Loperamid gidroxlorid

Tarkib

Har bir kapsulada quyidagilar mavjud:

ta’sir etuvchi modda - loperamid gidroxlorid - 2 mg;

yordamchi moddalar: laktoza monogidrati, makkajo‘xori kraxmali, magniy stearati. Kapsula tarkibi: jelatin, metil paragidroksibenzoat E 218, propil paragidroksibenzoat E 216, titan dioksidi E 171.

Tavsif

Kapsulalari qattiq jelatin, silindrsimon shaklda, yarim sferik uchlari oq rangda. Kapsulalar tarkibi - oq yoki sarg‘ish tusli oq granula.

Farmakologik xususiyatlari

Farmakodinamika

Loperamid periferik opioid retseptorlarining agonisti hisoblanadi. Uning antagonisti nalokson hisoblanadi. Loperamid atsetilxolin va prostaglandinlar ajralib chiqishini susaytiradi, propulsiv peristaltikani kamaytiradi, ichidagining ichakdan o‘tish vaqtini, shuningdek, ichak devorining suyuqlikni so‘rish qobiliyatini oshiradi. Loperamid ichak devorlari uchun yuqori darajada o‘ziga xos bo‘lib, tizimli qon aylanishiga cheklangan miqdorda yetib boradi va gematoensefalik to‘siq (GEB) orqali deyarli o‘tmaydi. Markaziy ta’sir chegarasi diareyaga nisbatan maksimal ta’sir ko‘rsatadigan dozadan ancha yuqori bo‘ladi. Loperamid anal sfinkterining tonusini oshiradi, najas tuta olmaslik va defekatsiyaga bo‘lgan ehtiyojni kamaytiradi. Xavfsizlik bo‘yicha klinikagacha bo‘lgan ma’lumotlar In vitro va in vivo klinikagacha bo‘lgan tadqiqotlar davomida terapevtik diapazondagi loperamid konsentratsiyasida, shuningdek uning sezilarli darajada (47 martagacha) oshishida loperamidning yurakka sezilarli elektrofiziologik ta’siri kuzatilmadi. Biroq, dozani oshirib yuborish bilan bog‘liq bo‘lgan haddan tashqari yuqori konsentratsiyalarda ("Ehtiyot choralari" bo‘limiga qarang), loperamid yurakka elektrofiziologik ta’sir ko‘rsatib, kaliy (hERG) va natriy kanallarining blokadasi hamda aritmiyani keltirib chiqaradi.

Farmakokinetika

So‘rilishi Loperamidning ko‘p qismi ichakda so‘riladi, ammo yuqori darajadagi metabolizm tufayli jigar orqali birinchi o‘tishda tizimli biosinguvchanligi taxminan 0,3% ni tashkil etadi. Taqsimot Loperamidning kalamushlarda taqsimlanishini o‘rganish natijalari ichak devoriga nisbatan yuqori affinlikni, asosan bo‘ylama mushak qavatining retseptorlari bilan bog‘lanishini ko‘rsatadi. Klinikadan oldingi ma’lumotlar loperamidning R-glikoprotein substrati ekanligini ko‘rsatdi. Plazma oqsillari bilan bog‘lanishi (asosan albumin bilan) - 95%. Loperamid gematoensefalik to‘siq (GEB) orqali deyarli o‘tmaydi. Metabolizm Loperamid deyarli to‘liq jigar tomonidan ajratib olinadi, u yerda konyugatsiya orqali metabolizmga uchraydi va keyin o‘t bilan chiqariladi. Asosiy metabolik yo‘l - asosan CYP3A4 va CYP2C8 vositachiligidagi oksidlanish N-demetillanishidir. Birinchi o‘tishning juda kuchli ta’siri tufayli loperamidning plazmadagi konsentratsiyasi juda past bo‘ladi. Chiqarilishi Yarim chiqarilish davri 9-14 soat (o‘rtacha 11 soat). O‘zgarmagan loperamid va uning metabolitlarining ekskretsiyasi asosan najas bilan sodir bo‘ladi. Bolalar populyatsiyasi: bolalar populyatsiyasida farmakokinetik tadqiqotlar o‘tkazilmagan. Loperamidning farmakokinetik xususiyatlari va dori vositalarining loperamid bilan o‘zaro ta’siri kattalarda qayd etilganlarga o‘xshash bo‘lishi kutilmoqda.

Qo‘llanilishi

O‘tkir diareyani simptomatik davolash. Turli etiologiyali surunkali diareyani simptomatik davolash. Sayohatchilar ich ketishini davolash. Davolashning davomiyligi 2 kun. Shunday bo‘lsa-da, isitma chiqqanda yoki axlatda qon aralashgan bo‘lsa, kasallik qo‘zg‘atuvchisi aniqlangunga qadar dori vositasini qabul qilishni to‘xtatish tavsiya etiladi.

Qo‘llash usuli va dozalari

Ichga, chaynamay, suv bilan ichish. O‘tkir diareyada kattalar va keksa yoshdagi bemorlarga boshlang‘ich dozada 4 mg (2 kapsula); keyinchalik - suyuq ich kelganda har bir defekatsiyadan keyin 2 mg (1 kapsula) buyuriladi. Surunkali diareyada kattalar va keksa yoshdagi bemorlarga boshlang‘ich dozada 4 mg/sut (2 kapsula) buyuriladi. Keyinchalik doza shunday o‘zgartiriladiki, najas chastotasi kuniga 1-2 marta bo‘lishi kerak, bunga odatda qo‘llab-quvvatlovchi doza 2-12 mg/kun (1-6 kapsula) bo‘lganda erishiladi. Keksa yoshdagi shaxslar Keksa yoshdagi bemorlarda dozani tuzatish talab etilmaydi. Buyrak faoliyatining buzilishi Buyrak faoliyati buzilgan bemorlarda dozani tuzatish talab etilmaydi. Jigar funksiyasining buzilishi Jigar funksiyasi buzilgan bemorlarda farmakokinetika to‘g‘risida ma’lumotlar yo‘qligiga qaramay, bunday bemorlarni davolash uchun dori vositasi ehtiyotkorlik bilan qo‘llaniladi, chunki ularda loperamid gidroxloridning tizim oldi metabolizmi pasayadi ("Ehtiyot choralari" bo‘limiga qarang). Agar o‘tkir diareya terapiyasi boshlangandan 48 soat o‘tgach klinik yaxshilanish kuzatilmasa, dori vositasini qabul qilish to‘xtatiladi. Diareya mavjud bo‘lganda shuni yodda tutish kerakki, davolashning muhim tarkibiy qismi suyuqlik va elektrolitlarni to‘ldirishdir, ayniqsa bolalarda. Kattalarda o‘tkir va surunkali diareyada maksimal sutkalik doza - 16 mg (8 kapsula). Normal ich kelishi paydo bo‘lganda yoki ich kelishi 12 soatdan ortiq bo‘lmaganda dori vositasi bekor qilinadi. Bolalar 6 yoshdan 17 yoshgacha bo‘lgan bolalar va o‘smirlar O‘tkir ich ketishni davolashning boshida va har bir suyuq ich kelishidan keyin 2 mg loperamid gidroxlorid qabul qilinadi, bu 1 kapsulaga to‘g‘ri keladi. Surunkali diareyani davolash uchun doza kuniga 2 mg loperamid gidroxloridni tashkil etadi, bu 1 kapsulaga to‘g‘ri keladi. Bolalarda o‘tkir va surunkali diareyani davolash uchun maksimal doza tana vazniga qarab hisoblanadi (6 mg/20 kg = 3 kapsula/20 kg), lekin u sutkasiga 16 mg loperamid gidroxloriddan oshmasligi kerak, bu 8 kapsulaga to‘g‘ri keladi. 6 yoshgacha bo‘lgan bolalar Ushbu dori vositasini 6 yoshgacha bo‘lgan bolalarga ta’sir etuvchi moddaning yuqori miqdori va dori shaklining o‘ziga xos xususiyatlari tufayli buyurish mumkin emas.

Homiladorlik va laktatsiya davrida qo‘llash

Loperamid homiladorlikning I trimestrida qo‘llash mumkin emas. Teratogen yoki embriotoksik ta’sir ko‘rsatmalari bo‘lmasa-da, homiladorlikning II va III trimestrlarida loperamidni faqat ona uchun terapiyaning taxminiy foydasi homila uchun potensial xavfdan yuqori bo‘lgan hollardagina buyurish mumkin. Loperamid oz miqdorda ko‘krak suti bilan ajraladi, shuning uchun laktatsiya davrida preparatni qo‘llash zarur bo‘lsa, emizishni to‘xtatish kerak.

Avtotransportni boshqarish va mexanizmlarni boshqarish qobiliyatiga ta’siri

Davolanish davrida transport vositasini boshqarishdan va diqqatning yuqori konsentratsiyasini hamda psixomotor reaksiyalarning yuqori tezligini talab qiladigan potensial xavfli faoliyat turlari bilan shug‘ullanishdan tiyilish lozim.

Ehtiyot choralari

Laktoza miqdori tufayli dori vositasi kam uchraydigan tug‘ma galaktozani ko‘tara olmaslik, laktaza tanqisligi yoki glyukoza-galaktoza malabsorbsiyasi sindromi bo‘lgan bemorlarga tavsiya etilmaydi. Ich qotishi yoki qorin dam bo‘lishi kuzatilganda, dori vositasini qabul qilishni darhol to‘xtatish lozim. Diareyani loperamid bilan davolash faqat simptomatik xarakterga ega bo‘lganligi sababli, shu bilan bir qatorda, iloji boricha etiotrop vositalarni qo‘llash zarur. Ich ketganda, ayniqsa bolalarda, gipovolemiya va elektrolitlar miqdori kamayishi mumkin. Bunday hollarda suyuqlik va elektrolitlarni to‘ldirish uchun o‘rinbosar terapiya eng muhim hisoblanadi. O‘tkir diareyada, agar 48 soat ichida klinik yaxshilanish kuzatilmasa, loperamidni qabul qilishni to‘xtatish va diareyaning infeksion genezini istisno qilish kerak. Axlati qon aralash ich ketganda va isitmasi ko‘tarilganda qo‘llanilmaydi. OITS bilan og‘rigan bemorlar qorin dam bo‘lishi alomatlari paydo bo‘lganda darhol davolanishni to‘xtatishlari lozim. Ayrim hollarda ham virusli, ham bakterial tabiatli infeksion kolitli OITS bilan og‘rigan bemorlarda loperamid bilan davolashda yo‘g‘on ichakning toksik kengayishi rivojlanishi mumkin. Buyrak faoliyati buzilgan bemorlarni davolashda loperamid dozasini kamaytirish shart emas. Davolanish davrida parhezga rioya qilish va suyuqlik to‘ldirish tavsiya etiladi. Loperamidni tibbiy qo‘llash bo‘yicha yo‘riqnomada tavsiya etilgan dozadan ortiq qabul qilinganda, shuningdek, noto‘g‘ri qo‘llanilganda yoki suiiste’mol qilinganda (qasddan yoki tasodifan) yurak faoliyatining buzilishi, shu jumladan QT intervalining uzayishi va piruet tipidagi qorincha taxikardiyasi (torsades de pointes) haqida xabarlar olingan. Ba’zi hollarda o‘lim holatlari qayd etilgan ("Dozani oshirib yuborish" bo‘limiga qarang). Bemorlar preparatning tavsiya etilgan dozasi va qabul qilish davomiyligini oshirmasliklari kerak.

Boshqa dorilar bilan o‘zaro ta’siri

Bolalarda MNTga susaytiruvchi ta’sirga ega bo‘lgan dori vositalari bilan birga qo‘llashdan saqlanish kerak. Klinikadan oldingi ma’lumotlarga ko‘ra, loperamid R-glikoprotein substrati hisoblanadi. Loperamidni (bir martalik dozasi 16 mg) R-glikoprotein ingibitorlari bo‘lgan xinidin yoki ritonavir bilan birgalikda qo‘llash qon plazmasida loperamid konsentratsiyasining 2-3 baravar oshishiga olib keladi. Loperamid tavsiya etilgan dozalarda qo‘llanilganda, R-glikoprotein ingibitorlari bilan bunday farmakokinetik o‘zaro ta’sirning klinik ahamiyati aniqlanmagan. Loperamidni (bir martalik 4 mg dozada) CYP3A4 fermenti va R-glikoprotein ingibitori bo‘lgan itrakonazol bilan bir vaqtda qabul qilish qon plazmasida loperamid konsentratsiyasining 3-4 baravar oshishiga olib keldi. Xuddi shu tadqiqot doirasida CYP2C8 ingibitori - gemfibrozil qon plazmasida loperamid konsentratsiyasining taxminan 2 baravar oshishiga olib keldi. Itrakonazol va gemfibrozil kombinatsiyasini qo‘llash qon plazmasida loperamidning maksimal darajasini 4 marta, qon plazmasidagi umumiy ekspozitsiyani esa 13 marta oshirdi. Psixomotor testlar (ya’ni subyektiv uyquchanlik hissi testi va raqamli belgilarni almashtirish testi) natijalariga ko‘ra, bu ko‘rsatkichlarning oshishi markaziy asab tizimiga ta’sir ko‘rsatmadi. Loperamidni (bir martalik dozasi 16 mg) CYP3A4 fermenti va P-glikoprotein ingibitori bo‘lgan ketokonazol bilan bir vaqtda qabul qilish qon plazmasida loperamid konsentratsiyasining 5 baravar oshishiga olib keladi. Konsentratsiyalarning bunday oshishi, pupillometriya ma’lumotlariga ko‘ra, dori vositasining farmakodinamik ta’sirining kuchayishi bilan kuzatilmadi. Loperamid va desmopressinni bir vaqtning o‘zida ichish qon plazmasida desmopressin konsentratsiyasining uch baravar oshishiga olib keldi, bu, ehtimol, oshqozon-ichak trakti motorikasining susayishi bilan bog‘liq. Taxminlarga ko‘ra, farmakologik xususiyatlari o‘xshash bo‘lgan preparatlar loperamidning ta’sirini kuchaytirishi, MIY motorikasini kuchaytiruvchi preparatlar esa uning ta’sirini susaytirishi mumkin.

Qarshi ko‘rsatmalar

o‘tkir dizenteriya va oshqozon-ichak traktining (OIT) boshqa infeksiyalari (jumladan, Salmonella spp., Shigella spp., Campylobacter spp.);

ichak tutilishi (shu jumladan, zarurat tug‘ilganda peristaltikani bostirishdan qochish);

divertikulyoz;

o‘tkir yarali kolit;

psevdomembranoz enterokolit (antibiotiklar qabul qilish natijasida kelib chiqqan ich ketishi);

Homiladorlikning I trimestri;

laktatsiya davri (ona suti bilan boqish);

6 yoshgacha bo‘lgan bolalar;

loperamid va/yoki dori vositasining boshqa tarkibiy qismlariga yuqori sezuvchanlik.

Peristaltika susayishining oldini olish zarur bo‘lgan hollarda qo‘llanilmaydi, chunki og‘ir oqibatlar, jumladan ichak tutilishi, megakolon yoki toksik megakolon xavfi mavjud. Agar qabziyat, qorin dam bo‘lishi yoki ichak tutilishi rivojlansa, loperamid gidroxloridni qabul qilish darhol to‘xtatiladi. Jigar yetishmovchiligida dori vositasini ehtiyotkorlik bilan buyurish lozim.

Dozani oshirib yuborish

Loperamidni tavsiya etilgan miqdordan yuqori dozada qo‘llashda yurak faoliyatining buzilishi, jumladan QT intervalining uzayishi va "piruet" (torsades de pointes) tipidagi qorincha taxikardiyasi va boshqa jiddiy qorincha aritmiyalari, yurak to‘xtashi, hushdan ketish holatlari kuzatildi. Ba’zi hollarda o‘lim holatlari qayd etilgan. Dozani oshirib yuborish alomatlari quyidagilarni o‘z ichiga olishi mumkin: markaziy asab tizimining susayishi (turg‘unlik, harakat koordinatsiyasining buzilishi, uyquchanlik, ko‘z qorachiqlarining torayishi, mioz, mushak gipertenziyasi, nafas olishning susayishi), ichak tutilishi (ko‘ngil aynishi, qusish, qorin og‘rig‘i, qabziyat), siyishning qiyinlashishi. Davolash: oshqozonni yuvish, faollashtirilgan ko‘mir buyurish (loperamid qabul qilgandan so‘ng 3 soatdan kechiktirmasdan), zarurat tug‘ilganda - o‘pkani sun’iy ventilyatsiya qilish (O‘SV), simptomatik terapiya o‘tkazish. Antidot - nalokson. Loperamidning ta’sir davomiyligi naloksonnikiga qaraganda uzoqroq (1-3 soat) bo‘lganligi sababli, naloksonni qayta tayinlash talab etilishi mumkin. MNTning mumkin bo‘lgan susayishini aniqlash uchun bemorning holatini kamida 48 soat davomida diqqat bilan kuzatib borish zarur.

Saqlash shartlari

Yorug‘lik va namlikdan himoyalangan joyda, 15 °C dan 25 °C gacha haroratda saqlang. Bolalar qo‘li yetmaydigan joyda saqlang.

Chiqarish shakli

Kapsulalar.

Dozalash

2 mg.