Neyrokson

Tarkib

1 ampula tarkibiga quyidagilar kiradi:

Faol modda: sitikolin natriy, sitikolinga aylantirib hisoblaganda 500 mg yoki 1000 mg.

Yordamchi moddalar: inyeksiya uchun suv.

Tavsif

Tiniq, rangsiz suyuqlik.

Dori shakli

Inyeksiya uchun eritma.

Farmakoterapevtik guruh

Boshqa psixostimullovchi va nootrop vositalar. ATX kodi: N06BX06.

Farmakologik xususiyatlari

Sitikolin neyronlar membranasida strukturaviy fosfolipidlar biosintezini rag‘batlantiradi, bu esa membranalar funksiyasini, jumladan, ion almashinuv nasoslari va neyroretseptorlar faoliyatini yaxshilashga yordam beradi. Sitikolin membranaga barqarorlashtiruvchi ta’sir ko‘rsatishi tufayli shishga qarshi xususiyatlarga ega, shuning uchun miya shishini kamaytiradi. Sitikolin ba’zi fosfolipazalar faoliyatini susaytiradi, erkin radikallarning qoldiq ajralishiga to‘sqinlik qiladi, membrana tizimlarining shikastlanishining oldini oladi va himoya antioksidant tizimining saqlanishini ta’minlaydi.

Sitikolin apoptoz mexanizmlariga ta’sir qilib, shikastlangan to‘qima hajmini kamaytiradi, hujayralar o‘limining oldini oladi va xolinergik uzatishni yaxshilaydi. Sitikolin o‘choqli miya insultlarida ham profilaktik neyroprotektor ta’sir ko‘rsatadi.

Sitikolin miya qon aylanishining o‘tkir buzilishlarida bemorlarning tez funksional reabilitatsiyasiga yordam beradi, miya to‘qimalarining ishemik shikastlanishini kamaytiradi, bu rentgenologik tadqiqotlar natijalari bilan tasdiqlanadi.

Bosh miya jarohatlarida sitikolin tiklanish davrining davomiyligini qisqartiradi va jarohatdan keyingi sindromning intensivligini kamaytiradi.

Sitikolin miya faoliyati darajasining oshishiga yordam beradi, amneziya darajasini kamaytiradi, miya ishemiyasida kuzatiladigan kognitiv, sensitiv va motor buzilishlarda holatni yaxshilaydi.

Farmakokinetika

Sitikolin og‘iz orqali, mushak orasiga va vena ichiga yuborilganda yaxshi so‘riladi. Preparat yuborilgandan so‘ng, qon plazmasida xolinlar miqdori sezilarli darajada oshishi kuzatiladi. Ichga qabul qilinganda preparat deyarli to‘liq so‘riladi. Tadqiqotlar shuni ko‘rsatdiki, peroral va parenteral yuborish yo‘llarida biosinguvchanlik deyarli bir xil.

Preparat ichak va jigarda xolin va sitidin hosil qilib metabolizmga uchraydi. Yuborilgandan so‘ng sitikolin miya to‘qimalari tomonidan o‘zlashtiriladi, bunda xolinlar fosfolipidlarga, sitidin sitidin nukleotidlari va nuklein kislotalariga ta’sir qiladi. Sitikolin miya to‘qimalariga tez yetib boradi va hujayra membranalari, sitoplazma hamda mitoxondriyalarga faol kirib, fosfolipidlar faoliyatini faollashtiradi.

Yuborilgan dozaning faqat ozgina miqdori siydik va najas bilan chiqariladi (3% dan kam). Kiritilgan dozaning taxminan 12% qismi nafas yo‘llari orqali chiqariladi. Preparatning siydik va nafas yo‘llari orqali chiqarilishi ikki fazaga ega: birinchi faza - tez chiqarish (siydik bilan - dastlabki 36 soat davomida, nafas yo‘llari orqali - dastlabki 15 soat davomida), ikkinchi faza - sekin chiqarish. Preparat dozasining asosiy qismi metabolizm jarayonlariga jalb qilinadi.

Qo‘llanilishi

Miya qon aylanishi buzilishlarining o‘tkir davri va miya qon aylanishi buzilishlarining asoratlari hamda oqibatlarini davolash.

Bosh miya jarohati va uning oqibatlari.

Degenerativ va qon tomir genezli serebral patologiya tufayli kelib chiqqan nevrologik buzilishlar (kognitiv, sezgir, motor).

Qo‘llash usuli va dozalari

Vena ichiga yoki mushak ichiga yuborish uchun.

Kattalar uchun tavsiya etilgan doza kuniga 500 mg dan 2000 mg gacha.

Davolash: dastlabki 2 hafta 500-1000 mg dan kuniga 2 marta vena ichiga, so‘ngra 500-1000 mg dan kuniga 2 marta mushak orasiga. Maksimal sutkalik doza - 2000 mg.

O‘tkir va shoshilinch holatlarda preparat birinchi 24 soat ichida buyurilganda maksimal terapevtik samaraga erishiladi.

Zarurat tug‘ilganda, davolash Neyrokson preparati, ichish uchun eritma bilan davom ettiriladi. Maksimal terapevtik samara kuzatiladigan tavsiya etilgan davolash kursi 12 haftani tashkil etadi.

Preparatning dozalari va davolash muddatlari miya shikastlanishining og‘irligiga bog‘liq bo‘lib, shifokor tomonidan individual belgilanadi.

Vena ichiga asta-sekin vena ichiga yuborish (3-5 daqiqa davomida, yuborilayotgan dozaga qarab) yoki tomchilab vena ichiga yuborish (daqiqasiga 40-60 tomchi) ko‘rinishida buyuriladi.

Keksa yoshdagi bemorlar dozani tuzatishni talab qilmaydilar.

Nojo‘ya ta’sirlari

Nojo‘ya ta’sirlar juda kam uchraydi (<1/10000), shu jumladan yakka holatlar ham uchraydi.

Ruhiy buzilishlar: gallyutsinatsiyalar.

Asab tizimi tomonidan: kuchli bosh og‘rig‘i, bosh aylanishi.

Yurak-qon tomir tizimi tomonidan: arterial gipertenziya, arterial gipotenziya, taxikardiya.

Nafas tizimi tomonidan: dispnoe.

Ovqat hazm qilish yo‘li tomonidan: ko‘ngil aynishi, qusish, ich ketishi.

Umumiy buzilishlar: qaltirash, shish, allergik reaksiyalar, shu jumladan: toshma, purpura, qichishish, angionevrotik shish, anafilaktik shok; tana haroratining ko‘tarilishi, ko‘p terlash, yuborilgan joydagi o‘zgarishlar.

Qarshi ko‘rsatmalar

Preparat komponentlariga yuqori sezuvchanlik.

Parasimpatik nerv tizimi tonusining oshishi.

Dorilarning o‘zaro ta’siri

Sitikolin levodopaning ta’sirini kuchaytiradi. Tarkibida meklofenoksat bo‘lgan dori vositalari bilan bir vaqtda buyurish mumkin emas.

Maxsus ko‘rsatmalar

Bosh suyagi ichiga doimiy qon quyilganda dozani sutkasiga 1000 mg dan va vena ichiga yuborish tezligini daqiqasiga 30 tomchidan oshirmaslik kerak.

Preparat ampula ochilgandan so‘ng darhol qo‘llaniladi. Preparat solingan ampula faqat bir marta qo‘llash uchun mo‘ljallangan. Preparat qoldiqlarini yo‘q qilish kerak.

Homiladorlik yoki emizish davrida qo‘llash

Homiladorlarda Neyroksonni qo‘llashga oid ma’lumotlar yetarli emas. Sitikolinning ona sutiga ekskretsiyasi va uning homilaga ta’siri haqidagi ma’lumotlar ma’lum emas. Shuning uchun homiladorlik yoki emizish davrida preparat faqat ona uchun kutilayotgan foyda homila uchun potensial xavfdan yuqori bo‘lgandagina buyuriladi.

Bolalar

Neyroksonni bolalarga qo‘llash bo‘yicha ma’lumotlar yetarli emas. Preparat o‘ta zarurat tug‘ilganda, qo‘llashdan kutilayotgan foyda potensial xavfdan yuqori bo‘lganda qo‘llaniladi.

Avtotransportni boshqarishda yoki boshqa mexanizmlar bilan ishlashda reaksiya tezligiga ta’sir qilish qobiliyati

Ayrim hollarda markaziy asab tizimining ba’zi nojo‘ya reaksiyalari avtotransportni boshqarish va murakkab mexanizmlar bilan ishlash qobiliyatiga ta’sir qilishi mumkin.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Dozani oshirib yuborish holatlari qayd etilmagan.

Chiqarish shakli

Ampulada 4 ml dan, blisterda 5 ampuladan, pachkada 2 blisterdan.

Saqlash shartlari

Asl qadoqda 30 °C dan yuqori bo‘lmagan haroratda saqlang.

Yaroqlilik muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

"Galichfarm" AJ Ukraina, 79024, Lvov shahri, Oprishkovskaya ko‘chasi, 6/8.