Panavir

Tarkib

1 shamchada quyidagilar mavjud:

faol modda: Panavir® (Solanum tuberosum novdalarining polisaxaridlari) - 200 mkg;

yordamchi moddalar: polietilenoksid 1500 (makrogol 1500) - 1,2599 g, polietilenoksid 400 (makrogol 400) - 0,1399 g.

Tavsif

Shamchalar silindrsimon yoki konussimon shaklda, kulrang-oq rangda, yarim shaffof.

Dori shakli

Vaginal shamchalar.

Farmakoterapevtik guruh

Virusga qarshi va immunomodullovchi vosita. ATX kodi: J05AX.

Farmakologik xususiyatlari

Farmakodinamika

Asosiy ta’sir etuvchi modda geksoza glikozid bo‘lib, glyukoza, ramnoza, arabinoza, mannoza, ksiloza, galaktoza, uron kislotalaridan tashkil topgan.

Panavir® preparati virusga qarshi va immunomodullovchi vosita hisoblanadi. 1 va 2-tipdagi oddiy gerpes viruslariga nisbatan virusga qarshi ta’sirga ega.

Organizmning turli infeksiyalarga nospetsifik rezistentligini oshiradi va interferonlar induksiyasiga yordam beradi.

Farmakokinetika

Preparatning kimyoviy tabiati va kichik ta’sir etuvchi dozalari tufayli uning farmakokinetikasi o‘rganilmagan.

Qo‘llanilishi

Ayollarda genital gerpes (kompleks terapiyada).

Qo‘llash usuli va dozalari

Intravaginal. Vaginal shamchalar kechqurun qinga, iloji boricha chuqurroq, oyoqlarni biroz bukkan holda chalqancha yotgan holatda, har kuni 5 kun davomida 1 ta vaginal shamchadan yuboriladi. Shifokor maslahatidan so‘ng takroriy davolash kursini o‘tkazish mumkin.

Nojo‘ya ta’sirlari

Kamdan-kam hollarda allergik reaksiyalar kuzatilishi mumkin.

Shu bilan birga, har qanday nojo‘ya ta’sirlar paydo bo‘lganda preparatni qo‘llashni to‘xtatish va shifokor bilan maslahatlashish lozim.

Agar siz yo‘riqnomada ko‘rsatilmagan boshqa nojo‘ya ta’sirlarni sezsangiz, bu haqda shifokorga xabar bering.

Qarshi ko‘rsatmalar

Preparat komponentlariga yuqori sezuvchanlik, buyrak va taloqning og‘ir kasalliklari, homiladorlik, laktatsiya davri, 18 yoshgacha bo‘lgan yosh.

Boshqa dori vositalari bilan o‘zaro ta’siri

Ro‘yxatga olinmagan.

Maxsus ko‘rsatmalar

Urogenital reinfeksiyaning oldini olish uchun jinsiy sheriklarni bir vaqtda davolash zarur.

Samara bo‘lmasa, tashxisni tasdiqlash kerak.

Transport vositalarini, mexanizmlarni boshqarish qobiliyatiga ta’siri

Preparatni qo‘llash transport vositalarini boshqarishga va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishga ta’sir ko‘rsatmaydi.

Dozani oshirib yuborish

Dozani oshirib yuborish holatlari qayd etilmagan.

Chiqarish shakli

Vaginal shamchalar 200 mkg.

5 ta shamcha kontur katakli o‘ramda, 1 ta kontur katakli o‘ramda, qo‘llash bo‘yicha yo‘riqnoma bilan birga karton qutida.

Saqlash shartlari

Yorug‘lik tushmaydigan quruq joyda, 2 °C dan 25 °C gacha bo‘lgan haroratda.

Bolalar qo‘li yetmaydigan joyda saqlang.

Yaroqlilik muddati

3 yil. Yaroqlilik muddati tugagandan keyin ishlatilmasin.

Dorixonalardan berish shartlari

Retsept bo‘yicha.

Ishlab chiqaruvchi

"Altfarm" MCHJ, Rossiya, 142073, Moskva viloyati, Domodedovskiy tumani, Sudakovo qishlog‘i, "Lesnoye" xo‘jaligi.

Ro‘yxatdan o‘tish guvohnomasi egasi/Iste’molchi da’volarini qabul qiluvchi tashkilot

"Milliy Tadqiqot Kompaniyasi" MCHJ, Rossiya, 301404, Tula viloyati, Suvorov tumani, Varushitsa qishlog‘i, 104-uy, tel./faks: 8-800-555-222-9.