Esfolip

Tarkib

Bir ampula quyidagilarni o‘z ichiga oladi:

faol modda: essensial fosfolipidlar (fosfatidilxolinga qayta hisoblaganda) - 250,0 mg;

yordamchi moddalar: natriy dezoksixolat, etanol, α-tokoferilatsetat, riboflavin (natriy fosfat riboflavin ko‘rinishida), benzil spirti, natriy xlorid, 1M natriy gidroksid eritmasi yoki 1M xlorid kislota eritmasi, inyeksiya uchun suv.

Tavsif

Sariq-yashil rangli tiniq eritma.

Dori shakli

Vena ichiga yuborish uchun eritma.

Farmakoterapevtik guruh

Jigar kasalliklarini davolash uchun vositalar. ATX kodi: A05VA.

Farmakologik xususiyatlari

Farmakodinamika

Essensial fosfolipidlar hujayra qobig‘i va hujayra organellalarining asosiy tarkibiy elementlari hisoblanadi. Jigar kasalliklarida hujayra qobig‘i va hujayra organellalarining shikastlanishi membrana bilan bog‘liq fermentlar va retseptorlar tizimi faolligining buzilishiga, funksional faollikning yomonlashishiga va jigar hujayralarining regeneratsiya qobiliyatining pasayishiga olib kelishi mumkin.

Esfolip dori vositasi tarkibidagi fosfolipidlar kimyoviy tuzilishi bo‘yicha endogen fosfolipidlarga mos keladi, shu bilan birga ko‘p to‘yinmagan (essensial) yog‘ kislotalari miqdori bo‘yicha ulardan ustun turadi. Ushbu yuqori energiyali molekulalarning hujayra membranalarining shikastlangan qismlariga joylashishi shikastlangan jigar to‘qimasining tiklanishiga yordam beradi. Ularning ko‘p to‘yinmagan kislotalarining qo‘sh sis-bog‘lari fosfolipid membranalarining uglevodorod zanjirlarining parallel joylashishini oldini oladi, buning natijasida fosfolipid tuzilmalarining joylashish zichligi kamayadi, bu esa ularning oquvchanligi va elastikligini oshiradi, moddalar almashinuvini yaxshilaydi. Hosil bo‘lgan funksional birliklar membrana bilan bog‘langan fermentlarning faolligini oshiradi va eng muhim metabolik jarayonlarning normal, fiziologik tarzda kechishiga yordam beradi.

Esfolip dori vositasi tarkibiga kiruvchi fosfolipidlar lipoproteinlarning buzilgan metabolizmini tartibga solib, neytral yog‘larni va xolesterinni transport qilinadigan shakllarga o‘tkazadi (asosan yuqori zichlikdagi lipoproteinlarning xolesterin bilan bog‘lanish qobiliyatini oshirish hisobiga) va shu tariqa oksidlanishga uchrashi mumkin.

Esfolip lipidlar va oqsillar metabolizmiga, jigarning dezintoksikatsion funksiyasiga, jigarning hujayraviy tuzilishi va fosfolipidlarga bog‘liq ferment tizimlarining tiklanishi va saqlanishiga me’yorlashtiruvchi ta’sir ko‘rsatadi, jigarda biriktiruvchi to‘qima shakllanishiga to‘sqinlik qiladi.

Fosfolipidlarning o‘tga ekskretsiyasi jarayonida litogen indeksning pasayishi va o‘tning barqarorlashuvi sodir bo‘ladi.

Farmakokinetika

Peroral qabul qilingan fosfolipidlarning 90% dan ortig‘i ingichka ichakda so‘riladi. Ularning ko‘pchiligi fosfolipaza A tomonidan 1-atsil-lizofosfatidilxolingacha parchalanadi, uning 50% i ichak shilliq qavatida absorbsiya jarayonida polito‘yinmagan fosfatidilxolinga qayta atsillanadi. Bu ko‘p to‘yinmagan fosfatidilxolin limfa yo‘llari orqali qonga o‘tadi va u yerdan YUZLP bilan bog‘langan holda jigarga tushadi. Og‘iz orqali qabul qilingandan so‘ng qondagi fosfatidilxolinning maksimal darajasi o‘rtacha 20% ni tashkil etadi va 6-24 soatdan keyin erishiladi.

Xolin komponentining yarim chiqarilish davri 66 soatni, to‘yinmagan yog‘ kislotalarining yarim chiqarilish davri 32 soatni tashkil etadi. Odamda kinetikasini o‘rganishda qabul qilingan 3N va 14S izotoplarining har biridan 5% dan kamrog‘i najas bilan chiqariladi.

Ko‘rsatmalar

Esfolip jigarning turli xil alimentar-toksik shikastlanishlari bo‘lgan bemorlarda ishtaha yo‘qolishi va/yoki o‘ng qovurg‘a ostida og‘irlik hissi kabi alomatlarni kamaytirish uchun qo‘llaniladi. Quyidagi kasalliklarda ko‘rsatiladi:

jigarning yog‘li degeneratsiyasi (shu jumladan qandli diabetda);

o‘tkir va surunkali gepatitlar;

sirrozlar;

jigarning toksik shikastlanishi, shu jumladan alkogolli jigar kasalligi, jigarning dorilar ta’sirida shikastlanishi;

xolestaz

Qo‘llash usuli va dozalari

12 yoshdan boshlab bolalar va kattalarga asta-sekin vena ichiga 1-2 ampula, og‘ir hollarda kuniga 2-4 ampula yuboriladi. Ikkita ampulaning tarkibi bir vaqtning o‘zida yuborilishi mumkin. Bir shprisda boshqa dori vositalari bilan aralashtirilmasin.

Dori vositasini suyultirish zarur bo‘lganda, infuzion yuborish uchun faqat 5% yoki 10% li dekstroza eritmasi ishlatiladi, suyultirilgan dori vositasi eritmasi esa butun yuborish vaqti davomida tiniq bo‘lishi kerak.

Esfolip dori vositasini elektrolit eritmalari (izotonik eritma, Ringer eritmasi) bilan suyultirish mumkin emas.

Parenteral yuborishni Gepatolek dori vositasini peroral qabul qilish bilan to‘ldirish tavsiya etiladi.

Nojo‘ya ta’siri

Nojo‘ya ta’sirlarning uchrash chastotasiga qarab quyidagi tasnif qo‘llaniladi: juda tez-tez (>1/10), tez-tez (≥1/100 -<1/10), kamroq (≥1/1 000 - <1/100), kamdan-kam (≥1/10 000 - <1/1 000), juda kam (<1/10 000), noaniq chastota (mavjud ma’lumotlarga ko‘ra paydo bo‘lish chastotasini aniqlash imkonsiz).

Immun tizimi tomonidan:

Kamdan-kam hollarda dori vositasida benzil spirti mavjudligi sababli yuqori sezuvchanlik reaksiyalari rivojlanishi mumkin.

Juda kam hollarda teri allergik reaksiyalari (toshma, ekzantema yoki eshakemi) kuzatilishi mumkin.

Noma’lum chastota: qichishish.

Qarshi ko‘rsatmalar

Preparat komponentlariga yuqori sezuvchanlik.

Dori vositasi yangi tug‘ilgan chaqaloqlar va chala tug‘ilgan bolalarni davolash uchun qo‘llanilishi mumkin emas, chunki uning tarkibida benzil spirti mavjud.

Klinik ma’lumotlar yetarli bo‘lmaganligi sababli, dori vositasini 12 yoshgacha bo‘lgan bolalarda qo‘llash tavsiya etilmaydi.

Dozani oshirib yuborish

Dozani oshirib yuborish holatlari qayd etilmagan.

Ehtiyot choralari

Faqat shaffof eritmadan foydalaning!

Venaga asta-sekin yuborilsin.

Dori vositasi tarkibida benzil spirti mavjud, shu sababli uning qo‘llanilishi:

12 yoshgacha bo‘lgan bolalarda qo‘llash tavsiya etilmaydi (yetarli klinik ma’lumotlar mavjud emas);

homilador ayollarda ehtiyotkorlik bilan qo‘llash lozim (benzil spirti yo‘ldosh orqali o‘tishi mumkin).

Homiladorlik va laktatsiya davrida qo‘llash

Tarkibida yo‘ldosh to‘sig‘idan o‘ta oladigan benzil spirti mavjudligi sababli, dori vositasini homiladorlik va laktatsiya davrida ehtiyotkorlik bilan buyurish lozim.

Bolalarda qo‘llanilishi

12 yoshgacha bo‘lgan bolalarda qo‘llash mumkin emas.

Avtotransport va mexanizmlarni boshqarish qobiliyatiga ta’siri

Noma’lum.

Boshqa dori vositalari bilan o‘zaro ta’siri

Hozirgacha ma’lum emas.

Dori vositasini elektrolit eritmalari (izotonik eritma, Ringer eritmasi) bilan suyultirish mumkin emas.

Saqlash shartlari

2 °C dan 8 °C gacha bo‘lgan haroratda saqlanadi.

Bolalar qo‘li yetmaydigan joyda saqlang.

Yaroqlilik muddati

3 yil.

Qadoqda ko‘rsatilgan yaroqlilik muddati tugagandan keyin ishlatilmasin.

Chiqarish shakli

Vena ichiga yuborish uchun 5 ml dan eritma siniq halqali jigarrang shisha ampulaga solinadi. Yacheykali o‘ramda 5 ampuladan. Karton qutida tibbiy qo‘llash bo‘yicha yo‘riqnoma bilan birga 1 yoki 2 ta katakli o‘ram.

Ishlab chiqaruvchi

Lekfarm, Belarus.