Teriks

Tarkib

Qobiq bilan qoplangan har bir tabletka tarkibiga quyidagilar kiradi:

Faol moddasi: setirizin digidroxlorid 10 mg.

Yordamchi moddalar: makkajo‘xori kraxmali, laktoza monogidrati, PVP K 30, magniy stearati.

Qobiq tarkibi: Eudrajit E 100-55, talk, titan dioksidi, magniy stearati, polietilen glikol 6000.

Tavsif

Oq rangli, ikki tomoni kertikli, uzunchoq tabletkalar plyonkali qobiq bilan qoplangan.

Dori shakli

Qobiq bilan qoplangan tabletkalar.

Farmakoterapevtik guruh

Allergiyaga qarshi vosita. ATX kodi: R06AE07.

Farmakologik xususiyatlari

Teriksning faol komponenti - setirizin - N1-gistamin retseptorlarining selektiv antagonisti hisoblanadi. O‘rtacha terapevtik dozalarda gematoensefalik to‘siqdan o‘tmaydi. Faqat yuqori dozalarda yoki kamdan-kam hollarda biroz tinchlantiruvchi ta’sir ko‘rsatishi mumkin. Teriks in vivo endogen gistamin retseptorlarini ham ingibirlaydi. Preparat sababi vazoaktiv ichak polipeptidlari (VIP) va P-moddalar bo‘lgan teri reaksiyalarining oldini oladi. Setirizin bronxial astma bilan og‘rigan bemorlarda bronxlarning gistaminga giperreaktivligini pasaytiradi. Xuddi shu yo‘l bilan o‘ziga xos allergik reaksiyalarni kamaytiradi.

Farmakokinetika

So‘rish

Setirizinning plazmadagi maksimal konsentratsiyasi peroral qo‘llanilgandan bir soat o‘tgach erishiladi.

Taqsimlash

Plazma ko‘rsatkichlari qabul qilingan dozaga qarab o‘zgaradi. Setirizinning plazma oqsillari bilan bog‘lanishi 93% ni tashkil etadi.

Metabolizm

Setirizin kam miqdorda jigarda birlamchi o‘tishda biroz antigistamin ta’sirga ega bo‘lgan metabolit hosil bo‘lguncha metabolizmga uchraydi. Kattalarda yarim chiqarilish davri 8-11 soat atrofida bo‘ladi. Bolalarda plazma klirensi kattalarga nisbatan yuqori bo‘ladi.

Chiqarish

Bolalarda, xuddi kattalardagi kabi, qabul qilingan dozaning taxminan 2/3 qismi buyraklar orqali chiqariladi. Preparatning 70% siydik bilan, 10% esa axlat bilan chiqariladi. Umumiy klirens taxminan 53 ml/daqiqani tashkil etadi.

Qo‘llanilishi

Pollinoz (mavsumiy allergik rinitlar va konyunktivitlar).

Surunkali allergik rinit va boshqa allergik rinopatiyalar.

Allergik qichima.

Idiopatik eshakemi.

Kvinke shishi.

Qo‘llash usuli va dozalari

Kattalar va 6 yoshdan oshgan bolalarga 10 mg/sut dozada buyuriladi.

Preparatni qabul qilish ovqatlanishga bog‘liq emas. Kursning davomiyligi bemorning shikoyatlari va kasallikning kechishiga bog‘liq. Pollinozda davolash davomiyligi asosan 3-6 haftani tashkil etadi.

Nojo‘ya ta’sirlari

Turli a’zolar va tizimlar tomonidan turli chastotali nojo‘ya reaksiyalar uchraydi, masalan: trombotsitopeniya, tana vaznining ortishi, anafilaktik shok, agressiya, depressiya, siydik tutilishi, talvasalar, o‘z joniga qasd qilish haqidagi fikrlar, amneziya, shuningdek, xotiraning boshqa buzilishlari, ko‘rishning buzilishi, taxikardiya, diskineziya, ta’m bilishning buzilishi va boshqalar.

Psixomotor funksiyalarni baholash uchun obyektiv testlar o‘tkazilganda, setirizinning tinchlantiruvchi ta’siri platseboga tenglashtirildi. Kamdan kam hollarda yuqori sezuvchanlik reaksiyalari, bosh og‘rig‘i, uyquchanlik, qo‘zg‘alish, og‘iz qurishi va oshqozon-ichak buzilishlari kuzatilgan, odatda ular kuchsiz ifodalangan va o‘tkinchi bo‘lgan.

Zarurat tug‘ilganda, sutkalik dozani ikkita teng qabulga - ertalab va kechqurun bo‘lish mumkin.

Nojo‘ya ta’sirlar paydo bo‘lganda shifokorga murojaat qiling.

Qarshi ko‘rsatmalar

Preparat komponentlariga yuqori sezuvchanlik.

Galaktozani irsiy ko‘tara olmaslik yoki glyukoza-galaktoza malabsorbsiyasi sindromi.

Buyrak yetishmovchiligining terminal bosqichi (kreatinin klirensi 10 ml/daqiqadan kam).

6 yoshgacha bo‘lgan bolalar yoshi.

Homiladorlik va laktatsiya davri.

Dorilarning o‘zaro ta’siri

Dorilarning bir-biriga mos kelmasligi aniqlanmadi. Diazepam va simetidin bilan birgalikda qo‘llash bo‘yicha o‘tkazilgan tadqiqotlar dorilarning mos kelmasligini aniqlamadi. Setirizin terapevtik dozalarda (qonda 0,8 g/l) alkogol ta’sirini kuchaytirmaydi. Teriksni sedativ va antixolinergik vositalar bilan birga qo‘llashda ehtiyot bo‘lish kerak, chunki ular setirizinning nojo‘ya ta’sirini kuchaytirishi mumkin.

Maxsus ko‘rsatmalar

Ishida diqqat-e’tibor talab qilinadigan shaxslar preparatning tavsiya etilgan dozasini oshirmasliklari kerak.

Buyrak yetishmovchiligi bo‘lgan bemorlarga sutkalik dozaning yarmi beriladi.

Preparat ehtiyotkorlik bilan qo‘llanadi:

jigar yetishmovchiligida;

siydik ajralishini to‘xtatishga moyillik bo‘lganda;

epilepsiyada, shuningdek, tutqanoqqa moyillikda.

Homiladorlik va laktatsiya davrida qo‘llash

Hayvonlarda o‘tkazilgan tajribalarda preparatning birorta ham teratogen ta’siri aniqlanmadi. Biroq, homilador ayollarda Teriksni qo‘llash mumkin emas.

Ko‘krak sutiga o‘tishi munosabati bilan laktatsiya davrida qo‘llanilmaydi.

Avtomobil va murakkab mexanizmlarni boshqarish qobiliyatiga ta’siri

Klinik tadqiqotlar davomida preparatni qabul qilishda uyquchanlik holatlari kuzatilganligi sababli, transport vositalari va mexanizmlarni boshqarishda ehtiyotkorlik talab etiladi.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

50 mg setirizin bir marta qabul qilinganda uyquchanlik va gipotenziya kuzatilishi mumkin. Doza oshirib yuborilganda boshqa tadbirlar bilan bir qatorda oshqozonni yuvish zarur. Maxsus antidot yo‘q. Antixolinergik ta’sir bilan bog‘liq intoksikatsiya simptomlarida fizostigmin buyurish mumkin.

Chiqarish shakli

Blisterda qobiq bilan qoplangan 10 ta tabletka. 1 ta blister qo‘llanmasi bilan birgalikda karton qutiga qadoqlangan.

Chiqarishning boshqa shakllari

Teriks siropi 5 mg/5 ml, shisha flakonda 100 ml.

Saqlash shartlari

25 °C dan yuqori bo‘lmagan haroratda, asl qadoqda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

Ali Raif Iloch San. A. SH.

Ikitelli OSB Mahallasi

Jaddi No3/1A

Bashakshehir/Istanbul/Turkiya