‘qimalar va bo‘g‘imlarning lat yeyishi.

Qarshi ko‘rsatmalar

Preparat komponentlariga yuqori sezuvchanlik, bolalik yoshi, tromboflebitda yarali-nekrotik jarayonlar, qon ivishining pasayishi, trombotsitopeniya, teri qoplamlari butunligining buzilishi (qon ketishining kuchayishi ehtimoli tufayli).

Geparin natriy gemorragik diatezda, leykozlarda, kamqonlikda, qon tomirlari o‘tkazuvchanligining oshishida, poliplarda, xavfli o‘smalarda va oshqozon-ichak traktining yarali shikastlanishlarida, jigar va buyraklar faoliyatining og‘ir buzilishlarida, miya va umurtqa pog‘onasida o‘tkaziladigan operatsiyalarda qo‘llanilishi mumkin emas.

Benzilnikotinat paroksizmal taxikardiyada qo‘llash mumkin emas.

Ushbu preparatga yuqori sezuvchanlikda benzokain (anestezin) qo‘llash mumkin emas.

Ehtiyotkorlik bilan

Geparinni oshqozon-ichak traktining yarali va o‘smali shikastlanishlarida, kaxeksiyada, yuqori arterial bosimda, tug‘ruqdan keyingi va operatsiyadan keyingi yaqin davrda (birinchi 3-8 kun davomida) qo‘llashda ehtiyotkorlik talab etiladi.

Benzilnikotinatni qo‘llashdagi cheklov siydik oqimining buzilishi bilan prostata bezining adenomasi hisoblanadi.

Benzokainni (anestezinni) qo‘llashga cheklovlar quyidagilardir: ko‘krak suti bilan emizish (to‘xtatish kerak), go‘daklik davri (1 yoshgacha).

Qo‘llash usuli va dozalari

Tashqarida. Surtma jarohatlangan sohaga yupqa qavat qilib surtiladi va yallig‘lanish holatlari yo‘qolguncha kuniga 2-3 marta, o‘rtacha 3 kundan 14 kungacha teriga massaj qilmasdan, ehtiyotkorlik bilan surtiladi. Preparatning maksimal sutkalik dozasi - 25,0 g. Uzoqroq davolash kursini o‘tkazish imkoniyati shifokor tomonidan belgilanadi.

Tashqi gemorroidal tugunlar trombozida malham shimdirilgan rektal tamponlar qo‘llaniladi, ular orqa teshikka kiritiladi. Yoki surtma bevosita tromblangan tugunlarga qo‘yiladigan surp yoki polotno qistirmaga surtiladi va fiksatsiya qilinadi. Malhamni har kuni, alomatlar yo‘qolguncha, o‘rtacha 3 kundan 14 kungacha qo‘llash kerak.

Boldirning trofik yaralarida malham faqat teri qoplamining butunligi buzilmagan atrofdagi teri sohalariga surtiladi.

Nojo‘ya ta’sirlari

Allergik reaksiyalar - teri toshmasi, angionevrotik shish kuzatilishi mumkin. Bunday simptomlar paydo bo‘lganda preparatni qo‘llash to‘xtatiladi va desensibilizatsiyalovchi preparatlar buyuriladi.

Geparinni qo‘llashda gemorragiyalar rivojlanishi mumkinligini hisobga olish kerak. Gemorragiyalar bilan bir qatorda geparinni qo‘llash trombotsitopeniya, osteoporoz, alopetsiya va gipoaldosteronizm rivojlanishiga olib kelishi mumkin.

Benzilnikotinat qo‘llanganda jigar transaminazalari faolligining o‘tib ketuvchi oshishi, taxikardiya, leykopeniya, ba’zan buyraklar funksiyasining buzilishi mumkin.

Benzokain (anestezin) qo‘llanganda ba’zan kontakt dermatit bo‘lishi mumkin; qo‘llangan joyda sezuvchanlikning pasayishi; kamdan-kam hollarda, haddan tashqari ko‘p qo‘llanganda - metgemoglobinemiya (ayniqsa chaqaloqlar va yosh bolalarda).

Dozani oshirib yuborish

Preparat terapevtik dozalarda asosan mahalliy ta’sirga ega bo‘lganligi sababli, dozani oshirib yuborish ehtimoli kam. Uzoq vaqt qo‘llanganda va katta yuzalarda gemorragik asoratlar kuzatilishi mumkin (geparin). Bunday hollarda preparatni qo‘llash to‘xtatiladi va simptomatik terapiya buyuriladi.

Tarkibiga kiruvchi komponentlarni mahalliy qo‘llashda ularning dozasini oshirib yuborish alomatlari o‘rganilmagan.

O‘zaro aloqa

Geparinning ta’sirini antikoagulyatsion preparatlar, atsetilsalitsil kislotasi va boshqa nosteroid yallig‘lanishga qarshi vositalar kuchaytiradi (qon ketish xavfi ortadi), yurak glikozidlari (angishvonagul preparatlari), tetratsiklinlar, N1-gistamin retseptorlari blokatorlari, nikotin kislotasi, etakrin kislotasi susaytiradi.

Benzilnikotinat simpatomimetiklar fonida taxiaritmiyalarning paydo bo‘lish ehtimolini va kaliy chiqaruvchi preparatlar ta’sirida yurak faoliyatining susayish xavfini oshiradi.

Xolinesteraza ingibitorlari benzokain (anestezin) metabolizmini tormozlaydi.

Maxsus ko‘rsatmalar

Malhamni ochiq jarohatlarga, shilliq qavatlarga, terida yiringli jarayonlar mavjud bo‘lganda surtmaslik kerak. Chuqur vena trombozida preparatni qo‘llash tavsiya etilmaydi.

Geparin uzoq vaqt qo‘llanganda qonning ivish vaqtini nazorat qilish zarur.

Benzilnikotinat uzoq vaqt qo‘llanganda jigar funksiyasi va umumiy qon tahlilini nazorat qilish zarur.

Benzokain (anestezin) uzoq muddat qo‘llanganda qonning umumiy tahlili (gemoglobin) nazorat qilinishi zarur.

Homiladorlik va laktatsiya

Preparatni homiladorlik davrida va emizish davrida faqat qat’iy ko‘rsatmalar bo‘yicha, sinchkov tibbiy nazorat ostida qo‘llash mumkin.

Geparin natriy va benzilnikotinat ta’siri natijasida qon ketishi kuchayishi mumkinligi sababli, preparat tug‘ruqdan keyingi yaqin davrda (birinchi 3-8 kun davomida) tayinlanmaydi.

Agar bu davrda preparatni qo‘llash zarur bo‘lsa, emizishni to‘xtatish lozim (tarkibida benzokain (anestezin) borligi sababli).

Transport vositalari va mexanizmlarini boshqarish qobiliyatiga ta’siri

Preparat transport vositalarini boshqarish va diqqatning yuqori konsentratsiyasini va psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanish qobiliyatiga ta’sir qilmaydi.

Qadoq

Ichki tomoni bushonli himoya laklari bilan qoplangan alyuminiy tubalarda yoki bushonli kombinatsiyalangan materialdan yasalgan tubalarda 10 g yoki 25 g dan.

Har bir tuba dori vositasini tibbiyotda qo‘llash bo‘yicha yo‘riqnoma bilan birga karton qutiga joylashtirilgan.

Saqlash shartlari

Yorug‘likdan himoyalangan joyda, 8 oS dan 25 oS gacha bo‘lgan haroratda.

Bolalar qo‘li yetmaydigan joyda saqlang.

Yaroqlilik muddati

3 yil. Yaroqlilik muddati tugagandan keyin qo‘llanilmaydi.

Dorixonalardan berish shartlari

Retseptsiz

Ro‘yxatdan o‘tish guvohnomasi egasi

YASHIL DUBRAVA YoAJ Rossiya

Ishlab chiqaruvchi

YASHIL DUBRAVA YoAJ Rossiya