Futsis DT

Tarkib

1 ta tabletka tarkibida quyidagilar mavjud:

faol modda: flukonazol - 50 mg;

yordamchi moddalar: laktoza, mikrokristallik sellyuloza, povidon K30, talk, magniy stearat, natriy krosskarmeloza, aerosil, natriy saxarin, "Amerika muzqaymog‘i" DC 129 xushbo‘ylantirgichi.

Dori shakli

Dispergirlanadigan tabletkalar.

Farmakoterapevtik guruh

Tizimli qo‘llash uchun zamburug‘larga qarshi vosita. ATX kodi: J02AC01.

Farmakologik xususiyatlari

Triazol birikmalar sinfiga mansub zamburug‘larga qarshi vosita. Futsis® DT zamburug‘larga qarshi kuchli ta’sirga ega bo‘lib, zamburug‘ sterollari sintezini o‘ziga xos tarzda to‘xtatadi. Candida turkumiga mansub zamburug‘larga (jumladan, visseral kandidozga), kriptokokklarga (jumladan, kalla ichi infeksiyalariga), shuningdek, endemik mikozlar (jumladan, kalla ichi infeksiyalariga) va boshqa zamburug‘li infeksiyalarning qo‘zg‘atuvchilariga nisbatan faol.

Farmakokinetika

Ichga qabul qilingandan so‘ng flukonazol yaxshi so‘riladi. Biologik o‘zlashtirilishi 90% dan kam emas. Maksimal konsentratsiyaga (Smax) flukonazol qabul qilingandan 1-2 soat o‘tgach erishiladi. Plazmadagi konsentratsiya 50-400 mg dozada dozaga mutanosibdir. Preparat qayta-qayta qabul qilinganda plazmadagi konsentratsiya cho‘qqisi ortadi.

Muvozanatli konsentratsiyaga 5-10 kun ichida erishiladi, ammo zarba dozasi buyurilganda 2 kundan keyin ham yetishi mumkin.

Oqsillar bilan bog‘lanishi past (taxminan 12%). Flukonazol organizmning barcha suyuqliklariga yaxshi o‘tadi. Flukonazolning ko‘krak suti, so‘lak, balg‘am, sinovial, vaginal va peritoneal suyuqliklardagi darajasi uning plazmadagi konsentratsiyasiga o‘xshash. Zamburug‘li meningit bilan og‘rigan bemorlarda orqa miya suyuqligidagi flukonazol miqdori uning plazmadagi darajasining 50-90% ni tashkil qiladi.

Flukonazol asosan buyraklar orqali chiqariladi; qabul qilingan dozaning taxminan 80% siydikda o‘zgarmagan holda aniqlanadi. Yarim chiqarilish davri (T1/2) taxminan 30 soatni tashkil etadi. Flukonazol klirensi kreatinin klirensiga mutanosibdir. Flukonazol dializda chiqariladi.

Qo‘llanilishi

Futsis® DT dispergirlanadigan tabletkalari Candida turkumiga mansub zamburug‘lar keltirib chiqargan infeksiyalarda qo‘llaniladi: shilliq qavatlar, shu jumladan og‘iz va tomoq bo‘shlig‘i (tish protezlarini taqish bilan bog‘liq), qizilo‘ngach kandidozi; noinvaziv bronx-o‘pka infeksiyalari; kanduriya; genital kandidoz - qin kandidozi (o‘tkir yoki qaytalanuvchi), shuningdek kandidozli balanit.

Futsis® DT tizimli kandidozli infeksiyalarda (nafas yo‘llari, kandidemiya, tarqalgan kandidoz), siydik yo‘llari infeksiyalarida, peritonitda; kriptokokkli meningitda, zamburug‘li infeksiyalarda (oyoq, tana, chov sohasi mikozlari, temiratkilar, onixomikozlar, chuqur endemik mikozlar, shu jumladan koksidioidomikoz) qo‘llaniladi.

Shuningdek, sitostatik yoki nur terapiyasini olayotgan OITS bilan og‘rigan bemorlarda zamburug‘li infeksiyalarning oldini olish uchun.

Qo‘llash usuli va dozalari

Ichish uchun tabletkalar. Zamburug‘li infeksiyaning xarakteri va kechishiga qarab, sutkalik doza 50 mg dan 400 mg gacha bo‘lishi mumkin. Dozani albatta shifokor belgilaydi.

50 mg li dispergirlanadigan tabletkalar bolalar va kattalarga qo‘llaniladi.

Tabletka bir choy qoshiq suvda (50 mg/5 ml) yoki dozaga muvofiq eritiladi.

Davolash davomiyligi klinik va mikologik ta’sirlarga bog‘liq. Futsis® DT har kuni sutkada 1 marta qo‘llaniladi.

Orofaringeal kandidozda kattalarga, odatda, kuniga 1 marta 7-14 kun davomida 50-100 mg Futsis® DT buyuriladi. Immuniteti sezilarli darajada pasaygan bemorlarda davolash uzoqroq davom ettiriladi.

Og‘iz bo‘shlig‘i shilliq qavatining kandidozida - birinchi kuni doza 200 mg, keyingi 5 kunda 100 mg ni tashkil etadi (yuvib, og‘izda 2 daqiqa ushlab turiladi, so‘ngra yutiladi).

Tish protezlarini taqish bilan bog‘liq bo‘lgan og‘iz bo‘shlig‘i shilliq qavatining atrofik kandidozida preparat 50 mg dan sutkada 1 marta, 14 kun davomida protezga ishlov berish uchun mahalliy antiseptik preparatlar bilan birga buyuriladi. Shilliq qavatlarning boshqa kandidozli infeksiyalarida (genitaldan tashqari), masalan, ezofagitda, noinvaziv bronx-o‘pka infeksiyalarida, kanduriyada, teri kandidozida, samarali doza odatda kuniga 50-100 mg ni tashkil etadi, davolash davomiyligi 14-30 kun.

Teri infeksiyalarida, jumladan oyoq, silliq teri, chov sohasi mikozlarida va kandidoz infeksiyalarida tavsiya etilgan doza haftasiga 1 marta 150 mg yoki kuniga 1 marta 50 mg ni tashkil etadi. Davolash davomiyligi odatda 2-4 hafta, biroq oyoq mikozida uzoqroq (6 haftagacha) davolanish talab etilishi mumkin. Kepaksimon temiratkida tavsiya etilgan doza 50 mg dan sutkada 1 marta 2-4 hafta davomida. Onixomikozda (tinea unguium) tavsiya etilgan doza - haftasiga 1 marta 150 mg. Davolashni zararlangan tirnoq sog‘lom tirnoq bilan to‘liq almashtirilgunga qadar davom ettirish kerak. Tirnoqlarning qo‘l va oyoq barmoqlarida qayta o‘sishi uchun, odatda, mos ravishda 3-6 va 6-12 oy kerak bo‘ladi.

Qizilo‘ngach kandidozi - birinchi kuni doza 200 mg, keyingi kunlarda - kuniga 1 marta 100 mg. Bemorlar kamida 3 hafta davomida davolanishlari kerak.

Tizimli kandidoz infeksiyasi - dozalarni shifokor belgilaydi, kuniga 400 mg gacha bo‘lishi mumkin.

Siydik yo‘llari infeksiyalari va peritonit - tavsiya etilgan doza kuniga 50-200 mg.

Kriptokokkli meningit - birinchi kuni tavsiya etilgan doza 400 mg, keyin kuniga 200 mg. Davolash davomiyligi - 10-12 hafta.

Bolalar uchun sutkalik doza kattalarnikidan oshmasligi kerak. Shilliq pardalar kandidozida tavsiya etiladigan doza 1-3 mg/kg/sutkani tashkil etadi. Tarqalgan kandidoz va kriptokokk infeksiyasini davolash uchun bolalar uchun flukonazol dozasi salomatlik holatiga qarab kuniga 6-12 mg/kg ni tashkil etadi. Buyrak faoliyati buzilgan bolalarda preparatning sutkalik dozasini buyrak yetishmovchiligining ifodalanganlik darajasiga muvofiq kamaytirish lozim.

Sitostatik yoki nur bilan davolanayotgan bemorlarda kuniga 400 mg dan, davolash boshlanishidan bir necha kun oldin va undan keyin 7 kun davomida qo‘llaniladi.

Sitotoksik kimyoterapiya yoki nur terapiyasi natijasida rivojlanadigan neytropeniya bilan bog‘liq infeksiya rivojlanish xavfi bo‘lgan immuniteti pasaygan bemorlarda zamburug‘li infeksiyalarning oldini olish uchun preparat indutsirlangan neytropeniyaning ifodalanishi va saqlanish davomiyligiga qarab kuniga 3-12 mg/kg dan buyuriladi.

Nojo‘ya ta’sirlari

Futsis® DT odatda yaxshi o‘zlashtiriladi.

Quyidagilar kuzatilishi mumkin: ko‘ngil aynishi, qorin sohasida og‘riq, ba’zi bemorlarda ich ketishi, teri toshmasi, bosh og‘rig‘i; alopetsiya, leykopeniya, trombotsitopeniya (immuniteti zaiflashgan shaxslarda); allergik reaksiyalar (preparatni bekor qilish talab etiladi); ishqoriy fosfataza, AlAT, AsAT faolligining oshishi.

Agar sizda qandaydir noodatiy reaksiyalar paydo bo‘lsa, dori vositasini keyingi qo‘llash bo‘yicha albatta shifokor bilan maslahatlashing!

Qarshi ko‘rsatmalar

Flukonazolga yoki kimyoviy tuzilishi bo‘yicha unga yaqin bo‘lgan azol birikmalariga yuqori sezuvchanlik; kuniga 400 mg yoki undan ortiq dozada flukonazol bilan davolanayotgan bemorlar tomonidan terfenadinni bir vaqtning o‘zida qo‘llash; jigar yetishmovchiligi; homiladorlik; laktatsiya.

Qo‘llashdagi ogohlantirishlar.

Davolashni boshlashdan oldin shifokor bilan maslahatlashing!

Futsis® DT bilan davolanish vaqtida jigar faoliyati ko‘rsatkichlari buzilgan bemorlar shifokor nazoratida bo‘lishlari kerak. Jigar shikastlanishining klinik belgilari paydo bo‘lishi bilan Futsis® DT bekor qilinishi kerak.

OITS bilan og‘rigan bemorlar ko‘pchilik dori-darmonlarni qabul qilganda og‘ir teri reaksiyalari rivojlanishiga ko‘proq moyil bo‘ladilar. Yuzaki zamburug‘li infeksiya bo‘yicha davolanayotgan bemorda toshmalar paydo bo‘lishi bilan, bu flukonazolni qo‘llash bilan bog‘liq bo‘lishi mumkin, preparatni bekor qilish kerak. Invaziv/tizimli zamburug‘li infeksiyalar bilan og‘rigan bemorlarda toshmalar paydo bo‘lishi bilan, albatta, holatni kuzatish va polimorf eritema paydo bo‘lganda Futsis® DTni bekor qilish lozim.

Transport vositalari va boshqa mexanizmlarni boshqarish qobiliyatiga ta’siri

Fucis® DT transport vositalarini boshqarish yoki potensial xavfli mexanizmlar bilan ishlash qobiliyatiga ta’sir ko‘rsatishi dargumon. Biroq, nojo‘ya ta’sirlar (bosh aylanishi, talvasalar) rivojlanishi mumkinligini hisobga olib, transport vositalari va boshqa mexanizmlarni boshqarishdan saqlanish kerak.

Dorilarning o‘zaro ta’siri

Varfarin va Futsis® DTni bir vaqtda qabul qilish protrombin vaqtini oshiradi; Futsis® DT va sulfonilmochevina hosilalari guruhining peroral gipoglikemik preparatlari (xlorpropamid, glibenklamid, glipizid va tolbutamid) - ularning yarim chiqarilish davrini uzaytiradi (gipoglikemiya rivojlanish ehtimolini hisobga olish lozim).

Futsis® DT va fenitoin bir vaqtda qabul qilinganda, fenitoin konsentratsiyasi klinik jihatdan sezilarli darajada oshadi (konsentratsiyani nazorat qilish va dozani tanlash zarur). Gidroxlortiazidni ko‘p marta qo‘llash qon plazmasida flukonazol konsentratsiyasini oshiradi, biroq Futsis® DT dozalash tartibini o‘zgartirish, odatda, zarur emas.

Futsis® DT va rifampitsinni bir vaqtda qabul qilish flukonazolning yarim chiqarilish davri davomiyligini 20% ga kamaytirdi. Preparatlarning ko‘rsatilgan kombinatsiyasidan foydalanayotgan bemorlarda Futsis® DT dozasini oshirish maqsadga muvofiqligini hisobga olish zarur.

Futsis® DT va zidovudin kombinatsiyasi tayinlangan bemorlarning holatini zidovudinning nojo‘ya ta’sirlarini erta aniqlash maqsadida kuzatib borish lozim.

Sizaprid, astemizol, rifabutin, takrolimus yoki sitoxrom R450 tizimi tomonidan metabolizmga uchraydigan boshqa dori vositalarini bir vaqtning o‘zida qabul qilayotgan bemorlarda Futsis® DT qo‘llanilishi ushbu dori vositalarining qondagi konsentratsiyasi oshishi bilan kechishi mumkin.

Simeditin yoki antatsidlarni bir vaqtda qabul qilish Futsis® DT so‘rilishiga klinik jihatdan sezilarli ta’sir ko‘rsatmaydi.

Maxsus ko‘rsatmalar

Ushbu dori vositasini tayinlagan shifokor davolash jarayonini kuzatib borishi muhimdir. Uning oldiga u belgilagan vaqtda kelishni unutmang.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin qo‘llamaslik lozim.

Dozani oshirib yuborish

Gallyutsinatsiyalar va paranoid xatti-harakatlar bilan namoyon bo‘ladi. Bunday holda darhol shifokorga murojaat qilish kerak.

Chiqarish shakli

50 mg li No 4 tabletkalar blisterda, karton qadoqda.

Saqlash shartlari

Quruq, qorong‘i joyda, 15-25 °C haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchining nomi va manzili.

KUSUM HEALTHCARE PVT.LTD.

SP-289 (A),RIICO INDL.AREA,CHOPANKI,

BHIWADI (RAJ.) INDIA.