Shreyprim

Tarkib

Ta’sir etuvchi moddalar (MNN): sulfametoksazol, trimetoprim.

Har 5 ml suspenziya quyidagilarni o‘z ichiga oladi:

faol moddalar: sulfametoksazol - 200 mg, trimetoprim - 40 mg;

yordamchi moddalar: natriy benzoat, sorbin kislotasi, 70% li sorbit eritmasi, dinatriy EDTA, natriy sitrat, limon kislotasi, guar smolasi, ksantan yelimi, natriy saxarin, polisorbat 80, saxaroza, metilparaben, propilparaben, natriy gidroksid, sariyog‘-vanil ta’mli essensiya M-6914, oq atirgul xushbo‘ylantirgichi M-8921, tozalangan suv.

Tavsif

Oq, o‘ziga xos hidli gomogen suspenziya.

Dori shakli

Ichish uchun suspenziya.

Farmakoterapevtik guruh

Antibakterial sintetik vosita (yun. sulfanilamidlar). ATX kodi: J01EE01.

Farmakologik xususiyatlari

Tarkibida sulfametoksazol va diaminpiridin hosilasi - trimetoprim bo‘lgan kombinatsiyalangan dori vositasi. Sulfametoksazol paraaminobenzoy kislota utilizatsiyasini va binobarin, digidrofolat kislota sintezini buzadi. Trimetoprim digidrofolatning faol tetragidrofolatga aylanishida ishtirok etuvchi fermentni ingibirlaydi. Ikkala komponentning kombinatsiyasi bakteritsid ta’sirni olish imkonini berdi. Shrayprim grammusbat bakteriyalar: streptokokklar (Streptococcus pneumoniae, S. agalactiae, S. viridans), stafilokokklar (Staphylococcus aureus, Staphylococcus epidermidis), Listeria monocytogenes, Nocardia asteroides va grammmanfiy bakteriyalarga, shu jumladan Enterobacteriaceae tayoqchalarining ko‘pchiligiga (Salmonella, Shigella, Klebsiella, Proteus mirabilis, Enterobacter turlari, Escherichia coli shtammlarining bir qismi), H.influenzae, Legionella spp., Yersinia enterocolitica, Brucella spp., Neisseria meningitidis, Neisseria gonorrhoeae shtammlarining bir qismiga, shuningdek, Pneumocystis carinii ga nisbatan faol. Preparatga tayoqchalar (Mycobacteriaceae), viruslar, ko‘pchilik anaerob bakteriyalar va zamburug‘lar chidamli.

Farmakokinetika

Terapevtik dozada ichga qabul qilingandan so‘ng, faol moddalar ingichka ichakning yuqori qismida tez va deyarli to‘liq (90%) so‘riladi va 60 daqiqadan so‘ng qon va to‘qimalarda 12 soat davomida saqlanadigan terapevtik konsentratsiyaga erishadi. Qon plazmasidagi faol moddalarning maksimal konsentratsiyasiga 1-4 soatdan keyin erishiladi. Plazma oqsillari bilan bog‘lanish sulfametoksazolda 66%, trimetoprimda esa 45% ni tashkil etadi. Preparat organizmda yaxshi taqsimlanadi.

Preparat ona sutiga va yo‘ldosh to‘sig‘i orqali o‘tadi. Sulfametoksazol va trimetoprim jigarda metabolizmga uchraydi.

Yarim chiqarilish davri 10-12 soat oralig‘ida bo‘ladi.

Qo‘llanilishi

Preparatga sezgir mikroorganizmlar keltirib chiqaradigan yuqumli-yallig‘lanish kasalliklari:

nafas yo‘llari infeksiyalari: surunkali bronxit (zo‘rayishi), kattalar va bolalarda pnevmotsistali pnevmoniya (davolash va oldini olish);

sinusit, o‘tkir o‘rta otit;

oshqozon-ichak trakti infeksiyalari: qorin tifi va paratif, bakterial dizenteriya (shigellezlar), ich ketishi, vabo;

siydik-tanosil a’zolari infeksiyalari: siydik yo‘llari infeksiyalari, yumshoq shankr;

boshqa bakterial infeksiyalar (antibiotiklar bilan birga qo‘llanilishi mumkin): nokardioz, brutsellyoz (o‘tkir), aktinomikoz, osteomiyelit (o‘tkir va surunkali), Janubiy Amerika blastomikozi, toksoplazmoz (kompleks terapiya tarkibida).

Qo‘llash usullari va dozalari

Preparat ovqat vaqtida yoki ovqatdan keyin darhol ko‘p miqdorda suyuqlik bilan ichiladi.

Ishlatishdan oldin bir xil suspenziya hosil bo‘lguncha chayqatiladi. 5 ml suspenziya 200 mg sulfametoksazol va 40 mg trimetoprim saqlaydi. Qadoqqa o‘lchov chashkasi ilova qilinadi.

Bolalarda odatda kuniga 1 kg tana vazniga 24 mg dan 36 mg gacha Shreyprim qo‘llaniladi.

Preparat dozasi Yosh

3 oydan 6 oygacha (6-8 kg) 7 oydan 3 yoshgacha (9-15 kg) 4 yoshdan 6 yoshgacha (16-22 kg) 7 yoshdan 12 yoshgacha (23-42 kg)

2,5 ml har 12 soatda -

2,5-5 ml - har 12 soatda -

5-10 ml - har 12 soatda -

10 ml - har 12 soatda

Kattalar va 12 yoshdan oshgan bolalar - odatda 20 ml, har 12 soatda. Maksimal doza (o‘ta og‘ir holatlarda qo‘llash uchun) - har 12 soatda 30 ml suspenziya.

O‘tkir infeksiyalarda Shreyprimni kamida 5 kun yoki bemorda belgilar 2 kun davomida yo‘qolguncha qabul qilish kerak. Agar davolanishning 7 kunidan keyin klinik yaxshilanish kuzatilmasa, davolanishni tuzatish uchun bemorning ahvolini qayta baholash lozim.

Pneumocystis carinii qo‘zg‘atgan infeksiyalarda - 120 mg/kg/sutka, har 6 soatda 14-21 kun davomida.

Siydik yo‘llari infeksiyasi va o‘tkir otitda davolash kursi - 10 kun, shigellezda - 5 kun.

Buyrak faoliyati buzilgan bemorlar

Kreatinin klirensi > 30 ml/min bo‘lganda odatdagi doza buyuriladi, kreatinin klirensi 15 dan 30 ml/min gacha bo‘lganda - odatdagi dozaning yarmi, kreatinin klirensi <15 ml/min gacha pasayganda esa Shreyprimni qo‘llash tavsiya etilmaydi.

Nojo‘ya ta’sirlari

Oshqozon-ichak buzilishlari: ko‘ngil aynishi (qayt qilish bilan yoki qayt qilmasdan), ishtahaning yo‘qolishi, endogastrit, diareya, stomatit, qorin og‘rig‘i, kamdan-kam hollarda jigarning parenximatoz yallig‘lanishi va ayrim hollarda soxta difteriya enterokoliti.

Teri va teri osti to‘qimalarining buzilishi: toshma, eshakemi, qichishish, yorug‘likka o‘ta sezuvchanlik. Juda kam hollarda polimorf eritema, Stivens-Jonson sindromi va epiteliyning toksik nekrozi (Layell sindromi) kuzatiladi.

Buyrak va siydik ajratish tizimi faoliyatining buzilishi: buyrak shikastlanishi va buyrak yetishmovchiligi, kristalluriya holatlari tasvirlangan.

Qon va limfa tizimining buzilishi: leykopeniya, neytropeniya va trombotsitopeniya. Juda kam uchraydi: agranulotsitoz, megaloblastik anemiya, pansitopeniya, eritremiya.

Immunologik tizimning buzilishi: o‘ta sezuvchanlik belgilari juda kam uchraydi. Isitma, qaltirash va angionevrotik shish ayrim hollarda qayd etilgan.

Yurak tomonidan buzilishlar: juda kam hollarda allergik miokardit.

Nafas olish tizimi, ko‘krak qafasi va ko‘ks oralig‘idagi buzilishlar: o‘pka pufakchalarining eozinofil yoki ekzogen allergik yallig‘lanishidagi kabi o‘pka to‘qimasidagi infiltratlar. Yo‘tal yoki nafas qisqarishiga olib kelishi mumkin.

Asab tizimi tomonidan buzilishlar: kamdan-kam hollarda aseptik meningit yoki psevdomeningit belgilari; juda kam hollarda gallyutsinatsiyalar, bosh og‘rig‘i va bosh aylanishi, uyqu buzilishi, depressiya. Quloqdagi shovqinning kamdan-kam hollari tasvirlangan.

Alohida xavf ostidagi bemorlarga buyrak faoliyati buzilgan, jigar kasalliklari bor, yetarli darajada ovqatlanmaydigan yoki Shreyprimning katta dozalarini qabul qiladigan shaxslar kiradi.

Qarshi ko‘rsatmalar

sulfonilamidlar, trimetoprim va/yoki preparatning boshqa tarkibiy qismlariga yuqori sezuvchanlik;

glyukoza-6-fosfatdegidrogenaza yetishmovchiligi;

jigar yoki buyrak faoliyatining yaqqol buzilishi (kreatinin klirensi 15 ml/daqiqadan past);

qonning morfologik manzarasida aniqlangan o‘zgarishlar;

chala tug‘ilgan, yangi tug‘ilgan va 3 oygacha bo‘lgan bolalar;

homiladorlik va laktatsiya davri;

streptokokk anginasini davolash.

Dozani oshirib yuborish

Simptomlari: ko‘ngil aynishi, qusish, ichak sanchig‘i, bosh aylanishi, bosh og‘rig‘i, uyquchanlik, depressiya, hushdan ketish holatlari, ongning chalkashishi, isitma, gematuriya, kristalluriya; uzoq muddatli dozani oshirib yuborishda - trombotsitopeniya, leykopeniya, megaloblastik anemiya, sariqlik.

Davolash: oshqozonni yuvish, kuchaytirilgan diurez, siydikni nordonlashtirish trimetoprim chiqarilishini oshiradi, m/o - 5-15 mg/sutka kalsiy folinat (trimetoprimning suyak ko‘migiga ta’sirini yo‘qotadi), zarur bo‘lganda - gemodializ.

Ehtiyot choralari va qo‘llash xususiyatlari

Maxsus ko‘rsatmalar

Shreyprimni qo‘llashda hayot uchun xavfsiz teri reaksiyalari (juda kamdan-kam) holatlari kuzatilgan: Stivens-Jonson sindromi va toksik epidermal nekroliz. Bemorlar belgilar va alomatlar haqida ogohlantirilishi hamda teri reaksiyalarini diqqat bilan kuzatib borishlari kerak. Stivens-Jonson sindromi yoki toksik epidermal nekrolizning eng yuqori xavfi davolanishning birinchi haftalarida yuzaga kelishi mumkin. Stivens-Jonson sindromi yoki toksik epidermal nekroliz belgilari va alomatlari paydo bo‘lganda (masalan, teri va shilliq qavatlarda progressiv toshmalar, ko‘pincha pufakchalar bilan) davolash darhol to‘xtatilishi kerak. Stivens-Jonson sindromi va toksik epidermal nekroliz rivojlanishining prognozi bevosita erta tashxis qo‘yish va shubhali preparatni qabul qilishni darhol to‘xtatishga bog‘liq. Bemorda Stivens-Jonson sindromi yoki toksik epidermal nekroliz rivojlanganda, butun umr davomida preparatni qo‘llash mumkin emas.

Preparatni jigar yoki buyrak yetishmovchiligi, folat kislotasi yetishmovchiligi bo‘lgan bemorlarda, allergiya belgilari og‘ir bo‘lgan, astma bilan og‘rigan shaxslarda ehtiyotkorlik bilan qo‘llash lozim.

Agar preparat katta dozalarda 14 kundan ortiq qo‘llanilsa, qon manzarasini vaqti-vaqti bilan nazorat qilib turish zarur. Qon manzarasida o‘zgarishlar aniqlanganda folat kislotasi tayinlanishini e’tiborga olish kerak.

Uzoq muddatli kurslarda (ayniqsa, buyrak yetishmovchiligida) siydikning umumiy tahlilini muntazam o‘tkazish va buyrak faoliyatini nazorat qilish zarur.

Kristalluriyaning oldini olish uchun yetarli miqdorda siydik ajratish tavsiya etiladi. Sulfanilamidlarning toksik va allergik asoratlari ehtimoli buyraklarning filtratsiya funksiyasi pasayganda sezilarli darajada oshadi.

Teri toshmasi yoki boshqa har qanday og‘ir nojo‘ya reaksiya birinchi marta paydo bo‘lganda, preparatni to‘xtatish kerak.

Yo‘tal yoki hansirash to‘satdan paydo bo‘lganda yoki kuchayganda bemorni qayta tekshirish va preparat bilan davolashni to‘xtatish masalasini ko‘rib chiqish kerak.

Laboratoriya tekshiruvlari natijalariga ta’siri

Shreyprim kreatinin darajasini taxminan 10% ga oshirishi mumkin.

Homiladorlik va laktatsiya davrida qo‘llash

Preparatni homiladorlik va bolani emizish davrida qo‘llash mumkin emas, chunki vosita yo‘ldosh orqali o‘tib, ona suti bilan ajraladi.

Homiladorlik paytida preparatni buyurish faqat ona uchun potensial foyda homila uchun mumkin bo‘lgan xavfdan yuqori bo‘lgan taqdirdagina mumkin.

Laktatsiya davrida preparatni buyurish zarur bo‘lganda, ko‘krak suti bilan emizishni to‘xtatish masalasini hal qilish lozim.

Transport vositalarini boshqarish va mexanik uskunalarga xizmat ko‘rsatish qobiliyatiga ta’siri

Bosh og‘rig‘i, bosh aylanishi, uyquchanlik va gallyutsinatsiyalar kabi nojo‘ya ta’sirlar paydo bo‘lganda, yuqori tezlikda ruhiy va jismoniy reaksiyalarni talab qiladigan ishlarni bajarish hamda avtomobil haydashni cheklash lozim.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Boshqa dorilar bilan o‘zaro ta’siri, boshqa o‘zaro ta’sirlar

Diuretiklar, ayniqsa tiazidlar guruhi bilan bir vaqtda qo‘llaniladigan Shreyprim qon ketishi bilan kechuvchi trombotsitopeniyaning namoyon bo‘lish imkoniyatini oshiradi. Antikoagulyantlar (masalan, varfarin) qabul qilayotgan bemorlarda protrombin vaqtini uzaytirishi mumkin.

Sulfonilmochevina hosilalari bo‘lgan diabetga qarshi vositalarning ta’sirini kuchaytiradi.

Jigarda fenitoin metabolizmini tormozlaydi (uning yarim parchalanish davrini 39% gacha oshiradi). Shuningdek, qon plazmasida erkin metotreksat konsentratsiyasini oshirishi mumkin (metotreksatning oqsillar bilan birikmalaridan ajralib chiqishini oshiradi).

Digoksinning zardobdagi konsentratsiyasini oshirishi mumkin, zardobdagi digoksin konsentratsiyasini nazorat qilish zarur.

Tritsiklik antidepressantlarni Shreyprim bilan birgalikda qabul qilish samaradorligi pasayishi mumkin.

Buyrak ko‘chirib o‘tkazilgandan so‘ng Shreyprim va siklosporin qabul qilayotgan bemorlarda kreatinin darajasining oshishi bilan namoyon bo‘ladigan buyrak funksiyasining qaytar yomonlashishi kuzatilishi mumkin.

Suyak ko‘migida qon yaratilishini susaytiruvchi dori vositalari miyelosupressiya xavfini oshiradi.

Shrayprim indometatsin bilan birga qo‘llanganda qonda sulfametoksazol konsentratsiyasining oshishi mumkin.

Chiqarish shakli

Ichish uchun suspenziya 240 mg/5 ml 50 ml dan flakonlarda. 1 flakon o‘lchov chashkasi va qo‘llash bo‘yicha yo‘riqnoma bilan birga karton qutida.

Saqlash shartlari

25 °S dan yuqori bo‘lmagan haroratda saqlanadi.

Yaroqlilik muddati

2 yil.

Qadoq birinchi marta ochilgandan so‘ng, flakondan 8 hafta davomida foydalanish kerak.

Dorixonalardan berish shartlari

Retsept bo‘yicha.

Ishlab chiqaruvchi

"Enikar Farmasyutikals Pvt.Ltd."

J-214, 215 M.I.D.C, Tarapur, Boisar -401501, Maxarashtra, (Hindiston).

Uchun ishlab chiqarilgan:

"Shrey Nutrasyutikals end Xerbalz Pvt.Ltd.,"

N-2/102 va 104, Suneja Chember, Alaknanda savdo majmuasi,

Nyu-Dehli - 110019, Hindiston.