Jaraflu

Tarkib

Bitta paketda quyidagilar mavjud:

Faol tarkibiy qismlar: paratsetamol 325 mg, feniramin maleat 20 mg, fenilefrin gidroxlorid 10 mg, askorbin kislotasi 50 mg.

Yordamchi komponentlar: olma kislotasi, natriy sitrat, saxaroza, limon aromatizatori, qulupnay aromatizatori, apelsin aromatizatori, suvsiz limon kislotasi, mannitol, natriy benzoat, gidroksipropilsellyuloza, aspartam, suvsiz dekstroza, povidon K-30.

Tavsifi: Sitrus hidli, kesaklarsiz va begona zarrachalarsiz, sariq rangli dog‘li sochiluvchan oq donador kukun.

Dori shakli

Ichish uchun eritma tayyorlash uchun kukun, dozalangan.

Farmakoterapevtik guruh

O‘RK va "shamollash" simptomlarini bartaraf etish uchun vosita (analgetik bo‘lmagan vosita + alfa-adrenomimetik + H1 - gistamin retseptorlari blokatori + vitamin).

Farmakologik xususiyatlari

Kombinatsiyalangan preparat isitma tushiruvchi, yallig‘lanishga qarshi, shishga qarshi, og‘riq qoldiruvchi va allergiyaga qarshi ta’sirga ega.

Qo‘llanilishi

Yuqumli-yallig‘lanish kasalliklari - gripp, O‘RVI ("shamollash"), yuqori harorat, kuchli qaltirash, tananing og‘rishi, bosh va mushak og‘rig‘i, tumov, burun bitishi, aksirish bilan kechadi.

Qo‘llash usuli va dozalari

Ichkariga. Bitta paketchadagi masalliqni 1 stakan qaynatilgan issiq suvda eritib olamiz. Issiq holda iste’mol qilish. Ta’bga ko‘ra shakar qo‘shish mumkin. Takroriy dozani har 4 soatda qabul qilish mumkin (24 soat ichida 3 dozadan ko‘p emas). Jaraflyani sutkaning istalgan vaqtida qo‘llash mumkin, lekin preparatni uxlashdan oldin, tunda qabul qilish eng yaxshi samara beradi. Agar preparatni qabul qilishni boshlaganingizdan keyin 3 kun ichida alomatlarning yengillashishi kuzatilmasa, shifokorga murojaat qilishingiz kerak.

Nojo‘ya ta’sirlari

Allergik reaksiyalar (toshma, qichishish, eshakyemi, angionevrotik shish), yuqori qo‘zg‘aluvchanlik, psixomotor reaksiyalar tezligining pasayishi, charchoq hissi, og‘iz qurishi, siydik tutilishi, ko‘ngil aynishi, qusish, oshqozonda og‘riq, yurak urishi, qon bosimining oshishi, bosh aylanishi, uyqu buzilishi, midriaz, akkomodatsiya parezi, ko‘z ichi bosimining oshishi kuzatilishi mumkin. Paratsetamol mavjudligini hisobga olgan holda: kamdan kam hollarda - qon tizimining buzilishlari (anemiya, trombotsitopeniya, leykopeniya, agranulotsitoz); yuqori dozalarni uzoq vaqt qabul qilganda gepatotoksik va nefrotoksik ta’sir, gemolitik anemiya, metgemoglobinemiya, pansitopeniya kuzatilishi mumkin.

Qarshi ko‘rsatmalar

Preparatning ayrim komponentlariga yuqori sezuvchanlik. Homiladorlik, emizish davri. Portal gipertenziya, alkogolizm, buyrak yetishmovchiligi, glyukoza 6 - fosfatdegidrogenaza fermenti yetishmovchiligi, 12 yoshgacha bo‘lgan bolalar.

Ehtiyotkorlik bilan qo‘llanilsin: arterial gipertenziya, qandli diabet, yopiq burchakli glaukoma, jigar yoki buyrak, o‘pkaning og‘ir kasalliklari (shu jumladan bronxial astma), prostata bezi adenomasida siydik ajralishining qiyinlashishi, qon kasalliklari, tug‘ma giperbilirubinemiya (Jilber, Dubin-Jonson va Roter sindromlari).

Boshqa dori vositalari bilan o‘zaro ta’siri

Monoaminooksidaza ingibitorlarini qabul qilishda preparatni qabul qilishdan tiyilish tavsiya etiladi. Paratsetamolning gepatotoksik ta’siri xavfi barbituratlar, difenin, karbamazepin, rifampitsin, zidovudin va jigar mikrosomal fermentlarining boshqa induktorlari bir vaqtda buyurilganda ortadi. Sedativ vositalar, etanol ta’sirini kuchaytiradi. Etanol feniraminning sedativ ta’sirini kuchaytiradi.

Antidepressantlar, parkinsonizmga qarshi va antipsixotik vositalar, fenotiazin hosilalari siydik tutilishi, og‘iz qurishi, qabziyat rivojlanish xavfini oshiradi.

Maxsus ko‘rsatmalar

Jigarning toksik shikastlanishini oldini olish uchun preparatni qabul qilishni alkogolli ichimliklar bilan birga qo‘shib olib bormaslik kerak.

Davolash paytida diqqatni jamlashni va psixomotor reaksiyalarning yuqori tezligini talab qiladigan avtomobil yoki boshqa mexanizmlarni boshqarish tavsiya etilmaydi.

Shikastlangan paketchalardan tayyorlangan preparatni ishlatish mumkin emas.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Dozani oshirib yuborish

Ko‘ngil aynishi, qusish, epigastral sohada og‘riq; gepatotoksik va nefrotoksik ta’sir, og‘ir hollarda jigar yetishmovchiligi, ensefalopatiya va komatoz holat rivojlanadi. Davolash: oshqozonni yuvish, dastlabki 6 soatda faollashtirilgan ko‘mir, SH-guruh donorlari va glutation sintezi o‘tmishdoshlari - metioninni dozani oshirib yuborgandan 8-9 soat o‘tgach va N - atsetilsisteinni 12 soatdan keyin yuborish.

Chiqarish shakli

Ichish uchun eritma tayyorlash uchun kukun, dozalangan. 22 g kukun aralash materialdan (polietilen, alyuminiy folga, polietilen, qog‘oz) tayyorlangan paketchaga solinadi.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlang.

Yaroqlilik muddati

2 yil.

Dorixonalardan berish shartlari

Retseptsiz.

Ishlab chiqaruvchi

Hailwood Laboratories Pvt. Ltd., Sol No319, Faza-2, GIDS., Vatva, Ahmedobod-382445, Hindiston.

Uchun ishlab chiqarilgan

Avantika Medeks Pvt. Ltd. 6, Ahmadobod majmuasi, Sarhez, Ahmadobod, Hindiston.