Vitrum Kaltsiy + D3 Vitamini

Tarkib

Plyonkali qobiq bilan qoplangan 1 ta tabletka quyidagilarni o‘z ichiga oladi:

Faol ta’sir etuvchi moddalar: ustritsa chig‘anog‘idan olingan kalsiy karbonat kalsiyga nisbatan 500 mg, kolekalsiferol (D3 vitamini) 200 ME1

1) 5 mkg kolekalsiferolga ekvivalent.

Kolekalsiferol granulatida quyidagilar mavjud: kolekalsiferol (D3 vitamini), dl-alfa tokoferol, gidrogenlangan soya moyi, jelatina gidrolizati, sukraloza, makkajo‘xori kraxmali.

Yordamchi moddalar: mikrokristall sellyuloza 26,36 mg, kolloid kremniy dioksidi 28,1 mg, magniy stearati 15,5 mg, natriy krosskarmelloza 19 mg.

Qobiq: gipromelloza 16 mg, triatsetin 0,004 mg, titan dioksidi 9 mg, riboflavin 0,09 mg, ko‘k brilliant bo‘yog‘i (E133) 0,01 mg.

Tavsif

Oval shaklidagi tabletkalar och yashil rangli pardali qobiq bilan qoplangan.

Chiqarish shakli

Plyonkali qobiq bilan qoplangan tabletkalar, 500 mg + 200 XB.

Farmakoterapevtik guruh

Kalsiy-fosfor almashinuvi regulyatori. Kalsiy preparatlari boshqa preparatlar bilan kombinatsiyada. ATX kodi: A12AX.

Farmakologik xususiyatlari

Farmakodinamika

Organizmda kalsiy va fosfor almashinuvini tartibga soluvchi kombinatsiyalangan preparat. Rezorbsiyani (suyaklardan kalsiyning yuvilishini) kamaytiradi va suyak to‘qimasining zichligini oshiradi, organizmda kalsiy va kolekalsiferol yetishmovchiligini to‘ldiradi. Kolekalsiferol oshqozon-ichak traktida kalsiyning so‘rilishini va uning suyak to‘qimasida bog‘lanishini oshiradi.

Kalsiy va kolekalsiferolni qo‘llash paratireoid gormon (PTG) ishlab chiqarilishining ko‘payishiga to‘sqinlik qiladi, bu gormon suyak rezorbsiyasining kuchayishi (suyaklardan kalsiyning yuvilishi) stimulyatori hisoblanadi.

Farmakokinetika

Kolekalsiferolning so‘rilishi tez (ingichka ichakning distal qismida), limfa tizimiga o‘tadi, jigar va umumiy qon oqimiga o‘tadi. Qonda alfa2-globulinlar va qisman albuminlar bilan bog‘lanadi. Jigar, suyak, skelet mushaklari, buyrak, buyrak usti bezi, miokard, yog‘ to‘qimasida to‘planadi. To‘qimalarda maksimal konsentratsiyaga erishish vaqti (TSmax) 4-5 soatni tashkil etadi, so‘ngra kolekalsiferol konsentratsiyasi biroz pasayadi va uzoq vaqt davomida o‘zgarmas darajada saqlanib qoladi. Qutbli metabolitlar shaklida asosan hujayra membranalari va mikrosomalarda, mitoxondriyalar va hujayra yadrolarida joylashadi. Yo‘ldosh to‘sig‘i orqali o‘tadi, ko‘krak sutiga o‘tadi. Jigarda depolanadi. Jigar va buyraklarda metabolizmga uchraydi: jigarda nofaol metabolit kalsifediolga (25-digidroxolekalsiferol), buyraklarda esa kalsifedioldan faol metabolit kalsitriolga (1,25-digidroksixolekalsiferol) va nofaol metabolit 24, 25-digidroksixolekalsiferolga aylanadi. Ichak-jigar retsirkulyatsiyasiga uchraydi. Kolekalsiferol va uning metabolitlari o‘t orqali, oz miqdorda buyraklar orqali chiqariladi. Kumulyatsiya qiladi.

Og‘iz orqali yuborilgan kalsiyning taxminan 1/5-1/3 qismi ingichka ichakning proksimal qismida so‘riladi; bu jarayon kolekalsiferolning mavjudligi, pH, parhez xususiyatlari va kalsiy ionlarini (Sa2+) bog‘lay oladigan omillarning mavjudligiga bog‘liq. Kalsiyning so‘rilishi uning yetishmovchiligi va kalsiy ionlari (Sa2+) miqdori kamaytirilgan parhez qo‘llanilganda ortadi. Plazmada taxminan 45% oqsillar bilan kompleksda bo‘ladi. 20% ga yaqini buyraklar orqali chiqariladi, qolgan miqdori (80%) ichak tarkibi bilan chiqariladi.

Ko‘rsatmalar

Davolash-profilaktika vositasi sifatida qo‘llaniladi:

- o‘smirlik va o‘spirinlik davrida jadal o‘sish davrida, homilador va emizikli ayollarda kalsiy va/yoki kolekalsiferol (D3 vitamini) tanqisligini to‘ldirish uchun;

- osteoporoz (menopauza, qarilik, steroid, idiopatik va boshqalar) va uning asoratlari (suyak sinishlari) ning oldini olish va kompleks davolash uchun;

- keksa yoshdagi odamlarda kalsiy va kolekalsiferol yetishmovchiligini to‘ldirish uchun.

Qarshi ko‘rsatmalar

- Preparat komponentlaridan biriga yuqori sezuvchanlik;

- D vitamini gipervitaminozi;

- buyrak faoliyatining yaqqol buzilishlari;

- giperkalsiyemiya (qondagi kalsiy miqdorining oshishi - qalqonsimon bez oldi bezlari faoliyati kuchaygan shaxslarda);

- giperkalsiuriya (siydik bilan kalsiy ajralishining ko‘payishi);

- siydik-tosh kasalligi (kalsiy toshlari hosil bo‘lishi);

- dekalsinatsiyalanuvchi o‘smalar (miyeloma, suyak metastazlari);

- sarkoidoz;

- immobilizatsiya tufayli kelib chiqqan osteoporoz;

- o‘pka sili (faol shakli);

- 12 yoshgacha bo‘lgan bolalar yoshi.

Qo‘llash usuli va dozalari

Qo‘llashdan oldin shifokor bilan maslahatlashing.

Ichkariga.

Davolash-profilaktika vositasi sifatida kalsiy va/yoki kolekalsiferol yetishmovchiligini to‘ldirish uchun kuniga 1-2 tabletkadan; osteoporoz va uning asoratlarini profilaktika qilish va kompleks davolash uchun kuniga 2 tabletkadan, bittasi ertalab va bittasi kechqurun, asosan ovqatlanish vaqtida.

Shifokor tavsiyasiga muvofiq davolash kursi.

Kalsiy so‘rilishini oshirish uchun tabletkani nordon ichimlik (apelsin yoki limon sharbati) bilan ichgan ma’qul.

Nojo‘ya ta’sirlari

Preparat komponentlariga nisbatan yuzaga kelishi mumkin bo‘lgan allergik reaksiyalar.

Oshqozon-ichak tizimi disfunksiyasi (qabziyat, ich ketishi, meteorizm, ko‘ngil aynishi, qorinda og‘riq) kuzatilishi mumkin.

Uzoq vaqt qabul qilinganda, qon va siydikda kalsiy miqdori ko‘payishi mumkin.

Dozani oshirib yuborish

O‘tkir yoki surunkali dozani oshirib yuborish belgilari giperkalsiyemiya va/yoki giperkalsiuriya bo‘lib, ular anoreksiya, ko‘ngil aynishi, qusish va bosh aylanishi, holsizlik, bosh og‘rig‘i bilan ifodalanadi. Bunday hollarda preparatni qabul qilishni to‘xtatish tavsiya etiladi.

Organizmga ko‘p miqdorda suyuqlik yuborish va kalsiy miqdori cheklangan parhezga amal qilish lozim. Dozani oshirib yuborish alomatlari paydo bo‘lganda shifokorga murojaat qilish zarur.

O‘zaro aloqa

Kolekalsiferol:

- kolekalsiferolning faolligi uni fenitoin yoki barbituratlar bilan bir vaqtda qo‘llanganda pasayishi mumkin;

- kolistiramin, surgi dori vositalari (vazelin moyi) kolekalsiferolning so‘rilishini pasaytiradi.

Kalsiy karbonat:

- yurak glikozidlari bilan bir vaqtning o‘zida davolashda EKG va klinik holatni nazorat qilish zarur, chunki kalsiy yurak glikozidlarining ta’sirini kuchaytiradi;

- tetratsiklin guruhi antibiotiklari, atsetilsalitsil kislotasi va boshqa salitsilatlar, sulfanilamidlar, beta-adrenoblokatorlar hamda bilvosita ta’sir etuvchi antikoagulyantlarning so‘rilishini sekinlashtiradi. Shu munosabat bilan preparatni boshqa dori vositalarini qabul qilishdan 2 soat oldin yoki 2 soat o‘tgach qo‘llash tavsiya etiladi;

- tiazidlar guruhidagi diuretiklar bilan bir vaqtda qo‘llanilganda giperkalsiyemiya xavfi ortadi.

Maxsus ko‘rsatmalar

Buyrak yetishmovchiligi bo‘lgan shaxslarga ehtiyotkorlik bilan qabul qilish tavsiya etiladi. Davolash davrida kalsiyning siydik bilan chiqarilishini va plazmadagi kalsiy hamda kreatinin konsentratsiyasini doimiy nazorat qilib borish zarur (kuniga 7,5 mmol (300 mg) dan ortiq kalsiuriya paydo bo‘lgan taqdirda, dozani kamaytirish yoki qabul qilishni to‘xtatish lozim).

Keksa odamlarda kalsiyga bo‘lgan ehtiyoj 1,5 g/sut, kolekalsiferolda - 500-1000 XB/sut ni tashkil etadi. Dozaning oshib ketishining oldini olish uchun boshqa manbalardan qo‘shimcha ravishda kolokalsiferol qabul qilinishini hisobga olish zarur.

Tarkibida kalsiy va kolekalsiferol bo‘lgan vitamin komplekslari bilan bir vaqtda qo‘llash mumkin emas.

Homiladorlik va laktatsiya

Kalsiy va kolekalsiferolga bo‘lgan talab homiladorlik va emizish davrida ortadi. Preparatni qabul qilishda organizmga boshqa manbalardan kalsiy va kolekalsiferolning qo‘shimcha tushishini hisobga olish va kalsiyning siydik bilan chiqarilishini hamda plazmadagi kalsiy va kreatinin konsentratsiyasini doimiy nazorat qilish zarur.

Homilaga zaharli ta’sir ko‘rsatmasligi uchun sutkasiga 1500 mg dan ortiq kalsiy va 600 XB kolekalsiferol qabul qilish tavsiya etilmaydi. Kalsiy va kolekalsiferol ko‘krak sutiga o‘tadi.

Qadoq

Plyonkali qobiq bilan qoplangan 30, 60, 100 yoki 120 ta tabletka polietilen flakonda, xuddi shu materialdan tayyorlangan burama qopqoq va folga saqlovchi klapan bilan. Flakon ustiga yorliq yopishtiriladi, flakon polietilen plyonka bilan berkitiladi va qo‘llash bo‘yicha yo‘riqnoma bilan birga karton qutiga solinadi.

Saqlash shartlari

Quruq joyda, 10 dan 30 °C gacha haroratda.

Bolalar qo‘li yetmaydigan joyda saqlang.

Yaroqlilik muddati

5 yil.

Yaroqlilik muddati tugaganidan keyin ishlatilmasin.

Dorixonalardan berish shartlari

Retsept bo‘yicha.

Ro‘yxatdan o‘tish guvohnomasi egasi

YUNIFARM INK Qo‘shma Shtatlar

Ishlab chiqaruvchi

YUNIFARM INK Qo‘shma Shtatlar