Zarnaksim

Tarkib

5 ml suspenziya tarkibiga quyidagilar kiradi:

faol modda: sefiksim trigidrat 112 mg (suvsiz sefiksimga ekvivalent) - 100 mg;

yordamchi moddalar: natriy benzoat, shakar, ksantan smolasi, apelsin xushbo‘ylantirgichi.

Tavsif

Oqish-krem rangli, shirin ta’mli va apelsin hidli kukun.

Dori shakli

Suspenziya tayyorlash uchun kukun.

Farmakoterapevtik guruh

Antibiotik - sefalosporinlar guruhi. ATX kodi: J01DA23.

Farmakologik xususiyatlari

Farmakodinamika

Preparat o‘z tarkibida faol modda sifatida sefiksim III avlod peroral sefalosporin antibiotikini saqlaydi, u mikroorganizmlarning hujayra devori sintezini buzish hisobiga bakteritsid ta’sir ko‘rsatadi.

Preparat keng ko‘lamli antibakterial ta’sirga ega bo‘lib, u turli aerob va anaerob grammusbat hamda grammanfiy mikroorganizmlarni o‘z ichiga oladi, bundan tashqari, u ham grammusbat, ham grammanfiy mikroorganizmlarning beta-laktamazalar ta’siriga chidamli.

Preparat quyidagi patogen qo‘zg‘atuvchilarga nisbatan in vitro faol: Streptococcus pneumoniae, Streptococcus pyogenes, Streptococcus agalactiae, Haemophilus influenzae, Haemophilus parainfluenzae, Moraxella catarrhalis (shu jumladan beta-laktamaza ishlab chiqaruvchi shtammlar), Escherichia coli, Proteus mirabilis, Proteus vulgaris, Neisseria gonorrhoeae, Klebsiella pneumoniae, Klebsiella oxytoca, Pasteurella multocida, Providencia spp., Salmonella spp., Shigella spp., Citrobacter spp. (shu jumladan Citrobacter diversus), Serratia marcescens.

Sefiksimga Pseudomonas va Acinetobacter avlodlarining quyidagi patogen qo‘zg‘atuvchilari va turlari, Enterococcus va Streptococcus avlodlarining ba’zi shtammlari (metilsillinga chidamli), shuningdek Listeria monocytogenes, Bacteroides fragilis, stafilokokklarning koagulaza-musbat, koagulaza-manfiy va metitsillinga chidamli shtammlari, Enterobacter va Clostridium avlodlarining aksariyat shtammlari in vitro sharoitida chidamlidir.

Farmakokinetika

Sefiksim oshqozon-ichak traktidan oson so‘riladi, ovqat qabul qilish so‘rilish darajasiga ta’sir qilmaydi. Sefiksimning farmakokinetik profili yoshga bog‘liq emas. 200-2000 mg dozalar oralig‘ida qon zardobidagi eng yuqori konsentratsiya va farmakokinetik egri chiziq ostidagi maydon (AUC) chiziqli ravishda oshadi. Sefiksimning 200 yoki 400 mg bir martalik dozasi qabul qilingandan so‘ng, qon plazmasidagi maksimal konsentratsiyasiga 3-4 soatdan so‘ng erishiladi va mos ravishda 2-4 mkg/ml va 3-5 mkg/ml ni tashkil etadi.

Takroriy dozalarda qo‘llanganda, sefiksim qon zardobida yoki siydikda to‘planmaydi. Oshqozon-ichak traktiga so‘rilgan dozaning 50% 24 soat davomida siydik bilan, 10% esa o‘t bilan o‘zgarmagan holda chiqariladi. Sefiksim 65% qon plazmasi oqsillari bilan bog‘lanadi, tizimli metabolizmga uchramaydi; kattalarda qon plazmasidan yarim chiqarilish davri 3-4 soatni tashkil etadi.

O‘rtacha buyrak yetishmovchiligi (kreatinin klirensi 20-40 ml/min) va yaqqol ifodalangan buyrak yetishmovchiligi (kreatinin klirensi 5-20 ml/min) bo‘lgan bemorlarda yarim chiqarilish davri mos ravishda 6,4 yoki 11,5 soatgacha cho‘zilgan.

Sefiksimning ozgina miqdori gemodializ yoki peritoneal dializ bilan chiqariladi.

Ko‘rsatmalar

Sefiksimga sezgir mikroorganizmlar keltirib chiqaradigan yuqumli kasalliklar:

yuqori va pastki nafas yo‘llarining bakterial infeksiyalari (o‘rta otit, faringitlar, tonzillitlar, sinusitlar, bronxitlar, pnevmoniya): siydik va o‘t yo‘llarining bakterial infeksiyalari (o‘tkir uretritlar, sistitlar, piyelonefritlar);

teri va yumshoq to‘qimalar;

osteomiyelit;

endometrit;

siydik chiqarish kanali va bachadon bo‘ynining asoratlanmagan gonokokk infeksiyasi;

Laym kasalligi

Qo‘llash usuli va dozalari

Suspenziyaning 6 oylikdan 2 yoshgacha bo‘lgan bolalar uchun tavsiya etilgan sutkalik dozasi 8 mg/kg ni tashkil etadi. Bu dozada suspenziya sutkada 1 marta buyuriladi yoki har 12 soatda 1 dozadan 2 qabulga bo‘linishi mumkin.

2 yoshdan oshgan bolalar uchun suspenziyaning tavsiya etilgan dozasi quyidagicha tayinlanadi:

2-4 yosh - kuniga 5 ml;

5-8 yosh - kuniga 10 ml;

9-12 yosh - kuniga 15 ml.

Davolash kursining o‘rtacha davomiyligi 7-10 kun. Streptococcus pyogenes chaqirgan infeksiyalarda davolash kursi 10 kundan kam bo‘lmasligi kerak.

Buyrak faoliyati buzilganda doza qon zardobidagi kreatinin (KK) klirensi ko‘rsatkichiga qarab belgilanadi: KK-21-60 ml/min bo‘lganda yoki gemodializda bo‘lgan bemorlarda sutkalik dozani 25% ga kamaytirish kerak; KK≤20 ml/min bo‘lganda yoki peritoneal dializda bo‘lgan bemorlarda sutkalik dozani 2 baravarga kamaytirish kerak.

Suspenziyani tayyorlash usuli

Ichidagisi bo‘lgan flakonni bir necha marta chayqatib, flakonga taxminan flakonning yarmigacha sovutilgan qaynatilgan suv qo‘shiladi va yaxshilab chayqatiladi. Taxminan 5 daqiqadan so‘ng (gomogen suspenziya hosil bo‘lgandan so‘ng) belgisigacha suv qo‘shiladi va flakon yana bir bor qattiq chayqatiladi.

Nojo‘ya ta’sirlari

Kamdan-kam hollarda quyidagi holatlar kuzatilishi mumkin:

ich ketishi, ko‘ngil aynishi, qorin og‘rig‘i, dispepsiya, qusish va meteorizm;

bosh og‘rig‘i, bosh aylanishi;

teri toshmasi, qichishish, eshakemi, isitma va bo‘g‘imlardagi og‘riqlar;

juda kam hollarda psevdomembranoz kolit kuzatilishi mumkin;

trombotsitopeniya, leykopeniya, eozinofiliya.

Qarshi ko‘rsatmalar

Sefalosporinlar va penitsillinlarga yuqori sezuvchanlik.

Dozani oshirib yuborish

Dozani oshirib yuborish holatlari haqida ma’lumot yo‘q.

Ehtiyot choralari va qo‘llash xususiyatlari

Keksa yoshdagi bemorlarga, surunkali buyrak yetishmovchiligi yoki psevdomembranoz koliti (anamnezida) bo‘lgan bemorlarga ehtiyotkorlik bilan buyurish lozim. Preparat uzoq vaqt qo‘llanganda ichakning normal mikroflorasi buzilishi mumkin, bu esa Clostridium difficile ning haddan tashqari ko‘payishiga va og‘ir diareya hamda psevdomembranoz kolit rivojlanishiga olib kelishi mumkin.

Davolash vaqtida Kumbsning musbat to‘g‘ri reaksiyasi va siydikning glyukozaga soxta musbat reaksiyasi bo‘lishi mumkin.

Preparat glyukozooksidaza testi natijalariga ta’sir ko‘rsatmaydi.

Homiladorlik va laktatsiya davri

Homilador va emizikli ayollarda sifatli klinik tadqiqotlar o‘tkazilmaganligi sababli, laktatsiya davrida preparat suspenziyasini qo‘llash zarurati tug‘ilganda, emizishni to‘xtatish lozim.

Transport vositasi yoki potensial xavfli mexanizmlarni boshqarish qobiliyatiga ta’sir

Ta’sir qilmaydi.

Boshqa dori vositalari bilan o‘zaro ta’siri

Kuzatilmagan.

Chiqarish shakli

Suspenziya tayyorlash uchun kukun 100 mg/5 ml 50, 60, 100 ml dan (flakonlar o‘lchov qoshiqchasi yoki stakancha bilan yoki ularsiz to‘plamda).

Saqlash shartlari

Quruq va yorug‘likdan himoyalangan joyda, 25 °C dan yuqori bo‘lmagan haroratda saqlang.

Saqlash muddati

3 yil.

Yaroqlilik muddati tugaganidan keyin ishlatilmasin.

Ishlab chiqaruvchi

"REMEDY GROUP" MCHJ QK

O‘zbekiston Respublikasi, 100069, Toshkent shahri, Olmazor tumani, Yangi Olmazor ko‘chasi, 51-uy, Tel./faks: (99871) 248-02-05.

"Izida Pharma Ltd" uchun, Buyuk Britaniya.