Xelpodik in'ektsiya uchun eritma 75 mg / 3 ml, 3 ml №5 (ampulalar)

Tarkib

1 ml eritma tarkibiga quyidagilar kiradi:

Faol moddasi: diklofenak natriy - 25 mg.

Yordamchi moddalar: makrogol 400, etil spirti, benzil spirti, dinatriy edetat, propilenglikol, inyeksiya uchun suv.

Chiqarish shakli

Inyeksiya uchun eritma 75 mg/3 ml neytral shisha ampulalarda, 5 donadan qutida.

Farmakoterapevtik guruh

Nosteroid yallig‘lanishga qarshi va revmatizmga qarshi vositalar. Diklofenak. ATX kodi: MO1ABO5.

Farmakologik xususiyatlari

Nosteroid yallig‘lanishga qarshi, og‘riq qoldiruvchi, isitma tushiruvchi, revmatizmga qarshi, antiagregatsion vosita. Siklooksigenazani ingibirlaydi, natijada araxidon kaskadi reaksiyalari bloklanadi va PGE2, PGF2alfa, tromboksan A2, prostatsiklin, leykotriyenlar sintezi va lizosomal fermentlar chiqarilishi buziladi; trombotsitlar agregatsiyasini susaytiradi; uzoq muddat qo‘llanganda desensibilizatsiyalovchi ta’sir ko‘rsatadi. Revmatik kasalliklarda tinch holatda va harakatda og‘riqni, ertalabki karaxtlikni, bo‘g‘imlarning shishganligini kamaytiradi, ularning funksional qobiliyatini yaxshilaydi. Operatsiya va jarohatlardan keyin yuzaga keladigan yallig‘lanish jarayonlarida o‘z-o‘zidan paydo bo‘lgan og‘riqni ham, harakatlangandagi og‘riqni ham tezda yengillashtiradi, jarohat joyidagi yallig‘lanish shishini kamaytiradi. Davo kursini olgan poliartrit bilan og‘rigan bemorlarda sinovial suyuqlik va sinovial to‘qimada konsentratsiya qon plazmasidagiga qaraganda yuqori bo‘ladi. Yallig‘lanishga qarshi faolligi bo‘yicha atsetilsalitsil kislotasi, butadion, ibuprofendan ustun turadi; indometatsinga nisbatan klinik ta’sirining kuchliligi va yaxshi o‘zlashtirilishi haqida ma’lumotlar mavjud; revmatizm va Bexterev kasalligida ta’siri bo‘yicha prednizolon va indometatsinga teng.

Farmakokinetika

Mushak ichiga (m/o) yuborilganda, plazmadagi maksimal konsentratsiyaga (Smax) 10-20 daqiqadan so‘ng erishiladi. Biomavjudligi - 50%; tizimli eliminatsiyaga jadal uchraydi. Qon plazmasi oqsillari bilan bog‘lanishi 99% dan yuqori. To‘qimalarga va sinovial suyuqlikka yaxshi o‘tadi, bu yerda uning konsentratsiyasi sekinroq o‘sadi, 4 soatdan keyin plazmadagiga qaraganda yuqori qiymatlarga erishadi. Taxminan 35% najas bilan metabolitlar shaklida chiqariladi; taxminan 65% jigarda metabolizmga uchraydi va buyraklar orqali faol bo‘lmagan hosilalar ko‘rinishida chiqariladi (o‘zgarmagan holda 1% dan kam chiqariladi). Plazmadan yarim chiqarilish davri (T1/2) - taxminan 2 soat, sinovial suyuqlik - 3-6 soat; qabul qilishlar o‘rtasidagi tavsiya etilgan intervalga rioya qilinganda to‘planmaydi.

O‘rtacha jigar yetishmovchiligi bo‘lgan bemorlarda metabolizm sezilarli darajada o‘zgarmaydi.

Og‘ir buyrak yetishmovchiligi bo‘lgan bemorlarda (kreatinin klirensi ˂ 10 ml/min) faol bo‘lmagan metabolitlarning o‘t bilan ajralishi ko‘payadi.

Bemorning yoshi bilan bog‘liq bo‘lgan preparat farmakokinetikasida sezilarli farqlar yo‘q.

Qo‘llanilishi

Bo‘g‘imlarning yallig‘lanish kasalliklari (revmatoid artrit, revmatizm, ankilozlovchi spondilit, surunkali podagra artriti).

Degenerativ kasalliklar (deformatsiyalovchi osteoartroz, osteoxondroz).

Og‘riq sindromlari: lyumbago, ishias, nevralgiya, mialgiya.

Bo‘g‘imdan tashqari to‘qimalar kasalliklari: tendovaginit, bursit, yumshoq to‘qimalarning revmatik zararlanishi.

Yallig‘lanish bilan kechadigan posttravmatik og‘riq sindromlari.

Og‘riq bilan kechadigan holatlar: operatsiyadan keyingi og‘riqlar, podagraning o‘tkir xuruji, birlamchi algodismenoreya, adneksit, migren xurujlari, buyrak va jigar sanchig‘i, LOR a’zolari infeksiyalari, pnevmoniyaning qoldiq belgilari.

Qo‘llash usuli va dozalari

Vena ichiga (v/i), mushak orasiga (m/o) yoki tomchilab infuziya ko‘rinishida. Diklofenak natriy eritmasi bilan davolash kursining davomiyligi 2-5 kunni tashkil etadi. Davolashni uzaytirish zarur bo‘lgan hollarda bemorlarga tabletka yoki shamcha ko‘rinishida dori buyuriladi. M/o inyeksiyalar: o‘tkir og‘riqlarda - 75 mg dan har kuni 1-5 kun davomida. Zarurat tug‘ilganda (o‘t yoki buyrak sanchig‘i) kunlik doza 150 mg gacha (1 ampuladan kuniga 2 marta) oshirilishi mumkin.

V/i infuziyalar: preparat infuziya ko‘rinishida tomchilab yuboriladi. Bevosita yuborishdan oldin 1 ampula ichidagini (75 mg) 100-500 ml 0,9% li NaCl eritmasida yoki 5% li dekstroza eritmasida suyultirish kerak (infuzion eritmalarga oldindan natriy bikarbonat eritmasi - 1 ml 4,2% li eritma qo‘shiladi). Infuziya uchun tayyorlangan eritmalar tiniq bo‘lishi kerak.

O‘rta va kuchli darajadagi operatsiyadan keyingi og‘riq sindromini davolashda preparat 75 mg dozada 30-120 daqiqa davomida yuboriladi. Zarurat tug‘ilganda preparat bir necha soatdan keyin qayta yuborilishi mumkin. Biroq, doza 24 soat ichida 150 mg dan oshmasligi kerak.

Operatsiyadan keyingi og‘riqlarning oldini olish maqsadida "zarbdor doza" bilan infuziya qilinadi - 25-50 mg 15-60 daqiqa davomida. Keyinchalik infuziya 5 mg/soat tezlikda davom ettirilib, maksimal sutkalik doza 150 mg ga yetkaziladi.

Nojo‘ya ta’sirlari

Ko‘ngil aynishi, anoreksiya, epigastral sohada og‘riq va noxush sezgilar, meteorizm, qabziyat, diareya. Aksariyat hollarda bu belgilar davolash jarayoniga ta’sir ko‘rsatmaydi. Bosh aylanishi, bosh og‘rig‘i, uyqusizlik, asabiylashish, charchoq; moyil bemorlarda - shishlar bo‘lishi mumkin. Kamdan kam hollarda - qon bosimi oshishi, kamqonlik, leykopeniya, trombotsitopeniya, agranulotsitoz, sezuvchanlik, ko‘rish qobiliyatining buzilishi (xiralik, diplopiya), quloqda shovqin, tutqanoq, buyrak yoki jigar faoliyatining buzilishi. Preparat v/i yuborilgan joyda - achishish; ayrim hollarda - infiltrat, abssess, yog‘ to‘qimasi nekrozi hosil bo‘lishi.

Qarshi ko‘rsatmalar

Yuqori sezuvchanlik (shu jumladan boshqa YAQNDV), etiologiyasi aniqlanmagan qon yaratilishining buzilishi, oshqozon va o‘n ikki barmoqli ichak yarasi, qo‘zg‘alish bosqichidagi ichakning destruktiv-yallig‘lanish kasalliklari, "aspirinli" bronxial astma, bolalik yoshi, homiladorlikning oxirgi uch oyligi.

Qo‘llanilish cheklovlari. Jigar va buyrak faoliyatining buzilishi, yurak yetishmovchiligi, porfiriya; diqqat talab qiladigan ish, homiladorlik, emizish (emizishdan voz kechish kerak).

Dorilarning o‘zaro ta’siri

Qonda litiy, digoksin, bilvosita antikoagulyantlar, diabetga qarshi peroral preparatlar (gipo- va giperglikemiya bo‘lishi mumkin), xinolon hosilalari konsentratsiyasini oshiradi. Metotreksat, siklosporin toksikligini oshiradi, glyukokortikoidlarning nojo‘ya ta’sirlari (oshqozon-ichakdan qon ketishi) rivojlanish ehtimolini, kaliy saqlovchi diuretiklar fonida giperkaliyemiya xavfini oshiradi, diuretiklar ta’sirini kamaytiradi. Plazmadagi konsentratsiyasi atsetilsalitsil kislotasi qo‘llanilganda kamayadi.

Maxsus ko‘rsatmalar

Uzoq davolanishda vaqti-vaqti bilan qon formulasi va jigar funksiyasini tekshirish, axlatni yashirin qonga tekshirish zarur. Homiladorlikning dastlabki 6 oyida qat’iy ko‘rsatmalar bo‘yicha va eng kam dozada qo‘llanilishi kerak.

Reaksiya tezligi pasayishi mumkinligi sababli avtotransportni boshqarish va mexanizmlar bilan ishlash tavsiya etilmaydi.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Belgilari: bosh aylanishi, bosh og‘rig‘i, giperventilyatsiya, es-hushning xiralashishi, MIY (oshqozon-ichak trakti) buzilishlari (ko‘ngil aynishi, qusish, qorin sohasidagi og‘riqlar, qon ketishi), jigar va buyrak faoliyatining buzilishi.

Davolash: arterial bosimning ko‘tarilishi, buyrak faoliyatining buzilishi, talvasalar, MIY ta’sirlanishi, nafas olishning susayishini bartaraf etishga qaratilgan simptomatik terapiya. Tezlashtirilgan diurez, gemodializ kam samara beradi.

Saqlash shartlari

Harorati 25 °C dan yuqori bo‘lmagan quruq, yorug‘lik tushmaydigan joyda.

Yaroqlilik muddati

5 yil.

Dorixonalardan berish shartlari

Retsept bo‘yicha.

Ishlab chiqaruvchi

HELP S. A.

10, Valaontou str/144 52 Metamorphosis Attica, Gretsiya

Tel: ++30210-28-15-353, ++30210-28-43-479, Faks: ++30210-28-11-850

E -mail: [email protected]