Emkor 10

Tarkib

Emkor 2,5 preparatining qobiq bilan qoplangan bitta tabletkasi quyidagilarni o‘z ichiga oladi:

Faol moddasi: 2,5 mg bisoprolol fumarat.

Emkor 5 preparatining qobiq bilan qoplangan bitta tabletkasi quyidagilarni o‘z ichiga oladi:

Faol moddasi: 5 mg bisoprolol fumarat.

Emkor 10 preparatining qobiq bilan qoplangan bitta tabletkasi quyidagilarni o‘z ichiga oladi:

Faol modda: 10 mg bisoprolol fumarat.

Yordamchi moddalar: jelatinlangan kraxmal (Uni-pure DW-L), polivinilpirrolidon, jelatinlangan kraxmal (Uni-pure WG 220), mikrokristallik sellyuloza, kalsiy gidrofosfat, kremniy dioksidi, magniy stearati.

Chiqarish shakli

Qobiq bilan qoplangan 2,5 mg, 5 mg yoki 10 mg li tabletkalar, o‘ramda 30 ta tabletka.

Farmakoterapevtik guruh

Antigipertenziv vosita (beta1-adrenoblokator). ATX kodi: C07AB07.

Farmakologik xususiyatlari

Ichki simpatomimetik faollikka va membranani barqarorlashtiruvchi xususiyatlarga ega bo‘lmagan selektiv beta1-adrenoblokator. Yurak qisqarishlari chastotasi va kuchini (tinch holatda va zo‘riqishda) hamda yurak haydashini kamaytiradi, bunda zarb hajmi sezilarli darajada kamaymaydi. AV o‘tkazuvchanlikni susaytiradi, buyraklar tomonidan renin sekretsiyasini kamaytiradi, miokardning kislorodga bo‘lgan ehtiyojini kamaytiradi. Antiaritmik, gipotenziv va antianginal ta’sir ko‘rsatadi.

Farmakokinetika

Ichga qabul qilingandan so‘ng bisoprolol MIYdan yaxshi so‘riladi. Biosinguvchanligi 90% atrofida bo‘lib, ovqatlanishga bog‘liq emas. Qon plazmasi oqsillari bilan bog‘lanishi taxminan 30% ni tashkil etadi. Jigar orqali "birinchi o‘tish" effekti sezilarli darajada emas. T1/2 10-12 soatni tashkil etadi.

Qo‘llanilishi

arterial gipertenziya;

yurak ishemik kasalligi (stenokardiya);

surunkali yurak yetishmovchiligi

Qo‘llash usuli va dozalari

Doza individual ravishda, davolash samaradorligi va puls chastotasini hisobga olgan holda tanlanadi.

Arterial gipertenziya va yurak ishemik kasalligi bilan og‘rigan bemorlarga sutkalik doza 2,5-10 mg, sutkasiga 1 marta buyuriladi. Boshlang‘ich doza 2,5 mg 1 marta/sutka, maksimal sutkalik doza - 10 mg 1 marta/sutka. Doza asta-sekin titrlash usuli bilan oshiriladi.

Jigar yoki buyrak faoliyatining yengil yoki o‘rta darajadagi buzilishlari bo‘lgan bemorlarda, shuningdek, keksa yoshdagi bemorlarda odatda dozalarni tanlash talab etilmaydi.

Surunkali yurak yetishmovchiligini davolashda (oxirgi 6 hafta davomida qo‘zg‘alishsiz barqarorlashgan holatda) quyidagi dozalash tartibi tavsiya etiladi: boshlang‘ich doza birinchi hafta davomida kuniga bir marta 1,25 mg ni tashkil etadi, qabul qilishning ikkinchi haftasi davomida kuniga 2,5 mg, uchinchi haftada kuniga 3,75 mg, to‘rtinchi haftadan sakkizinchi haftagacha - 5 mg, keyin doza 7,5 mg gacha oshiriladi, davolashning o‘n ikkinchi haftasidan keyin maksimal doza - 10 mg buyuriladi.

Shifokor individual chidamlilikka qarab dozalash tartibini o‘zgartirishi mumkin.

Emkorni ertalab och qoringa yoki nonushta paytida, oz miqdordagi suyuqlik bilan qabul qilish tavsiya etiladi.

Emkor preparati bilan davolashni to‘satdan to‘xtatish mumkin emas, davolash kursi, odatda, dozani asta-sekin pasaytirish bilan asta-sekin tugallanishi kerak. Barcha holatlarda dori bilan davolash davomiyligini shifokor belgilaydi.

Nojo‘ya ta’sirlari

Davolash kursining boshida vaqtincha markaziy asab tizimining buzilishlari paydo bo‘lishi mumkin: holsizlik, charchash, bosh aylanishi, bosh og‘rig‘i, uyquning buzilishi, ruhiyatning buzilishi.

Yurak-qon tomir tizimi tomonidan: ortostatik gipotenziya, bradikardiya, AV o‘tkazuvchanlikning buzilishi, qo‘l-oyoqlarda sovuqlik va paresteziya hissi, vaqti-vaqti bilan oqsoqlanish va Reyno sindromidagi asosiy klinik belgilarning kuchayishi.

Tayanch-harakat tizimi tomonidan: ayrim hollarda mushaklar kuchsizligi, mushaklar tortishishi.

Ko‘rish a’zolari tomonidan: ko‘z yoshi suyuqligi sekretsiyasining kamayishi, konyunktivit.

Oshqozon-ichak yo‘li tomonidan: ayrim hollarda ich ketishi, qabziyat, ko‘ngil aynishi, qorin og‘rig‘i.

Ayrim hollarda: teri qichishishi va terining qizarishi, terlash, qandli diabet bilan og‘rigan bemorlarda glyukozaga tolerantlikning pasayishi, allergik reaksiyalar; psoriaz belgilarining kuchayishi, psoriazsimon toshmalarning paydo bo‘lishi.

Moyil bemorlarda bronxial obstruksiya belgilari paydo bo‘lishi mumkin.

Qarshi ko‘rsatmalar

Kardiogen shok, II va III darajali AV blokada, sinus tugunining zaiflik sindromi, sinoatrial blokada, bradikardiya (puls daqiqasiga 50 martadan kam), arterial gipotenziya (SAB 90 mm sim.ust.dan kam); bronxospazmga moyillik (bronxial astma va bronxoobstruktiv sindromli boshqa kasalliklar), periferik qon aylanishining yaqqol buzilishlari; MAO ingibitorlarini (MAO-V ingibitorlaridan tashqari) bir vaqtda qabul qilish, bisoprolol va boshqa beta-adrenoblokatorlarga yuqori sezuvchanlik. Surunkali yurak yetishmovchiligi bo‘lgan bemorlarda preparatni yurak yetishmovchiligi zo‘rayganda yoki yurak yetishmovchiligining dekompensatsiya epizodlari paytida qabul qilmaslik kerak, bunda inotrop preparatlarni vena ichiga yuborish talab etiladi; shuningdek, bradikardiya (puls daqiqasiga 60 tadan kam) va gipotenziyada (SAB simob ustuni bo‘yicha 100 mm dan kam), homiladorlik va laktatsiya davrida, bolalik yoshida.

Dorilarning o‘zaro ta’siri

Bisoprolol boshqa gipotenziv vositalarning, shuningdek, gipotenziv ta’sir ko‘rsatishi mumkin bo‘lgan preparatlarning ta’sirini kuchaytirishi mumkin. Rezerpin, alfa-metildopa, klonidin, angishvonagul yoki guanfatsin bilan bir vaqtda qo‘llanganda kuchli bradikardiya kuzatilishi mumkin. Bisoprololni qabul qilish fonida v/i kalsiy kanallari blokatorlari va antiaritmik vositalarni buyurmaslik kerak. Ergotamin hosilalarini bir vaqtda qabul qilish periferik qon aylanishining buzilishini kuchaytirishi mumkin. Bir vaqtning o‘zida insulin yoki boshqa gipoglikemik vositalar qo‘llanilganda, ularning ta’siri kuchayishi mumkin.

Maxsus ko‘rsatmalar

Yo‘ldosh psoriazda, oilaviy anamnezda psoriazga ko‘rsatmalar bo‘lganda, dekompensatsiya bosqichidagi qandli diabetda, allergik reaksiyalarga moyil bemorlarda ehtiyotkorlik bilan qo‘llaniladi. Feoxromotsitomada bisoprololni faqat alfa-adrenoblokatorlarni qabul qilgandan so‘ng qo‘llash mumkin.

Jarrohlik amaliyotidan oldin anesteziologni bisoprolol bilan davolash haqida xabardor qilish kerak.

Davolanish davrida spirtli ichimliklarni iste’mol qilmaslik kerak.

Faoliyati diqqatni jamlash zarurati va psixomotor reaksiyalarning yuqori tezligi bilan bog‘liq bo‘lgan bemorlarda ehtiyotkorlik bilan qo‘llaniladi.

Homiladorlik va laktatsiya

Homiladorlikda, emizish davrida, shuningdek, bolalarda qo‘llash tavsiya etilmaydi. Homiladorlikda bisoprololni qo‘llashni istisno hollarda bradikardiya, arterial gipotenziya, gipoglikemiya va yangi tug‘ilgan chaqaloqda nafas olishning susayishi ehtimoli tufayli tug‘ruqning kutilayotgan muddatidan 72 soat oldin to‘xtatish kerak. Agar to‘xtatishning iloji bo‘lmasa, tug‘ruqdan keyin 72 soat davomida chaqaloqning holatini diqqat bilan nazorat qilish kerak.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Bradikardiya, arterial gipotenziya, yurak yetishmovchiligi, bronxospazm bilan namoyon bo‘luvchi preparatning dozasi oshirib yuborilganda yoki yurak qisqarishlari chastotasi xavf tug‘diruvchi darajada sekinlashganda davolash to‘xtatilishi kerak. Bunda oshqozonni yuvish, faollashtirilgan ko‘mir qabul qilish va zudlik bilan shifokorga murojaat qilish lozim.

Saqlash shartlari

10-25 °C haroratda saqlanadi.

Yaroqlilik muddati

3 yil.

Dorixonalardan berish shartlari

Shifokor retsepti bo‘yicha!

Ishlab chiqaruvchi

GM Pharmaceuticals Ltd.

Gruziya, Tbilisi shahri, Ponichala 65

Tel.: +995-32-2404801/02; Faks: +995-32-2404803