Reosorbil

Tarkib

1 ml eritmada quyidagilar mavjud:

faol moddalar: sorbitol 60,0 mg, natriy laktat (100% moddaga qayta hisoblaganda) 19,0 mg, natriy xlorid 6,0 mg, kalsiy xlorid digidrat (kalsiy xloridga qayta hisoblaganda) 0,1 mg, kaliy xlorid 0,3 mg, magniy xlorid geksagidrat (magniy xloridga qayta hisoblaganda) 0,2 mg;

yordamchi modda: inyeksiya uchun suv.

Nazariy osmolyarlik - 891 mOsmol/l; pH 6,00-7,60.

Ion tarkibi: 1 l preparat tarkibida: Na+ - 272,20 mmol, K+ - 4,02 mmol, Ca++ -0,90 mmol, Mg++ - 2,10 mmol, Cl - 112,69 mmol, Lac - 169,55 mmol bo‘ladi.

Dori shakli

Infuziya uchun eritma.

Farmakologik xususiyatlari

Farmakodinamika

Reosorbil-SEEM reologik, shokka qarshi, dezintoksikatsion hamda ishqorlovchi ta’sirga ega bo‘lib, ichak peristaltikasini rag‘batlantiradi. Preparatning asosiy farmakologik faol moddalari sorbitol va natriy laktat hisoblanadi. Jigarda sorbitol dastlab fruktozaga aylanadi, keyinchalik u glyukozaga, keyin esa glikogenga aylanadi. Sorbitolning bir qismi shoshilinch energetik ehtiyojlar uchun ishlatiladi, boshqa qismi glikogen ko‘rinishida zaxira sifatida to‘planadi. Sorbitolning izotonik eritmasi dezagregant ta’sirga ega bo‘lib, shu tariqa to‘qimalarning mikrotsirkulyatsiyasi va perfuziyasini yaxshilaydi.

Bikarbonat eritmasidan farqli o‘laroq, natriy laktat yordamida metabolik atsidozni tuzatish uning modda almashinuviga qo‘shilishi bilan sekinroq kechadi, pH ning keskin o‘zgarishlari yuzaga kelmaydi. Natriy laktatning ta’siri yuborilganidan 20-30 daqiqa o‘tgach namoyon bo‘ladi.

Natriy xlorid regidrogenlovchi ta’sirga ega. Turli patologik holatlarda natriy va xlor ionlari tanqisligini to‘ldiradi.

Kalsiy xlorid kalsiy ionlari tanqisligini to‘ldiradi. Kalsiy ionlari nerv impulslarini uzatish jarayonini amalga oshirish, skelet va silliq mushaklarning qisqarishi, miokard faoliyati, suyak to‘qimasining shakllanishi, qonning ivishi uchun zarurdir. Hujayralar va qon tomir to‘rining o‘tkazuvchanligini pasaytiradi, yallig‘lanish reaksiyalari rivojlanishining oldini oladi, organizmning infeksiyalarga chidamliligini oshiradi.

Kaliy xlorid suv-elektrolit muvozanatini tiklaydi. Salbiy xrono- va batmotrop ta’sirga, yuqori dozalarda - salbiy ino-, dromotrop va o‘rtacha diuretik ta’sirga ega. Nerv impulslarini o‘tkazish jarayonida ishtirok etadi. Atsetilxolin miqdorini oshiradi va vegetativ asab tizimining simpatik qismini qo‘zg‘atadi. Mushak distrofiyasi, miasteniyada skelet mushaklarining qisqarishini yaxshilaydi.

Farmakokinetika

Sorbitol umumiy metabolizmga tez qo‘shiladi, uning 80-90 foizi jigarda utilizatsiya qilinadi va glikogen ko‘rinishida to‘planadi, 5 foizi miya to‘qimalari, yurak mushaklari va skelet mushaklarida to‘planadi, 6-12 foizi siydik bilan chiqariladi. Tomir o‘zaniga yuborilganda natriy laktatdan natriy, CO2 va H2O ajralib chiqadi, ular natriy bikarbonatni hosil qiladi, bu esa qonning ishqoriy zaxirasining ko‘payishiga olib keladi. Yuborilgan natriy laktatning faqat yarmi (L izomeri) faol hisoblanadi, ikkinchi yarmi (D izomeri) esa metabolizmga uchramaydi va siydik bilan chiqariladi. Natriy xlorid qon tomir o‘zanidan tezda chiqib ketadi, faqat vaqtincha aylanib yuruvchi qon hajmini oshiradi. Diurezni kuchaytiradi.

Qo‘llanilishi

travmatik, jarrohlik, gemolitik, toksik va kuyish shokining oldini olish va davolash maqsadida kapillyar qon oqimini yaxshilash uchun;

intoksikatsiya bilan kechadigan o‘tkir qon yo‘qotish, kuyish kasalligi, yuqumli kasalliklarda;

surunkali gepatit, sepsis qo‘ziganda;

operatsiyadan oldingi va operatsiyadan keyingi davrda;

trombozlar, tromboflebitlar, endarteriitlar, Reyno kasalligining oldini olish maqsadida arterial va venoz qon aylanishini yaxshilash uchun.

Qo‘llash usuli va dozalari

Reosorbil-SEEM kattalarga vena ichiga 40-60 tomchi/daqiqa tezlikda tomchilab yuboriladi. Zarurat tug‘ilganda, sinama o‘tkazilgandan so‘ng preparatni 30 tomchi/daqiqa tezlikda tomchilab yuborishga yo‘l qo‘yiladi. 15 tomchi tomizilgandan so‘ng preparatni qo‘llash to‘xtatiladi, 3 daqiqadan so‘ng reaksiya bo‘lmaganda Reosorbil-SEEM oqimli yuboriladi.

Nojo‘ya ta’sirlari

Immun tizimi tomonidan: anafilaktoid reaksiyalar, angionevrotik shish, gipertermiya.

Yurak-qon tomir tizimi tomonidan: qon bosimining ko‘tarilishi yoki pasayishi, taxikardiya, hansirash, akrotsianoz.

Nevrologik buzilishlar: tremor, bosh og‘rig‘i, bosh aylanishi, umumiy holsizlik.

Teri va teri osti kletchatkasidagi o‘zgarishlar: teri toshmalari, eshakemi, qichishish hissi.

Oshqozon-ichak buzilishlari: ko‘ngil aynishi, qusish.

Umumiy buzilishlar: yuborilgan joydagi o‘zgarishlar, jumladan og‘riq va achishish.

Qarshi ko‘rsatmalar

Preparat komponentlariga nisbatan individual yuqori sezuvchanlik. Reosorbil-SEEM alkalozda, shuningdek, katta hajmdagi suyuqlik quyish mumkin bo‘lmagan hollarda (miyaga qon quyilishi, tromboemboliya, yurak-qon tomir dekompensatsiyasi, III darajali arterial gipertenziya, dekompensatsiyalangan yurak nuqsonlari, terminal buyrak yetishmovchiligi), suvsizlanish, oliguriya holatlarida qo‘llanilmaydi.

Dozani oshirib yuborish

Alkaloz hodisalari yuzaga keladi, ular preparatni yuborishni darhol to‘xtatish sharti bilan tezda o‘z-o‘zidan yo‘qoladi, ba’zan kollaps, suvsizlanish (diurez kuchayishi hisobiga) kuzatiladi. Yuborish tezligi oshirilganda taxikardiya rivojlanishi, arterial bosim ko‘tarilishi, hansirash, bosh og‘rig‘i, to‘sh orqasida og‘riq, qorinda og‘riq kuzatilishi mumkin. Ko‘rsatilgan alomatlar eritmani yuborish to‘xtatilgandan yoki tezligi sezilarli darajada kamaygandan so‘ng tezda yo‘qoladi.

Maxsus ko‘rsatmalar

Preparat qondagi kislota-ishqor holati va elektrolitlar ko‘rsatkichi, jigarning funksional holati va arterial bosim nazorati ostida qo‘llaniladi. Kalkulyoz xoletsistit bilan og‘rigan bemorlarga ehtiyotkorlik bilan yuborilsin.

Preparat tarkibida sorbit mavjud, shuning uchun kam uchraydigan irsiy fruktozani ko‘tara olmaslik bilan og‘rigan bemorlar ushbu preparatni qo‘llashlari kerak emas.

Homiladorlik yoki emizish davrida qo‘llash

Homiladorlik yoki emizish davrida qarshi ko‘rsatmalar haqida ma’lumotlar yo‘q.

Bolalar

Bolalarga yuborish tajribasi haqida ma’lumotlar yetarli emas.

Avtotransport yoki boshqa mexanizmlarni boshqarishda reaksiya tezligiga ta’sir qilish qobiliyati

Preparat shifoxona sharoitida qo‘llanilgani sababli, bunday ta’sirlar haqida ma’lumotlar yo‘q.

Preparat yaroqlilik muddati tugagandan so‘ng qo‘llanilmasligi va bolalar qo‘li yetmaydigan joyda saqlanishi lozim.

Dorilarning o‘zaro ta’siri

Boshqa dori vositalari uchun erituvchi-tashuvchi sifatida ishlatilmasin.

Chiqarilish shakli, o‘rami

Infuziya uchun eritma 100 ml, 250 ml, 500 ml (flakonlar).

Saqlash shartlari

Quruq, yorug‘likdan himoyalangan joyda, 25 °C dan yuqori bo‘lmagan haroratda saqlang.

Yaroqlilik muddati

2 yil.

Ishlab chiqaruvchi

Samarkand England Eco-Medical, QK MCHJ, O‘zbekiston