Ketonal Aktiv Plyus

Tarkib

1 ta ikki hajmli paketda

Faol moddasi: 80,0 mg ketoprofen lizin tuzi, bu 50,0 mg ketoprofenga teng.

Yordamchi moddalar: Mannitol, povidon K 30, yalpizli aromatizator, natriy xlorid, natriy saxarinat, kolloid kremniy dioksidi.

Tavsif

Qaytarilgan eritma: Rangsiz yoki sarg‘ish, biroz opalessiv, yalpiz hidiga ega eritma.

Dori shakli

Oq yoki sarg‘ish rangli, o‘ziga xos yalpiz hidiga ega bo‘lgan bir xil granulalar.

Farmakologik ta’siri

Ketonal® Aktiv Plyus preparati tarkibida faol modda ketoprofen - lizin tuzi mavjud bo‘lib, nosteroid yallig‘lanishga qarshi dorilar (NYAQDV) deb ataladigan dorilar guruhiga kiradi.

Ko‘rsatmalar

Ketonal® Aktiv Plyus preparati kattalar va 6 yoshdan oshgan bolalarda qo‘llaniladi.

Kattalar uchun:

Og‘riq sindromi bilan kechadigan turli xil kelib chiqishga ega yallig‘lanish jarayonlari belgilarini davolash, jumladan:

paylar, bo‘g‘im xaltachalarining yallig‘lanishi, mushaklardagi og‘riq, nevralgiya, radikulit;

bosh og‘rig‘i;

tish og‘rig‘i;

og‘riqli hayz ko‘rish (algodismenoreya);

jarohatdan keyingi va operatsiyadan keyingi og‘riq sindromi;

onkologik kasalliklarda og‘riq sindromi.

Tayanch-harakat apparatining yallig‘lanish va degenerativ kasalliklari: revmatoid artrit, seronegativ artritlar, ankilozlovchi spondiloartrit (Bexterev kasalligi), podagra, soxta podagra, osteoartroz, psoriatik artrit, reaktiv artrit (Reyter sindromi).

Bolalar (6 yoshdan katta):

Tayanch-harakat tizimi kasalliklari, otitda issiqlik bilan yoki usiz og‘riq sindromi bilan kechadigan yallig‘lanish jarayonlarini qisqa muddatli simptomatik davolash. Operatsiyadan keyingi og‘riqlarni qoldirish.

Preparat simptomlarni bartaraf etish, og‘riq va yallig‘lanishni kamaytirish uchun mo‘ljallangan, kasallikning rivojlanishiga ta’sir ko‘rsatmaydi.

Qo‘llash usuli va dozalari

Doimo preparatni ushbu qo‘shimcha varaqadagi ko‘rsatmalarga to‘liq muvofiq ravishda yoki davolovchi shifokor tavsiyalariga to‘liq muvofiq ravishda qabul qiling. Agar shubha paydo bo‘lsa, davolovchi shifokor bilan maslahatlashing.

Dozalash tartibi va davolash davomiyligi:

Kattalar: sutkasiga 3 martagacha 1 ta ikki hajmli paketcha;

Bolalar (6 yoshdan 14 yoshgacha): sutkasiga 3 martagacha 1/2 ta ikki xajmli paket ichidagi;

Bolalar (14 yoshdan 18 yoshgacha): preparatning dozalari kattalarnikiga mos keladi.

Simptomlarni bartaraf etish uchun zarur bo‘lgan eng qisqa vaqt ichida minimal samarali dozani qabul qilish lozim. Infeksiya rivojlangan taqdirda, agar uning belgilari (masalan, tana haroratining ko‘tarilishi va og‘riq) saqlanib qolsa yoki kuchayib borsa, darhol shifokoringiz bilan maslahatlashing (2-bo‘limga qarang).

Keksa yoshdagi bemorlarda qo‘llanilishi:

Dozani shifokor belgilaydi, u yuqorida keltirilgan dozalarni kamaytirish imkoniyatini ko‘rib chiqishi kerak. 2-bo‘lim "Alohida ko‘rsatmalar va ehtiyot choralari"ga qarang.

Jigar yoki buyrak faoliyatining pasayishi:

Agar sizda jigar yoki buyrak faoliyatining yengil yoki o‘rtacha darajada pasayishi aniqlansa, davolovchi shifokoringiz preparat dozasini kamaytirishi mumkin. Jigar yoki buyraklaringiz faoliyati sezilarli darajada pasaygan bo‘lsa, Ketonal® Aktiv Plus preparatini qabul qilmang.

Qo‘llash usuli:

Paketning yarmidan dozani olish uchun paketni "yarim doza" belgisi bo‘lgan chiziq bo‘ylab oching;

Butun paketdan dozani olish uchun paketni "to‘liq doza" belgisi bo‘lgan chiziq bo‘ylab oching;

Paket ichidagilarni yarim stakan ichimlik suviga soling;

Barcha granulalar to‘liq eriguncha 30 soniya davomida yaxshilab aralashtiring;

Eritmani tayyorlangandan so‘ng darhol ovqat bilan birga iching.

Agar Ketonal® Aktiv Plyus qabul qilishni unutgan bo‘lsangiz:

O‘tkazib yuborilgan dozani eslagan zahoti qabul qiling. Biroq, agar keyingi dozani qabul qilish vaqti yaqinlashsa, qabul qilinmagan dozani o‘tkazib yuboring. O‘tkazib yuborilgan dozani qoplash uchun ikki martalik dozani qabul qilmang.

Agar sizda ushbu preparatni qo‘llash bo‘yicha qo‘shimcha savollar bo‘lsa, ularni shifokor yoki dorixona xodimiga bering.

Nojo‘ya ta’sirlar

Barcha dorilar singari, bu dori ham nojo‘ya ta’sirlarni keltirib chiqarishi mumkin, garchi ular hammada ham uchramasa-da.

Quyidagi alomatlar paydo bo‘lganda, Ketonal® Aktiv Plyus preparatini qabul qilishni to‘xtatish va zudlik bilan shifokorga yoki shifoxonaga murojaat qilish lozim.

Kamdan-kam hollarda (1000 kishidan 1 tasida uchrashi mumkin):

bronxial astma xuruji;

ochlik va ochlikni his qilganda qorinning achishib og‘rishi. Bunday alomatlar oshqozon/ichak yarasi bilan bog‘liq bo‘lishi mumkin.

Juda kam uchraydi (10 000 kishidan 1 tasida uchrashi mumkin):

siydikdagi qon;

hiqildoq shishi

Noma’lum (mavjud ma’lumotlarga ko‘ra uchrash chastotasini baholash imkonsiz):

qonli qusish, oshqozonda kuchli og‘riq yoki qoramtir qoramoysimon najas, bu oshqozon/ichakdan qon ketishi yoki ushbu a’zolar devorining teshib o‘tuvchi shikastlanishi belgilari hisoblanadi;

qichishadigan papulyoz toshma bilan yoki usiz tananing har qanday qismidagi teri qoplamlarida pufakchalar, pustulalar, po‘st tashlash yoki qon ketishi. Ta’riflangan hodisalar lab, ko‘z, og‘iz, burun, jinsiy a’zolar, qo‘l yoki oyoq panjalariga ham ta’sir qilishi mumkin. Shu bilan birga, sizda grippga o‘xshash alomatlar rivojlanishi mumkin. Sizda shoshilinch tibbiy aralashuvni talab qiladigan jiddiy teri kasalligi, jumladan Stivens-Jonson sindromi, toksik epidermal nekroliz va o‘tkir tarqalgan ekzantematoz pustulyoz paydo bo‘lishi mumkin;

siydik hajmining o‘zgarishi yoki shishishi, ayniqsa oyoqlar, to‘piqlar yoki tovonlarda. Bu hodisalar buyraklardagi jiddiy muammolar tufayli yuzaga kelishi mumkin;

ko‘krak qafasidagi og‘riq (yurak xuruji belgisi) yoki to‘satdan kuchli bosh og‘rig‘i, ko‘ngil aynishi, bosh aylanishi, sezuvchanlikning buzilishi, gapirish qobiliyatining yo‘qolishi yoki nutqni takrorlashda qiyinchiliklar, falajlik (insult belgilari);

og‘ir allergik reaksiyalar belgilari, masalan, yutinish yoki nafas olishda xirillash yoki qiyinchiliklarni keltirib chiqaradigan yuz, lablar, og‘iz bo‘shlig‘i yoki hiqildoqning shishishi, ko‘krak qafasidagi siqilish hissi, yurak urishining tezlashishi, qon bosimining pasayishi, shok, qichishish va toshmalarni keltirib chiqaradi;

nafas olishni qiyinlashtiradigan hiqildoq mushaklarining spazmi;

"agranulotsitoz" deb ataladigan qon tomonidan jiddiy buzilish tufayli yuqumli kasalliklar odatdagidan osonroq paydo bo‘lishi mumkin;

talvasalar.

Agar sizda quyida sanab o‘tilgan nojo‘ya ta’sirlardan biri kuzatilsa, iloji boricha tezroq davolovchi shifokoringizga xabar bering.

Kamdan-kam hollarda (1000 kishidan 1 tasida uchrashi mumkin):

teridagi g‘ayritabiiy sezgilar, masalan, uvishish, chimchilash, sanchish, achishish yoki et uvishishi;

terining oqarishi, charchoq hissi, kuchli holsizlik yoki bosh aylanishi, ehtimol qon ketishi tufayli qondagi eritrotsitlar sonining kamayishi natijasida yuzaga kelishi mumkin;

ko‘rishning noaniqligi;

teri yoki ko‘z oqsillarining sariq tusga kirishi, bu jigar muammolarining belgisi bo‘lishi mumkin.

Noma’lum (mavjud ma’lumotlarga ko‘ra uchrash chastotasini baholash imkonsiz):

ko‘karish odatdagidan osonroq sodir bo‘ladi yoki qon ketishi odatdagidan uzoqroq to‘xtaydi. Bu qonda trombotsitlar sonining kamayishi kabi jiddiy muammoni ko‘rsatishi mumkin;

qondagi eritrotsitlar sonining kamayishi, buning natijasida teri och sariq tusga kirishi, shuningdek holsizlik va nafas qisilishi (gemolitik kamqonlik) rivojlanishi mumkin;

qonda leykotsitlar sonining kamayishi, bu esa yuqumli kasalliklar rivojlanish ehtimolini oshiradi;

Kron kasalligi yoki kolit kabi ichak kasalliklari kechishining yomonlashishi;

terining yorug‘likka yoki quyosh nuri lampasiga reaksiyasi.

Boshqa nojo‘ya ta’sirlar quyidagi chastotada kuzatilishi mumkin:

Tez-tez (10 kishidan 1 tasida uchrashi mumkin):

ovqat hazm qilishning buzilishi, qorin og‘rig‘i;

ko‘ngil aynishi, qusish

Kam uchraydi (100 kishidan 1 tasida uchrashi mumkin):

oshqozon shilliq qavatining yallig‘lanishi;

qabziyat, ich ketishi, qorin dam bo‘lishi;

teri toshmasi, qichishish;

qo‘l va oyoqlarning shishishiga olib kelishi mumkin bo‘lgan tanada suvning ushlanib qolishi;

bosh og‘rig‘i, bosh aylanishi yoki uyquchanlik;

charchoq yoki holsizlik hissi;

bosh aylanishi yoki "aylanish" hissi.

Kamdan-kam hollarda (1000 kishidan 1 tasida uchrashi mumkin):

quloq shang‘illashi;

tana vaznining ortishi;

og‘iz bo‘shlig‘idagi og‘riq va yallig‘lanish.

Juda kam uchraydi (10 000 kishidan 1 tasida uchrashi mumkin):

og‘iz, til yoki yuz mushaklarining nazoratsiz ritmik harakatlari (diskineziya deb ataladi);

hushdan ketish;

past qon bosimi;

yuzning shishishi (yuz shishi);

holsizlik hissi

Noma’lum (mavjud ma’lumotlarga ko‘ra uchrash chastotasini baholash imkonsiz):

nafas qisishi, yotgan holatda nafas olishning qiyinlashishi, oyoq va boldirlarning shishishi kabi belgilar bilan kechadigan yurak yetishmovchiligi;

yurak urishini his qilish;

yuqori qon bosimi;

qon tomirlarining kengayishi fonida terining qizarishi;

yurak urishining tezlashishi, notekis yurak urishi;

kayfiyat o‘zgarishi;

ongning chalkashligi;

qo‘zg‘aluvchanlik;

uyquning buzilishi;

ta’m sezgilarining o‘zgarishi;

jig‘ildon qaynashi

ko‘z atrofidagi shish;

tumov, burun qichishishi, aksirish va burun bitishi;

soch to‘kilishi;

eshakemi, terining qizarishi va yallig‘lanishi, pufakchalar;

qonda natriy miqdorining pastligi, bu esa charchoq va ongning chalkashishi, mushaklarning tortishishi, xurujlar va komaga olib kelishi mumkin;

qonda kaliy miqdorining yuqoriligi, bu esa yurak ritmining buzilishiga olib kelishi mumkin;

aseptik meningit (bo‘yin mushaklarining qattiqligi, bosh og‘rig‘i, tana haroratining ko‘tarilishi, ko‘ngil aynishi, qusish kabi mumkin bo‘lgan belgilar bilan bosh miya pardalarining yallig‘lanishi);

qon tomirlarining yallig‘lanishi, ko‘pincha teri toshmasi bilan (vaskulit, shu jumladan leykotsitoklastik vaskulit);

oshqozon osti bezining yallig‘lanishi, u qorin va orqa sohasida kuchli og‘riqni keltirib chiqaradi.

Qon tahlillari:

Qon tahlili natijalari jigar yoki buyrak faoliyatidagi o‘zgarishlarni aniqlashi mumkin.

Qarshi ko‘rsatmalar

Ketonal® Aktiv Plyus preparatini qabul qilmang, agar:

ketoprofen, ushbu dorining boshqa tarkibiy qismlariga (6-bo‘limda sanab o‘tilgan) yoki boshqa nosteroid yallig‘lanishga qarshi dorilarga allergiyangiz bo‘lsa;

o‘tmishda atsetilsalitsil kislotasi yoki og‘riq qoldiruvchi, masalan, ketoprofen, ibuprofen, diklofenak qabul qilgandan keyin allergik reaksiyalar, masalan, astma, nafas olish qiyinlashuvi, yuz, lab, til yoki hiqildoq shishi, eshakemi yoki boshqa allergik reaksiyalar bo‘lgan bo‘lsa;

sizda bronxial astma bor;

sizda bronxial astma, burun va burun yondosh bo‘shliqlarining qaytalanuvchi polipozi hamda atsetilsalitsil kislotasi yoki boshqa nosteroid yallig‘lanishga qarshi dorilarni ko‘tara olmaslikning to‘liq yoki to‘liq bo‘lmagan kombinatsiyasi mavjud bo‘lsa;

sizda oshqozon yoki o‘n ikki barmoqli ichak yarasi zo‘rayish bosqichida;

sizda faol oshqozon-ichak qon ketishi, miya qon tomirlaridan qon ketishi yoki boshqa qon ketishi bo‘lsa;

sizda o‘tkirlashayotgan ichak yallig‘lanish kasalliklari (yarali kolit, Kron kasalligi) mavjud bo‘lsa;

sizda gemofiliya yoki qon ivishining boshqa buzilishlari bo‘lsa;

sizda dekompensatsiyalangan yurak yetishmovchiligi mavjud;

agar yaqinda sizga aorta-koronar shuntlash amaliyoti o‘tkazilgan bo‘lsa;

Sizda og‘ir jigar yetishmovchiligi yoki faol jigar kasalligi mavjud bo‘lsa;

sizda og‘ir buyrak yetishmovchiligi yoki zo‘rayib boruvchi buyrak kasalliklari mavjud bo‘lsa;

tahlil natijalariga ko‘ra qondagi kaliy miqdori oshgan bo‘lsa;

bolalik davri (6 yoshgacha);

homiladorligingiz 20 haftadan oshgan bo‘lsa;

Siz emizasiz.

Dozani oshirib yuborish

Agar siz Ketonal® Aktiv Plus preparatini keragidan ko‘proq qabul qilgan bo‘lsangiz:

Bu haqda darhol davolovchi shifokoringizga xabar berishingiz yoki eng yaqin davolash muassasasiga murojaat qilishingiz kerak. Ko‘p hollarda dozani oshirib yuborish belgilari uyquchanlik, lanjlik, ko‘ngil aynishi, qusish va qorinning yuqori qismida og‘riq bilan cheklangan.

Boshqa dori vositalari bilan o‘zaro ta’siri

Davolovchi shifokor yoki dorixona xodimiga siz qabul qilayotgan, yaqinda qabul qilgan yoki qabul qilishni boshlashingiz mumkin bo‘lgan boshqa dori-darmonlar haqida xabar bering.

Ketonal® Aktiv Plyus preparatini quyidagilar bilan birgalikda qabul qilishdan saqlanish lozim:

boshqa YAQNDVlar, masalan, ibuprofen, diklofenak, naproksen kabi preparatlar va ta’sir etuvchi moddasining nomi "koksib" bilan tugaydigan preparatlar;

og‘riq va yallig‘lanishni qoldiradigan yoki tana haroratini pasaytiradigan dozalarda atsetilsalitsil kislotasi (>3 g/kun);

qon ivishini pasaytirish yoki tromblarni eritish uchun preparatlar, masalan, atsetilsalitsil kislotasi, varfarin, klopidogrel, tiklopidin, geparin, dabigatran, apiksaban, rivaroksaban yoki edoksaban;

depressiya yoki boshqa ruhiy kasalliklarni davolash uchun qo‘llaniladigan litiy;

onkologik kasalliklarni davolash uchun qo‘llaniladigan metotreksat bilan yuqori dozalarda (haftasiga 15 mg dan ortiq); past dozalarda (haftasiga 15 mg dan kam) davolanishning dastlabki bir necha haftasi davomida haftasiga bir marta umumiy qon tahlilini o‘tkazish zarur;

talvasalarni (epilepsiya) davolash uchun ba’zi dorilar, masalan, fenitoin bilan;

sulfanilamidlar guruhidagi preparatlar;

kortikosteroidlar bilan.

Agar Ketonal® Aktiv Plyus preparatini yuqorida aytib o‘tilgan dorilar bilan birga qo‘llashdan qochib bo‘lmasa, Sizni qattiq tibbiy nazorat ostiga olish lozim.

Ketonal® Aktiv Plyus ba’zi boshqa dori vositalari bilan o‘zaro ta’sirga kirishishi mumkin. Shu sababli, Ketonal® Aktiv Plyus preparatini boshqa dori vositalari bilan birga qabul qilishni boshlashdan oldin doimo davolovchi shifokoringiz yoki farmatsevtingiz bilan maslahatlashishingiz lozim. Xususan, bu quyidagi dori vositalariga tegishli:

siydik haydovchi vositalar deb ham ataladigan, buyraklar orqali suyuqlik chiqarilishini ko‘paytiruvchi va qon bosimini pasaytiruvchi preparatlar;

onkologik kasalliklarni, bo‘g‘imlarning og‘ir yallig‘lanishini yoki psoriazni davolash uchun haftasiga 15 mg dan kam dozalarda qo‘llaniladigan metotreksat;

yuqori qon bosimini pasaytiruvchi, faol farmatsevtik substansiyalarning nomlari "pril," "zartan" (mas., lozartan) yoki "olol" bilan tugaydigan preparatlar;

yurak qisqarishlari chastotasini nazorat qilish yoki yurak yetishmovchiligida yordam ko‘rsatish uchun qo‘llaniladigan digoksin kabi yurak glikozidlari;

serotoninni qayta qamrab olishning selektiv ingibitorlari guruhidan depressiyani davolash uchun preparatlar;

qo‘l va (yoki) oyoq tomirlari kasalligi bilan bog‘liq mushak og‘rig‘ini qoldirish uchun qo‘llaniladigan pentoksifillin;

podagrani davolash va qonda siydik kislotasining yuqori darajasini me’yorlashtirish uchun qo‘llaniladigan probenetsid;

immunosupressiya uchun qo‘llaniladigan siklosporin va takrolimus, masalan, organ ko‘chirib o‘tkazilgandan so‘ng;

tromblarni eritish uchun qo‘llaniladigan preparatlar;

ba’zi virusli infeksiyalarni davolashda qo‘llaniladigan tenofovir;

OIV infeksiyasini davolash uchun qo‘llaniladigan zidovudin;

qandli diabetni davolash uchun preparatlar, masalan glibenklamid yoki glimepirid;

qondagi kaliy darajasining oshishiga olib kelishi mumkin bo‘lgan dorilar (masalan, kaliy tuzlari, kaliyni tejaydigan siydik haydovchi dorilar, angiotenzinni o‘zgartiruvchi ferment ingibitorlari (APF ingibitorlari), angiotenzin II retseptorlari blokatorlari, nosteroid yallig‘lanishga qarshi dorilar (NYAQD, siklosporin, takrolimus va trimetoprim);

ba’zi yurak kasalliklarining alomati sifatida ko‘krak qafasidagi og‘riqlar (stenokardiya) ning oldini olish yoki chastotasini kamaytirish uchun qo‘llaniladigan nikorandil.

Maxsus ko‘rsatmalar

Ketonal® Aktiv Plyus preparatini qo‘llashni boshlashdan oldin, agar sizda quyidagilar kuzatilsa, davolovchi shifokoringiz yoki farmatsevtingiz bilan maslahatlashing:

oshqozon va o‘n ikki barmoqli ichak yara kasalligi, yarali kolit, Kron kasalligi;

surunkali yurak yetishmovchiligi;

yengil yoki o‘rtacha og‘irlikdagi buyrak yoki jigar kasalliklari, jigar porfiriyasi, shuningdek, jigar yoki buyrak faoliyati ko‘rsatkichlarining o‘zgarishi. Shuningdek, yuqoridagi "Ketonal® Aktiv Plus preparatini qabul qilmang" bo‘limiga qarang;

yuqori qon bosimi yoki u o‘tmishda kuzatilgan bo‘lsa;

aylanib yuruvchi qon hajmining sezilarli darajada kamayishi (shu jumladan jarrohlik amaliyotidan keyin);

keksa yoshdagi bemor (jumladan, agar siz diuretiklar qabul qilayotgan bo‘lsangiz, zaiflashgan bo‘lsangiz yoki tana vazningiz past bo‘lsa);

bronxial astma;

glyukokortikosteroidlar (shu jumladan prednizolon), antikoagulyantlar (shu jumladan varfarin), antiagregantlar (shu jumladan atsetilsalitsil kislotasi, klopidogrel), serotoninni qayta qamrab olishning selektiv ingibitorlari (shu jumladan sitalopram, fluoksetin, paroksetin, sertralin) kabi boshqa dori vositalarini qabul qilsangiz;

yurak ishemik kasalligi;

qo‘l, oyoq yoki bosh miya qon tomirlari kasalliklari;

qandli diabet yoki qondagi xolesterin miqdorining yuqoriligi (yoki qondagi lipidlar miqdorining boshqa buzilishlari);

Helicobacter pylori infeksiyasi mavjudligi;

sil kasalligi;

yaqqol osteoporoz;

alkogolizm;

chekasiz;

uzoq vaqt davomida YAQNDVdan foydalanayotgan bo‘lsangiz;

og‘ir somatik kasalliklar;

homiladorlik (20-haftagacha).

Davolashning boshida siz qonning klinik tahlilini o‘tkazishingiz, shuningdek, jigar va buyraklarning funksional holatini baholashingiz kerak.

Preparatni qo‘llashdan 2 hafta o‘tgach, jigar funksiyasi ko‘rsatkichlarini nazorat qilish kerak.

Agar sizda surunkali rinit, surunkali sinusit va/yoki burun poliplari bilan bog‘liq bronxial astma bo‘lsa, sizda aspirin yoki nosteroid yallig‘lanishga qarshi dorilarni qo‘llashga allergik reaksiya rivojlanish xavfi yuqori bo‘lishi mumkin. Bronxial astma mavjud bo‘lganda ketoprofenni qo‘llash bronxial astma xuruji rivojlanishiga olib kelishi mumkin.

Ketoprofen qo‘llanganda qonda kaliy miqdori oshishi (giperkaliyemiya rivojlanishi) mumkin, ayniqsa sizda qandli diabet, buyrak yetishmovchiligi bo‘lsa va/yoki giperkaliyemiyaga olib kelishi mumkin bo‘lgan dorilarni qabul qilsangiz. Agar siz shunday bemorlar guruhiga kirsangiz, qondagi kaliy miqdorini nazorat qilishingiz kerak.

Agar siz buyrak usti bezining umumiy faolligini baholash uchun tekshiruvdan o‘tishingiz kerak bo‘lsa (17-ketosteroidlarni aniqlash), preparatni tekshiruvdan 48 soat oldin to‘xtatish lozim.

Preparat trombotsitlar xususiyatini o‘zgartirishi mumkin, biroq yurak-qon tomir kasalliklarida atsetilsalitsil kislotasining profilaktik ta’sirini almashtirmaydi.

Ketonal® Aktiv Plyus preparati tana haroratining ko‘tarilishi va og‘riq kabi yuqumli kasalliklar belgilarini yashirishi mumkin, bu esa shifokor tomonidan to‘g‘ri tashxis qo‘yish muddatining uzayishiga, tegishli davolanishni kechiktirib boshlashga va yuqumli kasallik oqibatining yomonlashishiga olib kelishi mumkin. Bu bakterial pnevmoniya va suvchechakning bakterial asoratlarida kuzatilgan. Agar siz ushbu preparatni infeksiya paytida qabul qilsangiz va ushbu infeksiyaning alomatlari saqlanib qolsa yoki kuchaysa, darhol shifokor bilan maslahatlashing.

Agar siz keksa bemor, anamnezida oshqozon yarasi kasalligi bo‘lgan bemor bo‘lsangiz, shuningdek, oshqozon-ichak reaksiyalari xavfini oshirishi mumkin bo‘lgan aspirin yoki boshqa dorilarning past dozalarini qabul qilayotgan bo‘lsangiz, shifokoringiz himoya vositalarini (masalan, mizoprostol yoki proton pompasi ingibitorlari) qo‘llashni tavsiya qilishi mumkin.

Ushbu preparat ayollar fertilligiga salbiy ta’sir ko‘rsatishi mumkin. Agar siz homiladorlikni rejalashtirayotgan bo‘lsangiz, ushbu preparatni qo‘llash tavsiya etilmaydi.

Agar sizda fertillik bilan bog‘liq muammolar bo‘lsa yoki fertillik tekshiruvidan o‘tayotgan bo‘lsangiz, preparatni qo‘llashni to‘xtatish lozim.

Ushbu preparat past kaloriyali parhezlarga ta’sir qilmaydi va qandli diabet bilan og‘rigan bemorlarda qo‘llanilishi mumkin.

Ushbu preparat tarkibida glyuten yo‘q, shuning uchun seliakiya bilan og‘rigan bemorlarda qo‘llanilishi mumkin.

Preparat tarkibida aspartam mavjud emas, shuning uchun fenilketonuriya bilan og‘rigan bemorlarda qo‘llanilishi mumkin.

Agar sizda yurak yoki qon tomir kasalliklari bo‘lsa:

Agar sizda suyuqlikning ushlanib qolishi va nosteroid yallig‘lanishga qarshi dorilarni qabul qilish bilan bog‘liq shishlar bilan kechadigan arterial gipertenziya va/yoki o‘rta darajadagi yurak yetishmovchiligi kuzatilsa, u holda sizga sinchkovlik bilan nazorat qilish va davolovchi shifokor bilan maslahatlashish zarur. Klinik tadqiqotlar va epidemiologik ma’lumotlar shuni ko‘rsatadiki, ba’zi nosteroid yallig‘lanishga qarshi dorilarni (ayniqsa, uzoq vaqt davomida yuqori dozalarda) qo‘llash arterial trombotik hodisalar xavfining biroz oshishi bilan bog‘liq bo‘lishi mumkin (masalan, miokard infarkti yoki insult). Ketoprofen lizin tuzi uchun yuqoridagi xavfni istisno qilish uchun ma’lumotlar yetarli emas. Tavsiya etilgan dozadan yoki davolashning belgilangan muddatidan oshirmaslik kerak.

Agar sizda nazoratsiz gipertenziya, yurak yetishmovchiligi, aniqlangan yurak ishemik kasalligi, periferik arteriyalar va/yoki bosh miya qon tomirlari kasalliklari kuzatilsa, preparatni faqat sinchkovlik bilan tekshiruvdan o‘tgandan so‘ng qo‘llash lozim. Agar sizda yurak-qon tomir kasalliklari rivojlanishi uchun xavf omillari (masalan, gipertenziya, giperlipidemiya, qandli diabet, chekish) mavjud bo‘lsa, davolanishni boshlashdan oldin xuddi shunday tekshiruvdan o‘tishingiz kerak. Aorta-koronar shuntlash paytida operatsiyadan keyingi og‘riq sindromini bartaraf etish uchun nosteroid yallig‘lanishga qarshi dori vositalarini qabul qilayotgan bemorlarda arterial trombozlar rivojlanish xavfi yuqoriligi haqida xabar berilgan.

Bolalar va o‘smirlar:

Ketonal® Aktiv Plyus preparati 6 yoshgacha bo‘lgan bolalarga tavsiya etilmaydi.

Ketonal® Aktiv Plus preparati tarkibida natriy mavjud:

Ushbu preparat bitta paketda 1 mmol (23 mg) dan kam natriy saqlaydi va shu sababli amalda natriy saqlamaydi.

Homiladorlik va emizish

Homiladorlik muddati 20 haftadan oshganda Ketonal® Aktiv Plyus preparatini qabul qilmang.

Agar shifokoringiz ushbu vaziyatda Ketonal® Aktiv Plyus preparatini qabul qilishni muhim deb hisoblamagan bo‘lsa, 20 haftagacha bo‘lgan homiladorlikda uni qabul qilmang.

Ketonal® Aktiv Plyus preparatini qo‘llash paytida emizish tavsiya etilmaydi. Ketoprofenning ona sutiga o‘tishi noma’lum.

Agar siz homiladorlikni rejalashtirayotgan bo‘lsangiz yoki homiladorlik bilan bog‘liq muammolaringiz bo‘lsa, davolovchi shifokoringizga xabar berishingiz kerak. Ketoprofen kabi dorilar homiladorlikni qiyinlashtirishi mumkin.

Transport vositalari va mexanizmlarini boshqarish qobiliyatiga ta’siri

Odatda, Ketonal® Aktiv Plyus transport vositalarini boshqarish va mexanizmlar bilan ishlash qobiliyatiga ta’sir ko‘rsatmaydi. Shunga qaramay, bosh aylanishi, uyquchanlik, tirishish yoki ko‘z xiralashishi kabi nojo‘ya ta’sirlar yuzaga kelganda transport vositalarini boshqarmaslik va mexanizmlar bilan ishlamaslik kerak.

Yaroqlilik muddati

2 yil.

Saqlash shartlari

Preparatni bolalar qo‘li yetmaydigan va ko‘rinmaydigan joyda saqlang. Ushbu dori vositasining qadog‘ida "Yaroqlilik muddati" yozuvidan keyin ko‘rsatilgan yaroqlilik muddati tugagandan so‘ng uni qabul qilmang. Yaroqlilik muddatining tugash sanasi oyning oxirgi kuni hisoblanadi. +25 °S dan yuqori bo‘lmagan haroratda saqlang.

Chiqarish shakli

Ichish uchun eritma tayyorlash uchun granulalar, 80 mg. Kombinatsiyalangan materialdan (qog‘oz/alyuminiy/polietilen) tayyorlangan paketchalarga 2 g dan granulalar solinadi. 12 ta paketcha karton pachkaga varaq-qo‘shimcha bilan birga joylanadi.

Ta’til shartlari

Retsept bo‘yicha.

Ishlab chiqaruvchi

Lek d.d., Sloveniya.