Idrinol

Tarkib

1 ml eritma tarkibiga quyidagilar kiradi:

Faol modda: adsorbsiyalangan namliksiz meldoniy digidrat - 100 mg (suvsiz meldoniyga qayta hisoblaganda - 80,21 mg).

Yordamchi moddalar: inyeksiya uchun suv.

Tavsif

Tiniq, rangsiz suyuqlik.

Chiqarish shakli

Vena ichiga va parabulbar yuborish uchun eritma 100 mg/ml.

Rangsiz shisha ampulalarda 5 ml dan.

Konturli yacheykali o‘ramda 5 ta ampula. Karton qutida qo‘llash bo‘yicha yo‘riqnoma bilan birga 1 yoki 2 ta konturli yacheykali o‘ram.

Farmakoterapevtik guruh

Metabolik vositalar. ATX kodi: C01EB.

Farmakologik xususiyatlari

Farmakodinamika

Meldoniy - gamma-butirobetainning strukturaviy analogi, karnitinning o‘tmishdoshi. Meldoniy gamma-butirobetain-gidroksigenaza fermentini susaytiradi, karnitin sintezini va uzun zanjirli yog‘ kislotalarining hujayra qobig‘i orqali o‘tishini pasaytiradi, hujayralarda oksidlanmagan yog‘ kislotalarining faollashtirilgan shakllari - atsilkarnitin va atsilkoenzim A hosilalarining to‘planishiga to‘sqinlik qiladi.

Ishemiya sharoitida hujayralarda kislorod yetkazib berish va uni iste’mol qilish jarayonlarining muvozanatini tiklaydi, adenozintrifosfat kislota (ATF) transportining buzilishining oldini oladi. Bir vaqtning o‘zida qo‘shimcha kislorod sarflamasdan kechadigan glikolizni faollashtiradi. Karnitin konsentratsiyasining kamayishi natijasida tomirlarni kengaytiruvchi xususiyatga ega bo‘lgan gamma-butirobetain kuchli sintezlanadi.

Ta’sir mexanizmi uning farmakologik ta’sirlarining xilma-xilligini belgilaydi: ish qobiliyatini oshirish, aqliy va jismoniy zo‘riqish belgilarini kamaytirish, to‘qima va gumoral immunitetni faollashtirish, kardioprotektor ta’sir. Miokard o‘tkir ishemik shikastlanganda nekroz zonasi hosil bo‘lishini sekinlashtiradi, reabilitatsiya davrini qisqartiradi. Yurak yetishmovchiligida miokardning qisqaruvchanligini yaxshilaydi, jismoniy yuklamaga chidamlilikni oshiradi, stenokardiya xurujlari chastotasini kamaytiradi. Miya qon aylanishining o‘tkir va surunkali ishemik buzilishlarida ishemiya o‘chog‘ida qon aylanishini yaxshilaydi. Ko‘z tubining qon tomir patologiyasida samarali. Preparat surunkali alkogolizm bilan og‘rigan bemorlarda abstinensiya davrida asab tizimining funksional buzilishlarini bartaraf etadi.

Farmakokinetika

Qon plazmasidagi maksimal konsentratsiyaga yuborilgandan so‘ng darhol erishiladi. Organizmda metabolizmga uchrab, buyraklar orqali chiqariladigan ikkita asosiy metabolitni hosil qiladi. Yarim chiqarilish davri 3-6 soat.

Qo‘llanilishi

yurak ishemik kasalligini (stenokardiya, miokard infarkti) kompleks davolash tarkibida;

surunkali yurak yetishmovchiligi, disgormonal kardiomiopatiya;

bosh miyada qon aylanishining o‘tkir buzilishini kompleks davolash tarkibida (ishemik insult, serebrovaskulyar yetishmovchilik);

ish qobiliyatining pasayishi, jismoniy zo‘riqish (shu jumladan sportchilarda);

surunkali alkogolizmda abstinensiya sindromi (maxsus terapiya bilan birgalikda);

gemoftalm va ko‘z to‘r pardasiga turli etiologiyali qon quyilishlar, to‘r parda markaziy venasi va uning tarmoqlari trombozi, turli etiologiyali retinopatiyalar (diabetik, gipertoniya).

Qarshi ko‘rsatmalar

preparat komponentlariga yuqori sezuvchanlik;

kalla ichi bosimining oshishi (vena qon oqimi buzilganda va kalla ichi o‘smalarida);

18 yoshgacha (samaradorligi va xavfsizligi aniqlanmagan);

homiladorlik;

laktatsiya davri

Ehtiyotkorlik bilan: jigar va/yoki buyrak kasalliklari.

Qo‘llash usuli va dozalari

Qo‘zg‘atuvchi ta’sir rivojlanishi mumkinligi sababli, preparatni kunning birinchi yarmida qo‘llash tavsiya etiladi.

Yurak-qon tomir kasalliklari

Kompleks terapiya tarkibida - vena ichiga 500 mg dan 1,0 g (vena ichiga va parabulbar yuborish uchun 5-10 ml eritma 100 mg/ml), butun dozani bir vaqtning o‘zida qo‘llash yoki uni 2 marta yuborishga bo‘lish. Davolash kursi - 10-14 kun.

Takroriy kurslar (odatda yiliga 2-3 marta) - shifokor tavsiyasiga ko‘ra.

Miya qon aylanishining buzilishi

Miya qon aylanishi buzilishining o‘tkir davrida vena ichiga 500 mg (vena ichiga va parabulbar yuborish uchun 5 ml eritma 100 mg/ml) sutkada 1 marta 10 kun davomida yuboriladi.

Ish qobiliyatining pasayishi, jismoniy zo‘riqish (shu jumladan sportchilarda)

Aqliy va jismoniy zo‘riqishlarda (shu jumladan sportchilarda) 500 mg dan vena ichiga (vena ichiga va parabulbar yuborish uchun 5 ml eritma 100 mg/ml) sutkada 1 marta buyuriladi. Davolash kursi - 10-14 kun.

Surunkali alkogolizmda abstinensiya sindromi (maxsus terapiya bilan birgalikda)

Abstinensiya sindromida vena ichiga 500 mg (vena ichiga va parabulbar yuborish uchun 5 ml eritma 100 mg/ml) sutkada 2 marta qo‘llaniladi. Davolash kursi - 10-14 kun.

Oftalmopatologiya (ko‘z to‘r pardasiga turli etiologiyali gemoftalm va qon quyilishlar, to‘r parda markaziy venasi va uning tarmoqlari trombozi, turli etiologiyali retinopatiyalar (diabetik, gipertoniya). Preparat parabulbar yo‘l bilan 50 mg/sut (0,5 ml eritma vena ichiga va parabulbar yo‘l bilan 100 mg/ml) 10 kun davomida, shu jumladan kombinatsiyalangan terapiya tarkibida yuboriladi.

Nojo‘ya ta’sirlari

Yurak-qon tomir tizimi tomonidan: kamdan-kam hollarda - taxikardiya, arterial bosimning pasayishi yoki ko‘tarilishi.

Markaziy asab tizimi tomonidan: kamdan-kam hollarda - psixomotor qo‘zg‘alish.

Ovqat hazm qilish tizimi tomonidan: kamdan-kam hollarda - dispeptik buzilishlar.

Allergik reaksiyalar: kamdan kam hollarda - teri qichishishi, toshmalar, teri qoplamlari giperemiyasi, angionevrotik shish; juda kam hollarda - eozinofiliya.

Boshqalar: juda kam hollarda - umumiy holsizlik.

Dorilarning o‘zaro ta’siri

Antianginal vositalar, antikoagulyantlar, antiagregantlar, antiaritmik vositalar, diuretiklar, bronxolitiklar bilan birga qo‘llash mumkin.

Yurak glikozidlari ta’sirini kuchaytiradi.

O‘rtacha taxikardiya va arterial gipotenziya rivojlanishi mumkinligi sababli, nitroglitserin, nifedipin, alfa-adrenoblokatorlar, gipotenziv vositalar va periferik vazodilatatorlar bilan kombinatsiyalanganda ehtiyot bo‘lish kerak.

Maxsus ko‘rsatmalar

Idrinol® o‘tkir koronar sindromda birinchi darajali dori vositasi emas.

Avtotransport va mexanizmlarni boshqarish qobiliyatiga ta’siri

Idrinol® preparatining psixomotor reaksiyalar tezligiga salbiy ta’siri haqida ma’lumotlar yo‘q.

Homiladorlik va emizish davrida qo‘llash

Homiladorlikda preparatni qo‘llash xavfsizligi isbotlanmagan. Homilaga noxush ta’sir ko‘rsatmasligi uchun homiladorlikda preparatni buyurmaslik kerak. Preparat ko‘krak suti bilan ajralishi noma’lum. Laktatsiya davrida Idrinol® preparatini qo‘llash zarur bo‘lsa, emizishni to‘xtatish lozim.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Belgilari: bosh og‘rig‘i, taxikardiya, bosh aylanishi va umumiy holsizlik bilan kechuvchi qon bosimining pasayishi.

Davolash: simptomatik.

Saqlash shartlari

25 °C dan yuqori bo‘lmagan haroratda saqlanadi.

Muzlatmang.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

"FarmFirma "Soteks" YoAJ

141345, Rossiya, Moskva viloyati, Sergiyevo-Posadskiy munitsipal tumani, Bereznyakovskoye qishloq aholi punkti, Belikovo posyolkasi, 11-uy

Tel./faks: (495) 956-29-30

Ro‘yxatdan o‘tkazish guvohnomasining egasi: "FarmFirma "Soteks" YoAJ. Iste’molchilarning e’tirozlari ishlab chiqaruvchi manziliga yuborilsin.