Orniford

Tarkib

100 ml eritmada quyidagilar mavjud:

faol modda: ornidazol - 500 mg;

yordamchi moddalar: natriy xlorid - 0,9% (v/o);

inyeksiya uchun suv - q.s.

Tavsif

Shaffof, rangsizdan kuchsiz sariq ranggacha bo‘lgan eritma.

Dori shakli

Infuziya uchun eritma.

Farmakoterapevtik guruh

Protozoylarga qarshi vosita. ATX kodi: J01XD03.

Farmakologik xususiyatlari

Protozoylarga qarshi, antibakterial preparat, 5-nitroimidazol hosilasi. Ta’sir mexanizmi ornidazolning 5-nitroguruhini anaerob bakteriyalar va sodda hayvonlarning hujayra ichidagi transport oqsillari bilan biokimyoviy tiklashdan iborat. Ornidazolning qaytarilgan 5-nitroguruhi mikroorganizm hujayralari DNKsi bilan o‘zaro ta’sirlashib, ularning nuklein kislotalari sintezini ingibirlaydi, bu esa bakteriyalarning nobud bo‘lishiga olib keladi.

Trichomonas vaginalis, Giardia lamblia, Entamoeba histolytica, shuningdek, anaerob bakteriyalar (Bacteroides spp., Fusobacterium spp., Clostridium spp.) va anaerob kokklarga nisbatan faol.

Ornidazolga aerob mikroorganizmlar sezgir emas.

Farmakokinetika

Oshqozon-ichak traktidan so‘rilishi yuqori, biosinguvchanligi 90%. Plazma oqsillari bilan bog‘lanish 15% dan kam. Jigarda gidroksillanish, oksidlanish va glyukuronlanish yo‘li bilan metabolizmga uchraydi. T1/2 12-14 soat. Ko‘krak sutiga va ko‘pchilik to‘qimalarga o‘tadi, GEB va yo‘ldosh orqali o‘tadi.

Metabolitlar ko‘rinishida buyraklar (60-70%) va ichaklar (20-25%) orqali chiqariladi, dozaning taxminan 5% o‘zgarmagan holda chiqariladi.

Qo‘llanilishi

Preparatni parenteral qo‘llash o‘tkir va og‘ir infeksiyalarga chalingan bemorlarga yoki og‘iz orqali qo‘llash imkonsiz bo‘lgan hollarda, quyidagi hollarda va sharoitlarda tavsiya etiladi:

ornidazolga sezgir mikrofloralar keltirib chiqaradigan anaerob tizimli infeksiyalar: septitsemiya, meningit, peritonit, operatsiyadan keyingi yara infeksiyalari, tug‘ruqdan keyingi sepsis, septik abort va endometrit;

jarrohlik muolajalari (ayniqsa, yo‘g‘on ichak va to‘g‘ri ichakda), ginekologik operatsiyalar paytida anaerob bakteriyalar keltirib chiqaradigan infeksiyalarning oldini olish; og‘ir ichak amyobiazida, ichakdan tashqari amyobiazning har qanday shakllarida, lyambliozda, jigar abssessida.

Qo‘llash usuli va dozalari

Orniford 15-30 daqiqa davomida vena ichiga yuboriladi.

Kattalar va 12 yoshdan oshgan bolalarda anaerob infeksiyalarda birinchi doza 500-1000 mg, keyingi dozalar har 12 soatda 500 mg yoki har 24 soatda 1000 mg, 5-10 kun davomida (ketma-ket dozalar bilan).

Bemorning ahvoli barqarorlashgandan so‘ng, ornidazolni og‘iz orqali qabul qilishga o‘tiladi (masalan, har 12 soatda 500 mg dan bitta tabletka).

12 yoshdan kichik va tana vazni 6 kg dan yuqori bo‘lgan bolalar uchun sutkalik doza tana vazniga 20 mg/kg miqdorida, 5-10 kun davomida 2 dozaga bo‘lingan holda hisoblanadi.

Kattalar va 12 yoshdan oshgan bolalarda anaerob infeksiyalarning oldini olish uchun operatsiyadan o‘ttiz daqiqa oldin 500-1000 mg dozada ornidazol vena ichiga yuboriladi.

Poliinfeksiyalarning oldini olish uchun ornidazolni aminoglikozidlar, penitsillin yoki sefalosporinlar bilan bir vaqtda vena ichiga yuborish qo‘llaniladi. Preparatlar alohida-alohida yuboriladi.

Og‘ir ichak amyobiazida, kattalar va 12 yoshdan oshgan bolalarda ichakdan tashqari amyobiazning har qanday shaklida birinchi doza 500-1000 mg, keyingi dozalar esa 3-6 kun davomida har 12 soatda 500 mg ni tashkil etadi.

12 yoshgacha bo‘lgan bolalar uchun infuziya uchun ornidazolning sutkalik dozasi tana vazniga 20-30 mg/kg bo‘lib, 2 dozaga bo‘lingan holda hisoblanadi.

Buyrak disfunksiyasi bo‘lgan bemorlarda preparatni qabul qilish oralig‘ini uzaytirish yoki preparatning bir martalik va sutkalik dozalarini kamaytirish zarur.

Nojo‘ya ta’sirlari

Ovqat hazm qilish tizimi tomonidan: og‘izda "metall" ta’mi, og‘izda quruqlik hissi, til qoplamasi, ko‘ngil aynishi, ishtahaning yo‘qolishi, oshqozon og‘rig‘i, ich ketishi, qusish, jigar fermentlari darajasining o‘zgarishi.

Asab tizimi tomonidan: bosh og‘rig‘i, bosh aylanishi, tremor, mushaklar rigidligi, harakat koordinatsiyasining buzilishi, ataksiya, talvasalar, ongning chalkashishi, sensor yoki aralash periferik neyropatiya belgilari.

Allergik reaksiyalar: juda kam hollarda - angionevrotik shish; teri toshmasi, qichishish, eshakem.

Boshqa nojo‘ya ta’sirlari: o‘rtacha leykopeniya, siydikning qorayishi, yurak-qon tomir muammolari.

Qarshi ko‘rsatmalar

preparatning har qanday tarkibiy qismiga yuqori sezuvchanlik;

markaziy asab tizimining organik kasalliklari;

epilepsiya, tarqoq skleroz;

qon aylanishining buzilishi;

surunkali alkogolizm;

homiladorlikning birinchi trimestri va emizish;

tana vazni 6 kg dan kam.

Dorilarning o‘zaro ta’siri

Ornidazol kumarin qatoridagi oral antikoagulyantlarning ta’sirini kuchaytiradi, bu esa ikkinchisining dozasini tegishli ravishda tuzatishni talab qiladi. Ornidazol vekeroniy bromidning miorelaksant ta’sirini uzaytiradi. Mikrosomal fermentlar induktorlari (fenobarbital, rifampitsin) bir vaqtda qabul qilingan taqdirda preparat konsentratsiyasi pasayadi va jigar mikrosomal tizimi ingibitorlari, xususan, H2-retseptorlari blokatorlari (simetidin) bir vaqtda qabul qilingan taqdirda preparat konsentratsiyasi ortadi. 5-nitroimidazolning boshqa hosilalari bilan bir vaqtda qabul qilinganda periferik nefrit, ruhiy tushkunlik va epilepsiyaga o‘xshash tutqanoqlar paydo bo‘lishining ayrim holatlari haqida xabar berilgan.

Maxsus ko‘rsatmalar

Preparat jigar yetishmovchiligi (dozani kamaytirish zarur), miyaning organik shikastlanishi, gematopoez tizimining buzilishi (leykopeniya yoki neytropeniya xavfi yuqori) bo‘lgan bemorlarga va spirtli ichimliklarni suiiste’mol qiluvchi bemorlarga ehtiyotkorlik bilan buyuriladi.

Ehtiyotkorlik bilan: Preparatni MAT kasalliklarida (shu jumladan epilepsiya, tarqoq skleroz), jigar kasalliklarida, alkogolizmda, homiladorlik va laktatsiya davrida qo‘llash lozim.

Homiladorlik va laktatsiya

Preparatni homiladorlikning I trimestrida va emizish davrida qo‘llash mumkin emas.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Avtomobil va boshqa mexanizmlarni boshqarish qobiliyatiga ta’siri

Ornidazol infuziya uchun diqqatni jamlash qobiliyatini va psixomotor reaksiyalar tezligini pasaytiradi. Shuning uchun preparat avtomobil haydash yoki mexanizmlar bilan ishlash kabi diqqatni talab qiladigan harakatlarni bajaradigan bemorlarga ehtiyotkorlik bilan buyuriladi.

Dozani oshirib yuborish

Belgilari: hushdan ketish, bosh og‘rig‘i, bosh aylanishi, tremor, talvasalar, depressiya, periferik nefrit, ko‘ngil aynishi, qusish.

Davolash: simptomatik davolash, spetsifik antidot noma’lum.

Chiqarish shakli

Birlamchi qadoqlash: Tegishli markirovka bilan ta’minlangan plastik flakonda 100 ml dan eritma.

Ikkilamchi qadoqlash: Tibbiy qo‘llash bo‘yicha yo‘riqnoma bilan birga flakonni o‘z ichiga olgan karton quti.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

Oxford Laboratories Pvt. Ltd.,"

B 305, Crystal Plaza, New Link Road, Andheri (W),

Mumbay - 400 053, Hindiston (Hindiston)