Mer Tiaksitam in'ektsiya uchun eritma, 10 ml №10 (ampulalar)

Tarkib

1 ml eritma tarkibiga quyidagilar kiradi:

faol moddalar: piratsetam 100 mg; tiotriazolin 25 mg;

yordamchi moddalar: inyeksiya uchun suv 1 ml gacha.

Tavsif

Tiniq, rangsiz yoki biroz sarg‘ish tusli suyuqlik.

Dori shakli

Inyeksiya uchun eritma.

Farmakologik ta’siri

MER Tiaksitam serebroaktiv vositalar guruhiga mansub bo‘lib, nootrop, ishemiyaga qarshi, antioksidant va membranani barqarorlashtiruvchi xususiyatlarni namoyon etadi. Preparatning farmakologik ta’siri tiotriazolin va piratsetamning o‘zaro potensiyalovchi ta’siri bilan bog‘liq. MER Tiaksitam aerob va anaerob oksidlanish reaksiyalarida glyukozaning utilizatsiyasini tezlashtiradi, bioenergetik jarayonlarni me’yorlashtiradi, miya to‘qimalarida metabolizmni barqarorlashtiradi va organizmning gipoksiyaga chidamliligini oshiradi. Preparat kislorodning faol shakllari hosil bo‘lish yo‘llarini tormozlaydi, fermentativ antioksidant tizimni, ayniqsa superoksiddismutazani faollashtiradi, ishemiyada miya to‘qimalaridagi erkin radikal jarayonlarni tormozlaydi, fibrinolitik tizimni faollashtirish hisobiga qonning reologik xususiyatlarini yaxshilaydi, mos ravishda nekroz va ishemiya sohalarini barqarorlashtiradi va kamaytiradi. MER Tiaksitam metabolik GAMK-shunt ishining jadalligini va ishemiyaga uchragan to‘qimalarda GAMK konsentratsiyasini oshiradi. MER Tiaksitam miyaning integrativ va kognitiv faoliyatini yaxshilaydi, o‘rganish jarayoniga yordam beradi, amneziyani bartaraf etadi, qisqa va uzoq muddatli xotira ko‘rsatkichlarini oshiradi. MER Tiaksitam stress oqibatlarini (xavotirlanish hissi, fobiya, depressiya, uyquning buzilishi) bartaraf etadi, chala tug‘ilgan bolalarning jismoniy va aqliy rivojlanishdan orqada qolishini kamaytiradi.

Ko‘rsatmalar

Ishemik insult va uning nutq buzilishi, ruhiy va somatik buzilishlar, faollikning pasayishi, hissiy sohaning buzilishi kabi oqibatlarini davolash; qon tomir, toksik va travmatik ensefalopatiyani davolash (tiklanish davrida); alkogol intoksikatsiyasida abstinensiya sindromini bartaraf etish; diabetik ensefalopatiya.

Qo‘llash usuli va dozalari

Ishemik insultda va uning oqibatlarini davolash uchun oldindan 100-150 ml 0,9% li natriy xlorid eritmasida suyultirilgan preparatdan 20-30 ml dan buyuriladi va sutkada 1 marta venaga tomchilab yuboriladi. Davolash kursi 2 hafta. Alkogol intoksikatsiyasida ensefalopatiyani davolash va abstinensiya sindromini bartaraf etish uchun preparat mushak orasiga 5 ml dan sutkada 1 marta 10-15 sutka davomida buyuriladi. Diabetik ensefalopatiyada 5 ml dan mushak orasiga sutkada 1 marta, 10 kun davomida.

Nojo‘ya ta’siri

Inyeksiya uchun eritma bo‘lgan MER Tiaxsitam preparatini klinik qo‘llashda ayrim nojo‘ya ta’sirlar kuzatilishi mumkin:

Markaziy va periferik asab tizimi tomonidan: umumiy holsizlik, bosh og‘rig‘i.

Oshqozon-ichak yo‘li tomonidan: ko‘ngil aynishi, qusish.

Allergik reaksiyalar: qichishish, toshma, eshakyemi, angionevrotik shish, anafilaktik shok. Ayrim bemorlarda ba’zan quyidagilar tufayli nojo‘ya ta’sirlar rivojlanishi mumkin: piratsetam:

Markaziy va periferik asab tizimi tomonidan: yuqori qo‘zg‘aluvchanlik, xavotirlanish, gallyutsinatsiyalar, ongning chalkashishi, muvozanatning buzilishi, uyqusizlik yoki uyquchanlik, tremor, epilepsiya xurujlari chastotasining oshishi, giperkineziya, ataksiya, depressiya, asteniya.

Boshqalar: tana vaznining ortishi, qorin og‘rig‘i, diareya, dermatitlar, gipertermiya.

Markaziy va periferik asab tizimi tomonidan: bosh aylanishi, quloqlarda shovqin.

Yurak-qon tomir tizimi tomonidan: taxikardiya, arterial gipertenziya (bir holat).

Oshqozon-ichak yo‘li tomonidan: og‘iz qurishi, qorin dam bo‘lishi.

Nafas tizimi tomonidan: ayrim hollarda hansirash va bo‘g‘ilish.

Dozani oshirib yuborish

Terapevtik dozalarni qo‘llashda dozani oshirib yuborish mumkin emas. Biroq, shifokor tavsiya etgan dozalardan chetga chiqilganda, preparatning nojo‘ya ta’sirlari (qo‘zg‘alish, uyqu buzilishi, dispeptik holatlar) paydo bo‘lishi yoki kuchayishi mumkin. Bunday hollarda preparatni qo‘llash to‘xtatiladi va simptomatik davolash buyuriladi.

Qarshi ko‘rsatmalar

Piratsetam yoki tiotriazolinga yuqori sezuvchanlik; buyrak yetishmovchiligining oxirgi bosqichi; Xantington xoreyasi; gemorragik insultning o‘tkir davri.

Maxsus ko‘rsatmalar

Surunkali buyrak yetishmovchiligi bo‘lgan bemorlarga ehtiyotkorlik bilan buyuriladi. Tiaksitam trombotsitlar agregatsiyasiga ta’sir qiladi, shuning uchun uni gemostazi buzilgan bemorlarda, jarrohlik aralashuvlari paytida ehtiyotkorlik bilan qo‘llash kerak. Yurak-qon tomir patologiyasi bo‘lgan keksa yoshdagi shaxslarga preparatni ehtiyotkorlik bilan qo‘llash lozim, chunki yuqorida tavsiflangan nojo‘ya ta’sirlar ushbu guruh bemorlarida ko‘proq qayd etiladi. Allergik reaksiyalar allergiyaga moyil shaxslarda ko‘proq uchraydi. Avtotransportni boshqaradigan yoki xavfli mexanizmlar bilan ishlaydigan shaxslarga MER Tiaksitamni qo‘llashda asab tizimi tomonidan yuzaga kelishi mumkin bo‘lgan noxush reaksiyalarni hisobga olgan holda ehtiyotkorlik bilan yondashish lozim.

Homiladorlik va emizish davrida

Preparatni homiladorlik davrida qo‘llash tajribasi yetarli emas. Piratsetam ko‘krak sutiga o‘tadi, shuning uchun davolash vaqtida emizishni to‘xtatish kerak.

Bolalarda qo‘llanilishi

Preparatni bolalarda qo‘llash tajribasi yetarli emas.

Dorilarning o‘zaro ta’siri

MER Tiaksitamni kislotali pH ga ega bo‘lgan preparatlar bilan buyurish mumkin emas. Piratsetamning mavjudligi hisobiga antidepressantlar va antianginal preparatlarning ta’siri kuchayadi. Piratsetam yuqori dozalarda (9,6 g/sut) venoz tromboz bilan og‘rigan bemorlarda atsenokumarolning samaradorligini oshiradi, biroq MER Tiaksitamning terapevtik dozalari qo‘llanilganda bunday samara kuzatilmaydi. Piratsetamning klonazepam, fenobarbital, fenitoin, natriy valproat bilan o‘zaro ta’siri kuzatilmadi. Piratsetam va tireoid gormonlarni (T3+T4) bir vaqtning o‘zida qo‘llash qo‘zg‘aluvchanlik, dezoriyentatsiya, uyqu buzilishlarini keltirib chiqarishi mumkin. Piratsetamning R450 kompleksi fermentlari bilan biotransformatsiyalanadigan preparatlar bilan o‘zaro ta’siri ehtimoli kam. Enalapril, kaptopress bilan bir vaqtda qabul qilish yurak-qon tomir tizimi tomonidan nojo‘ya ta’sirlar rivojlanish xavfini oshiradi. Alkogol bilan birga qabul qilish piratsetamning qon zardobidagi konsentratsiyasi darajasiga ta’sir qilmaydi.

Saqlash shartlari

Harorati 25 °C dan yuqori bo‘lmagan, quruq va yorug‘likdan himoyalangan joyda saqlanadi.

Yaroqlilik muddati

Ishlab chiqarilgan sanadan boshlab 3 yil. Yaroqlilik muddati tugagandan keyin ishlatilmasin.

Chiqarish shakli

Inyeksiya uchun eritma 5 ml yoki 10 ml dan ampulalarda. Kontur yacheykali o‘ramga 5 ampuladan solinadi. Karton qutida qo‘llash bo‘yicha yo‘riqnoma bilan birga 2 ta konturli katakli o‘ramda.

Ishlab chiqaruvchi

Merrymed Farm, O‘zbekiston.