Antagriks

Tarkib

1 tabletka quyidagilarni o‘z ichiga oladi:

faol modda: klopidogrel basilat (ekvivalenti 75 mg klopidogrel);

yordamchi moddalar: aerosil, prejelatinlangan kraxmal, mikrokristallik sellyuloza, krossovidon, stearin kislotasi;

qobiq: Opadry II Pink 31K34111 (laktoza monogidrati, gidroksipropilmetilsellyuloza, titan dioksidi, triatsetin, qizil temir oksidi).

Tavsif

Tabletkalari pushti rangda, dumaloq shaklda, ikki tomoni qavariq, qobiq bilan qoplangan.

Dori shakli

Qobiq bilan qoplangan tabletkalar.

Farmakoterapevtik guruh

Trombotsitlar agregatsiyasi ingibitori. ATX kodi: B01AC04.

Farmakologik xususiyatlari

Klopidogrel pro-dori bo‘lib, uning faol metabolitlaridan biri trombotsitlar agregatsiyasining ingibitori hisoblanadi. Klopidogrel ADFning uning P2Y trombotsitar retseptori bilan bog‘lanishini va keyinchalik GPIIb/IIIa glikoprotein kompleksining ADF bilan bog‘liq faollashuvini selektiv ingibirlaydi, shu bilan trombotsitlar agregatsiyasini susaytiradi.

Bog‘lanishning qaytmasligi natijasida ta’sirga uchragan trombotsitlar hayotining qolgan butun muddati davomida (taxminan 7-10 kun) shikastlanadi va trombotsitlarning normal funksiyasining tiklanishi trombotsitar siklga mos keladigan tezlikda amalga oshiriladi. ADFdan boshqa agonistlar tomonidan chaqirilgan trombotsitlar agregatsiyasi ham ajralib chiqqan ADF ta’sirida amalga oshiriladigan trombotsitlar faollashuvining kuchayishini bloklash orqali bostiriladi.

Faol metabolit CYP2C19 fermentlari yordamida hosil bo‘lganligi sababli, ularning ba’zilari polimorf yoki boshqa dori birikmalari tomonidan bostiriladi, barcha bemorlarda trombotsitlarning bostirilishi yetarli darajada bo‘lmaydi.

Kuniga 75 mg dan takroriy dozalar birinchi kundan boshlab ADF tomonidan chaqirilgan trombotsitlar agregatsiyasining sezilarli darajada pasayishiga olib keldi. Ingibirlovchi ta’sir progressiv ravishda kuchayib bordi va 3-7 kundan keyin muvozanat holatiga yetdi. Muvozanat holati bosqichida kuniga 75 mg dozada kuzatilgan o‘rtacha ingibirlash darajasi 40% dan 60% gacha bo‘lgan. Trombotsitlar agregatsiyasi va qon ketish vaqti asta-sekin dastlabki darajaga qaytdi, odatda davolanish to‘xtatilgandan keyin 5 kun o‘tgach.

Farmakokinetika

So‘rilish. So‘rilish ma’lumotlari 75 mg klopidogrel ichilganda olingan. Klopidogrel bir marta qabul qilingandan so‘ng va kuniga 75 mg dozada ichga qabul qilinganda tez so‘riladi.

Qon plazmasidagi o‘zgarmagan klopidogrelning o‘rtacha Cmax ko‘rsatkichi (75 mg bir martalik dozani ichga qabul qilgandan so‘ng taxminan 2,2-2,5 ng/ml) qabul qilingandan taxminan 45 daqiqa o‘tgach erishiladi. Klopidogrel metabolitlarining buyraklar orqali chiqarilishi ma’lumotlariga ko‘ra, uning so‘rilishi taxminan 50% ni tashkil etadi.

Taqsimot. In vitro sharoitida klopidogrel va uning qonda aylanib yuruvchi asosiy nofaol metaboliti plazma oqsillari bilan qaytar bog‘lanadi (mos ravishda 98% va 94%) va bu bog‘ 100 mg/l konsentratsiyagacha to‘yinmaydi.

Metabolizm. Klopidogrel jigarda jadal metabolizmga uchraydi. In vitro (sun’iy muhitda (probirkada) jarayon yoki reaksiya) va in vivo klopidogrel ikki yo‘l bilan metabolizmga uchraydi: birinchisi - esterazalar va keyingi gidroliz orqali karboksil kislotasining nofaol hosilasi (tizimli qon aylanishida aylanib yuruvchi metabolitlarning 85%) hosil bo‘lishi bilan, ikkinchisi - sitoxrom P450 tizimi orqali. Dastlab klopidogrel oraliq metabolit bo‘lgan 2-oksoklopidogrelgacha metabolizmga uchraydi. 2-oksoklopidogrelning keyingi metabolizmi klopidogrelning faol metaboliti - klopidogrelning tiol hosilasi hosil bo‘lishiga olib keladi. In vitro ushbu faol metabolit asosan CYP2C19 izofermenti yordamida hosil bo‘ladi, ammo uning hosil bo‘lishida boshqa ba’zi izofermentlar, jumladan CYP1A2, CYP2B6 va CYP3A4 ham ishtirok etadi. In vitro tadqiqotlarda ajratib olingan klopidogrelning faol tiol metaboliti trombotsitlar retseptorlari bilan tez va qaytmas bog‘lanib, ularning agregatsiyasini ingibirlaydi.

Antagriks® (300 mg) preparatining bir martalik yuklama dozasini qabul qilgandan so‘ng, klopidogrelning faol metaboliti Cmax darajasi Antagriks® (75 mg) preparatining qo‘llab-quvvatlovchi dozasini 4 kun davomida qabul qilgandan so‘ng 2 baravar yuqori bo‘ladi. Antagriks® preparatini qabul qilgandan so‘ng 30-60 daqiqa o‘tgach, faol metabolitning Cmax ko‘rsatkichiga erishiladi.

Chiqarish. Odam 14S-belgilangan klopidogrelni ichganidan keyin 120 soat ichida olingan preparatning taxminan 50% buyraklar orqali siydik bilan va taxminan 46% ichak orqali axlat massalari bilan chiqariladi. Klopidogrelning 75 mg dozasini bir marta ichgandan so‘ng T1/2 taxminan 6 soatni tashkil etadi. Qonda aylanib yuruvchi asosiy faol bo‘lmagan metabolitning bir marta va takroriy dozalarini qabul qilgandan so‘ng T1/2 8 soatni tashkil etadi.

Farmakogenetikasi. CYP450 ning bir nechta polimorf fermentlari klopidogrelni faollashtiradi. CYP2S19 faol metabolit va oraliq metabolit 2-okso-klopidogrel hosil bo‘lishida ishtirok etadi. Klopidogrel faol metabolitining farmakokinetikasi va antitrombotsitar ta’siri CYP2S19 genotipiga qarab o‘zgaradi. CYP2S19 ning oraliq va yomon metabolizmiga olib keladigan CYP2S19 allellarining ustunligi irq yoki etnik kelib chiqishga qarab farq qildi.

CYP2S19*1 alleli to‘liq ishlaydigan metabolizmga mos keladi, CYP2S19*2 va CYP2S19*3 allellari esa pasaygan funksiyaga mos keladi. CYP2S19*2 va CYP2S19*3 allellari yevropoid irq subyektlarida 85%, monogaloid irq vakillarida esa 99% funktsiyasi pasaygan allellarni tashkil etadi. Funksiyasi pasaygan boshqa allellarga CYP2C19*4, *5, *6, *7 va *8 kiradi, ammo ular umumiy populyatsiyada kamroq tarqalgan. CYP2S19 ning keng tarqalgan fenotiplari va genotiplarining e’lon qilingan chastotasi quyidagi jadvalda keltirilgan.

Chastota (%)

yevropoid irqi (n=1356) negroid irqi (n=966) mongoloid irqi (n=573)

to‘liq metabolizm: CYP2C19*1 /*1 74 66 38

oraliq metabolizm: CYP2C19*1/*2 yoki *1/*3 26 29 50

yomon metabolizm: CYP2C19*2/*2, *2/*3 yoki *3/*3 2 4 14

Oraliq va kuchsiz metabolizatorlarda CYP2S19 metabolizmining pasayishi 300 mg yoki 600 mg yuklama dozalari va 75 mg qo‘llab-quvvatlovchi dozadan keyin faol metabolitning Cmax (maksimal konsentratsiyasi) va egri chiziq ostidagi yuzasini (AUC) 30-50% ga kamaytiradi. Faol metabolitning kamroq ta’siri natijasida trombotsitlarning bostirilishi trombotsitlarning qoldiq faolligidan kamroq yoki yuqoriroq bo‘ladi.

Buyrak funksiyasining buzilishi. Og‘ir buyrak kasalligi bilan og‘rigan bemorlarda kuniga 75 mg klopidogrelning takroriy dozalaridan so‘ng (kreatinin klirensi 5 dan 15 ml/min gacha) adenozindifosfat (ADF) tomonidan qo‘zg‘atilgan trombotsitlar agregatsiyasining bostirilishi sog‘lom shaxslarga qaraganda kuchsizroq (25%), ammo qon ketish vaqtining uzayishi kuniga 75 mg klopidogrel qabul qilgan sog‘lom shaxslarnikiga o‘xshash edi. Klinik chidamlilik barcha bemorlarda yaxshi bo‘ldi.

Jigar faoliyatining buzilishi. Jigar faoliyatining og‘ir buzilishi bo‘lgan bemorlarda klopidogrelning kuniga 75 mg dan 10 kun davomida takroriy dozalaridan so‘ng, ADF tomonidan qo‘zg‘atilgan trombotsitlar agregatsiyasining bostirilishi sog‘lom subyektlarda kuzatilgan bostirilishga o‘xshash bo‘ldi. Qon ketish vaqtining o‘rtacha uzayishi ikkala guruhda ham bir xil bo‘lgan.

Irqiy mansublik. Ushbu izofermentning oraliq va past faolligini ta’minlovchi CYP2C19 izofermenti genlari allellarining tarqalishi turli irqiy guruhlar vakillarida farq qiladi. Mongoloid irqi vakillarida ularning tarqalishi haqida cheklangan adabiyot ma’lumotlari mavjud bo‘lib, bu ularda ishemik asoratlarning rivojlanishida CYP2C19 izofermenti genotiplanishining ahamiyatini baholash imkonini bermaydi.

Qo‘llanilishi

Aterotrombotik asoratlarning oldini olish:

Miokard infarkti (bir necha kundan 35 kungacha bo‘lgan), ishemik insult (7 kundan 6 oygacha bo‘lgan) yoki periferik arteriyalarning okklyuzion kasalligi tashxisi qo‘yilgan katta yoshli bemorlarda.

O‘tkir koronar sindromli katta yoshli bemorlarda:

ST segmentini ko‘tarmasdan (nostabil stenokardiya yoki Q tishchasisiz miokard infarkti), shu jumladan teri orqali koronar aralashuvda (atsetilsalitsil kislotasi bilan birgalikda) stentlash o‘tkazilgan bemorlar.

Dori-darmonlar bilan davolashda ST segmentining ko‘tarilishi (o‘tkir miokard infarkti) va trombolizis o‘tkazish imkoniyati (atsetilsalitsil kislotasi bilan birgalikda).

Bo‘lmachalar fibrillyatsiyasida (miltillovchi aritmiya) aterotrombotik va tromboembolik asoratlarning, shu jumladan insultning oldini olish:

bo‘lmachalar fibrillyatsiyasi (miltillovchi aritmiya) bo‘lgan bemorlarda qon tomir asoratlari rivojlanishining kamida bitta xavf omili mavjud bo‘lib, ular bilvosita antikoagulyantlarni qabul qila olmaydilar va qon ketish xavfi past (atsetilsalitsil kislotasi bilan birgalikda).

Qo‘llash usuli va dozalari

Kattalar va qariyalar: Klopidogrel 75 mg dan kuniga bir marta, ovqatlanishdan qat’i nazar qabul qilinishi kerak.

300 mg li tabletkalar o‘tkir koronar yetishmovchilik sindromi bo‘lgan bemorlarda yuklama doza sifatida qo‘llash uchun mo‘ljallangan.

Xalqaro tavsiyalarda o‘tkir koronar sindrom yuzaga kelganda zudlik bilan 75-325 mg atsetilsalitsil kislotasi va 300 mg klopidogrel bilan yuklama dozasini qabul qilish zarurligi ta’kidlangan.

O‘tkir koronar yetishmovchilik sindromi bilan og‘rigan bemorlarda:

ST segmenti ko‘tarilmagan o‘tkir koronar yetishmovchilik sindromi (beqaror stenokardiya yoki Q tishchasi bo‘lmagan miokard infarkti): davolash 300 mg bir martalik yuklama dozasi bilan boshlanishi, so‘ngra kuniga bir marta 75 mg dozada (atsetilsalitsil kislotasi bilan kuniga 75-325 mg dozada) davom ettirilishi kerak. Atsetilsalitsil kislotasining yuqori dozalari qon ketish xavfini oshirishi sababli, atsetilsalitsil kislotasining dozasini 100 mg dan oshirish tavsiya etilmaydi. Davolashning optimal davomiyligi rasman belgilanmagan. Klinik sinovlar ma’lumotlari sxemani 12 oygacha qo‘llashni tasdiqlaydi va maksimal foyda 3 oydan keyin kuzatiladi.

ST segmenti oshishi bilan kechuvchi o‘tkir miokard infarkti: preparatni 300 mg yuklama dozadan boshlab, atsetilsalitsil kislotasi va boshqa trombolitiklar bilan yoki ularsiz 75 mg ga teng bo‘lgan bir martalik sutkalik dozada qo‘llash lozim. 75 yoshdan oshgan bemorlarda davolanishni yuklama dozasiz boshlash kerak. Kombinatsiyalangan terapiyani quyidagicha boshlash kerak:

Kombinatsiyalangan terapiyani simptomlar paydo bo‘lganidan keyin iloji boricha ertaroq boshlash va kamida to‘rt hafta davomida davom ettirish kerak.

Pediatriyada qo‘llanilishi: bolalar va o‘smirlarda qo‘llashning xavfsizligi va samaradorligi aniqlanmagan.

Buyrak funksiyasining pasayishi: buyrak funksiyasi buzilgan bemorlarni davolash tajribasi cheklangan. Bunday bemorlarga preparatni ehtiyotkorlik bilan qo‘llash lozim.

Jigar funksiyasining buzilishi: gemorragik diatezga moyil, o‘rtacha og‘irlikdagi jigar kasalligi bo‘lgan bemorlarda qo‘llash tajribasi cheklangan. Shu sababli, ushbu populyatsiyada preparatni ehtiyotkorlik bilan qo‘llash lozim.

Nojo‘ya ta’sirlari

JSST ma’lumotlariga ko‘ra, nojo‘ya ta’sirlar ularning rivojlanish chastotasiga ko‘ra quyidagicha tasniflangan: juda tez-tez (≥1/10); tez-tez (≥1/100 dan <1/10 gacha); tez-tez emas (≥1/1000 dan <1/100 gacha); kamdan-kam (≥1/10000 dan <1/1000 gacha); juda kamdan-kam (<1/10000); noma’lum - mavjud ma’lumotlarga ko‘ra, paydo bo‘lish chastotasini aniqlash imkoni bo‘lmadi.

Qon yaratish tizimi va limfa tizimi tomonidan: kamdan-kam hollarda - trombotsitopeniya, leykopeniya, eozinofiliya; kamdan-kam hollarda - neytropeniya, shu jumladan og‘ir neytropeniya; juda kamdan-kam hollarda - trombotik trombotsitopenik purpura (TTP), aplastik anemiya, pansitopeniya, agranulotsitoz, og‘ir trombotsitopeniya, granulotsitopeniya, anemiya.

Immun tizimi tomonidan: juda kam hollarda - zardob kasalligi, anafilaktoid reaksiyalar.

Ruhiy jihatdan: juda kam hollarda - gallyutsinatsiyalar, ongning chalkashligi.

Asab tizimi tomonidan: kamdan-kam hollarda - kalla ichi qon ketishi (o‘lim bilan yakunlangan bir nechta holatlar haqida xabar berilgan), bosh og‘rig‘i, paresteziya, bosh aylanishi; juda kam hollarda - ta’m sezgilarining buzilishi.

Ko‘ruv a’zosi tomonidan: kam hollarda - ko‘zga qon quyilishi (konyunktival, okulyar, retinal).

Eshitish va muvozanat organlari tomonidan: kamdan-kam hollarda - bosh aylanishi.

Yurak-qon tomir tizimi tomonidan: ko‘pincha - gematoma; juda kam hollarda - jarrohlik jarohatidan og‘ir qon ketishi, vaskulit, gipotenziya.

Nafas olish tizimi, ko‘krak qafasi a’zolari va ko‘ks oralig‘i tomonidan: ko‘pincha - burundan qon ketishi; juda kam hollarda - nafas yo‘llaridan qon ketishi (qon tupurish, o‘pkadan qon ketishi), bronxospazm, interstitsial pnevmonit.

Oshqozon-ichak trakti tomonidan: ko‘pincha - oshqozon-ichakdan qon ketishi, diareya, qorinda og‘riq, dispepsiya; kamdan-kam hollarda - oshqozon va o‘n ikki barmoqli ichak yarasi, gastrit, qusish, ko‘ngil aynishi, qabziyat, meteorizm; kamdan-kam hollarda - retroperitoneal qon ketish; juda kam hollarda - o‘limga olib keladigan oshqozon-ichak va retroperitoneal qon ketish, pankreatit, kolit (shu jumladan yarali va limfotsitar kolit), stomatit.

Jigar va o‘t yo‘llari tomonidan: juda kam hollarda - o‘tkir jigar yetishmovchiligi, gepatit, jigar funksional testining patologik ko‘rsatkichlari.

Teri va teri osti to‘qimalarida: ko‘pincha - lat yeyish; kamdan-kam hollarda - toshma, qichishish, teriga qon ketishi (purpura); juda kamdan-kam hollarda - bullyoz dermatit (toksik epidermal nekroliz, Stivens-Jonson sindromi, ko‘p shaklli eritema), angionevrotik shish, eritematoz toshma, eshakemi, ekzema va yassi temiratki.

Tayanch-harakat tizimi tomonidan: juda kam hollarda - skelet-mushak qon ketishi (gemartroz), artrit, artralgiya, mialgiya.

Buyraklar va siydik yo‘llari tomonidan: kam hollarda - gematuriya; juda kam hollarda - glomerulonefrit, qonda kreatinin darajasining oshishi.

Yuborish joyidagi umumiy buzilishlar va buzilishlar: ko‘pincha - punksiya joyida qon ketishi; juda kam hollarda - isitma.

Laborator va instrumental ma’lumotlar: kam hollarda - qon ketish vaqtining uzayishi va tekshiruvda neytrofillar va trombotsitlar sonining kamayishi.

Qarshi ko‘rsatmalar

ta’sir etuvchi moddaga yoki dori vositasining har qanday tarkibiy qismiga yuqori sezuvchanlik;

og‘ir jigar yetishmovchiligi;

o‘tkir patologik qon ketishi, shu jumladan oshqozon va o‘n ikki barmoqli ichak yara kasalligida, qizilo‘ngach yaralarida yoki kalla ichiga qon quyilishida qon ketishi;

homiladorlik va laktatsiya davri;

18 yoshgacha bo‘lgan bolalar va o‘smirlar.

Dorilarning o‘zaro ta’siri

Oral antikoagulyantlar: klopidogrelni oral antikoagulyantlar bilan bir vaqtda qo‘llash tavsiya etilmaydi, chunki bu qon ketishini kuchaytirishi mumkin.

IIb/IIIa glikoprotein ingibitorlari: preparatni jarohat, jarrohlik yoki boshqa patologik holatlar bilan bog‘liq qon ketish xavfi yuqori bo‘lishi mumkin bo‘lgan va IIb/IIIa glikoprotein ingibitorlarini qabul qilayotgan bemorlarda ehtiyotkorlik bilan qo‘llash lozim.

Atsetilsalitsil kislotasi (ASK): ASK klopidogrel tufayli yuzaga keladigan ADF bilan indutsirlangan trombotsitlar agregatsiyasining susayishini o‘zgartirmaydi, aksincha, klopidogrel ASKning kollagen bilan indutsirlangan trombotsitlar agregatsiyasiga ta’sirini kuchaytiradi. Shunga qaramay, ASKni kuniga ikki marta 500 mg dan 1 kun davomida bir vaqtning o‘zida qabul qilish preparatni qabul qilish natijasida qon ketish vaqtining sezilarli darajada oshishiga olib kelmadi. Klopidogrel va ASK o‘rtasida farmakodinamik o‘zaro ta’sir bo‘lishi mumkin, bu qon ketish xavfining oshishiga olib keladi. Demak, bu preparatlarni bir vaqtda qo‘llashda ehtiyot bo‘lish kerak. Shunga qaramay, klopidogrel va ASK birgalikda bir yilgacha buyurildi.

Geparin: klopidogrel geparin dozasini o‘zgartirishni talab qilmadi va geparinning qon ivishiga ko‘rsatadigan ta’siriga ta’sir qilmadi. Geparinni bir vaqtda qo‘llash klopidogrel chaqirgan trombotsitlar agregatsiyasini bostirishga ta’sir qilmadi. Klopidogrel va geparin o‘rtasida farmakodinamik o‘zaro ta’sir bo‘lishi mumkin, bu qon ketish xavfini oshiradi. Binobarin, bu preparatlarni bir vaqtda qo‘llash ehtiyotkorlikni talab qiladi.

Trombolitik vositalar: klinik ahamiyatga ega qon ketish chastotasi trombolitik vositalar va geparinni ASK bilan birga qo‘llashda kuzatilganidek bo‘ldi.

Nosteroid yallig‘lanishga qarshi vositalar (NYAQV): preparat va naproksenni birgalikda qo‘llash oshqozon-ichak traktidan yutilgan qon yo‘qotilishini ko‘paytirdi. Biroq, boshqa nosteroid yallig‘lanishga qarshi dori vositalari bilan o‘zaro ta’siri bo‘yicha klinik tadqiqotlar o‘tkazilmaganligi sababli, hozirgi vaqtda barcha nosteroid yallig‘lanishga qarshi dori vositalari uchun oshqozon-ichak qon ketishining yuqori xavfi xos ekanligi aniq emas. Shunday qilib, YAQNDV, shu jumladan SOG-2 ingibitorlari va klopidogrelni tayinlashda ehtiyotkorlik talab etiladi.

Omeprazol, ezomeprazol, fluvoksamin, fluoksetin, moklobemid, vorikonazol, flukonazol, tiklopidin, siprofloksatsin, simetidin, karbamazepin, okskarbamazepin va xloramfenikol: preparat bilan birgalikda qo‘llash klopidogrelning faol metaboliti dori konsentratsiyasining pasayishiga va CYP2S19 fermentining bostirilishi tufayli uning klinik samaradorligining pasayishiga olib keladi, bu ferment yordamida klopidogrel o‘zining faol metabolitigacha metabolizmga uchraydi. Klopidogrelni ushbu preparatlar bilan bir vaqtda qo‘llashdan voz kechish kerak.

Proton pompasi ingibitorlari: proton pompasi ingibitorlari sinfi ichida CYP2C19 ni bostirishda farq bo‘lishiga qaramay, klopidogrel va ushbu sinfning barcha a’zolari o‘rtasida o‘zaro ta’sir bo‘lishi mumkin. Shuning uchun, agar bu mutlaqo zarur bo‘lmasa, proton pompasi ingibitorlarini bir vaqtning o‘zida qo‘llashdan saqlanish kerak. Oshqozonda kislotalilikni pasaytiruvchi boshqa dori vositalari, masalan, H2 blokatorlari va antatsidlar klopidogrelning antitrombotsitar faolligiga ta’sir ko‘rsatishi haqida dalillar yo‘q.

Atenolol, nifedipin yoki ikkala preparat bir vaqtda: klopidogrel bilan klinik jihatdan ahamiyatli farmakodinamik o‘zaro ta’sir kuzatilmadi.

Fenobarbital, simetidin va estrogenlar: birgalikda qo‘llash klopidogrelning farmakodinamik faolligiga sezilarli ta’sir ko‘rsatmadi.

Digoksin, teofillin: preparatni bir vaqtda qo‘llash ushbu preparatlarning farmakokinetikasiga ta’sir ko‘rsatmadi.

Antatsid vositalar: klopidogrelning so‘rilish darajasini o‘zgartirmagan.

Sitoxrom P4502C9 yordamida metabolizmga uchraydigan fenitoin, tolbutamid va YAQNDV: klopidogrel bilan birgalikda qabul qilish ushbu dori vositalarining plazmadagi darajasi oshishiga olib kelishi mumkin, chunki klopidogrelning metaboliti bo‘lgan karbon kislotasi sitoxrom P4502C9 faolligini pasaytirishi mumkin. Biroq, fenitoin va tolbutamidni klopidogrel bilan bir vaqtda xavfsiz qo‘llash mumkin.

Siydik haydovchi, β-blokatorlar, AAF ingibitorlari, kalsiy antagonistlari, dorilar, xolesterinni pasaytiruvchi vositalar, koronar vazodilatatorlar, antidiabetik vositalar (shu jumladan insulin), epilepsiyaga qarshi vositalar va GPIIb/IIIa antagonistlari: klopidogrel bilan birgalikda qabul qilish klinik jihatdan sezilarli salbiy o‘zaro ta’sirlarni keltirib chiqarmaydi.

Maxsus ko‘rsatmalar

Qon ketishi va gematologik nojo‘ya ta’sirlar xavfi tufayli, davolash jarayonida qon ketishini ko‘rsatuvchi klinik belgilar paydo bo‘lgan taqdirda, zudlik bilan qon hujayralari sonini aniqlash va/yoki boshqa tegishli tahlillarni o‘tkazish zarur. Boshqa antitrombotsitar preparatlar kabi, preparatni jarohat, jarrohlik yoki boshqa patologik holatlar bilan bog‘liq qon ketish xavfi yuqori bo‘lgan bemorlarda, shuningdek, ASK, geparin, glikoprotein IIb/IIIa ingibitorlari yoki nosteroid yallig‘lanishga qarshi vositalar, shu jumladan SOG-2 ingibitorlari bilan davolanayotgan bemorlarda ehtiyotkorlik bilan qo‘llash lozim. Bemorlarda qon ketish belgilari, shu jumladan yashirin qon ketishining mavjudligini, ayniqsa davolanishning birinchi haftalarida va/yoki yurakdagi invaziv muolajalar yoki jarrohlik aralashuvidan keyin sinchiklab nazorat qilish zarur.

Agar bemorga elektiv jarrohlik amaliyoti o‘tkazilishi kerak bo‘lsa va trombga qarshi ta’sir vaqtincha nomaqbul bo‘lsa, operatsiyadan 7 kun oldin klopidogrelni qabul qilishni to‘xtatish kerak. Har qanday jarrohlik amaliyoti va har qanday yangi dori vositasini qabul qilishdan oldin bemorlar shifokorlar va tish shifokorlarini klopidogrel qabul qilayotganliklari haqida ogohlantirishlari kerak. Klopidogrel qon ketish vaqtini uzaytiradi va qon ketishiga moyil bo‘lgan patologik o‘zgarishlar (ayniqsa, oshqozon-ichak va ko‘z ichi) bo‘lgan bemorlarda ehtiyotkorlik bilan qo‘llanilishi kerak.

Bemorlarni dori vositasini (yolg‘iz yoki ASK bilan birgalikda) qabul qilganda qon ketishini to‘xtatish uchun ko‘proq vaqt talab etilishi, shuningdek, agar ularda noodatiy (joylashuvi yoki davomiyligi bo‘yicha) qon ketishi kuzatilsa, davolovchi shifokorga xabar berishlari kerakligi haqida ogohlantirish lozim.

Juda kam hollarda, klopidogrel qo‘llanilgandan so‘ng, ba’zan esa qisqa muddatli ta’sirdan so‘ng, nevrologik o‘zgarishlar, buyrak disfunksiyasi yoki isitma bilan kechadigan trombotsitopeniya va mikroangiopatik gemolitik anemiya bilan tavsiflangan trombotik trombotsitopenik purpura (TTP) holatlari qayd etilgan. TTP zudlik bilan davolanishni, shu jumladan plazmaferezni talab qiladigan potentsial o‘limga olib keladigan holatdir.

Ma’lumotlar yo‘qligi sababli, klopidogrelni o‘tkir ishemik insultdan keyingi dastlabki 7 kunda tavsiya etish mumkin emas.

Preparat tarkibida laktoza mavjud. Galaktozani ko‘tara olmaslikning kam uchraydigan irsiy buzilishlari, Lappa laktaza tanqisligi va glyukoza hamda galaktoza malabsorbsiyasi sindromi bo‘lgan bemorlarda bu preparatni qabul qilish mumkin emas.

Ushbu preparat tarkibida gidrogenlangan kanakunjut moyi mavjud bo‘lib, u oshqozon buzilishi va ich ketishini keltirib chiqarishi mumkin.

Homiladorlik va laktatsiya davri

FDA tasnifiga ko‘ra, homiladorlik paytida qo‘llash imkoniyatiga ko‘ra, Antagriks® (klopidogrel) preparati homilaga ta’siri bo‘yicha "V" toifasiga kiradi.

Homiladorlik paytida ta’sir qilish haqida klinik ma’lumotlar yo‘qligi sababli, ehtiyot chorasi sifatida homiladorlikda preparatni qo‘llamaslik maqsadga muvofiq.

Dori vositasi inson ko‘krak sutiga o‘tishi noma’lum. Ehtiyot chorasi sifatida klopidogrel bilan davolanish vaqtida emizishni davom ettirish mumkin emas.

Dori vositasining transport vositasini yoki potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Dori vositasining nojo‘ya ta’sirlarini hisobga olib, avtomobilni boshqarishda va mashina jihozlari bilan ishlashda ehtiyot bo‘lish lozim.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Dozani oshirib yuborish

Belgilari: qon ketish vaqtining uzayishi va keyinchalik qon ketish asoratlari. Qon ketish holatida tegishli muolajalar talab etilishi mumkin.

Davolash: Klopidogrelning farmakologik faolligiga ega bo‘lgan antidot topilmagan. Agar qon ketish vaqtining uzayishini tezda tuzatish zarur bo‘lsa, trombotsitlarni quyish preparatning ta’sirini to‘xtatishi mumkin.

Chiqarish shakli

"Antagriks® 75," qobiq bilan qoplangan 75 mg li tabletkalar, No14 va No28.

Saqlash shartlari

Quruq, yorug‘likdan himoyalangan joyda, 25 °C dan yuqori bo‘lmagan haroratda.

Yaroqlilik muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

"NOBEL PHARMSANOAT" MCHJ XK

Dori vositasining sifati bo‘yicha iste’molchilarning fikr-mulohazalari va e’tirozlari, shuningdek, nojo‘ya ta’sirlari yoki dori vositasining samarasizligi haqidagi xabarlar quyidagi manzilga yuborilsin:

O‘zbekiston Respublikasi, Toshkent shahri, Mirzo Ulug‘bek tumani, Qorasuvbo‘yi ko‘chasi, 5 "A" uy

Tel.: (99871) 207-99-00; Faks: (99871) 207-99-01; E-mail: [email protected]