Ibufen D

Tarkib

5 ml suspenziya quyidagilarni o‘z ichiga oladi:

Faol moddasi: ibuprofen 100 mg.

Yordamchi moddalar: makrogol glitserolgidroksistearat, ksantan yelimi, glitserol, natriy benzoat, limon kislotasi monogidrat, natriy fosfat digidrat yoki natriy fosfat dodekagidrat, natriy saxarinat, maltitol, apelsin xushbo‘ylantirgichi, tozalangan suv.

Tavsif

Oq yoki deyarli oq rangli, apelsin hidli suspenziya.

Dori shakli

Ichish uchun suspenziya 100 mg / 5 ml.

Farmakoterapevtik guruh

Nosteroid yallig‘lanishga qarshi vosita (NYAQV). ATX kodi: M1AE01.

Farmakologik xususiyatlari

Ibuprofen propion kislotasining hosilasi bo‘lib, isitma tushiruvchi, og‘riq qoldiruvchi va yallig‘lanishga qarshi ta’sir ko‘rsatadi.

Ibuprofenning ta’sir mexanizmi, birinchi navbatda, araxidon kislotasining prostaglandinlar, prostatsiklin va tromboksanga aylanishini tartibga soluvchi ferment - siklooksigenaza (SOG) faolligini pasaytirish orqali prostaglandinlar biosintezini bostirish bilan bog‘liq. Bunda araxidon kislotasi metabolizmining siklooksigenaza yo‘li qaytmas tormozlanishi natijasida prostaglandinlar hosil bo‘lishi kamayadi. Yallig‘lanish joyida prostaglandinlar konsentratsiyasining pasayishi bradikinin, endogen pirogenlar, boshqa biologik faol moddalar, kislorod radikallari va NO hosil bo‘lishining kamayishi bilan kechadi. Bularning barchasi yallig‘lanish jarayoni faolligining pasayishiga olib keladi (ubuprofenning yallig‘lanishga qarshi ta’siri) va og‘riq retsepsiyasining kamayishi bilan kechadi (og‘riq qoldiruvchi ta’sir). Orqa miya suyuqligida prostaglandinlar konsentratsiyasining kamayishi tana haroratining me’yorlashuviga olib keladi (antipiretik ta’sir). Haroratni pasaytirish ta’siri qabul qilingandan 30 daqiqa o‘tgach boshlanadi, uning maksimal ta’siri 3 soatdan keyin namoyon bo‘ladi.

Farmakokinetika

Ovqat qabul qilish ibuprofenning so‘rilishini sekinlashtiradi, ammo uning biologik samaradorligini kamaytirmaydi. Ibuprofen bolalar tomonidan suspenziya ko‘rinishida 10 mg/kg dozada qabul qilinganda, uning qondagi maksimal konsentratsiyasi 55 mkg/ml ni tashkil etadi. Ibuprofen ovqat bilan qabul qilinganda sekinroq so‘riladi: (tmax) och qoringa qabul qilinganga qaraganda 30-60 daqiqa uzoqroq va 1,5-3 soatni tashkil etadi.

Ibuprofen qon plazmasi oqsillari bilan 99% dan ko‘proq bog‘lanadi. Dori vositasini bog‘lovchi asosiy oqsillar albuminlardir. Ibuprofenning taqsimlanish hajmi kattalarda tana vazniga nisbatan taxminan 0,12 l/kg ni tashkil etadi, ammo tana harorati yuqori bo‘lgan 11 yoshgacha bo‘lgan bolalarda bu ko‘rsatkich yuqori bo‘lib, tana vazniga nisbatan taxminan 0,2 l/kg ni tashkil etadi.

Dori vositasi asosan jigarda biotransformatsiyalanadi. Qabul qilingan dozaning 70-90% siydik bilan metabolitlar va ularning glyukuron kislotasi bilan konyugatsiya mahsulotlari shaklida chiqariladi.

Dozaning qolgan qismi axlat bilan o‘zgarmagan holda va metabolitlar shaklida chiqariladi. Dori vositasi organizmda to‘planmaydi.

Qo‘llanilishi

Ibufen® D - suspenziyasi isitma tushiruvchi, og‘riq qoldiruvchi, yallig‘lanishga qarshi ta’sir ko‘rsatadi. Tana haroratining ko‘tarilishi, og‘riq va shish kabi alomatlarning namoyon bo‘lishini ular paydo bo‘lgan joyga ta’sir ko‘rsatish orqali kamaytiradi. Preparat tarkibida shakar yo‘q, shuning uchun diabet bilan og‘rigan shaxslarda qo‘llanilishi mumkin.

Ibufen® D emizikli chaqaloqlar va bolalarda quyidagi hollarda qo‘llash uchun mo‘ljallangan:

Quyidagi holatlarda turli sabablarga ko‘ra tana haroratining ko‘tarilishi:

shamollash kasalliklari;

o‘tkir respirator virusli infeksiyalarda;

gripp;

angina (faringit);

tana harorati ko‘tarilishi bilan kechadigan bolalar infeksiyalarida;

emlashdan keyingi reaksiyalarda.

Quyidagi holatlarda kelib chiqishi turlicha bo‘lgan kuchsiz va o‘rtacha intensivlikdagi og‘riq sindromi:

o‘rta quloq yallig‘langanda quloq og‘rig‘i;

tish og‘rig‘i, tishlarning og‘riqli chiqishi;

bosh og‘rig‘i, migren;

mushaklar va bo‘g‘imlardagi og‘riqlar;

tayanch-harakat apparati jarohatlari.

Qo‘llash usuli va dozalari

Ichish uchun.

5 ml suspenziya 100 mg ibuprofen saqlaydi.

Ishlatishdan oldin bir xil suspenziya hosil bo‘lguncha chayqatiladi.

Dori preparati ovqatdan keyin, ko‘p miqdorda suyuqlik bilan ichiladi.

Suspenziyani aniq dozalash uchun flakonga 1,25 ml, 2,5 ml, 5 ml li qoshiq-dozator yoki 5 ml li shpris-dozator qo‘shib beriladi.

Doza bolaning yoshi va tana vazniga qarab belgilanadi.

Ibufen® D preparatining bir martalik dozasi bolaning tana vazniga nisbatan 5-10 mg/kg ni sutkasiga 3-4 marta tashkil etadi. Suspenziyaning maksimal sutkalik dozasi tana vazniga nisbatan 20-30 mg/kg ni tashkil etadi. Preparat quyidagi sxema bo‘yicha bir martalik dozalarda buyuriladi:

Emizikli bolalar 3 oydan 6 oygacha (5-7,6 kg): 3 mahal 2,5 ml dan sutka davomida (bu 150 mg ibuprofen/sutkaga to‘g‘ri keladi).

6 oylikdan 12 oylikkacha bo‘lgan emizikli bolalar (7,7-9 kg): sutkasiga 2,5 ml dan 3 martadan 4 martagacha (bu 150-200 mg ibuprofen/sutkaga to‘g‘ri keladi).

1 yoshdan 3 yoshgacha bo‘lgan bolalar (10-15 kg): 3 mahal 5 ml dan sutka davomida (bu 300 mg ibuprofen/sutkaga to‘g‘ri keladi).

4 yoshdan 6 yoshgacha bo‘lgan bolalar (16-20 kg): 3 mahal 7,5 ml dan sutka davomida (bu 450 mg ibuprofen/sutkaga to‘g‘ri keladi).

7 yoshdan 9 yoshgacha bo‘lgan bolalar (21-29 kg): sutkada 3 marta 10 ml dan (bu 600 mg ibuprofen/sutkaga to‘g‘ri keladi).

10 yoshdan 12 yoshgacha bo‘lgan bolalar (30-40 kg): 3 mahal 15 ml dan sutka davomida (bu 900 mg ibuprofen/sutkaga to‘g‘ri keladi).

Dozani har 6-8 soatda takrorlash mumkin, bunda navbatdagi dozalar orasidagi vaqt kamida 4 soat bo‘lishi kerak.

6 oygacha bo‘lgan bolalarga shifokor bilan maslahatlashgan holda, uning tavsiyalariga muvofiq dori vositasini qo‘llash mumkin. Tavsiya etilgan dozadan oshirmaslik kerak.

Agar isitma 3 kundan ortiq davom etsa, shifokor bilan maslahatlashish kerak.

Shpris shaklidagi dozatorni qo‘llash bo‘yicha yo‘riqnoma

Flakonning qopqog‘ini burab oching (pastga bosgan holda bosing va soat miliga qarshi burang).

Dozatorni flakon og‘zining teshigiga qattiq bosing.

Flakon ichidagisi qattiq chayqatiladi.

Dozatorni to‘ldirish uchun flakonni to‘nkarish, so‘ngra dozator porshenini ehtiyotkorlik bilan pastga siljitish, ichidagini shkalada kerakli belgiga yetguncha quyish kerak.

Flakonni dastlabki holatiga ag‘darish va undan dozatorni ehtiyotkorlik bilan burab chiqarib olish.

Dozator uchi bolaning og‘iz bo‘shlig‘iga joylashtiriladi, so‘ngra porshenni sekin bosib, dozator ichidagi modda yuboriladi.

Qo‘llagandan so‘ng flakonni qopqog‘ini burab berkitish, dozatorni esa suv bilan yuvib, quritish lozim.

Nojo‘ya ta’sirlari

Odatda preparat yaxshi o‘zlashtiriladi, biroq uni qo‘llash ba’zi shaxslarda ovqat hazm qilish trakti tomonidan nojo‘ya ta’sirlarni keltirib chiqarishi mumkin, masalan, oshqozonda noqulaylik hissi.

Kam uchraydigan nojo‘ya ta’sirlarga quyidagilar kiradi:

o‘ziga xos bo‘lmagan allergik va anafilaktik reaksiyalar;

nafas olish a’zolari tomonidan bronxospazm yoki bo‘g‘ilish, astmaning kuchayishi bilan namoyon bo‘ladigan reaksiyalar;

toshmalar, qichishish, eshakemi, purpura, vazomotor shish ko‘rinishidagi teri reaksiyalari, juda kam hollarda bullyoz dermatoz;

trombotsitopeniya;

oshqozon-ichak yo‘lining eroziv-yarali shikastlanishlari.

Barcha nojo‘ya (g‘ayritabiiy) ta’sirlar, shu jumladan varaqa-qo‘shimcha varaqda ko‘rsatilmagan ta’sirlar paydo bo‘lishi haqida davolovchi shifokorga xabar berish zarur.

Qarshi ko‘rsatmalar

Ibufen® D preparatini quyidagi hollarda qo‘llash mumkin emas:

preparatning biron-bir komponentiga, shuningdek yallig‘lanishga qarshi boshqa nosteroid dori vositalariga nisbatan individual yuqori sezuvchanlik;

atsetilsalitsil kislotasi yoki boshqa nosteroid yallig‘lanishga qarshi preparatlarni qo‘llashdan keyin burun oqishi, teri toshmalari yoki bronxospastik reaksiyalar ko‘rinishidagi allergiya belgilarining ilgari namoyon bo‘lishi;

me’da va o‘n ikki barmoqli ichak yara kasalligining qo‘zg‘alish bosqichida;

jigar, buyraklar faoliyatining yaqqol yetishmovchiligi;

qon kasalliklari: gemofiliya, gipokoagulyatsiya, gemorragik diatez;

homiladorlikning III trimestrida.

Dorilarning o‘zaro ta’siri

Ibuprofenni (xuddi nosteroid yallig‘lanishga qarshi dorilar guruhiga kiruvchi boshqa dori vositalari kabi) quyidagi dori vositalari bilan bir vaqtda qo‘llash mumkin emas:

atsetilsalitsil kislotasi yoki boshqa nosteroid yallig‘lanishga qarshi preparatlar bilan - oshqozon-ichak trakti tomonidan nojo‘ya ta’sirlar paydo bo‘lish xavfi ortadi;

antigipertenziv dori vositalari va diuretiklar - nosteroid yallig‘lanishga qarshi preparatlar guruhiga kiruvchi dori vositalari ushbu vositalarning ta’sir samaradorligini pasaytirishi mumkin;

antikoagulyantlar bilan - kam sonli klinik ma’lumotlar shuni ko‘rsatadiki, nosteroid yallig‘lanishga qarshi preparatlar qon ivishini pasaytiruvchi dori vositalarining ta’sirini kuchaytirishi mumkin;

litiy va metotreksat bilan - nosteroid yallig‘lanishga qarshi dorilar ham litiy, ham metotreksatning plazmadagi konsentratsiyasini oshirishi mumkinligi isbotlangan;

zidovudin bilan - ibuprofen va zidovudinni bir vaqtning o‘zida qabul qilgan bemorlarda qon ketish vaqtining uzayishi haqida dalillar mavjud.

Maxsus ko‘rsatmalar

Ibufen® D preparatini qabul qilishdan oldin, agar ilgari quyidagilar tasdiqlangan bo‘lsa, shifokor bilan maslahatlashish lozim:

bronxial astma, eshakemi;

jigar va buyrak kasalliklari;

anamnezida oshqozon va o‘n ikki barmoqli ichak yara kasalligi.

Preparat tarkibida bo‘yoqlar mavjud emas va bo‘yoqlarga allergik reaksiyalarga moyil bolalarda tavsiya etilgan dozalarda qo‘llanilishi mumkin.

Homiladorlik va laktatsiya davri

Homiladorlikning dastlabki 6 oyida ibuprofenni qo‘llashga faqat shifokor ko‘rsatmasi bilan ruxsat etiladi. Homiladorlikning oxirgi uch oyligida ibuprofenni qo‘llash mumkin emas.

Ibuprofen oz miqdorda ko‘krak suti bilan ajralishi mumkin. Ko‘krak suti bilan emizilgan bolalarda nojo‘ya ta’sir holatlari ma’lum emas, shuning uchun ko‘krak suti bilan emizishni bekor qilishning hojati yo‘q.

Mexanik transport vositalarini boshqarish va mexanik uskunalarga xizmat ko‘rsatish qobiliyatiga ta’siri.

Ibufen® D preparatini qabul qilish paytida transportni boshqarish va mexanizmlarga xizmat ko‘rsatishga qarshi ko‘rsatmalar haqida ma’lumot yo‘q.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Dori vositasining tavsiya etilganidan yuqori dozasi qabul qilingan taqdirda, darhol shifokor yoki farmatsevtga murojaat qilish lozim.

Ibuprofen dozasini oshirib yuborish belgilari: qorin og‘rig‘i, ko‘ngil aynishi, qusish, bosh og‘rig‘i va bosh aylanishi. Ibuprofenning yuqori dozalari, odatda, bir vaqtning o‘zida boshqa dori vositalari qo‘llanilmaganda yaxshi o‘zlashtiriladi.

Doza oshirib yuborilganda ko‘riladigan choralar:

Maxsus antidot mavjud emas va qo‘llab-quvvatlovchi terapiya, oshqozonni yuvish va zarur bo‘lsa, elektrolitik buzilishlarni tuzatish qo‘llaniladi.

Chiqarish shakli

Kafolat halqasi va 1,25 ml, 2,5 ml, 5 ml li qoshiq-dozatorli burama qopqoqli 120 ml li shisha flakonlar yoki kafolat halqasi va 5 ml li shpris-dozatorli burama qopqoqli 120 ml li plastik flakonlar. Har bir flakon qo‘llash bo‘yicha yo‘riqnoma bilan birga alohida karton qutilarga joylashtiriladi.

Saqlash shartlari

Asl qadoqda 15 °C dan 25 °C gacha bo‘lgan haroratda saqlansin.

Yaroqlilik muddati

3 yil.

Flakonni birinchi marta ochgandan so‘ng, preparatni 6 oy davomida ishlatish kerak.

Dorixonalardan berish shartlari

Retseptsiz.

Ishlab chiqaruvchining nomi va manzili

Medana Farma A. O.

98-200 Seradz, V. Loketka ko‘chasi 10, Polsha.