Prednizolon

Tarkib

1 ta tabletka tarkibida:

Faol moddasi: prednizolon 5 mg.

Yordamchi moddalar: laktoza monogidrati, kartoshka kraxmali, kalsiy stearati.

Tavsif

Oq rangli, yassi silindrsimon, faskali tabletkalar.

Dori shakli

Tabletkalar.

Farmakoterapevtik guruh

Glyukokortikoidlar ATX kodi: H02AB06.

Farmakologik xususiyatlari

Prednizolon - gidrokortizonning degidrogenlangan analogi. Yallig‘lanishga qarshi, allergiyaga qarshi, desensibilizatsiyalovchi, shokka qarshi va immunodepressiv ta’sir ko‘rsatadi.

Prednizolon qo‘llanilganda preparatning ta’siri hujayra membranalarini barqarorlashtirish, makrofaglar to‘planishini tormozlash, leykotsitlar migratsiyasini kamaytirish, kapillyarlar o‘tkazuvchanligini pasaytirish orqali amalga oshadi, bu esa shishlar hosil bo‘lishiga to‘sqinlik qiladi. Prednizolon fagotsitozni susaytiradi, araxidon kislotasi metabolizmiga, yallig‘lanish mediatorlari sintezi va ajralib chiqishiga ta’sir ko‘rsatadi. Prednizolonning immunosupressiv ta’siri T- va V-limfotsitlar faolligining susayishi, qondagi komplement miqdorining kamayishi, shuningdek, interleykin-2 ishlab chiqarilishi va ta’sirining susayishi bilan bog‘liq. Katabolik ta’sir ko‘rsatadi, qondagi glyukoza miqdorini oshiradi. Ba’zi mineralkortikoid faollikni namoyon qiladi, buyrak kanalchalarida Na+ va suv reabsorbsiyasini oshiradi, organizmdan K+ va Ca+ chiqarilishini oshiradi, ayniqsa ularning qon plazmasidagi miqdori oshganda. Prednizolon gipofizda adrenokortikotrop gormonlar va ikkilamchi ravishda buyrak usti bezlarida glyukokortikosteroidlar sintezi va sekretsiyasini susaytiradi.

Farmakokinetika

Oshqozon-ichak yo‘llaridan tez so‘riladi. Biologik o‘zlashtirilishi yuqori. Qon plazmasida maksimal konsentratsiyaga erishish vaqti - 1-1,5 soat. Preparatning katta qismi (90%) kortizol bog‘lovchi globulin - transkortin va albumin bilan bog‘lanadi. Jigar, buyrak, ingichka ichak, bronxlarda metabolizmga uchraydi. Prednizolonning oksidlangan shakllari glyukuronlanadi yoki sulfatlanadi. Yarim chiqarilish davri (T1/2) - 2-4 soat. Buyraklar orqali asosan metabolitlar ko‘rinishida, 20% gacha o‘zgarmagan holda chiqariladi.

Qo‘llanilishi

Revmatik isitma, revmatik kardit, kichik xoreya.

Biriktiruvchi to‘qimaning tizimli kasalliklari (tizimli qizil yuguruk, sklerodermiya, tugunchali periarteriit, dermatomiozit).

Tarqoq skleroz.

Bo‘g‘imlarning o‘tkir va surunkali yallig‘lanish kasalliklari (revmatoid artrit, yuvenil artrit, ankilozlovchi spondiloartrit, podagra va psoriatik artritlar, poliartrit, yelka-kurak periartriti, osteoartrit (shu jumladan jarohatdan keyingi), kattalardagi Still sindromi, bursit, nospetsifik tendosinovit, sinovit, epikondilit).

Bronxial astma, astmatik status.

O‘pkaning interstitsial kasalliklari (o‘tkir alveolit, o‘pka fibrozi, II-III darajali sarkoidoz); o‘pka saratoni (sitostatiklar bilan birgalikda), berillioz, aspiratsion pnevmoniya (spetsifik terapiya bilan birgalikda), eozinofilli Leffler pnevmoniyasi, sil (o‘pka sili, sil meningiti) - spetsifik terapiya bilan birgalikda.

Buyrak usti bezlarining birlamchi va ikkilamchi yetishmovchiligi (shu jumladan, buyrak usti bezlari olib tashlanganidan keyingi holatlar), buyrak usti bezlarining tug‘ma giperplaziyasi, adrenogenital sindrom, o‘tkir osti tireoiditi.

O‘tkir va surunkali allergik kasalliklar (dori va oziq-ovqat allergiyasi, zardob kasalligi, pollinoz, atopik dermatit, tananing katta yuzasini qamrab oluvchi kontakt dermatit, eshakem, allergik rinit, Kvinke shishi, Stivens-Jonson sindromi, toksikodermiya).

Gepatit.

Gipoglikemik holatlar.

Autoimmun kasalliklar (shu jumladan o‘tkir glomerulonefrit).

Nefrotik sindrom.

Oshqozon-ichak traktining yallig‘lanish kasalliklari (nospetsifik yarali kolit, Kron kasalligi, mahalliy enterit).

Qon va qon yaratish a’zolari kasalliklari (agranulotsitoz, panmiyelopatiya, miyeloma kasalligi, o‘tkir limfo- va miyeloid leykoz, limfogranulematoz, trombotsitopenik purpura, kattalarda ikkilamchi trombotsitopeniya, autoimmun gemolitik kamqonlik, eritroblastopeniya, tug‘ma eritroid gipoplastik kamqonlik).

Autoimmun va boshqa teri kasalliklari (ekzema, seboreyali dermatit, psoriaz, Layell sindromi, bullyoz gerpetiksimon dermatit, po‘rsildoq, eksfoliativ dermatit).

Operatsiyadan keyingi, radiatsiyadan keyingi, jarohatdan keyingi miya shishi, miya o‘smalari (parenteral glyukokortikosteroidlardan keyin qo‘llaniladi).

Ko‘z kasalliklari, shu jumladan allergik va autoimmun (simpatik oftalmiya, konyunktivitning allergik shakllari, shox pardaning allergik yarasi, yiringsiz keratit, iridotsiklit, irit, og‘ir sust kechuvchi oldingi va orqa uveitlar, xorioidit, ko‘z nervi nevriti).

Transplantatning ko‘chib tushish reaksiyalarining oldini olish.

Onkologik kasalliklar fonida giperkalsiyemiya.

Sitostatik terapiyada ko‘ngil aynishi, qusishning oldini olish va bartaraf etish uchun.

Qo‘llash usuli va dozalari

Dozalash individual belgilanadi. Buyurishda glyukokortikoidlar sekretsiyasining sirkad ritmini hisobga olish kerak: dozaning katta qismini (2/3) yoki barcha dozani ertalab soat 8 atrofida va 1/3 - kechqurun qabul qilish kerak.

Kattalarga

O‘tkir holatlarda va o‘rinbosar terapiya sifatida preparat kuniga 20-30 mg dozada buyuriladi, asta-sekin 5-10 mg qo‘llab-quvvatlovchi kunlik dozaga o‘tiladi. Zarurat bo‘lganda boshlang‘ich doza 15-100 mg/sutka, qo‘llab-quvvatlovchi doza esa 5-15 mg/sutka bo‘lishi mumkin.

Bolalarga

Bolalar uchun preparatning boshlang‘ich dozasi 1-2 mg/kg/sutkani tashkil etadi va 4-6 qabulga taqsimlanadi, qo‘llab-quvvatlovchi doza esa - 300-600 mkg/kg/sutka.

Preparat chaynamay, oz miqdordagi suyuqlik bilan ichiladi. Davolash asta-sekin to‘xtatilib, dozasi kamaytirib boriladi.

Nojo‘ya ta’sirlari

Nojo‘ya ta’sirlarning rivojlanish chastotasi va ifodalanishi qo‘llash davomiyligiga, qo‘llaniladigan doza miqdoriga va buyurishning sirkad ritmiga rioya qilish imkoniyatiga bog‘liq.

Yurak-qon tomir tizimi tomonidan: aritmiya, bradikardiya, arterial gipertenziya, surunkali yurak yetishmovchiligi belgilarining rivojlanishi yoki kuchayishi, gipokaliyemiyaga xos EKG o‘zgarishlari. O‘tkir va yarim o‘tkir miokard infarkti bilan og‘rigan bemorlarda nekroz o‘chog‘ining tarqalishi, chandiq to‘qimasining shakllanishi sekinlashadi, bu esa yurak mushagining yorilishiga olib kelishi mumkin.

Qon va limfa tizimi tomonidan: leykotsituriya, tromboz va tromboemboliyalarga olib keladigan giperkoagulyatsiya.

Asab tizimi tomonidan: bosh og‘rig‘i, bosh aylanishi, miyacha soxta o‘smasi, kalla ichi bosimining oshishi, talvasalar.

Ko‘ruv a’zolari tomonidan: orqa subkapsulyar katarakta, ko‘ruv nervi shikastlanishi mumkin bo‘lgan ko‘z ichki bosimining oshishi, ko‘zning ikkilamchi bakterial, zamburug‘li yoki virusli infeksiyalari rivojlanishiga moyillik, shox pardaning trofik o‘zgarishlari, ekzoftalm.

Ovqat hazm qilish tizimi tomonidan: ko‘ngil aynishi, qusish, epigastral sohada og‘riq, diareya, pankreatit, oshqozon va o‘n ikki barmoqli ichakning "steroid" yarasi, eroziv ezofagit, oshqozon-ichak yo‘lining qon ketishi va teshilishi, ishtahaning oshishi yoki pasayishi, meteorizm, hiqichoq. Kamdan kam hollarda - "jigar" transaminazalari va ishqoriy fosfataza faolligining oshishi.

Teri va teri osti kletchatkasi tomonidan: regeneratsiya jarayonining sekinlashishi, petexiyalar, qontalashlar, gematomalar, ekximozlar, striyalar, terining yupqalashishi, giper- yoki gipopigmentatsiya, husnbuzarlar, piodermiya rivojlanishiga moyillik.

Tayanch-harakat apparati va biriktiruvchi to‘qima tomonidan: bolalarda o‘sish va suyaklanish jarayonlarining sekinlashishi (epifizar o‘sish sohalarining muddatidan oldin yopilishi), osteoporoz, juda kam hollarda - patologik suyak sinishlari, yelka va son suyagi boshchasining aseptik nekrozi, mushak paylarining yorilishi, "steroid" miopatiya, mushak massasining kamayishi (atrofiya).

Endokrin tizim tomonidan: glyukozaga tolerantlikning pasayishi, "steroid" qandli diabet yoki latent qandli diabetning namoyon bo‘lishi, gipotalamo-gipofizar-buyrak usti bezi tizimining susayishi, hayz siklining buzilishi, bolalar va o‘smirlarda o‘sishning sekinlashishi, bolalarda jinsiy rivojlanishning kechikishi, Itsenko-Kushing sindromi (oysimon yuz, gipofizar turdagi semizlik, girsutizm, qon bosimining ko‘tarilishi, dismenoreya, amenoreya, miasteniya, striyalar).

Moddalar almashinuvi tomonidan: gipokalsiyemiya, manfiy azot balansi (oqsillar parchalanishining kuchayishi), tana vaznining ortishi. Prednizolonning glyukokortikosteroid faolligi bilan bog‘liq nojo‘ya ta’sirlari: suyuqlik va Na+ ushlanib qolishi (periferik shishlar), gipernatriyemiya, gipokaliyemiya sindromi - aritmiya, mialgiya yoki mushaklar spazmi, g‘ayritabiiy holsizlik va charchoq.

Infeksiyalar va invaziyalar: organizmning infeksiyalarga chidamliligining pasayishi.

Immun tizimi tomonidan: toshma, qichishish, giperemiya, eshakem, Kvinke shishi, anafilaktik shok.

Ruhiyat tomonidan: deliriy, dezoriyentatsiya, eyforiya, gallyutsinatsiyalar, maniakal-depressiv psixoz, depressiya, paranoyya, asabiylik, bezovtalik, uyqusizlik.

Boshqalar: bekor qilish sindromi, shishlar, aftoz yaralar, urolitlar paydo bo‘lish xavfining ortishi.

Qarshi ko‘rsatmalar

Preparat komponentlariga yuqori sezuvchanlik.

Hozirda mavjud yoki yaqinda o‘tkazilgan virusli, zamburug‘li yoki bakterial tabiatli parazitar va yuqumli kasalliklar: oddiy gerpes, belbog‘simon gerpes (viremik faza), suvchechak, qizamiq; amyobiaz, strongiloidoz (aniqlangan yoki gumon qilingan); tizimli mikoz; faol va yashirin sil.

Emlashdan keyingi davr (davomiyligi 10 hafta: emlashdan 8 hafta oldin va 2 hafta keyin), BSJ emlashdan keyingi limfadenit.

OIV infeksiyasi keltirib chiqargan immunitet tanqisligi holatlari.

Oshqozon-ichak tizimi kasalliklari: oshqozon va o‘n ikki barmoqli ichak yara kasalligi, ezofagit, gastrit, o‘tkir yoki yashirin peptik yara, yangi hosil qilingan ichak anastamozi, teshilish yoki abssesslanish xavfi bo‘lgan nospetsifik yarali kolit, divertikulit.

Yurak-qon tomir tizimi kasalliklari: yaqinda o‘tkazilgan miokard infarkti, dekompensatsiyalangan surunkali yurak yetishmovchiligi, arterial gipertenziya, tromboembolik kasallikka moyillik.

Endokrin tizimi kasalliklari: qandli diabet va uglevodlarga tolerantlikning buzilishi, tireotoksikoz, gipotireoz, Itsenko-Kushing kasalligi.

Og‘ir surunkali buyrak va/yoki jigar yetishmovchiligi, nefrourolitiaz. Gipoalbuminemiya. Tizimli osteoporoz. Miasteniya gravis. O‘tkir psixoz. Semizlik (III-IV daraja). Poliomiyelit (bulbar ensefalit shaklidan tashqari). Ochiq va yopiq burchakli glaukoma.

Dorilarning o‘zaro ta’siri

Prednizolon boshqa dori vositalari bilan bir vaqtda qo‘llanganda quyidagilar kuzatilishi mumkin:

qalqonsimon bez gormonlari, jigar fermentlari induktorlari, xususan barbituratlar, fenitoin, pirimidon, karbamazepin, rifampitsin bilan - prednizolonning tizimli klirensini oshirish natijasida uning ta’sirini susaytirish;

estrogenlar (jumladan, tarkibiga estrogen kiradigan peroral kontratseptivlar), siklosporin, CYP3A4 ingibitorlari, xususan, eritromitsin, klaritromitsin, ketokonazol, diltiazem, aprepitant, itrakonazol, oleandomitsin bilan - prednizolonning terapevtik va toksik ta’sirini kuchaytirish;

antatsidlar bilan - so‘rilishning pasayishi;

salitsil kislotasi hosilalari va boshqa nosteroid yallig‘lanishga qarshi dori vositalari bilan - oshqozon shilliq qavatida yaralar paydo bo‘lish ehtimolini oshiradi; prednizolon qon zardobidagi salitsil kislotasi hosilalari darajasini pasaytirib, ularning buyrak klirensini oshiradi; preparat "jigar" fermentlarining induksiyasi va uning zaharli metaboliti hosil bo‘lishi natijasida paratsetamolning gepatotoksik reaksiyalari rivojlanish xavfini oshiradi;

yurak glikozidlari bilan - ularning zaharli ta’sirining kuchayishi, yuzaga keladigan gipokaliyemiya natijasida esa - aritmiyalar rivojlanish xavfining ortishi;

gipoglikemik vositalar bilan - peroral qand miqdorini pasaytiruvchi vositalar va insulinning gipoglikemik ta’sirini pasaytirish;

gipotenziv preparatlar bilan - ularning samaradorligi pasayishi;

tritsiklik antidepressantlar bilan - prednizolon qabul qilish natijasida kelib chiqqan depressiya belgilarining kuchayishi va ko‘z ichi bosimining ko‘tarilishi;

immunosupressantlar bilan - Epshteyn-Barr virusi bilan bog‘liq infeksiyalar va limfoma yoki boshqa limfoproliferativ buzilishlar rivojlanish xavfini oshiradi;

diuretiklar, surgi vositalari, amfoteritsin V bilan - gipokaliyemiya rivojlanish xavfini oshiradi; prednizolon amfoteritsin va karboangidraza ingibitorlari bilan bir vaqtda qo‘llanilganda osteoporoz rivojlanish xavfini kuchaytiradi;

m-xolinoblokatorlar, antigistamin dori vositalari, nitratlar bilan - ko‘z ichki bosimining oshishi va antigistamin dori vositalarining samaradorligi pasayishi;

neyroleptiklar, karbutamid, azatioprin bilan - katarakta rivojlanish xavfini oshiradi;

estrogenlar, anabolik preparatlar, peroral kontratseptivlar bilan - girsutizm va husnbuzar belgilari;

virusga qarshi tirik vaksinalar bilan va immunizatsiyaning boshqa turlari fonida - viruslarning faollashishi va infeksiyalar rivojlanishi xavfining ortishi;

gipokaliyemiya fonida miorelaksantlar bilan - miorelaksantlarni qo‘llash fonida mushak blokadasi belgilari va davomiyligining kuchayishi;

antixolinesteraz vositalar bilan - miasteniya bilan og‘rigan bemorlarda mushaklar zaifligining paydo bo‘lishi (ayniqsa, miasteniya gravis bilan og‘rigan bemorlarda);

mitotan va buyrak usti bezi po‘stlog‘i funksiyasining boshqa ingibitorlari bilan - preparat dozasining oshishiga olib kelishi mumkin;

qayt qilishga qarshi vositalar bilan - qayt qilishga qarshi ta’sirni kuchaytirish;

izoniazid, meksiletin, prazikvantel bilan - ularning plazmadagi konsentratsiyasini pasaytirish;

somatotropin bilan (yuqori dozalarda) - ikkinchisining ta’sirini pasaytirish;

ftorxinolonlar bilan - pay shikastlanishi;

siklosporin bilan - tutqanoq holatlari qayd etilgan. Ushbu preparatlarni bir vaqtda qo‘llash metabolizmning o‘zaro tormozlanishiga olib kelishi sababli, bu preparatlarning har birini ham monoterapiya, ham birgalikda qo‘llash bilan bog‘liq bo‘lgan tutqanoqlar va boshqa nojo‘ya ta’sirlar tez-tez kuzatilishi mumkin. Birgalikda qo‘llanilishi qon plazmasida boshqa preparatlar konsentratsiyasining oshishiga olib kelishi mumkin.

Uzoq muddatli terapiyada prednizolon folat kislotasi miqdorini oshiradi.

Preparat D vitaminining ichak bo‘shlig‘ida Ca2+ so‘rilishiga ta’sirini kamaytiradi.

Maxsus ko‘rsatmalar

Davolashni boshlashdan oldin bemorni mumkin bo‘lgan qarshi ko‘rsatmalarni aniqlash uchun tekshirish zarur. Klinik tekshiruv yurak-qon tomir tizimini tekshirishni, o‘pkani rentgenologik tekshirishni, oshqozon va o‘n ikki barmoqli ichakni tekshirishni; siydik ajratish tizimini, ko‘rish a’zolarini o‘z ichiga olishi kerak. Laboratoriya tekshiruvi quyidagilarni o‘z ichiga olishi kerak: qonning umumiy tahlili, qon va siydikdagi glyukoza konsentratsiyasi, qon plazmasidagi elektrolitlar.

Uzoq vaqt davomida glyukokortikoidlar bilan davolanganda muntazam ravishda qon bosimini nazorat qilish, siydik va qondagi glyukoza miqdorini aniqlash, axlatni yashirin qonga tahlil qilish, qon ivish ko‘rsatkichlari tahlillari, umurtqa pog‘onasini rentgenologik nazorat qilish, oftalmologik tekshiruv (3 oyda 1 marta) tavsiya etiladi.

Davolanish davrida qizamiq yoki suvchechak bilan og‘rigan bemorlar bilan muloqotda bo‘lgan bolalarga profilaktika sifatida maxsus immunoglobulinlar tayinlanishi kerak (muloqotdan keyin 10 kun davomida).

Davolash vaqtida immunizatsiya qilish kerak emas.

Glyukokortikoidlar bilan davolash paytida bemorlarda noodatiy stress holatlari yuzaga kelsa, stress holatidan oldin, stress holati paytida va undan keyin tez ta’sir qiluvchi kortikosteroidlar dozasini oshirish tavsiya etiladi.

Prednizolon bilan davolash vaqtida alkogol iste’mol qilmaslik kerak.

Davolash davomiyligi va dozasiga qarab, preparat kalsiy metabolizmiga salbiy ta’sir ko‘rsatishi mumkin. Osteoporozning oldini olish tavsiya etiladi, bu, ayniqsa, bemorlarda xavf omillari (jumladan, oilaviy moyillik, keksa yosh, postmenopauza, oqsil va kalsiyni yetarli darajada iste’mol qilmaslik, haddan tashqari chekish, spirtli ichimliklarni haddan tashqari iste’mol qilish, shuningdek, jismoniy faollikning pasayishi) mavjud bo‘lganda juda muhimdir. Profilaktika kalsiy va D vitaminini yetarli darajada iste’mol qilishga asoslangan bo‘lib, jismoniy faollikni ham o‘z ichiga oladi.

Prednizolon bilan davolashning nojo‘ya ta’sirlarini kamaytirish uchun tegishli parhezni tayinlash maqsadga muvofiqdir.

Prednizolonning yuqori dozalari uzoq muddat davomida (kamida 4 hafta davomida kuniga 30 mg) qo‘llanganda, spermatogenezning qaytar buzilishlari yuzaga kelishi mumkin, bu dori vositasini qabul qilish to‘xtatilgandan keyin ham bir necha oy davomida saqlanib qoladi.

Prednizolonning fiziologik dozalaridan yuqori (taxminan 7,5 mg prednizolon yoki ekvivalent) dozalarini 3 haftadan ortiq qabul qilgan bemorlarda prednizolon bilan davolashni asta-sekin to‘xtatish zarur. Davolashni asta-sekin to‘xtatish kerak, hatto u 3 haftadan kam davom etgan bo‘lsa ham, bemorlarning quyidagi guruhlarida:

prednizolon bilan takroriy davolash kursini o‘tayotgan bemorlar;

uzoq muddatli davolanishdan so‘ng (oylar, yillar) bir yil davomida takroriy davolash kursi tayinlangan bemorlar;

kuniga 40 mg dan ortiq prednizolon yoki uning ekvivalentini qabul qiladigan bemorlar;

sababi kortikosteroidlarni ekzogen qabul qilish bo‘lmagan buyrak usti bezi yetishmovchiligi bo‘lgan bemorlar.

Davolash to‘xtatilgandan so‘ng bekor qilish sindromi, buyrak usti bezi yetishmovchiligi, shuningdek, prednizolon tayinlangan kasallikning kuchayishi yuzaga kelishi mumkin. Agar prednizolon bilan davolash tugagandan so‘ng buyrak usti bezlarining funksional yetishmovchiligi kuzatilsa, preparatni darhol qabul qilishni qayta tiklash, dozani kamaytirishni esa juda sekin va ehtiyotkorlik bilan amalga oshirish lozim (masalan, sutkalik dozani 7-10 kun davomida 2-3 mg ga kamaytirish kerak).

Buyrak usti bezlari po‘stlog‘ining atrofiyasi uzoq muddatli davolashda rivojlanadi va davolash to‘xtatilgandan keyin ham ko‘p yillar davomida saqlanib qolishi mumkin.

Steroid bilan bog‘liq ikkilamchi buyrak usti bezi yetishmovchiligi dozani asta-sekin kamaytirish natijasida minimal darajaga tushirilishi mumkin. Yetishmovchilikning bu turi terapiya tugagandan so‘ng bir necha oy davomida davom etishi mumkin, shuning uchun ushbu davrda yuzaga kelgan har qanday stress holatida kortikosteroidlar bilan davolashni qayta tiklash zarur.

To‘satdan to‘xtatilganda, ayniqsa ilgari yuqori dozalar qo‘llanilganda, to‘xtatish sindromi paydo bo‘ladi, bu isitma, ishtahaning pasayishi, ko‘ngil aynishi, qusish, diareya, tormozlanish, bosh aylanishi, umumiy suyak-mushak og‘riqlari, asteniya bilan namoyon bo‘ladi.

Giperkortitsizm rivojlanishi xavfi tufayli, ilgari bir necha oy davomida prednizolon bilan o‘tkazilgan uzoq muddatli davolashdan so‘ng, kortizon bilan davolashning yangi kursini har doim past boshlang‘ich dozalardan boshlash kerak (hayot uchun xavfli bo‘lgan o‘tkir holatlar bundan mustasno).

Bolalarda o‘sish davrida glyukokortikosteroidlarni faqat mutlaq ko‘rsatmalar bo‘yicha va davolovchi shifokorning alohida sinchkov nazorati ostida qo‘llash mumkin.

Interkurrent infeksiyalar, septik holatlar va silda bir vaqtning o‘zida antibiotikoterapiya o‘tkazish zarur.

Og‘iz orqali qabul qilinadigan gipoglikemik preparatlar yoki antikoagulyantlar fonida prednizolonni qo‘llash zarurati tug‘ilganda, ularning dozalash tartibini o‘zgartirish zarur.

Prednizolonni diuretiklar bilan birgalikda qo‘llashda elektrolitlar muvozanatini ayniqsa sinchkovlik bilan nazorat qilish kerak. Gipokaliyemiyaning oldini olish maqsadida prednizolon bilan uzoq vaqt davolanganda, ko‘z ichki bosimining oshishi va subkapsulyar katarakta qobiliyatining rivojlanishi mumkinligi sababli kaliy preparatlari va tegishli parhez buyurish zarur.

Og‘ir yuqumli kasalliklarda faqat maxsus antimikrob terapiya fonida qo‘llash mumkin.

Ayollar menopauza davrida osteoporoz yuzaga kelishi mumkinligi bo‘yicha tekshiruvdan o‘tishlari kerak.

Addison kasalligida o‘tkir buyrak usti bezi yetishmovchiligi (addison krizisi) rivojlanish xavfi tufayli barbituratlarni bir vaqtning o‘zida buyurishdan saqlanish kerak.

Agar anamnezda psoriaz, talvasalar bo‘lsa, prednizolon faqat minimal samarali dozalarda qo‘llanilishi kerak.

Jigar va buyrak yetishmovchiligi, migrenda preparatni alohida ehtiyotkorlik bilan qo‘llash lozim.

Anamnezida depressiv, maniakal-depressiv psixoz, oldingi steroid psixozni o‘z ichiga olgan og‘ir affektiv buzilishlar mavjud yoki mavjud bo‘lgan bemorlarda tizimli kortikosteroidlarni qo‘llash masalasi alohida e’tiborni talab qiladi. Bemorlar va/yoki vasiylar ruhiy jihatdan jiddiy nojo‘ya ta’sirlar rivojlanishi ehtimoli haqida ogohlantirilishi kerak. Simptomlar odatda davolanish boshlanganidan keyin bir necha kun yoki hafta ichida namoyon bo‘ladi. Ushbu nojo‘ya ta’sirlarning yuzaga kelish xavfi yuqori dozalarda qo‘llanilganda yuqoriroq bo‘ladi. Aksariyat reaksiyalar dozani kamaytirgandan yoki preparatni to‘xtatgandan so‘ng yo‘qoladi, garchi ba’zida maxsus davolash zarur bo‘lsa-da. Bunday alomatlar rivojlanganda shifokorga murojaat qilish zarur. Shuningdek, glyukokortikoidlarni bekor qilish vaqtida ham ruhiy buzilishlar kuzatilishi mumkin.

Homiladorlik yoki emizish davrida qo‘llash

Homilador ayollarda nazoratli tadqiqotlar o‘tkazilmagan. Homiladorlik davrida (ayniqsa, birinchi trimestrda) ona uchun foyda homila uchun xavfdan yuqori bo‘lsa, qo‘llash mumkin. Preparatni emizish davrida qo‘llashda shuni esda tutish kerakki, prednizolon ona sutiga o‘tadi.

Avtotransportni boshqarishda yoki boshqa mexanizmlar bilan ishlashda reaksiya tezligiga ta’sir qilish qobiliyati

Davolash davrida avtotransportni boshqarishda va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishda ehtiyot bo‘lish lozim.

Bolalar

Preparat pediatriya amaliyotida ishlatiladi.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Dozani oshirib yuborish xavfi preparatni uzoq vaqt, ayniqsa katta dozalarda qo‘llashda ortadi.

Belgilari: qon bosimining oshishi, periferik shishlar, nojo‘ya ta’sirlarning ko‘payishi.

O‘tkir dozani oshirib yuborishni davolash: zudlik bilan oshqozonni yuvish yoki qusish. Maxsus antidot yo‘q.

Dozaning surunkali oshib ketishini davolash: preparat dozasini kamaytirish.

Chiqarish shakli

Kontur yacheykali o‘ramda 10 tadan tabletka; paketda 4 tadan kontur yacheykali o‘ram.

Saqlash shartlari

Asl qadoqda 25 °C dan yuqori bo‘lmagan haroratda saqlansin.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

"Darnitsa" farmatsevtika firmasi" OAJ.

Ukraina, 02093, Kiyev shahri, Borispolskaya ko‘chasi, 13.