Jasmed

Dori preparatining tarkibi

Bir tabletka quyidagilarni o‘z ichiga oladi:

faol modda - azitromitsin digidrat 524,0 mg, azitromitsinga 500 mg hisobida,

yordamchi moddalar: prejelatinlangan kraxmal, kopovidon, past almashingan gidroksipropilsellyuloza, suvsiz kalsiy gidrofosfat, krossovidon, talk, magniy stearat, natriy laurilsulfat, tozalangan suv1, 96% etanol1

qobiq tarkibi: gipromelloza, makrogol 6000, talk, titan dioksidi, dimetikon, tozalangan suv 1

1 - Ishlab chiqarish jarayonida olib tashlanadi.

Tashqi ko‘rinish, hid, ta’m tavsifi

Tabletkalar cho‘zinchoq shaklda, yuzasi ikki tomonlama qavariq, oq rangli plyonkali qobiq bilan qoplangan, bir tomonida chizig‘i bor. Yoriqda oq yadro va oq parda ko‘rinadi.

Dori shakli, dozasi

Plyonkali qobiq bilan qoplangan tabletkalar, 500 mg

Farmakoterapevtik guruh

Tizimli qo‘llash uchun infeksiyalarga qarshi preparatlar. Tizimli qo‘llaniladigan antibakterial preparatlar. Makrolidlar, linkozamidlar va streptograminlar. Makrolidlar. Azitromitsin. ATX kodi: J01FA10.

Qo‘llanilishi

Preparatga sezgir mikroorganizmlar keltirib chiqaradigan yuqumli-yallig‘lanish kasalliklari:

- yuqori nafas yo‘llari infeksiyalari (burun yondosh bo‘shliqlari, halqum, bodomcha bezlari, o‘rta quloq shilliq qavatining yallig‘lanishi)

- pastki nafas yo‘llari infeksiyalari (bronxit va o‘pka yallig‘lanishi)

- teri va yumshoq to‘qimalarning yengil va o‘rtacha og‘irlikdagi infeksiyalari (soch follikulasi, teri osti yog‘ to‘qimasi yallig‘lanishi, saramas)

- jinsiy yo‘l bilan yuqadigan infeksiyalar (shu jumladan siydik-tanosil yo‘llari xlamidiozi, siydik chiqarish kanali va bachadon bo‘ynining xlamidiya infeksiyasi keltirib chiqargan asoratsiz yallig‘lanishi).

Qo‘llash boshlangunga qadar zarur bo‘lgan ma’lumotlar ro‘yxati

Qarshi ko‘rsatmalar

- azitromitsin, eritromitsin, yordamchi moddalar yoki makrolidlar yoki ketolidlar guruhidagi har qanday antibiotikka yuqori sezuvchanlik

- buyrak va jigar faoliyatining og‘ir buzilishlari (shu jumladan, xolestatik sariqlik, o‘tmishda azitromitsin qabul qilish natijasida jigar faoliyatining buzilishi)

- 12 yoshgacha bo‘lgan bolalar (tana vazni 45 kg dan kam bo‘lgan bolalar)

- homiladorlikning birinchi uch oyi va emizish davri

- yurak-qon tomir yetishmovchiligining og‘ir shakli.

Qo‘llashda zarur ehtiyot choralari

Tana vazni 45 kg dan kam bo‘lgan bolalar va o‘smirlar: Jasmed preparati, tabletkalar 500 mg, tana vazni 45 kg dan kam bo‘lgan bolalarni davolash uchun mo‘ljallanmagan, ular uchun azitromitsinning boshqa dori shakllari ishlab chiqariladi.

Keksa yoshdagi bemorlar: preparat kattalar bilan bir xil dozalarda qo‘llaniladi, keksa yoshdagi bemorlarda yurak ritmining buzilishi va ahvolning yomonlashishi xavfi tufayli alohida ehtiyotkorlik bilan foydalanish tavsiya etiladi.

Buyrak yetishmovchiligi bo‘lgan bemorlar: Buyrak faoliyatining yengil va o‘rtacha ifodalangan buzilishida dozani tuzatish talab etilmaydi, og‘ir buyrak kasalligida ehtiyotkorlik zarur.

Jigar yetishmovchiligi bo‘lgan bemorlar

Jigar faoliyatining yengil yoki o‘rtacha ifodalangan buzilishi bo‘lgan bemorlarda dozani tuzatish talab etilmaydi.

Boshqa dori vositalari bilan o‘zaro ta’siri

Me’da shirasi kislotaliligini kamaytiruvchi dorilar (antatsidlar): ularni bir vaqtda qabul qilish mumkin emas. Jasmed preparatini antatsiddan 1 soat oldin yoki 2 soat keyin qabul qilish kerak.

Flukonazol: Jasmed preparatining ta’siri kamayishi mumkin.

Nelfinavir: Nelfinavir bilan bir vaqtda qo‘llash azitromitsin konsentratsiyasini oshirdi, ammo sezilarli nojo‘ya ta’sirlar kuzatilmadi, shuning uchun dozani o‘zgartirish talab etilmaydi.

Rifabutin: Rifabutin bilan bir vaqtda davolanayotgan bemorlarda rifabutinni qo‘llash natijasida qondagi neytrofil leykotsitlar sonining kamayishi kuzatildi.

Terfenadin, astemizol: o‘zaro ta’sir dalillari aniqlanmadi, ammo o‘zaro ta’sir rivojlanishi ehtimoli haqida kamdan-kam xabarlar qayd etilgan.

Simetidin: o‘zaro ta’sirlar kuzatilmadi.

Ergotamin hosilalari: qoraqo‘zaning toksik ta’siri rivojlanishi mumkin, shuning uchun Jasmed preparati bilan bir vaqtda qo‘llash tavsiya etilmaydi.

Digoksin, kolxitsin: Digoksin ta’siri kuchayishi mumkin. Davolash paytida va Jasmed preparatini qo‘llash to‘xtatilgandan so‘ng, shifokor nazorati va qondagi digoksin miqdorini o‘lchash talab etilishi mumkin.

Qon ivishini pasaytiruvchi peroral preparatlar: ularning ta’siri kuchayishi mumkin, shuning uchun Jasmed preparati bilan bir vaqtda qo‘llanganda qon ivish ko‘rsatkichlarini (protrombin vaqtini) aniqlash talab etilishi mumkin.

Siklosporin: siklosporin ta’sirining sezilarli darajada kuchayishi qayd etiladi. Agar ularni Jasmed bilan bir vaqtda qo‘llash zarur bo‘lsa, siklosporin darajasini nazorat qilish yoki uning dozasini tuzatish talab etilishi mumkin.

Teofillin: teofillin bilan o‘zaro ta’siri kuzatilmadi.

Trimetoprim/sulfametoksazol: o‘zaro ta’sir kuzatilmadi, dozani o‘zgartirish talab etilmaydi.

Zidovudin: periferik qonning mononuklear hujayralarida zidovudin va uning faol metaboliti konsentratsiyasining oshishi qayd etildi. Bu faktning klinik ahamiyati noaniq, ammo bemorlar uchun foydali bo‘lishi mumkin.

Atorvastatin: Atorvastatin ta’sirining kuchayishi va mushaklar yemirilishi (rabdomioliz) tufayli yuzaga keladigan og‘ir holat rivojlanishi mumkin.

Karbamazepin: Karbamazepinning ta’siri kuzatilmadi.

Setirizin: dorilarning o‘zaro ta’siri yoki EKGda (QT intervali) biron-bir sezilarli o‘zgarishlarni keltirib chiqarmaydi.

Didanozinlar (didezoksiinozin): OIV bilan kasallangan bemorlarda bir vaqtda qo‘llash didanozinning ta’siriga ta’sir ko‘rsatmadi.

Edavirens: dorilarning o‘zaro ta’siri kuzatilmadi, Jasmed dori vositasining dozasini o‘zgartirish talab etilmaydi.

Indinavir: dorilarning o‘zaro ta’siri kuzatilmagan, Jasmed dori vositasining dozasini o‘zgartirish talab etilmaydi.

Metilprednizolon: Azitromitsin metilprednizolon ta’siriga sezilarli ta’sir ko‘rsatmadi.

Midazolam: azitromitsin midozalam ta’siriga sezilarli ta’sir ko‘rsatmadi.

Sildenafil: sog‘lom erkaklarda azitromitsin sildenafil ta’siriga sezilarli ta’sir ko‘rsatmadi.

Triazolam: azitromitsin triazolam ta’siriga sezilarli ta’sir ko‘rsatmadi.

Maxsus ogohlantirishlar

Ehtiyotkorlik zarur: Jasmed preparati Streptococcus pneumoniae yoki Haemophilus influenzae keltirib chiqargan shifoxonadan tashqari zotiljamning yengil shaklini ambulator davolashda xavfsiz va samarali qo‘llanilishi mumkin. Pnevmoniyaning o‘rtacha yoki og‘ir kechishida Jasmedni qo‘llash tavsiya etilmaydi, chunki bu hollarda og‘iz orqali qabul qilinadigan dori vositalari bilan ambulator davolanish to‘g‘ri kelmaydi, ayniqsa quyidagi xavf omillari mavjud bo‘lsa:

• mukovissidoz

• shifoxona ichi infeksiyasi

• mavjud yoki gumon qilinayotgan septik holat (qonda bakteriyalar mavjudligi)

• kasalxonaga yotqizish zarurati

• keksalik yoki zaiflashgan sog‘liq holati

•kasallikning kechishiga javob berish qobiliyatini xavf ostiga qo‘yishi mumkin bo‘lgan jiddiy kasalliklar (shu jumladan immunitet tanqisligi yoki taloq funksiyasining pasayishi).

Allergik reaksiyalar: jiddiy allergik reaksiyalar rivojlanishi mumkin, shu jumladan teri va teri osti to‘qimalarining chuqur qatlamlarining zich, assimetrik, og‘riqsiz shishi va tez og‘ir allergik reaksiyalar (ba’zan o‘lim bilan tugaydigan), masalan, teri va shilliq qavatlarda toshmalar bilan kechuvchi o‘tkir toksik-allergik kasallik, terining allergik yallig‘lanishi, toshmalar paydo bo‘lishi, terida katta yassi pufakchalar va yorqin qizil rangli keng eroziyalar rivojlanishi. Agar allergik reaksiya rivojlansa, Jasmed preparatini qabul qilishni to‘xtatish va zudlik bilan shifokorga murojaat qilish lozim.

Jigarga toksik ta’siri: Jasmed preparatini jigar faoliyati buzilgan bemorlarda qo‘llashda ehtiyotkorlik zarur. Yengil va o‘rta og‘irlikdagi jigar kasalligi bo‘lgan bemorlarda dozani tuzatish talab etilmaydi. Azitromitsin preparatlarini qo‘llashda o‘limga olib kelishi mumkin bo‘lgan jigar faoliyatining buzilishi, jigar yallig‘lanishi, jigarda o‘t oqishining qiyinlashishi tufayli teri va shilliq qavatlarning sarg‘ayishi, jigar hujayralarining yemirilishi (nekroz), jigar yetishmovchiligi va jigarning yashin tezligidagi yallig‘lanishi holatlari qayd etilgan. Ko‘pincha bu jigar kasalligi mavjud bo‘lganda yoki jigarga zaharli ta’sir ko‘rsatadigan boshqa preparatlar bilan bir vaqtda qo‘llanganda sodir bo‘ladi.

Jigar faoliyatining buzilishi belgilari paydo bo‘lganda: sariqlik, qoramtir siydik, qon ketishga moyillik yoki bosh miya faoliyatining buzilishi natijasida yuzaga kelgan tez rivojlanuvchi og‘riqli holatda Jasmed preparatini qabul qilishni to‘xtatish va zudlik bilan shifokorga murojaat qilish lozim.

Cho‘chqayong‘oqning toksik ta’siri: cho‘chqayong‘oq preparatlari bilan bir vaqtda qo‘llanganda, uning toksik ta’siri rivojlanishi mumkin, shuning uchun Jasmed preparati va cho‘chqayong‘oq hosilalari bir vaqtda qabul qilinmasligi kerak.

Yangi infeksiya: zamburug‘lar kabi sezgir bo‘lmagan mikroorganizmlar keltirib chiqaradigan yangi infeksiya belgilari paydo bo‘lishi mumkin. Bunday hollarda Jasmed preparatini bekor qilish va tegishli davolashni tayinlash talab etilishi mumkin.

Klostridium Difficile (KD) keltirib chiqargan o‘tkir ichak yallig‘lanishi: Antibakterial dorilar bilan davolash normal ichak florasini susaytiradi va KDning kuchayishiga olib kelishi mumkin, bu esa (hatto preparatni qo‘llagandan keyin ikki oy ichida ham) turli darajadagi o‘tkir ichak yallig‘lanishi bilan namoyon bo‘lishi mumkin: kamdan-kam suyuq ich kelishidan tortib, o‘lim bilan tugaydigan yo‘g‘on ichakning og‘ir yallig‘lanishigacha. Kuchli toksin ishlab chiqaradigan KD turi kasallanish va o‘limning ko‘payishiga olib kelishi mumkin, bu qo‘zg‘atuvchi mikroblarga qarshi dorilarga chidamli bo‘lishi va yo‘g‘on ichakni olib tashlashni talab qilishi mumkin. Tez-tez, suyuq ich kelganda, antibiotiklar qo‘llangandan keyin KD haqida doimo yodda tutish kerak. Yengil holatlarda alomatlar faqat preparatni qabul qilish to‘xtatilgandan keyingina o‘tib ketishi mumkin. O‘rtacha og‘ir va og‘ir holatlarda mos keladigan, KDga qarshi samarali antibakterial preparatlarni tayinlash zarur bo‘lishi mumkin. Eritmalarni, jumladan tuzlar va oqsil o‘rnini bosuvchilarni vena ichiga yuborish ham talab etilishi mumkin. Ichakning harakat faolligini sekinlashtiradigan dori vositalari, masalan, opiatlar va difenoksilat bilan atropin (lomotil), og‘riqli holatni uzaytirishi va/yoki yomonlashtirishi mumkin, shuning uchun ularni qo‘llash kerak emas. 

Tez-tez ich kelishi kuzatilsa, zudlik bilan shifokorga murojaat qilish lozim.

Buyrak yetishmovchiligi: buyrak kasalligi bor bemorlarda Jasmed preparatining ta’siri kuchayishi mumkin.

Yurak ritmining buzilishi: juda kam hollarda o‘limga olib kelishi mumkin bo‘lgan yurak ritmining og‘ir buzilishlari rivojlanishi mumkin. Jasmedni qo‘llashda ehtiyot bo‘lish kerak, ayniqsa ayollar va keksa yoshdagi bemorlarda:

- yurakda impuls o‘tkazilishining tug‘ma yoki orttirilgan buzilishlari (yurak qisqarishlari odatdagidan kamroq);

- yurak ritmiga ta’sir ko‘rsatadigan boshqa dori vositalarini, masalan, aritmiyaga qarshi vositalarni (xinidin, prokainamid, dofetilid, amiodaron, sotalol, sizaprid va terfenadin); antipsixotik dori vositalarini (pimozid); depressiyaga qarshi dori vositalarini (sitalopram) va boshqa dori vositalarini (moksifloksatsin va levofloksatsin) bir vaqtning o‘zida qabul qilish;

- qonning tuz tarkibi buzilishi, ayniqsa kaliy va magniyning kamayishi;

- juda kam uchraydigan yurak qisqarishlari, yurak ritmining buzilishi yoki og‘ir yurak yetishmovchiligi;

- keksa yosh.

Mushaklarning patologik tez charchashi (miasteniya): miasteniya simptomlari kuchayishi va miasteniya sindromi boshlanishi mumkin.

Diabet: Preparatni qandli diabet bilan og‘rigan bemorlarda ehtiyotkorlik bilan qo‘llash zarur, preparat fruktozani irsiy ko‘tara olmaslik, glyukoza-galaktoza malabsorbsiyasi yoki saxaraza-izomaltaza yetishmovchiligi bo‘lgan shaxslarga ko‘rsatilmagan.

Bolalarda mikobakteriyalar (Mycobacterium Avium Complex) guruhi qo‘zg‘atuvchisi keltirib chiqaradigan kasalliklarni profilaktik davolashning xavfsizligi va samaradorligi bo‘yicha ma’lumotlar mavjud emas. Asosan bu kasallik immuniteti juda past bo‘lgan bemorlarda rivojlanadi, profilaktik davolashni tayinlash zaruratini shifokor belgilaydi.

O‘tkazilgan tadqiqotlar traxomani davolashda takroriy qo‘llash zarurligini tasdiqlamaydi.

Jasmed preparati og‘ir kasalliklarni davolashga yaramaydi.

Streptokokkli infeksiyalar: halqum/bodomsimon bez yallig‘lanishini davolash uchun, yiringli streptokokk keltirib chiqaradigan o‘tkir revmatik isitmaning oldini olish uchun penitsillin samaraliroq, garchi Jasmed preparati ham og‘iz-halqumdagi streptokokkli yallig‘lanishda qo‘llanilishi mumkin. O‘tkir revmatik isitmaning oldini olishda azitromitsinning samaradorligi haqida ma’lumotlar yo‘q.

Homiladorlik yoki emizish davrida

Homiladorlik: Homilador ayollar uchun Jasmed preparatining xavfsizligi o‘rganilmagan, bolaning ona qornidagi rivojlanishiga salbiy ta’sir ko‘rsatish ehtimoli istisno qilinmagan, shuning uchun homiladorlikda shifokor ko‘rsatmasisiz preparatni qo‘llash tavsiya etilmaydi.

Emizish: ko‘pgina dori vositalari organizmdan ona suti bilan chiqib ketadi, shuning uchun Jasmedni emizikli onani davolash uchun qo‘llash mumkin emas, chunki emizikli bolada suyuq ich kelishi, shilliq qavatlarning zamburug‘li infeksiyasi, shuningdek, allergiya rivojlanishi mumkin. Jasmed bilan davolash davrida va davolash to‘xtatilgandan keyin yana 2 kun davomida emizishdan voz kechish tavsiya etiladi. So‘ngra emizishni davom ettirish mumkin.

Fertilligi: hayvonlarda homiladorlik chastotasining pasayishi qayd etilgan, odamlarga ta’siri noma’lum.

Preparatning transport vositasini yoki potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Preparatning bosh aylanishi, uyquchanlik kabi nojo‘ya ta’sirlarini hisobga olgan holda, avtotransportni boshqarishda va yuqori diqqatni talab qiladigan ishlarni bajarishda ehtiyot bo‘lish zarur.

Qo‘llash bo‘yicha tavsiyalar

Dozalash tartibi

Tana vazni 45 kg dan ortiq bo‘lgan kattalar, bolalar va o‘smirlar:

Kuniga 500 mg dan 3 kun davomida buyuriladi (kurs dozasi – 1,5 g).

Siydik chiqarish kanali va bachadon bo‘ynining asoratlanmagan yallig‘lanishida, xlamidiya infeksiyasi tufayli, 1 g bir marta buyuriladi (har biri 500 mg dan 2 tabletka).

Preparatga sezgir bo‘lgan so‘zak qo‘zg‘atuvchisi uchun tavsiya etilgan doza 1000 mg yoki 2000 mg Jasmed preparatini 250 mg yoki 500 mg seftriakson bilan birgalikda qabul qilishdir. Agar sizda boshqa antibiotiklarga allergiya bo‘lsa, davolanishni boshlashdan oldin bu haqda shifokorga aytishingiz kerak.

Yuborish usuli va yo‘li

Jasmed preparati, 500 mg li tabletkalar ovqatdan 1 soat oldin yoki 2 soat keyin qabul qilinishi kerak.

Doza oshirib yuborilganda ko‘riladigan choralar

Belgilari: vaqtincha eshitish qobiliyatining yo‘qolishi, kuchli ko‘ngil aynishi, qusish, suyuq ich kelishi.

Davolash: oshqozonni yuvish, faollashtirilgan ko‘mir buyurish va simptomatik terapiya o‘tkazish.

Dori vositasini qo‘llash usulini tushuntirish uchun tibbiyot xodimi bilan maslahatlashish tavsiya etiladi.

Dori vositalarini standart qo‘llashda yuzaga keladigan nojo‘ya ta’sirlarning tavsifi va bunday hollarda ko‘rilishi kerak bo‘lgan choralar

Juda tez-tez:

- suyuq ich kelishi, qorin og‘rig‘i, ko‘ngil aynishi, ichakda gazlarning ko‘payishi.

Tez-tez:

- bosh aylanishi, bosh og‘rig‘i, achishish, sanchish, et uvishishi kabi sezgi buzilishlari

- bo‘g‘imlarda og‘riq, charchoq, eshitish qobiliyatining pasayishi, ko‘rishning buzilishi

- ta’m sezishning buzilishi, qusish, qorinning yuqori qismida og‘riq yoki noqulaylik, ishtahaning butunlay yo‘qolishi

- toshma, teri qichishishi

-limfotsitlar sonining kamayishi, eozinofillar sonining ko‘payishi, qondagi bikarbonat miqdorining pasayishi.

Tez-tez emas:

- kandidoz, og‘iz bo‘shlig‘i kandidozi, qin infeksiyasi

- teri va teri osti to‘qimalarining chuqur qatlamlarida zich, assimetrik, og‘riqsiz shish, yuqori sezuvchanlik

- teri sezuvchanligining pasayishi, asabiylashish, uyquchanlik, uyqusizlik, eshitish qobiliyatining buzilishi, quloqlarda shovqin paydo bo‘lishi

- gastrit, qabziyat

- yurak urishi

- qonda leykotsitlar va neytrofillar sonining kamayishi, eozinofillar sonining ko‘payishi

- jigar yallig‘lanishi

- teri va shilliq qavatlarda toshmalar paydo bo‘ladigan o‘tkir toksik-allergik kasallik (Stivens-Jonson sindromi), terining quyosh nuriga reaksiyasi, tez rivojlanadigan, kuchli qichishadigan, terida kuyishdan paydo bo‘lgan pufakchalarga o‘xshash och pushti rangli pufakchalar (eshakemi)

- ko‘krak qafasidagi og‘riq, shishlar, holsizlik, og‘riqli holat

- qonda aspartataminotransferaza (AST), alaninaminotransferaza (ALT), bilirubin, mochevina, kreatinin miqdorining oshishi, qonda kaliy miqdorining buzilishi.

Kamdan-kam:

- qo‘zg‘alish

- vestibulyar bosh aylanishi

- jigar faoliyatining buzilishi

-yiringli toshma ko‘rinishidagi o‘tkir teri reaksiyasi (odatda dori-darmonlarni qabul qilishda), eozinofillar sonining ko‘payishi va ichki a’zolar tomonidan buzilishlar bilan kechuvchi dori vositasiga allergik reaksiya

Noma’lum:

- hushdan ketish, talvasalar, yuqori psixomotor faollik, hid bilish qobiliyatining yo‘qolishi, ta’mni farqlay olmaslik, hid bilish illyuziyalari, vasvasalar, gallyutsinatsiyalar, mushaklarning patologik tez charchashi (miasteniya gravis), tajovuzkorlik, xavotirlik

- tez, og‘ir allergik reaksiya (ko‘pincha o‘limga olib keladigan)

- ichakning o‘tkir yallig‘lanish kasalligi

- trombotsitlar sonining kamayishi, qon hujayralarining muddatidan oldin parchalanishi natijasida kelib chiqadigan kamqonlik

- yurak urishining xurujsimon tezlashishi, yurak ritmining buzilishi, shu jumladan uning tezlashishi

- qon bosimini pasaytirish

- oshqozon osti bezining yallig‘lanishi, til rangining o‘zgarishi, o‘tkir jigar yetishmovchiligi bilan kechuvchi og‘ir jigar yallig‘lanishi, jigar yetishmovchiligi (kamdan-kam hollarda o‘lim bilan tugaydi), jigar hujayralarining parchalanishi va ommaviy nobud bo‘lishi, jigarda o‘t oqishining qiyinlashuvi tufayli teri va shilliq qavatlarning sarg‘ayishi.

- terining suyuqlikka to‘lgan pufakchalar hosil bo‘lishi bilan kechuvchi og‘ir allergik shikastlanishi (toksik epidermal nekroliz), terining yallig‘lanish reaksiyasi natijasida nishonsimon toshmalar paydo bo‘lishi (ko‘p shaklli eritema)

- elektrokardiogrammada QT oralig‘ining uzayishi

- o‘tkir buyrak yetishmovchiligi, buyrakning yallig‘lanish kasalligi (interstitsial nefrit).

Chiqarilish shakli va qadoqlash

3 ta tabletka PVX/PVDX plyonkasi va alyuminiy bosma folgasidan yasalgan konturli katakli o‘ramga joylashtiriladi.

1 ta konturli o‘ram qozoq va rus tillaridagi tibbiy qo‘llash bo‘yicha yo‘riqnoma bilan birga karton qutiga joylashtiriladi.

Saqlash muddati

Saqlash muddati 3 yil

Yaroqlilik muddati o‘tgandan keyin qo‘llanilmaydi.

Saqlash shartlari

Quruq, yorug‘likdan himoyalangan joyda, 25°C dan yuqori bo‘lmagan haroratda saqlang.

Dorixonalardan berish shartlari

Retsept bo‘yicha

Ishlab chiqaruvchi tafsilotlari

REPLEK FARM Ltd. Skopye, Kozle ko‘chasi 188, 1000 Skopye,

Shimoliy Makedoniya Respublikasi

telefon: +389 2 3081343

elektron pochta: [email protected]

Ro‘yxatdan o‘tkazish guvohnomasi egasi

Belinda Laboratories LLP, Unit 18, 53 Norman Road, Greenwich Centre Business Park, London, Buyuk Britaniya, SE10 9QF.

telefon: +44-203-598-2050

email: [email protected]